An ath-chaibideil ann an sgeulachd Chnoc Soilleir a-nis a' tòiseachadh

Ailig O'Henley còmhla ri Daibhidh MacAonghais bho Bhràithrean MhicAonghais Earranta san talla ùr aig Cnoc SoilleirCnoc Soilleir

Ailig O'Henley còmhla ri Daibhidh MacAonghais bho Bhràithrean MhicAonghais Earranta san talla ùr aig Cnoc Soilleir

Tha an obair togail air an ionad airson ceòl, dannsa agus cultar na Gàidhlig ann an Uibhist a Deas a-nis deiseil.

Tha an dàrna ìre den leasachadh aig Cnoc Soilleir ann an Dalabrog air a crìochnachadh agus tha an togalach a-nis air ais an làmhan stiùirichean.

Thug Cathraiche Bòrd-stiùiridh Chnoc Soilleir Earranta, Ailig O'Henley, taing don chompanaidh Bràithrean MhicAonghais Earranta airson "sàr obair a dhèanamh".

Togalach geal le coltas ùr air. Tha bhanaichean air a thaobh a-muigh.

Thuirt e: "Tha mi an dòchas gum bi e na lòchran dhan h-uile duine aig a bheil meas air a' Ghàidhlig, air a' cheòl agus air a' chultar - an dà chuid an seo an Uibhist a Deas agus nas fhaide air falbh - airson bliadhnaichean mòra ri thighinn."

Tha 26 bliadhna ann bho thòisich an iomairt airson ionad dualchais a stèidheachadh, agus thòisich an obair air an dàrna ìre den leasachadh san Dàmhair 2024.

A-nis, tha talla-cluiche le rùm gu leòr do 200 luchd-èisteachd, stiùidio dannsa, seòmraichean deasachaidh agus siostam lèir-chlaistinneach san togalach ùr.

Tha Cnoc Soilleir ag ràdh gu bheil iad an dòchas gum faigh na com-pàirtichean aca, Ceòlas agus UHI a Tuath, an Iar is Innse Gall a thuilleadh air buidhnean is daoine eile, buannachd às a' ghoireas leudaichte.