په کوټه کې اورګاډي ته څېرمه چاودنې له کبله لږ تر لږه اووه تنه مړه او ۲۰ ټپيان شوي دي
د بلوچستان ایالت په مرکز کوټه کې د یوې چاودنې له کبله هلته د تېرېدونکي یوه اورګاډي دوې ډبې له پټلۍ اوښتې دي او یوې ډبې ته سخت زيان اوښتی دی.
په کوټه کې د پولیسو یوه چارواکي د بي بي سي خبریال محمد کاظم ته په پېښه کې د لږ تر لږه اوو کسانو د مړینې او ۲۲ تنو د ټپي کېدو پخلی کړی دی.
په هغو ویډیوګانو کې چې له چاودنې وروسته خپرې شوې ليدل کېږي چې د اورګاډي پټلۍ ته نژدې ولاړو ګاډو هم اور اخيستی دی او د اورګاډي ډبې له پټلۍ اوښتې دي.
تراوسه کوم کس يا ډلې د دغه برید مسوليت نه دی منلی.
د بلوچستان د کورنيو چارو وزارت د رسنيو چارو مرستيال بابر يوسفزي د چاودنې پخلی کړی او وايي، د پېښې په اړه معلومات راغونډوي.
د پاکستان د رېلوې وزير محمد حنفيف عباسي په کوټه کې چاودنه غندلې ده. د یاد وزرات د ویاند له خوا په خپره شوې اعلاميه کې د حنيف عباسي له خولې ويل شوي چې له چاودنې وروسته امنيتي ځواکونو سيمه کلابنده کړې او د ژغورنې عمليات روان دي.
د پېښې له ځايه يوه عیني شاهد عرفان خان ويلي، د چاودنې له کبله د اورګاډي دوې ډبې اوښتې او یوه ډبه د اور له کبله سخته زيانمنه شوې ده.
د چاودنې له امله اورګاډي ته څېرمه ځینې ګاډي هم زیانمن شوي. چاودنه دومره لويه وه چې غږ یې په ښار کې تر لرې لرې اورېدل شوی دی.
د چاودنې له امله د کوټې ښار په روغتونونو کې بېړنی حالت اعلان شوی دی.
د عکس سرچینه، Irfan Khan
