तपाईँ अहिले हाम्रो वेबसाइटको थोरै डेटा प्रयोग हुने ‘टेक्स्ट-ओन्ली’ साइटमा हुनुहुन्छ। सबै तस्बिर र भिडिओसहित मूल वेबसाइटमा जान यहाँ क्लिक गर्नुहोस्।
मूल वेबसाइट तथा पूरा संस्करणमा जानुहोस्।
हाम्रो वेबसाइटको थोरै डेटा प्रयोग हुने संस्करणबारे थप जान्नुहोस्।
भोटेकोशी र त्रिशूली नदीमा विनाशकारी बाढी गएको आज नवौँ दिन हो। सरकारी निकायहरूका अनुसार अहिलेसम्म १,२०० जनाभन्दा बढी मानिसको मृत्यु भएको पुष्टि भएको छ भने अझै ४,००० जनाभन्दा बढी मानिस सम्पर्कविहीन छन्।
भदौ १० गते तिब्बत हुँदै भोटेकोशी नदीमा आएको बाढीले रसुवासहित विभिन्न जिल्लामा ठूलो विनाश निम्त्यायो। रसुवाको स्याफ्रुबेँसी अतिप्रभावित क्षेत्रमध्ये एक हो।
भोटेकोशी नदीको किनारमा रहेको स्याफ्रुबेँसी अहिले बगरमा परिणत भएको छ। हेर्नुहोस् केही तस्बिर।
पछिल्लो तथ्याङ्कअनुसार बाढीमा परी हालसम्म मृत्यु हुनेको सङ्ख्या १,२२२ पुगेको छ।
रसुवादेखि नवलपरासी पश्चिमसम्म शवहरू फेला परेको खोजी तथा उद्धारमा संलग्न निकायहरूले जनाएका छन्। केही शव नारायणी नदीमा बगेर भारत पनि पुगेका छन्।
भोटेकोशी र त्रिशूली नदीमा विनाशकारी बाढीको एक आठ दिन पुग्दा बुधवार साँझसम्म ११,९९३ जनाको उद्धार गरिएको सरकारी निकायहरूले बताएका छन्।
हिजो बेलुकाको तथ्याङ्कअनुसार ४,२१६ जना अझै सम्पर्कविहीन छन्।
सम्पर्कविहीनको खोजी प्राथमिकताका साथ जारी रहेको अधिकारीहरूले बताएका छन्।
रासससँग राष्ट्रिय विपद् जोखिम न्यूनीकरण तथा व्यवस्थापन प्राधिकरणकी प्रवक्ता शान्ति महतले बाढी प्रभावित क्षेत्रमा नेपाली सेना, नेपाल प्रहरी र सशस्त्र प्रहरी बल नेपालका गरी २१,३१४ सुरक्षाकर्मी परिचालन गरिएको बताएकी छन्।
नेपाल प्रहरीका ७,९१२, सशस्त्र प्रहरी बल नेपालका ४,२०३ र नेपाली सेनाका ९,१९९ सुरक्षाकर्मी खोज तथा उद्धारमा खटिएका छन्।
सुरक्षाकर्मीले नदी किनार, बाढीबाट प्रभावित बस्ती, सडक तथा पहिरो गएका क्षेत्रमा खोजी गरिरहेका छन् ।
प्राधिकरणका अनुसार बाढीपछि नेपाली सेनाका ४५, नेपाल प्रहरीका २५ र सशस्त्र प्रहरी बल नेपालका १३ जना सम्पर्कविहीन छन्।
भन्सार कार्यालयका १४, अध्यागमन कार्यालयका तीन तथा रसुवाबाट करिब ८६५ जना सम्पर्कविहीन छन्।
जलविद्युत् आयोजनामा कार्यरत करिब ९००, लाङ्टाङ राष्ट्रिय निकुञ्जका तीन, क्वारन्टीन कार्यालयका तीन, जनप्रतिनिधि सात, स्थानीय तह वा मातहतका कर्मचारी ३२ तथा निजी विद्यालयका एक जना सम्पर्कविहीन रहेको प्राधिकरणको विवरणमा उल्लेख छ।
सेनाले हालसम्म ४,०९१ नेपाली र २७३ विदेशी नागरिकको हवाई उद्धार गरेको बताइएको छ।
नमस्कार। बीबीसी नेपाली सेवाको लाइभ पेजमा यहाँलाई स्वागत छ।
भोटेकोशी र त्रिशूली नदीमा विनाशकारी बाढी आएको आज नवौँ दिन हो।
आज हामी यो लाइभ पेजमा उक्त बाढीले पुर्याएको क्षति र त्यसपछि जारी उद्धार तथा राहतका प्रयासबारे भइरहेका गतिविधिबारे अप्डेट गर्ने छौँ।
