Prìomh sheirbheisean ChalMac air ais agus an Hebrides a' tilleadh

Hebrides aig cidhe an Tairbeart.

Tha Caledonian Mac a' Bhriuthainn ag ràdh gum bi grunn de na prìomh sheirbheisean aca a' ruith mar as àbhaist bho Dhiciadain an dèidh troimh-chèile o chionn ghoirid a dh'fhàg aig aon àm gun robh cha mhòr an treas cuid den chabhlach a-mach à seirbheis.

Tha dùil gun till an MV Hebrides dhan t-slighe eadar an t-Eilean Sgitheanach, na Hearadh agus Uibhist a Tuath an dèidh obair-chàraidh a bharrachd a bha a dhìth oirre aig deireadh na seirbheis bliadhnail aice.

Tha CalMac ag ràdh gu bheil sin a' ciallachadh gum faod soithichean a bha iad a' gluasad air feadh an lìonra airson seirbheisean a chumail ri daoine a dhol air ais gu na slighean àbhaisteach aca.

Thuirt Àrd-oifigear na companaidh-aiseig, Donnchadh Mackison: "Tha e a' leigeil leinn seirbheis sheasmhach a thoirt seachad air na slighean air a bheil na soithichean mòra a' seòladh agus seirbheisean àbhaisteach a chumail ri còig eileanan."

  • Bidh an MV Clansman a' dol eadar an t-Òban, Colla, Tiriodh agus Colbhasa

  • Bidh an MV Isle of Mul a' seòladh eadar an t-Òban agus Creag an Iubhair

  • Tillidh an MV Lord of the Isles dhan t-slighe eadar Malaig is Loch Baghasdail

  • Thèid an MV Isle of Arran a dh'Ìle an àite an MV Lord of the Isles, a th' air a bhith air an t-slighe fhad 's a tha an MV Finlaggan ga càradh

Thuirt Mgr Mackison gun robh na beagan sheachdainean a chaidh seachad air a bhith "air leth dùbhlanach".

"Tha mi airson taing mhòr a thoirt do na co-obraichean agam aig CalMac a rinn obair cho cruaidh, agus do dhaoine sna coimhearsnachdan cladaich a tha sinn a' frithealadh a th' air a bhith cho tuigseach."

Dhearbh e gun robh dùil gun tilleadh dà shoitheach mhòr eile, an MV Isle of Lewis agus an MV Finlaggan, ro dheireadh na mìos.