Moja kwa moja, Mmoja wa viongozi wakuu wa ISIS auawa na majeshi ya Marekani na Nigeria

Moja kwa moja

Na Beldeen Waliaula

1. Dakika 58 zilizopitaIsrael yatangaza wimbi jipya la mashambulizi dhidi ya Hezbollah

   Jeshi la Israel limesema limeanzisha wimbi jipya la mashambulizi ya anga dhidi ya maeneo walioko wapiganaji wa Hezbollah kusini mwa Lebanon.

   Jeshi la Israel awali lilitoa ilani ya kuwahamisha wakazi wa maeneo ya kusini mwa Lebanon.

   Mashambulizi hayo mapya yamejiri siku moja tu baada ya wawakilishi wa Israel na Lebanon kukutana mjini Washington na kukubaliana kuongeza muda wa usitishaji mapigano kwa siku 45.

   Awali, maafisa wa Lebanon waliishutumu Israel kwa kulenga vituo vya matibabu na wahudumu wa afya

   Wizara ya Afya ya Lebanon ilitangaza kuwa Israel ilishambulia kituo cha kutoa msaada na kuwaua watu sita, wakiwemo wahudumu watatu wa afya.

   Israel imekanusha kuwalenga wanaotoa misaada na vituo vya afya.

   Pia unaweza kusoma:

   Nchi gani za kiarabu zina uhusiano wa karibu na Israel?

   Je, kuna hatari ya Israel kuishambulia Uturuki?

2. Saa 2 zilizopitaBei ya nauli yapanda maradufu nchini Kenya

   Wahudumu wa magari ya uchukuzi maarufu matatu, nchini Kenya, wametangaza mgomo wa kitaifa utakaoanza siku ya Jumatatu, wakilalamikia ongezeko la bei ya mafuta.

   Wahudumu hao pia wameongeza bei ya nauli kwa 50%

   Chama cha Wamiliki wa Matatu kimesema sekta hiyo imeathirika pakubwa na gharama za juu za mafuta, na kuonya kuwa watasitisha shughuli za uchukuzi iwapo serikali ya Kenya haitaangazia malalamiko yao.

   Ongezeko la nauli kwa 50% ilianzwa kutekelezwa mara moja hapo jana, huku wakenya wengi wakilalamikia gharama ya juu ya usafiri.

   Nyongeza ya nauli imejiri siku mbili tu baada ya Mamlaka ya udhibiti wa nishati nchini Kenya EPRA kuongeza bei ya mafuta.

   Mjini Nairobi, bei ya petroli kwa sasa ni Sh214.25 (dola 1.65) na dizeli Sh242.92 (dola 1.88)

   Pia unaweza kusoma:

   Injili Klabuni: Mtindo mpya wa kuwavuta vijana katika injili

   Ufaransa inataka nini kipya Afrika?

3. Saa 3 zilizopitaKiongozi mmoja wa kundi la ISIS auawa nchini Nigeria

   Rais wa Marekani Donald Trump ametangaza kuwa majeshi ya Marekani na Nigeria yamemuua kiongozi wa pili kwa cheo katika kundi la kigaidi la Islamic State (ISIS) katika operesheni ya pamoja.

   Katika ujumbe aliochapisha kwenye mtandao wa Truth Social, Trump alisema kuwa “Abu Bilal al-Minouki hataweza tena kuwadhuru watu wa Afrika wala kupanga mashambulizi dhidi ya Wamarekani.”

   Aliongezea kuwa Al-Minouki alikuwa “mtu hatari zaidi duniani”

   Al-Minouki alikuwa amewekewa vikwazo na Marekani mwaka wa 2023 kutokana na uhusiano wake na kundi la Islamic State.

   Pia unaweza kusoma:

   https://www.bbc.com/swahili/articles/c74387dzjx0o

   Jinsi droni za kawaida tu zinavyowapa Islamic State nguvu mpya Afrika Magharibi

4. Saa 3 zilizopita"Hatutavumulia tena vita ambavyo havituhusu" - Lebanon

   Waziri Mkuu wa Lebanon Nawaf Salam amesema kuwa nchi yake haiwezi tena kuvumilia “vita vya kiholela” vinavyopiganwa kwa maslahi ya watu wengine, na ametoa wito kwa jumuiya ya Kiarabu na kimataifa kuiunga mkono Lebanon katika mazungumzo yake na Israel.

   Kiongozi huyo ameitoa kauli hiyo muda mfupi baada ya kumalizika kwa duru ya hivi karibuni ya mazungumzo na kuongezwa kwa muda wa usitishaji mapigano kwa siku 45.

   Akiishtumu Hezbollah kwa kujiingiza katika vita vya eneo hilo la Mashariki ya Kati, kwa kuinga mkono Iran, Waziri huyo mkuu alisema “Lebanon imekumbwa na matukio haya ya kiholela na imetosha” na kusisitiza kuwa jeshi la Lebanon ndiyo pekee kikosi cha usalama nchini humo.

   Pia unaweza kusoma:

   Kusitishwa mapigano Iran, Lebanon kutakavyosukuma mazungumzo ya Marekani na Iran

   Tunachokijua kuhusu kusitishwa kwa mapigano kati ya Israel na Lebanon

5. Saa 4 zilizopitaTrump: kusitishwa kwa mpango wa nyuklia wa Iran kwa muda wa miaka 20 kunatosha

   Rais wa Marekani Donald Trump amesema atakubali pendekezo la Iran kusitisha mpango wake wa nyuklia kwa muda wa miaka 20.

   Hii inaonekana kama kubadilisha msimamo wake wa awali wa kutaka Iran isitishe kabisa mpango wake wa nyuklia.

   Trump alisisitiza kuwa lazima iwe “miaka 20 ya kweli.” Awali alikuwa akitaka Iran isitishe kabisa urutubishaji wa uranium—hatua muhimu katika kutengeneza silaha za nyuklia.

   Rais huyo aliongezea kuwa uvumilivu wake kwa Iran unaisha, huku kukiwa hakuna dalili za mafanikio katika mazungumzo yanayoendelea.

   Vikosi vya Israel na Marekani vilianza mashambulizi ya anga dhidi ya Iran tarehe 28 mwezi Februari.

   Bado usitishaji mapigano uliopo tangu mwezi uliopita unaendelea kutekelezwa ili kutoa nafasi ya mazungumzo kufanyika.

   Pia unaweza kusoma:

   'Ni Trump pekee, sio Congress, anayeweza kumaliza vita vya Iran' - Wall Street Journal

   Iran na Marekani kwenye vita yenye washindi wawili

6. Saa 4 zilizopitaTrump aionya Taiwan dhidi ya kutangaza uhuru wake

   Rais wa Marekani Donald Trump ametoa onyo kwa Taiwan dhidi ya kutangaza rasmi uhuru wake kutoka China.

   “Nisingependa kuona mtu akijitangazia uhuru,” alisema rais huyo wa Marekani katika mahojiano na Fox News hapo jana, baada ya kukamilisha mkutano wake wa siku mbili na Rais wa China Xi Jinping mjini Beijing.

   Rais wa Taiwan Lai Ching-te awali alisema kuwa Taiwan haihitaji kutangaza uhuru wake kutoka China kwa sababu tayari inajiona kama taifa huru.

   Marekani kwa muda mrefu imekuwa ikiiunga mkono Taiwan, ikiwa ni pamoja na kuipa silaha za kujilinda, lakini mara nyingi haijakuwa ikipaza sauti kuhusu uhusiano huo ili kudumisha uhusiano wa kidiplomasia na China.

   Msimamo wa Washington kwa muda mrefu ni kwamba haiungi mkono uhuru wa Taiwan, huku uhusiano wa Washington na Beijing ukitegemea pakubwa kukubali kuwa kuna serikali moja tu ya China.

   Pia unaweza kusoma:

   Jinsi Taiwan inavyojiandaa na mashambulizi ya China

   Yaelewe mazoezi ya kijeshi ya Taiwan ya kujilinda dhidi ya China

7. Saa 4 zilizopitaIdadi ya vifo kutokana na ugonjwa wa Ebola vyaongezeka nchini DRC

   Kituo cha Afrika cha kuzuia na kudhibiti magonjwa (Africa CDC) limetangaza mlipuko wa ugonjwa wa Ebola katika wilaya ya Ituri, mashariki mwa Jamhuri ya Kidemokrasia ya Congo.

   Takriban visa 246 na vifo 80 vimeripotiwa, hasa katika miji ya uchimbaji dhahabu ya Mongwalu na Rwampara, kulingana na taarifa za kituo hicho.

   Mamlaka nchini Uganda pia wamethibitisha kisa kimoja cha Ebola kilichoingia nchini humo kutoka DR Congo siku ya Ijumaa, huku wizara ya afya ya nchi hiyo ikisema kuwa mwanaume mwenye umri wa miaka mwenye umri wa miaka 59 aliyefariki siku ya Alhamisi alipatikana na virusi vya Ebola.

   Hakuna tiba iliyothibitishwa kutibu ugonjwa wa Ebola. Kulingana na shirika la afya duniani (WHO) 50% ya watu ambao hupatikana na ugonjwa huu hufariki.

   Pia unaweza kusoma:

   Kwanini waliopona Ebola wanaambiwa waepuke kujamiiana kabla ya siku 90?

8. Saa 4 zilizopitaIsrael na Lebanon zakubaliana kuongeza muda wa usitishaji mapigano kwa siku 45.

   Lebanon imekaribisha makubaliano na Israel ya kuongeza muda wa usitishaji mapigano kwa siku 45, ambao ulikuwa unatarajiwa kumalizika siku ya Jumapili,baada ya mazungumzo yaliyofanyika Marekani mwezi Aprili.

   Hata hivyo, vikosi vya Israel vilishambulia miji na vijiji vya kusini mwa Lebanon, na kuua angalau watu 12 siku ya Ijumaa, wakiwemo wahudumu watatu wa afya.

   Msemaji wa wizara ya mambo ya kigeni wa Marekani, Tommy Pigott, alisema kuwa “Tunatumai mazungumzo haya yatachangia katika kupatikana kwa amani ya kudumu kati ya nchi hizo mbili, kutambuliwa kikamilifu kwa mamlaka na mipaka ya kila upande, pamoja na kuimarishwa kwa usalama katika mpaka wa mataifa hayo.”

   Pia unaweza kusoma:

   Nchi gani za kiarabu zina uhusiano wa karibu na Israel?

9. Saa 4 zilizopita

   Hamjambo, na karibu katika matangazo yetu ya moja kwa moja leo siku ya Jumamosi