TOOS , Trump: Wada-hadallada Iran si wanaagsan ayay u socdaan, balse lama aamini karo

Tebin toos ah

Trump: Wada-hadallada Iran si wanaagsan ayay u socdaan, balse lama aamini karo.

1. 2 Saacadood ka horReuters: Wadahadallada wafdiga Iran iyo dhexdhexaadiyeyaasha Qatar ee Doha oo weli socda

   Wakaaladda wararka ee Reuters ayaa, iyadoo soo xiganaysa mas’uul xog-ogaal ah, sheegtay in wadahadallada u dhexeeya wafdiga Iran iyo dhexdhexaadiyeyaasha Qatar ee magaalada Doha ay weli socdaan.

   Kadib wadahadallo xooggan oo ay Jimcihii Tehran kula yeesheen dhexdhexaadiyeyaasha Qatar, ergada Iran ayaa shalay u safray Doha si ay u sii ambaqaadaan wadaxaajoodyada. Wararka hadda soo baxaya ayaa sheegaya inay weli ku sugan yihiin caasimadda Qatar, halkaas oo ay wadahadalladu ka socdaan.

   Kadib markii ay soo baxeen warar sheegaya in wafdi Mareykan ah uu ku wajahan yahay Doha si uu wadahadallada ugu biiro, wasiirka arrimaha dibadda Iran ayaa shalay carrabka ku adkeeyay in Tehran aysan xilligan qorsheyneyn inay Mareykanka la gasho wadahadal.

   Cabbas Caraqji, ayaa sheegay in Iran ay go’aan ka gaari doonto wadahadal toos ah ama dadban oo ay la yeelato Mareykanka kaddib marka la buuxiyo shuruudaheeda.

   Wadahadalladan ayaa dhacaya xilli ay sii kordhayaan xiisadaha u dhexeeya Tehran iyo Washington, iyadoo ay soo dhow yihiin doorashooyinka dhexe ee Mareykanka, isla markaana ay kordhayaan walaacyada laga qabo suurtagalnimada dagaal cusub.

   Dhanka kale, wakaaladda wararka ee dowladda Qatar ayaa maanta sheegtay in markab Qatar leedahay oo siday gaaska dabiiciga ah ee dareeraha laga dhigay (LNG) ay la kulmay jimcihii weerar aan la aqoonsan, xilli uu marayay Gacanka Faaris.

2. 3 Saacadood ka horMadaxweyne Cirro oo warqadaha aqoonsiga ka guddoomay danjiraha Israa’iil u soo magacowday Somaliland

   

   Xigashada Sawirka, Madaxtooyada JSL

   MadaxweynahaJamhuuriyadda Iskeed Madaxbannaanida ugu dhawaaqday ee Somaliland, Cabdiraxmaan Maxamed Cabdillaahi (Cirro), ayaa maanta warqadaha aqoonsiga kaga guddoomay danjiraha Israa’iil u soo magacowday Somaliland, Michael Lotem.

   Lotem, ayaa bartamihii bishii April ee sanadkan Israa’iil u soo magacawday safiirkeedi ugu horreeyay ee Somaliland, sida ay xilligaas sheegtay wakaaladda wararka ee Anadolu.

   Qoraal la soo dhigay barta Facebook ee madaxtooyadda Somaliland ayaa lagu tilmamay “Tallaabadan ayaa ah mid astaan u ah xoojinta xiriirka diblomaasiyadeed iyo hirgelinta iskaashiga istaraatiijiga ah ee u dhexeeya labada dal iyo labada shacab.”

   Waxaa intaas la sii raaaciyey in “Madaxweynuhu uu carrabka ku adkeeyey sida ay Somaliland uga go’an tahay dhismaha xidhiidh ku salaysan is-ixtiraam, dano-wadaag iyo iskaashi waara, kaas oo horseeda horumar la taaban karo, gaar ahaan dhinacyada siyaasadda, kaabeyaasha dhaqaalaha, ganacsiga, maalgashiga, amniga iyo tiknoolajiyadda.” ayaa lagu yiri qoraalka.

   Michael Lotem ayaa loo magacaabay safiir ma-degane ah oo qaabilsan Somaliland, sida lagu sheegay qoraal horrey uga soo baxay wasaaradda arrimaha dibadda Israa'iil.

   Dowladda Federalka ee Soomaaliya ayaa horrey si adag ugu hortimi tallaabada Israa'iil ay Somaliland ugu magacowday danjire.

   "Jamhuuriyadda Federaalka Soomaaliya waxay si adag u cambaaraynaysaa dhawaaqii ugu dambeeyay ee ka soo yeeray Wasaaradda Arrimaha Dibadda Israa'iil ee ku saabsan magacaabista wakiil diblomaasiyadeed oo loo diraayo gobolka waqooyi ee Soomaaliya, Somaliland" ayaa lagu yiri qoraal horrey uga soo baxay wasaaradda arrimaha dibadda ee Soomaaliya.

   Sheekooyinka kale ee aad sii akhrin karto:

   "Helitaanka qaab jireedkan wuxuu u baahan yahay dadaal ka badan kan ragga" –Haweenka Itoobiya ee ku tartama dhisida murqaha

   Kiisaskee Dimuqraadiyiintu baari doonaan haddii ay helaan aqlabiyadda Koongareeska

3. 3 Saacadood ka horIran oo sheegtay in ay liiska argagixisada ku dartay ciidamada badda iyo kuwa cirka ee Ingiriiska

   Wasaaradda Arrimaha Dibadda ee Jamhuuriyadda Islaamiga ah ee Iiraan ayaa bayaan ay soo saartay ku sheegtay in Hay’adda Sirdoonka Dibadda ee Ingiriiska (MI6) lagu daray liiska kooxaha "cadowga ah".

   Sida lagu sheegay bayaanka, go’aankan waxaa lagu qaatay qaraar ka soo baxay Golaha Sare ee Amniga Qaranka, wuxuuna jawaab u yahay tallaabooyinka ay qaaday dowladda Ingiriisku.

   Wasaaraddu waxay sidoo kale shaacisay in Ciidamada Badda iyo Ciidamada Cirka ee Ingiriiska lagu daray liiska ururada argagixisada ee ay u aqoonsan tahay Tehran, iyadoo la raacayo "Sharciga Iiraan ee Aargoosiga," kaas oo jawaab u ah tallaabada ay Mareykanku ku liis gareeyeen Ciidamada Ilaalada Kacaanka oo ay u aqoonsadeen urur argagixiso ah.

   Iiraan waxay sababaha go’aankan keentay ku sheegtay iskaashiga militari ee ka dhexeeya Ingiriiska, Mareykanka iyo Israa’iil ee la xiriira dagaalka.

   Sida bayaanka lagu xusay, go’aamadan waxaa la qaatay iyadoo la raacayo mabda’a "is-dhaafsiga tallaabooyinka" (reciprocity), ujeeddaduna tahay "ilaalinta amniga qaranka iyo danaha dalka."

4. 3 Saacadood ka horWaa kee dalka FBI-da Maraykanku ku eedeysay xatooyadii lacagaha cryptocurrency?

   

   Xigashada Sawirka, Getty Images

   Hay’adda dambi-baarista Mareykanka ee FBI-da ayaa Kuuriyada Waqooyi ku eedeysay inay ka dambeysay xatooyada lacagaha loo yaqaan cryptocurrency-ga, taas oo la rumeysan yahay inay tahay tii ugu weyneyd ee abid dhacda.

   Lacago dijitaal ah oo qiimahoodu ka badan yahay lix bilyan oo doollar ayaa Khamiistii laga xaday madasha Binance.

   FBI-da ayaa sheegtay in koox burcad-interneth oo Kuuriyada Waqooyi ka tirsan, loona yaqaan TraderTraitor, ay isku dayeysay inay dhaqdo lacagihii ay xadeen.

   Pyongyang ayaa sannadihii u dambeeyay lagu eedeeyay xatooyooyin waaweyn oo noocan oo kale ah.

   Shirkaddu waxay sidoo kale macaamiisheeda u sheegtay inay dhowaan dib u bilaabi doonto qaar ka mid ah adeegyada lacag-bixinta iyo kala-bixinta lacagaha.

   Binance waa madasha ugu weyn caalamka ee lagu kala iibsado lacagaha loo yaqaan cryptocurrency, marka loo eego mugga ganacsiga. Dadku waxay halkaas ka iibsan karaan, ku iibin karaan, kuna kala beddelan karaan lacagaha dijitaalka ah sida Bitcoin, sidoo kalena lacagahaas way ku shuban karaan ama kala bixi karaan.

5. 4 Saacadood ka horMuxuu yahay baasaboorka cusub ee Soomaaliya yeelanayso, muxuuse uga duwan yahay kuwii hore?

   

   Dawladda Federaalka ayaa ku dhawaaqday in bisha Diiseembar ee sannad kan 2026 la daabici doono Baasaboor nooc cusub ah oo ay yeelanayso Soomaaliya.

   Boosaboorka cusub ayaa ka kooban sida kuwii horeba seddexda heer ee kala ah kan shaqaalaha, kan diblomaasiyiinta iyo kan caadiga ah.

   Baasaboorka waxaa jaldigiisa iyo gudihiisaba ka muuqda qoraal iyo astaamo muujinaya in Soomaaliya ay kamid tahay wadamada ku mideysan Ururka Bulshada Bariga Afrika, waxaana loogu safri doonaa sida dallalka kale ee ku jira ururka.

   Agaasimaha Hay'adda Socdaalka iyo Jinsiyadda ee Soomaaliya Xuseen Qaasim Yuusuf (Iidow) oo waraysi gaar ah siiyay BBC-da ayaa sheegay in horraanta bisha Diiseembar ee sannad kan la bixin doono noocyadii ugu horeeyay ee Baasaboorka cusub.

   "Soomaaliya waxay yeelanaysaa Baasaboor cusub oo casriya, Baasaboorkaas oo waafaqsan nidaamka caalamiga ah ee lagu qiimeeyo, Baasaboorada casriga ah" ayuu yiri Agaasime Xuseen Iidow.

   Halkan ka sii akhri

6. 5 Saacadood ka horWeerar lagu qaaday markab siday gaaska Qadar

   Wakaaladda Wararka ee Qatar (QNA) ayaa Axaddii sheegtay in markab xambaarsan gaaska dabiiciga ah ee dareeraha ah uu bartilmaameed u noqday "shay aan la aqoonsan" xilli uu marayay biyaha Gacanka Carabta.

   Sida lagu sheegay warbixinta, weerarku wuxuu dhacay fiidnimadii Jimcaha, wuxuuna beegsaday markabka lagu magacaabo "Al-Muaidah" ​​oo ay leedahay shirkad laga leeyahay Qatar oo ka shaqeysa gaadiidka gaaska.

   Waxaa sidoo kale la sheegay inaysan jirin wax dhaawac ah oo soo gaaray shaqaalihii saarnaa markabka, isla markaana aysan dhacdadaasi keenin waxyeello deegaanka ah. Shirkadda reer Qatar ayaa shaacisay in markabku uu ku sugan yahay xaalad "ammaan ah" uuna weli awood u leeyahay inuu shaqeeyo.

   Tan iyo markii uu dagaalku ka qarxay Bariga Dhexe, Iiraan ayaa xayiraado ku soo rogtay marinka Hormuz \, iyadoo beegsanaysa maraakiibta ay ku tilmaamtay inay yihiin kuwo "xadgudub sameeyay."

   Dhanka kale, Mareykanka ayaa go'doomin dhanka badda ah saaray dekedaha dalka Iiraan. Qatar, oo door dhexdhexaadin ah ka ciyaaraysa dagaalkan, ayaa maalmihii u dambeeyay xoojisay dadaalladeeda diblomaasiyadeed si dib loogu bilaabo wadahadallada u dhexeeya Mareykanka iyo Iiraan.

7. 6 Saacadood ka horIiraan oo hanjabaad hor leh jeedisay xilli Trump rajo muujiyey

   

   Xigashada Sawirka, isna

   Afhayeenka ciidamada milatariga Jamhuuriyadda Islaamiga ah ee Iran, Mohammad Akraminia, ayaa sheegay in haddii dagaal cusub uu qarxo, “aagga uu dagaalku ka dhacayo uusan ku koobnaan doonin gobolka Galbeedka Aasiya”.

   Waxa uu intaas ku daray in “xarumaha, qalabka, ciidamada iyo danaha Mareykanka, meel kasta oo ay gaari karaan, ay noqon karaan bartilmaameedyo”.

   Isagoo ka hadlayay xoojinta diyaargarowga howlgallada milatari iyo cusboonaysiinta liiska bartilmaameedyada, Akraminia ayaa sheegay in dagaal cusub oo dhici kara uu noqon karo mid “aad uga dheer” kii hore.

   Afhayeenka ciidamada ayaa sidoo kale yiri: “Hannaanka lagu beddelayo istaraatiijiyadda difaaca ee Jamhuuriyadda Islaamiga ah ee Iran, laguna qaadayo mid weerar ku dhisan, wuxuu billowday waqti hore, wuxuuna si dhab ah u muujiyay intii uu socday dagaalkii ugu dambeeyay.”

   Bogga rasmiga ah ee Mojtaba Khamenei ayaa shalay sheegay in kulan uu la yeeshay taliyeyaasha ciidamada qalabka sida ee Iran uu ku amray inay si “degdeg ah oo aan xuduud juqraafiyeed ku xirnayn” uga jawaabaan khatar kasta oo cadowgu keeno.

   Hoggaamiyaha Jamhuuriyadda Islaamiga ah ayaa sidoo kale laga soo xigtay inuu sheegay in haddii Iran lagu qaado weerar cusub oo milatari ama mid “argagixiso”, ay iyadu go'aamin doonto waqtiga iyo shuruudaha lagu soo afjarayo colaadda.

8. 7 Saacadood ka horNetenyahu iyo Trump oo wadahadal telefoon yeeshay, maxay isla soo qaadeen

   Wargeyska Wall Street Journal, oo soo xiganaya ilo xog-ogaal ah, ayaa sheegay in madaxweynaha Mareykanka Donald Trump uu khadka telefoonka kula hadlay Ra'iisul Wasaaraha Israa'iil Benjamin Netanyahu.

   Sida uu wargeysku sheegay, wada-hadalku wuxuu dhacay xilli Washington ay isu diyaarinayso suurtagalnimada in dib loo bilaabo weerarrada ka dhanka ah Iran.

   Warbixinta Wall Street Journal ayaa imaanaysa kaddib markii Xoghayaha Arrimaha Dibadda ee Mareykanka, Mark Rubio, uu horay u sheegay in Donald Trump uusan weli go'aan ka gaarin weerar lagu qaado Iran.

   Wargeysku wuxuu sidoo kale tilmaamay cadaadisyada siyaasadeed ee wajahaya Donald Trump iyo Benjamin Netanyahu, kuwaas oo ay ka mid yihiin saameynta dhaqaale ee dagaalka, sare u kaca qiimaha shidaalka ee Mareykanka, iyo xaqiiqda ah in Netanyahu uu wajahayo wada-hadallo muddo dheer qaadan kara oo ku saabsan dhismaha dowlad cusub.

9. 8 Saacadood ka horXog la yaab leh oo uu sheegay madaxii hore ee hay'adda sirdoonka Israa'iil ee Mossad

   Subaxnimadii 13-kii Juun 2025, markii Israa'iil ay billowday weerarkeedii ka dhanka ahaa Iiraan intii lagu jiray dagaalkii 12-ka maalmood socday, waxaa la baahiyay muuqaal ay ku dhegganayd astaanta rasmiga ah ee sirdoonka Israa'iil ee Mossad. Muuqaalku wuxuu muujinayay saraakiil ka tirsan hay'adda oo diyaarinaya qalab milatari, si ay gudaha Iiraan u geeyaan una hawlgeliyaan.

   Sida ay sheegeen saraakiil Israa'iili ah, muuqaalladu waxay muujinayeen howlgal lagu beegsanayay nidaamka difaaca cirka ee Iiraan. Baahinta muuqaallada hawlgallada hay'ad sirdoon, gaar ahaan saacadihii ugu horreeyay ee dagaal, ayaa ahayd arrin aan caadi ahayn.

   In ka badan 16 bilood kaddib dagaalka, madaxii hore ee Mossad, David Barnea, ayaa hadda sheegay in hay'adda lafteedu ay si ula kac ah u baahisay muuqaalladaas.

   Waxa uu sheegay in ujeeddadu ahayd in ciidamada ammaanka ee Jamhuuriyadda Islaamiga ah ee Iiraan ay xiraan dad badan, iyaga oo isku dayaya inay aqoonsadaan wakiillada Israa'iil. Tallaabadaas ayaa adkaynaysay in la kala saaro wakiillada dhabta ah ee Mossad iyo dadka kale ee tuhmanayaasha ah.

   Sida ay baahiyeen warbaahinta Israa'iil, Barnea ayaa arrintan ka sheegay khudbad uu jeediyay 22-kii Oktoobar. Waxa uu sheegay in tani ay ahayd sababta keentay in 21,000 oo qof lagu xiro Iiraan "maalintii labaad ee dagaalka".

   Halkan ka sii akhriso sheekada

10. 8 Saacadood ka horXaaladda garoomada diyaaradaha ee Sacuudiga oo war ka soo kordhay

    

    Xigashada Sawirka, Getty Images

    Sida ay sheegtay warbaahinta Bloomberg ee Mareykanka, qiyaastii 94% duullimaadyadii ka ambabaxayay garoonka diyaaradaha caalamiga ah ee Boqor Khaalid ee magaalada Riyadh intii u dhexeysay 10-kii iyo 27-kii Oktoobar ayaa la baajiyay, kaddib weerarradii Xuutiyiinta.

    Weerarkii ugu khasaaraha badnaa ayaa dhacay 10-kii Oktoobar, kaas oo ay ku dhinteen in ka badan 12 qof, isla markaana sababay in mas'uuliyiintu hakiyaan howlihii garoonka diyaaradaha.

    Warbixinta ayaa sheegtay in weerarrada Xuutiyiintu ay sii xumeeyeen carqaladaha soo wajahay duulimaadyada gobolka, kuwaas oo horay u saameeyay dagaalka Iran.

    Dhanka kale, xogta dhaqdhaqaaqa diyaaradaha ee FlightRadar ayaa sidoo kale muujinaysa in ay weli jiraan carqalado dhanka duulimaadyada ah oo ka jira garoonka diyaaradaha caalamiga ah ee Boqor Fahad, kaas oo ku yaalla magaalada Dammam ee bariga Sacuudiga.

11. 8 Saacadood ka horTrump oo war ka soo saaray wadahallada Iiraan

    

    Xigashada Sawirka, Reuters

    Madaxweynaha Mareykanka Donald Trump ayaa sheegay in wada-hadallada Iran ay haatan si wanaagsan u socdaan, balse uu sheegay in aan si weyn loo aamini karin mas'uuliyiinta Iran.

    Trump ayaa yiri: “Wada-hadallada Iran haatan si wanaagsan ayay u socdaan, balse dhibaatada ugu weyn ayaa ah in aanay ahayn kuwo la aamini karo. Waxay galaan heshiisyo, kaddibna si fudud ayay uga baxaan ballanqaadyadooda!”

    Isagoo sidoo kale wariyeyaasha kula hadlayay hoygiisa ku yaalla gobolka Florida, ayuu yiri: “Goobihii nukliyeerka ee Iran waa la burburiyay, waxaana haray hal ama laba goobood oo kale oo ay tahay inaan wax ka qabanno.”

    Hadalka Trump ayaa imaanaya kaddib markii xoghayaha arrimaha dibadda ee Mareykanka uu horay u sheegay in Donald Trump uusan weli go'aan ka gaarin in weerar militari lagu qaado Iran iyo in kale.

    Dhanka kale, mas'uuliyiinta Iran ayaa Sabtidii sheegay in ay qaadi doonaan weerarro aargoosi oo culus haddii Mareykanku soo weeraro Iran.