Cymru Werdd

O'r 7fed tan y 18fed o Ragfyr 2009, fe fydd gweinidogion amgylchedd o 192 o wledydd yn dod ynghyd yn Copenhagen ar gyfer Uwch-gynhadledd y Cenhedloedd Unedig ar Newid Hinsawdd. Eu nod fydd llunio cytundeb bydeang i daclo newid hinsawdd a fydd yn weithredol o 2012 ymlaen.

I nodi'r achlysur hanesyddol hon, mae BBC Cymru yn darlledu tymor arbennig o raglenni a fydd yn ymdrin ag ystod eang o bynciau amgylcheddol.

Yma ar BBC Radio Cymru, bydd modd i chi glywed amrywiaeth o gynnwys - o sgyrsiau difyr ar raglenni dyddiol i drafod a dadansoddi manwl ar ein cyfresi newyddion a materion cyfoes.

Mae drama arbennig hefyd wedi'i chomisynu sy'n rhoi blas ar sut allai bywyd ddatblygu yng Nghymru erbyn y flwyddyn 2050.

Nod Tymor Gwyrdd BBC Cymru yw holi sut mae newidiadau yn yr hinsawdd yn effeithio arnom ni yng Nghymru ac i ysgogi trafodaeth ar gynaladwyedd a llu o gwestiynau eraill:

• Ydy pobl yn derbyn bod hinsawdd y byd yn newid?
• Pam fod y Cymry ar gyfartaledd yn cyfrannu mwy at lefelau carbon diocsid yn yr awyr na phobl yn Lloegr, Tseina neu Rwsia?
• Pwy sydd fwyaf cyfrifol a phwy sydd angen gweithredu i newid y sefyllfa - unigolion, busnesau, awdurdodau lleol, llywodraethau cenedlaethol neu sefydliadau rhyngwladol?
• Beth yw polisiau Llywodraeth Cynulliad Cymru ac a ydyn nhw'n effeithiol?
• Beth mae cymunedau lleol yn ei wneud i fyw yn fwy cynaladwy?
• O fynd ati i leihau ein hôl-troed carbon, beth fydd yr effaith ar ein bywydau bob dydd?

Caiff Tymor Gwyrdd BBC Cymru ei lawnsio Ddydd Llun 23 Tachwedd ac fe fydd yn parhau tan ddiwedd Uwch-gynhadledd Copenhagen.

Yn ogystal â rhaglenni a chynnwys arlein ar BBC Radio Cymru, bydd sylw hefyd ar BBC One Wales, ar BBC Radio Wales ac ar wefannau Saesneg BBC Cymru.

Cofiwch hefyd y bydd storïau newyddion o Copenhagen yn ymddangos yn gyson ar wefan newyddion arlein y BBC.