"Meeshaan humni injifate hin jiru; injifachuun kan danda'amu mariinidha," -Prof. Masifn Araayaa

Haguuggii Tamsaasa Kallattii

1. 23 Hagayya 2026Tiraamp waraana daldalaa narratti bane jette Kanaadaan

   

   Madda suuraa, Getty Images

   USfi Kanaadaan taarifa daldalaa Tiraamp kaa'e irratti waliigaluu dadhabuun mariin taasisaa turan adda cite.

   Waggoota hedduuf michuu daldalaa cimoofi daldalaa bilisaa kan walitti gurguraafi bitaa turan biyyoonni ollaa kun lamaan amma waraana daldalaatti seenaniiru.

   Ministiirri Muummee Kanaadaa Maark Kaarneey kaleessa halkan marii dhimma daldalaafi taarifaa irratti Tiraamp waliin taasisan adda kutaniiru.

   Sababni maricha adda kutuu ibsaniif ammoo, "US waan heddu gaafatti, garuu waanti namaaf kennitu muraasa" jechuun ibsan.

   Ministiirri Muummee Kanaadaa gaggeessaa addunyaa jalqabaa taarifa Tiraampitti waliigaluu diduun wal-gahii dhiisanii bahaniidha.

   Maark Kaarneey, "Tiraamp waraana daldalaa nurratti baneera" jechuun kan himatan yoo ta'u, Kanaadanis omishaalee US irra taarifa dabalataa akka keessu ibsan.

   Maark Kaarneey, mala Tiraamp taarifa fayyadamuun dhiibbaa uumuu barbaadu diduun dura erga dhaabbatanii booda, taarifa %50 Tiraamp kaa'een dhiibbaa diinagdee lammiilee Kanaadaa mudachuu malu akka dandamataniif amansiisuun hojii manaa isaan eeggatuudha.

   Kanaadaan omishaalee ishee alatti ergitu keessaa %70 UStti ergiti.

2. 23 Hagayya 2026US qoqqobbii haaraa Iraanirra akka keessu beeksisuu hordofee Iraan balaaleffatte

   

   Madda suuraa, Reuters

   US qoqqobbii haaraa Iraanirra kaa'uuf akka jettu beekisuu hordofee Tehraan balaaleffatte.

   Bulchiinsi Tiraamp akka beeksisetti, qoqqobbiin haaraan kun diinagdee Iraan kan caalmatti dadhabsiisufi michuu daldalaa cumtuu Iraan kan taate Chaayinaa irrattillee dhiibbaa kan qabaatu ta'uu ibse gabaasni Rooyitars.

   Waraanni Iraan erga eegalee ji'a jaha ta'us, US ta'ee Iraan lamaansaanituu waliigaltee qabatamaarra gahuu hin dandeenye.

   Iraan Ulaa Hormuuz cufuun dooniwwan boba'aa fe'an akka hin dabarre haleeluu hordofee omishi boba'aa gabaa addunyaaf dhiyaachurratti danqaan mudateera.

   Qoqqobbii haaraa US Iraanirra kaa'uuf jirtu ilaalchisee Ministiirri Faayinaansii US Iskoot Beesent har'a galgala ibsa kennu jedhamee eegama.

   Boba'aa Iraan dhibbeentaa 80 kan bittu Iraan qoqqobbii kanaan akka hin miidhamneef dippilomaasii akka filattu ibsa gabaasi Rooyotars.

   Dubbi himaa Ministiira Dhimma Alaa Iraan kan ta'an, Ismaa'eel Baaghee qoqqobbiin haaraan US kaa'uuf jettu faallaa seera idiladdunyaa ta'uu ibsuun balaaleffatan.

   Qoqqobbiin kun hojiirra kan oolu taanan, Iraan biyyoota ollaa kanneen US gargaaran irratti akka xiyyeeffattu akeekkachiiste.

   Barreessaa Mana Maree Nageenya Biyyaalessaa Iraan kan ta'an Mohseen Reezayi biyyoonni Baha Giddu Galaa waraana diinagdee US kanatti akka hin makamne akeekkachiisan.

   "Biyyoota naannoo [keenyaa] waraana diinagdee US bante kanatti akka hin makamne itti himaa jirra, ta'uu baannan akka diinatti isaan ilaalla," jedhan qondaalli olaanan Iraan kun.

3. 23 Hagayya 2026Haakeroonni Iraan buufata aannisaa UK cufan

   

   Madda suuraa, Getty Images

   Ji’a darbe Telegiraaf akka gabaasetti haakeroonni Iraan buufata aannisaa UK xiqqaa tokko irra haleellaa saayiberii geessisaniiru.

   Nageenya biyyaalessaaf jecha mootummaanis tahe Gidduugalli Nageenya Saayiberii UK waa’ee haleellichaa ibsa hin kennine.

   Garuu haleellichi buufata aannisaa isa guddaa biyyattii irratti miti. Buufanni aannisaa haleellaan irra gahe garuu guyyoota afuriif cufamee ture. Mootummaan madden aannisaa kanaaf eegumsa guddaa gochuun qormaata itti taheera.

   Bulchiinsa sirna saayiberii haaraa diriirsuu fi madda aannisaa qormaata dandamatu diriirsuu irratti akka hojjetu mootummaan ibseera.

4. 22 Hagayya 2026"Cabinsa seenaa qawween osoo hin taane mariin furuuf boqonnaa haaraa saaqneerra" Hiruut G/Sillaasee

   

   Madda suuraa, FBC

   Komishinariin itti-aantuu Komishinii Marii Biyyaalessaa Hiruut Gabresillaasee, adeemsi marichaa "seenaa siyaasaa fi hawaasummaa biyyattii keessatti boqonnaa haaraa kan banedha," jette.

   ""Cabinsa seenaa qawween osoo hin taane mariin furuuf boqonnaa haaraa saaqneerra" jechuun dubbatte Hiruut G/Sillaasee.

   "Wal dhibdeen waggoota dheeraaf nu mudatan humnaa fi wal dhiibuun osoo hin taane marii fi wal dhaggeeffachuun furuu akka danda'amu qabatamaan kan itti mirkanaa'e aadaa siyaasaa haadhaadha," jechuun gahee adeemsi marichaa gara fuula duraatti qabaatu ibsiteetti.

   Komishinarri itti-aantuu kun marichaan "sagaleen kutaa hawaasa hundaa osoo hin moggeeffamiin akka kabajamu' hojjetameera jechuun ibsite.

   Korri kun, "waltajjii guutuu Itoophiyaa isa dhugaa" akka ta'u godhameera.

   "Yaadawwan furmaataa maricharratti ka'an Itoophiyaa boruutiif kan bu'uura kaa'anidha," jechuun ibsite

   Mariin kun salphaa akka hin turre kan kaaste Hiruut, garaagarummaan ilaalchaa jiraatullee, "milkaa'inni keenya yaada tokkorratti waliigaluu osoo hin taane garaagarummaa yaadaan wal dhageeffachuun fala barbaaduudha," jette.

   Yaadawwan furmaataa dhiyaatanis mootummaa fi qaamolee isaan ilaallatuun hojiitti hiikamu jechuun amantaa qabdus dubbatteetti.

   "Dhimmi irratti garaagarummaa qabaannu jiraatullee, biyya waliin qabna," jechuun ibsite.

   "Daandii wal dhaggeeffachuu jalqabne kana itti fufsiisuu barbaachisa," jette.

5. 22 Hagayya 2026"Meeshaan humni injifate hin jiru; injifachuun kan danda'amu mariinidha," -Prof. Masifn Araayaa

   

   Madda suuraa, FBC

   Sirni cufiinsa Mnarii Biyyaalessaa Itoophiyaa Hagayya 22, 2026 yeroo gaggeeffamaa jirutti, Komishinariin Olaanaa Piroofeesar Masifin Araayaa "wal mariyannaan, waliin dubbannaan, wal dhaggeeffannaan, bu'a qabeessa akka taanu kan itti arginedha," jechuun ibse.

   Namoonni kuma afur ta'an " guyyoota kana hunda as turuu" kan jedhu gaaffiin ka'ullee marii kana xumuruun danda'uu eeruun, ajandaawwan maricharratti ka'an naannolee fi bulchiinsawwan magaala alamaan keessatti marii taasifamaniif ka'umsa akka ta'an ibseera.

   Adeemsi marichaa, "kun gaaffii lagaa miti... kun gaaffii walooti," miira jedhu keessatti akka gaggeeffame ta'uu kan dubbate Prof. Masfin "humni meeshaan mo'ate hin jiru. Ijnjifachuun kan danda'amu mariinidha,: jechuun dubbate.

   Odeeffannoo dabalataa biroo:

   Guyyoota dhumaa lamaan Marii Biyyaalessaarratti wanti mudate maali?

   Finfinneen magaalaa guddoo Oromiyaa jedhamtee beekamtii Heera Mootummaa akka argattu yaadni murtoo dhiyaate

6. 22 Hagayya 2026Pirezidant Tiraamp Hormuuz "daangaa bulchiinsa Ameerikaadha" jedhe

   

   Madda suuraa, Reuters

   Pirezidantiin Ameerikaa Doonaald Tiraamp kan bakki dhimma ijoo waraana Iraan ta'e, Ulaan Hormuuz "daangaa bulchiinsa Ameerikaadha" jedhe. "Ani yeroo ammaa Ulaa Hormuuz akka daangaa bulchiinsa Ameerikaattin ilaala," jechuun ummata Kaarolaayinaa Kibbaatti duula filannnoof walitti qabamanitti dubbate. "Qaama bulchiinsa Ameerikaati," jechuun deeggartootatti dubbate.

   Boba'aan addunyaa dhibbentaa 20 ta'e kan keessa darbu Ulaan Hormuuz toora galanaan murteessaa iraan fi Omaan gidduutti argamudha. Guraandhala Ameerikaa fi Israa'eliin waraanni kan irratti baname Iraan, tarkaanfii deebii kennuu fudhatte keessaa tokko ulaa galaanaa baayyee murteessaa ta'e kana cufuudha.

   Sababa kanarraa kan ka'een gabaa boba'aa (annisaa) addunyaa irratti rakkoon uumameera.

   Gatiin boba'aas baayyee akka dabalu taasiseera.

   Tiraamp haasaa isaa kaleessaatiin, "Rippabilika Islaamaa iraan waliin akkuma xumurreen gatiin boba'aa bakka dhiyeenya kana irra turee kan gadi bu'u ta'a," jedheera.

   Dabalataan Tiraamp biyyi isaa Iraan meeshaa waraanaa nukilaraa akka hin hidhanne taasisuushee ibseera. "Iraan meeshaa waraanaa nukilaraa akka hidhattu hayyamuu hin dandeenyu. [Meeshaa kana hidhannaan garuu] waan baayyee badaa ta'e argiti. Kanaafidha kan deemnee dhaabsisfneef," jechuun dubbate.

   Humna meeshaa waraanaa nukilaraa hojjechuu qabdi jedhamuun kan himatamtu Iraan, sagantaa nukilaraa ishee kaayyoo misoomaaf akka gargaaramtu irra deddeebiin ibsiteetti.

   Pirezidant kana kan dubbate muddamni biyyoota lamaan gidduutti deebiyee yeroo ka'aa jiruttidha. Bulchiisni Tiraamp qoqqobbiin dinagdee kan dinagdee Iraan "burkuteessuu" fi "kan diigu" akka itti fufu beeksiseera.

   Tiraamp turtii Jimaata gaazexeessitoota waliin taasiseen, ameerikaan gara dhiibbaa dinagdee Iraanirratti uumuutti caalsiftulleen, duulli waraanaa Teehiraan irratti fudhatamus ammallee filannoo ta'uu dubbateera.

   Itti dabaluun Iraan, "waliigaltee taasisuu baayyistee barbaaddi, haata'u malee akka amantaa kootti waliigaltee isa sirrii gochuuf hin qophoofne," jedheera.

   "Maallaqa hin qaban, humna galaanaa hin qaban. Loltoota isaaniif, miseensota poolisii isaaniif miindaa kaffalaa hin jiran. Qaala'insi jireenya %350 keessa jiru. Kanaaf, waan ta'uuf jiru kan ilaallu ta'a," jedhe Tiraamp.

   Iraan gamasheetiin tarkaanfii Ameerikaan irratti fudhattuuf deebiin kennitu "kan barbadeessu" akka ta'e akeekkachiifteetti.

7. 21 Hagayya 2026Yaadannoowwan Mahaatama Gaandiin ofii barreesse dolaara mil 1.9tti gurguraman

   

   Madda suuraa, Saffronart

   Yaadannoowwan Mahaatama Gaandiin ofii barreesse dolaara mil 1.9tti gurguraman.

   Hogganaan qabsoo bilisummaa uummata Hindii Mahaatama Gaandiin yaadannoon harkaan barreesse Hindii magaalaa Mombaay keessatti dolaara mil. 1.9tti gurguraman.

   Yaadannoowwan Gaandii kunneen harka maatii isaa Anaand Tii Hingoraaniikan turan yoo ta'u, baroota 1944 fi 1946 gidduu barreeffaman.

   Dhugaa, jeequmsarra of eeguu fi of to'achuu yaadawwan jedhaman yaadannoo kana keessatti hammatamanii jiru.

   Hangi maallaqaa yaadannoowwan kanneen bituuf dhiyaate, sanada seena qabeessa Hindiitiif gatii olaanaa kaffalame ta'uu caalbaasii kana kan qopheesse dhaabbanni Saafroon Aart jedhamu beeksise.

   Waldhaansoo Hindii gita bittaa koloneeffattoota Ingliizii jalaa baasuu kan hoggane Gaandiin abbaa qabsoo karaa nagaa jedhamee beekama.

   Yaadannoon isaa miilanaa kun garuu siyaasaan gamatti Maahatamaan dhuunfaan nama akkamii akka ture baruuf kan karaa saaqani.

   Gaandiin haadha warraa isaa Viidiyaa du'aan kan dhabe Hiingoraaniif xalayaa barreesse gaddaa fi jajjabina barreessefii ture. Ergaawwan kunneen boodarra ‘A Thought for the Day’ mata duree jedhuun kitaaba barreeffame keessatti hammatameera.

   Hundeessitoota Saafroon Aart keessaa tokko kan ta'e Daaniish Vaaziraanii yaadannoowwan kunneen Maahatama Gaandiin dhiyeenyattii fi dhuunfaan nama akkamii akka ture hubachuuf kan dandeessisani jedhe.

   Caalbaasii dhiyaaterratti xalayaawwan, dokimantoonni harkaan barreeffaman, suuraaleen fi meeshaaleen dhuunfaa jiru.

   Meeshaaleen waggoota kurnan lamaa oliif walitti qabamaa turan kunneen yeroowwan murteessoo qabsoo walabummaa Hindii fi michummaa Gaandii fi Hiingoraanii agarsiisu.

8. 21 Hagayya 2026FBI dubartii Niwyoorkitti Capitol Hills boombiin haleeluuf jette jedhu to'ate

   

   Madda suuraa, DOJ/FBI

   Biiroon Tikaa Federaalaa US (FBI) Dubartii Niwyoorki Albaniitti kan argamu gamoo Capitol Hills boombiin haleeluun seera baastota ajjeesuuf karoorsitee turte jedhu to'ate.

   Abbaan alangaa dubartii ganna 35 Jessica Bowie, 35, hidhata garee IS waliin qabdi jechuun himate.

   Dubartiin tun garee shororkeessaa kanaaf deeggarsa meeshaalee fi qabeenyaa dhiyeessaa akka turte himata isaatiin eere.

   Boowii dursitee "irra deddeebii gamoo kana qorachaa turuu" fi qawwee sobaa fi qawwee hin hojjenne kan caasaan ishee harka lafa jalaatiin kenneef qabachuu abbaan alangaa beeksise.

   "Hamman danda'etti gamoo kana gara caalu barbadeessee senaataroota ajjeesuun barbaada, " jettee caasaa isheetti himuu ragaan isheerratti dhiyaate ni mul'isa.

   Himata isheerratti baname ofirraa haa ittisuuf fi dhiisuu karoora qabaachuu ishee wanti beekamu hin jiru.

   Boowiin karoora ishee kana qaamolee FBI'tti himuu fi torbaanotaaf akka miseensa IS'tti of waamuun waliin dabarsuu isheetu himame.

   Waajjira mootummaa Niwyoork Albanii jiru kan filatteef masaraa Waayit Haawus caalaa waan salphatuuf ta'uu abbaan alangaa hime.

   "Sirna Ameerikaarratti dhiibbaa gochuun barbaada," jette FBI faana yoo dubbattu.

   Abbaan alangaa haala mijataa haleellaaf tolu qorachuuf gamoo kanatti yeroo shanii ol deddeebi'uushee eere.

9. 21 Hagayya 2026'Yoo barbaachise Iraan si'a dhibba haleeluu nan danda'a - Tiraamp

   

   Madda suuraa, Getty Images

   Iraan nukilarii akka hin hidhanneef yoo barbaachisaa ta’ee argame, si'a dhibba haleeluu nan danda'a jedhe Donaald Tiraamp.

   Gaaffii fi deebii miidiyaa WBBC77 waliin tolcheen Tiraamp, osoo inni tarkaanfii waraanaa fudhachuu baatee Israa’elii fi Bahi Jiddugaleessaa har’a lafarra hin jiran.

   Gaaffii fi deebii kanaan buufataalee nukilaraa Iraanirratti haleellaan akka raawwatamu kan inni ajaje Iraan nukilarii hidhachuuf torbeenm lafa yeroo torbeen lama ishee hafutti.

   Waan miidiyaarra deemaa jiruun faallaa, US Ulaa Hormuz to’achuus hime Tiraamp.

   Dandeettiin misaayelaa fi diroonii Iraan akka malee laamshayuu fi diinagdeen isaanii kufaatii jaka gahuus dubbate.

   Waliigalteen nukilaraa 2015 JCPOA jedhamu balaafamaa fi isa keessaa bahuun Iraan nukilarii akka hin hidhanne hanqisuu dha jedhe.

   Iraan “wanbadee Baha Jiddugaleessaati” jedhe. Akkuma beeknu Iraan Qaataar, Baahreen, Kuweetii fi biyya ishee deggarte UAE haleelte.

   Osoo US tarkaanfii waraanaa fudhachuu baattee Iraan biyyoota kanneen balleessiti, ni qophoooftiif jedhe.

10. 21 Hagayya 2026Kaaba lixa Naayijeeriyaatti bidiruun garagaluun hedduun dhuman

    

    Madda suuraa, Reuters

    Kaaba lixa Naayijeeriyaa kutaa bulchiinsa Sookotootti bidiruun garalgaluun yoo xiqqaate namoonni 46 dhuman.

    Bidiruun tun nama 70 baattee akka turte tilmaamama, baay'een daa'imman ta'uufi barbaachi reeffa namoota dhumanii itti fufuu aangawoonni himan.

    Dubbii himaan poolisii Ahmad Rufaayi BBC'tti akka himanitti Kamisa reeffi namoota 46 naannawa Goronii keessatti bakka Goraawu jedhamutti argame. Kanneen 16 ta'an immoo nagaan baraaramaniiru. Ammallee namoonni 15 achi buuteen isaanii hin beekamu.

    Naannichi barbaachaf bakka tolu miti, qaamoleen nageenyaa fi tajaajila baraarsaa garas imaluu isaanii Rufaayi himan.

    Namni ijaan arge tokko Rooytarsitti akka himetti daa'immanii fi hojjettoonni humnaa qonnaan bultoota waliin ta'uun oomisha ruuzii sassaabuuf imalaa turuu amana.

    Kanneen ijaan argan reeffa namoota 50 arguu himu. Reeffi isaanii kanneen argame awwaalchaan dura afataa fi uffata aadaatiin maramee masjiida dura kaayameera.

    Dubbii himaan waajjira ittisa balaa tasaa Naayijeeriyaa Izqeel Manzoo "Goraawu iddoo baay'ee fagoo dha" jedhe. Gareen baraarsaa garas socho'uu ibse.

    Balaan bidiruu akkasii Naayijeeriyaa keessatti baramaadha. Bidiruuwwan humnaa ol fe'u, moofaa dha, seerotaa fi qajeelfama balaa tasaahin qaban jedhamuun qeeqamu.

    Ji'a darbe sababa kanaan namoonni shan kutaa blchiinsa Jigaawaa keessatti dhumanii jiru.

11. 21 Hagayya 2026US qoqqobbii 'seenaa keessatt mul'atee hin beekne' Iraanirra kaawuf dhaadatte

    

    Madda suuraa, Getty Images

    Ministirri Maallaqaa US Iskoot Beesent US qoqqobbii "hamaa seenaa keessatti argitee hin beekne" Iraan irra kaawuf akka jiran beeksisan.

    Tarkaanfiin kun US tarkaanfii oppireeshinii waraanaa laaffisuuf akka jirtu kan akeeke jedhameera.

    Dubbiin Beesent kun kan dhagahame Kamisa yoo ta'u dhaadannoo Tiraamp "waraana diinagdee" fi akeekkachiisa "biyya Iraan deeggartu kamiyyuu" dhiibbaa diinagdeetu ishee eeggata jedhu durseeti.

    Beesent torbee darbe bal'ina qoqqobbii kanaa ibsuufis waadaa galanii turan.

    US waraana ji'oota jahaa dhaabuuf qoqqobbii diinagdeetiif dhaadachuu isheetiin kanaaf gatiin boba'aa Kamisa mul'ate torban sadii sadarkaa mul'atee hin beekne ta'e. Boba'aa barmeela miliyoona hedduu Baha Jiddugaleessaatii hiriira galee jira.

    "Boba'aan maaliif akka dabale ani hin beeku" jedhan Beesent CNBC irratti. "Dhiibbaa diinagdee olaanaa yoo goone, carraan waraanairra deebiin hin eegaluu gad aanaa dha jechuu dha" jedhan.

    Waraana kanaan kumaatamatu ajjeefame. Sababa Iraan Ulaa Hormuuz cufteef gabaa biyyoota Galoogalaanaa ni danqame. Ulaan Hormuuz boba'aa addunyaa 20% ceesisa.

    US fi Iraan si'a lama waraana dhaabuuf waliigaluu beeksisan. Baatiiwwan Eblaa fi Adoolessa keessa Ulaa Hormuuz bananii waraanatti xumura gochuufis beeksisan. Garuu lamaanuu osoo hin bubbulle waraanatti deebi'an.

12. 21 Hagayya 2026Qubsuma Israa'el West Baank keessatti taasisftu UK, Faransaay, Jarmanii, Xaaliyaaniifi Kanaadaan morman

    

    Madda suuraa, AFP via Getty Image

    Karoora Israa'el manneen qubsumaa 1,200 WEst Baank kan humnaan qabatte keessa bakka baayyee barbaachisaa ta'etti ijaaruuf caalbaasii ifa goote biyyoota gurguddoo Lixaarraa mormii haaraa kaase.

    Ibsa waloo baasaniin UK, Faransaay, Jarmanii, Xaaliyaanii fi Kanaadaan murtee Israa'el kana "kan fudhatama hin qabnedha" jechuun Israa'el akka "karoorashee kana hatattamaan kaastuuf" cimsanii gaafataniiru.

    Seera idil-addunyaa jalatti qubsumni hunduu seeraan ala ta'ee osoo jiruu, akkasumas dhiibbaan idil-addunyaa osoo taasifamaatti jiruu Israa'el waggoota baayyeetiif karoora Yerusaalem bahaa E1 keessatti karoora kanatti cichitee jirti.

    Michoonnishee baayyeeniifi Filisxeemonni yaada furmaataa biyya-lamee jedhamuuf gufuu akka ta'u yaaddoo qaban ibsuun, West Baank bakka lamatti baasuun Yerusaalem bahaa addaan qooda jedhu.

    Israa'el projektii manneenii iddoo falmisiisaa Weesti Baankitti ijaartuf caalbaasii ifa goote

13. 21 Hagayya 2026ASHAMAA

    Toora oduu kallattiin isin biraan geenyu kunoo jakqabneerra.

    • Qubsuma Israa'el West Baank keessatti taasisftu UK, Faransaay, Jarmanii, Xaaliyaaniifi Kanaadaan morman
    • Tiraamp biyya Iraaniin deeggaru kamirrattiyyu tarkaanfii "rakkoo dinagdee" uumu akka fudhatu dhaadate
    • Waa'ee haleellaa diroonii Maqaleetti raawwatame jedhamee maal beekna?
    • Piriimer Liigii Ingiliiz 2026-27: Hireen kilaba isin deeggartanii maal ta'a?

    • Kophee Warqee mo'achuurratti morkattoota Haalaand baranaa

    Kanneen jedhaniifi kaan qabanneerra.

    Oduu keenya karaa Instagram, Marsariitii, YouTube, WhatsApp, Facebook fi TikTok keenyaa argachuu dandeessu.

    DHIYAADHAA!