Rùnaire ùr na Còmhdhail ann an Uibhist

Bidh Rùnaire ùr na Còmhdhail ann an Uibhist an-diugh air a' chiad chuairt aige dha na h-Eileanan an Iar bho fhuair e an obair.

Chaidh Stephen Flynn ainmeachadh san dreuchd sa chaibineat ùr aig Iain Swinney air a' mhìos sa chaidh.

Bha staing nan aiseagan gu mòr air aire dhaoine tro iomairt taghadh Pàrlamaid na h-Alba is duilgheadasan mòra a' bualadh air CalMac aig an àm.

San iomairt, gheall an SNP gun rachadh maoin ùr aiseig £10m fhoillseachadh taobh a-staigh 20 là nam biodh iad air an taghadh às ùr.

Anns na seachdainean mu dheireadh tha an dà chuid Comhairle nan Eilean Siar agus Buidheann Buaidhe Ghnothachais Uibhist a Deas (SUBIG) air iarraidh gun tèid am maoin ùr sin a chur an sàs cho luath 's a ghabhas.

Dh' iarr SUBIG cuideachd gun rachadh faraidhean aiseig eadar Malaig is Loch Baghasdail a ghearradh 50% airson a' chòrr den t-samhradh mar thoradh air na trioblaidean mòra a th' air a bhith air an t-slighe sin.

Bho thàinig an t-iarrtas sin bhuapa sa Chèitean, bhuail trioblaidean teicnigeach ùra air an Lord of the Isles, ged a tha iad sin a-nise air an cur ceart.

Tha SUBIG am measg na tha a' faireachdainn gu bheil Uibhist a Deas tric air fulang barrachd na eileanan eile nuair a tha duilgheadasan ann le aiseagan.

Tha dùil gun coinnich Mgr Flynn ri riochdairean ionadail is luchd-iomairt à Uibhist fhèin agus cuideachd à Barraigh fhad 's a tha e anns na h-eileanan.

A thuilleadh air suidheachadh nan aiseagan, tha a h-uile coltas ann gun tèid trioblaidean leis an t-seirbheis adhair eadar Beinn na Faoghla is Steòrnabhagh a thogail leis.

Tha turas Mhgr Flynn a' tighinn beagan làithean às dèidh do Mhàiri NicAonghais à Uibhist a Deas a dhol na cathraiche ùr air Bòrd Coimhearsnachd nan Aiseagan.