तपाईँ अहिले हाम्रो वेबसाइटको थोरै डेटा प्रयोग हुने ‘टेक्स्ट-ओन्ली’ साइटमा हुनुहुन्छ। सबै तस्बिर र भिडिओसहित मूल वेबसाइटमा जान यहाँ क्लिक गर्नुहोस्।
मूल वेबसाइट तथा पूरा संस्करणमा जानुहोस्।
हाम्रो वेबसाइटको थोरै डेटा प्रयोग हुने संस्करणबारे थप जान्नुहोस्।
गत बुधवार आएको भोटेकोशी-त्रिशूली बाढीपछि थप शवहरू फेला परेका छन् भने सम्पर्कविहीनहरूको खोजीकार्य जारी रहेको अधिकारीहरूले बताएका छन्।
रसुवाको धुन्चेकी पाँचवर्षे बालिका मनीषा मगर बाढीका कारण पुरिएको झन्डै ६० घण्टापछि सशस्त्र प्रहरी बलले उद्धार गरेका थिए।
धुन्चे हुँदै काठमाण्डूको त्रिवि शिक्षण अस्पतालमा ल्याइएकी उनको आज परिवारसँग पुनर्मिलन भएको छ।
नेपाल चीन सीमा क्षेत्रमा हिमपहिरोका कारण बनेको एउटा ताल फुटेको र त्यसको पानी बाहिर प्रवाह भइसकेको भन्दै अब त्यस क्षेत्रमा रहेको अर्को त्यस्तै तालका कारण विगतमा जस्तो ठूलो विनाशकारी बाढीको जोखिम नरहेको आकलन गरिएको जल तथा मौसम विज्ञान विभागका अधिकारीहरूले बीबीसीलाई बताएका छन्।
विभागको बाढी पूर्वानुमान महाशाखाका वरिष्ठ मौसमविद् विनोद पराजुलीले 'लेक वन' भन्ने गरिएको सीमा क्षेत्रको पहिलो ताल फुटेका कारण आइतवार बिहान लेदोसहितको बाढी भोटेकोशी र त्रिशूली नदीमा आएको बताए।
रसुवाको बाढीका कारण विदुर-५, देवीघाटबाट विस्थापित भएकाहरूलाई अहिले स्थानीय चन्द्रज्योति विद्यालयमा राखिएको छ।
त्यहाँ विभिन्न ठाउँबाट ल्याइएका ३०० भन्दा बढी मानिसहरूलाई अस्थायी रूपमा बस्ने स्थान मिलाइएको छ।
त्यहाँ उनीहरूको अनुभव र आवश्यकताबारे बीबीसी संवाददाता शक्तिमाया तामाङले कुरा गरेर बनाएको भिडिओ हेर्नुहोस्।
भोटेकोशी नदीमा आएको बाढीपछि बेपत्ता भएकाको पहिचान तथा खोजीका लागि तिनका आफन्तजन काठमाण्डू र अन्य जिल्लाका अस्पतालहरूमा पनि पुगेका छन्।
यो तस्बिर काठमाण्डूस्थित त्रिभुवन विश्वविद्यालयको शिक्षण अस्पतालमा खिचिएको हो।
राष्ट्रिय समाचार समितिका अनुसार बेपत्ता भएका मानिसका आफन्तहरू खोजी, उद्धार र पहिचानको आशामा अस्पताल परिसरमा भेला भएका हुन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार अझै करिब २५ सय मानिस हराइरहेका छन्।
हालसम्म ८,७३० जनाको उद्धार गरिएको उसले जनाएको छ।
धादिङको कृष्णभीरमा पृथ्वी राजमार्गको एउटा भाग भासिएपछि काठमाण्डूबाट बाहिरिने सवारीसाधनहरूले वैकल्पिक बाटो प्रयोग गर्न थालेका छन्।
त्रिशूली नदीमा गएको बाढीले सडकको तल्लो भाग कटानमा परेपछि आज कृष्णभीरमा झन्डै २० मिटर सडकको आधाभन्दा बढी भाग भासिएको हो।
त्यसपछि उक्त सडकबाट सवारी आवागमन हुन नसक्ने स्थिति उत्पन्न भएको र बिहानैदेखि यातायात सञ्चालन प्रभावित भएको काठमाण्डू उपत्यका ट्राफिक प्रहरी कार्यालय रामशाहपथले जनाएको छ।
उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीलाई उद्धृत गर्दै राष्ट्रिय समाचार समितिले काठमाण्डूबाट बाहिरिने सवारीसाधनलाई तत्कालका लागि दुईवटा वैकल्पिक मार्ग प्रयोग गर्ने व्यवस्था मिलाइएको जनाएको छ।
सुवेदीका अनुसार ठूला सवारीसाधनहरू काठमाण्डूबाट बाइरोड–नौबिसे–पालुङ–भैँसे हुँदै गन्तव्यतर्फ जान सक्ने छन् भने साना सवारीसाधन तथा माइक्रोबसले फर्पिङको बाटो प्रयोग गर्न सक्ने छन्।
कान्ति लोकपथमा पहिरो गएर सडक अवरुद्ध भएकाले उक्त सडक पनि तत्काल सञ्चालनमा ल्याउन आवश्यक पहल भइरहेको प्रवक्ता सुवेदीले राससलाई बताए।
सडक विभागका महानिर्देशक डा विजय जैसीका अनुसार कृष्णभीरमा भासिएको सडकको अवस्थाबारे अध्ययन गर्न काठमाण्डूबाट विज्ञहरूको टोली पठाइएको छ।
भोटेकोशीमा आएको बाढीका कारण विभिन्न नौवटा ब्याङ्कका शाखाहरू पूर्ण ध्वस्त भएको नेपाल ब्याङ्कर्स असोसिएशनले जनाएको छ।
“हाम्रा २७ जना ब्याङ्क कर्मचारीहरू पनि हराइरहेको खबर प्राप्त भएको छ,” असोसिएशनका अध्यक्ष सन्तोष कोइरालाले भने।
“हिमालयन, सानीमा, एनआईएमबी, माछापुच्छ्रे, लक्ष्मी सनराइज, नबिल, प्रभु, एनएमबी सहितका ब्याङ्कका शाखाहरू क्षतिग्रस्त भएका छन्,” उनले बताए।
ती ब्याङ्कहरूमा कति नगद थिए भन्ने यकीन विवरण सङ्कलन भइरहेको उनले बताए।
निक्षेपकर्ताको पैसा के हुन्छ?
ध्वस्त भएका ब्याङ्कहरूमा रहेका निक्षेपकर्ताहरूको रकम कतै खेर नजाने कोइरालाले बताए।
“खास गरी टिमुरेमा नाकाको ब्याङ्क भएका हुनाले कर्जा त्यति नहोला। अरू निक्षेपको हकमा निक्षेपकर्तालाई फिर्ता गरिन्छ। भल्टमा भएका नगदको पनि बीमा गरिएको हुन्छ," उनले भने।
नष्ट भएको नगद तथा अन्य सम्पत्तिको परिमाण केही दिनमा स्पष्ट हुने उनले बताएका छन्।
बाढीले बगाएर ल्याएको शेफ फोड्नेहरू पक्राउ
यसैबीच बाढीले बगाएर ल्याएको पैसा राख्ने शेफ धादिङको गल्छीमा फेला पारी तोडफोड गरी नगद पैसा चोरी गरेको आरोपमा २९ जनालाई नियन्त्रणमा लिइएको जिल्ला प्रहरी कार्यालय धादिङले बताएको छ।
प्रहरीका अनुसार शेफमा कति नगद थियो भन्ने स्पष्ट भएको छैन। तर खानतलासी गर्दा रु ९२ लाखभन्दा बढी बरामद भएको थियो।
रसुवाको भोटेकोशी नदीमा गएको बाढीपछि रसुवाबाट उद्धार गरिएका मानिसहरू चढेको एउटा बस नवलपरासी पूर्वको डन्डामा दुर्घटनामा परेको राष्ट्रिय समाचार समितिले जनाएको छ।
उक्त बस काठमाण्डूबाट बर्दिया जाँदै थियो। उनीहरू घर फर्किने क्रममा रहेको बताइएको छ।
उक्त बसमा सवार ३८ जनामध्ये ३२ जना घाइते भएका छन्।
जिल्ला प्रहरी कार्यालय नवलपरासी पूर्वका प्रहरी नायब उपरीक्षक अनिल पण्डितका अनुसार घाइतेमध्ये २७ जना उपचारपछि डिस्चार्ज भएका छन्।
पाँच जनाको उपचार भइरहेको छ। उनीहरू बर्दिया, अछाम, बाँके, रुकुम पूर्व र सुर्खेतका हुन्।
प्रहरीका अनुसार चार जनाको मध्यबिन्दु प्रादेशिक अस्पताल, नवलपरासी पूर्वमा र एक जनाको पुरानो मेडिकल कलेज, चितवनमा उपचार भइरहेको छ।
भोटेकोशी बाढीका कारण मारिनेहरूको सङ्ख्या ७८८ पुगेको नेपाल प्रहरीले जनाएको छ। विभिन्न आठ जिल्लामा शवहरू फेला परेका हुन्।
आइतवार दिउँसो ३ बजेसम्मको अद्यावधिक जानकारीमा सो विवरण उल्लेख छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार अझै झन्डै २,५०० मानिस सम्पर्कविहीन छन्।
हालसम्म ८,७३० जनाको उद्धार गरिएको उसले जनाएको छ।
नुवाकोटस्थित माथिल्लो त्रिशूली ३ 'ए' जलविद्युत् आयोजनाको सुरुङभित्र फसेका मानिसहरूको उद्धारका लागि नेपाली सेनाका इन्जिनिअर तथा तालिमप्राप्त कुकुरसमेतको विशेष खोज तथा उद्धार टोलीसहित तीनवटा सुरक्षा निकायका कुल ९० जना खटेको प्रधानमन्त्रीको सचिवालयले जनाएको छ।
प्रधानमन्त्रीको सचिवालयले दिएको जानकारीअनुसार यसअघि दिउँसो २:०० बजे सुरुङको 'क्राउन हेड' अर्थात् मुख्य भागमा उद्धारकर्मीहरूले एउटा प्वाल बनाएका थिए।
तर डोरीको सहायताले टोली तल झरेर बोलाउँदा "भित्रबाट कुनै प्रतिक्रिया नआएपछि" उद्धारलाई थप सहज र तीव्र बनाउन ठूला उपकरण, ब्लास्टिङ तथा प्वाल फराकिलो पार्ने काम एकसाथ जारी राखिएको प्रधानमन्त्रीको सचिवालयले जनाएको छ।
बुधवार आएको बाढीपछि रसुवा र नुवाकोटमा रहेका विभिन्न जलविद्युत् आयोजनाका सुरुङमा सयौँ मानिस फसेको बताइएको छ।
पछिल्लो बाढीका कारण भएको कटानले पृथ्वी राजमार्गलाई ठूलो क्षति पुगेको सडक विभागका प्रमुखले बताएका छन्।
सडक विभागका महानिर्देशक विजय जैसीले यसलाई रसुवा बाढीले नेपालको सडक संरचनामा पुर्याएको सबैभन्दा ठूलो क्षति भनेका छन्।
गत बुधवारको विनाशकारी बाढीलगत्तै धादिङको कृष्णभीर क्षेत्रमा त्यस्तो कटान सुरु भएको थियो र आइतवार बिहानको बाढीले त्यसमा थप क्षति पुगेको थियो।
सवारीसाधनहरूलाई वैकल्पिक बाटो प्रयोग गर्न भनिएको जैसीले बताएका छन्।
सडक विभागले यसअघि आफ्ना १९ वटा पुल र नुवाकोटबाट स्याफ्रुबेँसी र रसुवागढीसम्म जाने करिब ४० किलोमिटर बाटोमा क्षति पुगेको यसअघि बताएको थियो।
बुधवार नेपाल-चीन सिमानामा आएको बाढीको विनाश र विध्वंसका माझ त्यस्तो विपद्को पूर्वसूचनामा के कस्ता चुनौती देखिए भन्ने बारे बहस छेडिएको छ।
समयमै सूचना दिन पाएको भए जनधनको क्षति केही कम हुन सक्थ्यो कि भन्ने तर्क कतिपयको छ।
तर नेपाली अधिकारीहरूका अनुसार हाल वर्षापछि आउने बाढीको मात्र पूर्वानुमान गर्न सक्ने अवस्थामा उनीहरू छन्।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले भोटेकोशी-त्रिशूली बाढीका कारण मारिनेहरूको सङ्ख्या ७५२ पुगेको जनाएको छ।
मृतकका शवहरू विभिन्न जिल्लामा फेला परेका हुन्।
आइतवार दिउँसो १ बजेसम्मको अद्यावधिक विवरणमा अझै २,५०२ मानिस हराइरहेको उल्लेख छ।
प्राधिकरणले आज दिउँसो १ बजेसम्म २,५०२ जना सम्पर्कविहीन रहेको जनाएको छ। तीमध्ये झन्डै ६०० जना विदेशी पर्यटक हुन्। सम्पर्कविहीनहरूको सङ्ख्यामा सरकारी कर्मचारी, सुरक्षाकर्मी र जलविद्युत् आयोजनाका कर्मचारी पनि छन्।
सरकारी निकायहरूका अनुसार खोज, उद्धार तथा राहतका लागि नेपाल प्रहरी, नेपाली सेना र सशस्त्र प्रहरी बलका गरी झन्डै २० हजार सुरक्षाकर्मी परिचालन गरिएको छ।
अहिलेसम्म ८,७३० जनाको उद्धार गरिएको प्राधिकरणले जनाएको छ।
भोटेकोशी बाढीका कारण चारवटा सरकारी स्वास्थ्य केन्द्रमा पूर्ण क्षति पुगेको स्वास्थ्य मन्त्रालयले जनाएको छ।
रसुवा जिल्लास्थित स्याफ्रुबेसी स्वास्थ्य चौकी, रसुवा टिमुरे स्वास्थ्य चौकी, रसुवा टिमुरे हेल्थ डेस्क तथा रसुवागढी मैलुङ सामुदायिक स्वास्थ्य एकाइमा पूर्ण क्षति पुगेको छ।
दुईवटा स्वास्थ्य केन्द्रहरू आंशिक क्षतिग्रस्त छन्। गल्छीस्थित बैरेनी अस्पताल तथा बेनिघाटस्थित चरौँदी आधारभूत स्वास्थ्य सेवा केन्द्रमा आंशिक क्षति पुगेको छ र ती अहिले सञ्चालनमा छैनन्।
साथै धादिङ अस्पताल र त्रिशूली अस्पतालको पहुँचमार्ग अवरुद्ध रहेको बताइएको छ।
चिकित्सकहरूको छाता सङ्गठन नेपाल मेडिकल असोसिएशनका अध्यक्ष डा बद्री रिजालका अनुसार रसुवा जिल्लामा कार्यस्थलबाट चारजना स्वास्थ्यकर्मीहरू हराइरहेको जानकारी प्राप्त भएको छ।
“मानसरोवर तथा गोसाइँकुण्ड यात्राका क्रममा पनि केही स्वास्थ्यकर्मीहरू प्रभावित भएको हुन सक्ने भनिएको छ तर त्यसको यकिन जानकारी प्राप्त भएको छैन,” उनले बताए।
असोसिएशनले प्रभावित क्षेत्रका मानिसहरूको सहयोगका लागि चिकित्सक तथा स्वास्थ्यकर्मीहरूको दुईतीन वटा टोली खटाइएको बताएको छ।
नुवाकोटस्थित माथिल्लो त्रिशूली ३ 'ए' जलविद्युत् आयोजना क्षेत्रमा फसेका मानिसहरूको उद्धारका लागि नेपाली सेनाले एक्स्कभेटर र डोजरलाई नुवाकोटको बट्टार पुर्याएको प्रधानमन्त्रीको सचिवालयले जनाएको छ।
ती उपकरणहरूलाई त्यहाँ "डिस्म्यान्टल" अर्थात् खण्डखण्ड पारेर हेलिकप्टरमार्फत् आयोजनास्थलतर्फ लगिएको छ।
नेपाली सेनालाई उद्धृत गर्दै प्रधानमन्त्रीको सचिवालयले एक घण्टाजतिमा सुरुङको प्रवेशद्वार खोल्ने काम सकिने जनाएको छ।
"त्यसपछि मात्रै फसेका मानिसहरूको खोजी तथा उद्धार कार्य सुरु हुने छ," प्रधानमन्त्रीको सचिवालयले एउटा विज्ञप्तिमा भनेको छ।
बुधवारको बाढीपछि रसुवादेखि नवलपरासी पश्चिमसम्म विभिन्न आठ जिल्लामा शवहरू फेला परेका छन्। तीमध्ये केहीको मात्र सनाखत हुन सकेको छ।
ठूलो सङ्ख्यामा शवहरू फेला परेका र तिनलाई सुरक्षित राख्न आवश्यक पूर्वाधार पर्याप्त नभएको देखिएको छ।
स्वास्थ्य मन्त्रालयका सहप्रवक्ता डा समीरकुमार अधिकारीका अनुसार अहिले शव व्यवस्थापनको राष्ट्रिय निर्देशिकामा संशोधन गरेर काम भइरहेको छ।
“ठूलो सङ्ख्यामा शव छन्। हाम्रो क्षमताभन्दा धेरै छन्। त्यसैले विभिन्न विकल्पहरूलाई हेरेर काम गरिरहेका छौँ,” उनले भने।
“जतिसक्दो चाँडो तिनको फ्रिजरमा व्यवस्थापन गर्ने, डीएनए परीक्षणका व्यवस्था मिलाउने जस्ता काम भइरहेका छन्। धार्मिक सांस्कृतिक सँगसँगै अन्य पाटोलाई पनि ध्यान दिएर शव व्यवस्थापनमा लागेका छौँ,” उनले भने।
मृतकहरूको डिएनए नमुना सङ्कलनका निम्ति राष्ट्रिय जनस्वास्थ्य प्रयोगशालाले १००० थान डिएनएका नमुना सङ्कलन कन्टेनर पठाएको जनाइएको छ।
भोटेकोशी बाढीका कारण दशौँ हजार मानिसहरूको बसोबास प्रभावित भएको हुँदा उनीहरूलाई थप स्वास्थ्य समस्या हुनबाट जोगाउन आफूहरूले विभिन्न कदमहरू चालेको स्वास्थ्य मन्त्रालयले जनाएको छ।
मन्त्रालयका सहप्रवक्ता डा समीरकुमार अधिकारीले विपद्पश्चात् उत्पन्न हुन सक्ने रोगव्याधिको सर्भिलन्स तथा प्रकोपको तयारीका निम्ति कार्य थालिएको बताएका छन्।
खास गरी झाडापखाला तथा हैजाजस्ता पानीजन्य रोग, औलो र डेङ्गीजस्ता कीटजन्य रोग तथा अन्य सरुवा रोगसँग जुझ्ने गतिविधिहरूलाई सुदृढ पारिएको उनले बताए।
विपद्पश्चात् निम्न किसिमका रोग समस्या उब्जिन सक्ने डा अधिकारीले बताएका छन् -
उनले यस्ता समस्यासँग जुझ्न सरसफाइ तथा पोषणमा विशेष ध्यान दिनु जरुरी रहेको बताए।
मानसिक स्वास्थ्य तथा मनोसामाजिक सहयोगका लागि पनि प्रभावित क्षेत्रमा त्यस्ता सेवा परिचालन गरिएको जनाइएको छ।
सातसदस्यीय टोली परिचालन गरेर हेलो स्वास्थ्य १११५ मार्फत् चौबिसै घण्टा मनोसामाजिक परामर्श प्रदान गरिएको मन्त्रालयले जनाएको छ।
मधुमेह, रक्तचापजस्ता नसर्ने रोगका अत्यावश्यक औषधिहरू प्रभावित क्षेत्रमा पठाइएको तथा सुत्केरी, नवजातशिशु तथा बालस्वास्थ्यका निम्ति पनि आवश्यक जनशक्ति तथा सामग्रीहरू पठाइएको बताइएको छ।
केही दिनअघि तिब्बतमा बनेको तालभन्दा तलपट्टि फेरि अर्को पहिरो जाँदा नयाँ दह जमेको चीनको सरकारी सञ्चारमाध्यमले जनाएको छ। पहिरोले खोला वा नदी थुन्दा त्यसरी पानी जम्ने गर्छ।
बुधवार ठूलो विनाश निम्तिने गरी एक्कासि बाढी आएपछि नेपालको रसुवासँगै जोडिएको तिब्बतको केरुङमा ताल बनेको थियो।
उक्त ताल भत्किएर फेरि ठूलो बाढी आउन सक्ने आशङ्का गरिएको थियो। तर ताल भरिएर पानी आफैँ बाहिर जान थालेको विवरण आएको छ।
चिनियाँ सरकारको स्वामित्व भएको सीसीटीभीका अनुसार निगरानीका लागि परिचालित एउटा ड्रोनले बुधवार बनेको तालभन्दा २.८ किलोमिटर तल 'प्रुक्पु चिआङ जाङ्बु' खोलामा पहिरो गएको पत्ता लगाएको हो।
चीनको आपत्कालीन व्यवस्थापन मन्त्रालयले त्यसबारे चाँडै विश्लेषण गर्न विज्ञहरूलाई निर्देशन दिएको छ।
यद्यपि अहिलेका लागि केरुङ पोर्टमा भएका उद्धारकर्ताहरूलाई सुरक्षित स्थानतिर सारिएको पनि सीसीटीभीले जनाएको छ।
शुक्रवार हिमालबाट हिउँ र बरफ खस्दा उक्त ताल भरिएर पानी बाहिर बगेको थियो। त्यसपछि नेपालमा पनि भोटेकोशी र तल त्रिशूली नदीको प्रवाह बढेको देखिएको थियो।
त्यसयता चिनियाँ विज्ञहरूले उक्त तालमा पानीको सतहको निरन्तर निगरानी गर्दै आएका छन्। तालमा पानी भरिएर बाहिर निस्केको देखिए चेतावनी जारी गर्ने प्रबन्ध पनि चिनियाँ पक्षले मिलाएको बताइएको छ।
नेपाल टेलिकमले भोटेकोशी बाढीबाट प्रभावित क्षेत्र र आसपासका सेवाग्राहीलाई उपलब्ध गराउँदै आएको निःशुल्क भोइस, डेटा र एसएमएस सुविधा अर्को सूचना नभएसम्म निरन्तर उपलब्ध हुने जनाएको छ।
यसअघि टेलिकमले भदौ १४ गतेसम्मका लागि निःशुल्क भोइस कल, प्रतिदिन २ जीबी डेटा र ५० वटा एसएमएस सुविधा उपलब्ध गराएको थियो।
राहत वितरण तथा उद्धारकार्यलाई सहज बनाउन कम्पनीले उक्त सुविधा थप समयका लागि निरन्तरता दिएको टेलिकमका प्रवक्ता कमल लामिछानेले बताए।
राष्ट्रिय समाचार समितिका अनुसार बाढीका कारण कम्पनीका विभिन्न भौतिक संरचनामा क्षति पुगे पनि दूरसञ्चार सेवा यथासम्भव नियमित राख्न तथा प्रभावित संरचनाको मर्मतसम्भारका लागि प्राविधिक टोली परिचालन भएको छ।
भोटेकोशी हुँदै त्रिशूली नदीमा आएको बाढीबाट प्रभावित त्रिशूली–३ ‘बी’ जलविद्युत् आयोजनास्थलमा खोज तथा उद्धारमा नेपाली सेनासहितको प्राविधिक टोली परिचालन भएको छ।
बुधवारको बाढीका कारण विभिन्न जलविद्युत् आयोजनाका सुरुङमा प्राविधिक र कर्मचारीहरूसहित ठूलो सङ्ख्यामा मानिसहरू फसेको अनुमान छ।
आयोजनाका प्रमुख, परामर्शदाता कम्पनीका प्रमुख तथा साइट इन्जिनियरसहित नेपाली सेनाको टोली घटनास्थलमा पुगेर काम सुरु गरेको ऊर्जा, जलस्रोत तथा सिँचाइमन्त्रीको सचिवालयले जनाएको छ।
प्रतिकूल मौसम तथा चुनौतीपूर्ण भौगोलिक अवस्थाका कारण खोज तथा उद्धार गर्न जटिल भए पनि खोज टोली सचेत भएर काममा जुटेको ऊर्जा, जलस्रोत तथा सिँचाइ मन्त्रालयले जनाएको छ।
माथिल्लो त्रिशूली ३ 'ए'मा पनि प्रयास जारी
यसअघि प्रधानमन्त्रीको सचिवालयले प्रतिकूल मौसम र रातको अँध्यारोका बीच माथिल्लो त्रिथूली-३ 'ए' जलविद्युत् आयोजनामा फसेका मानिसहरूको उद्धार गर्ने प्रयास गरेको जनाएको थियो।
सचिवालयले जारी गरेको विज्ञप्तिमा "रातको अँध्यारो र प्रतिकूल मौसमका कारण सिर्जित जोखिमलाई पन्छाउन उच्च क्षमताका फ्लडलाइटहरू जडान गरी कार्यस्थलमा काम जारी राखिएको" उल्लेख छ।
सुरुङको प्रवेशद्वारमा बाढी, लेदो र भग्नावशेष थुप्रिएकाले पन्छाएर भित्र प्रवेश गर्नका लागि उद्धार टोलीले खन्ने र बाटो बनाउने प्रयास गरेको बताइएको छ। त्यसका लागि एक्स्कभेटर प्रयोग गरिएको छ।
उद्धार टोलीले अत्याधुनिक 'सर्च क्यामरा' तथा विशेष मोनिटर प्रयोग गरेको पनि प्रधानमन्त्रीको सचिवालयले जनाएको छ।
प्रधानमन्त्री दैवी प्रकोप उद्धार कोषको नाममा ठगी गर्न खोजेको आशङ्कामा प्रहरीले एक जनालाई पक्राउ गरेको छ।
भदौ १० गते रसुवाको भोटेकोशी नदी र तल त्रिशूली नदीमा आएको बाढीका कारण प्रभावित मानिसहरूलाई उद्धार गर्न तथा राहत सङ्कलन गर्न नेपाल सरकारले प्रधानमन्त्री दैवी प्रकोप उद्धार कोषमा सहयोग गर्न सार्वजनिक आह्वान गरेको छ।
तर एक युवकले आफूले रु १,२०,००० रकम सहयोग गरेको भनी "च्याटजीपीटीबाट नक्कली स्टेटमन्ट बनाएर आफ्नो क्यूआर कोड पनि सामाजिक सञ्जालमा पोस्ट" गरेको भन्दै उनलाई नियन्त्रणमा लिई थप अनुसन्धान भइरहेको जिल्ला प्रहरी कार्यालय रामेछापले जनाएको छ।
यो पनि पढ्नुहोस्
