Украина: Автобуска урулган сокку кеминде 30 адамдын өмүрүн алды

8-октябрда Орусия Украинанын чыгышындагы Краматорск шаарындагы эки автобуска сокку уруп, андан кеминде 30 адам каза болгону кабарланды. Дагы 18 адам жаракат алды.

Аймактын башчысы Орусияны жайкын тургундарды атайылап бутага алды жана согуш жүргүзүүнүн бардык эрежелерин одоно бузду деп айыптады. Ал коопсуздук боюнча кырдаал начарлаганын айтып, Краматорск жана ага жакын жайгашкан Славянск шаарларында коомдук транспорттун ишин токтотууну буйруду.

Краматорск фронтко жакын жайгашкандыктан дээрлик күн сайын аткылоого дуушар болот. Көчөнүн үстүнө унааларды дрондордон коргоо үчүн тор тартылган. Бирок ал бомбалоодон кийин айрылып калган.

Украинанын борбору Киевде болсо эки башка соккудан үч адам каза болгону кабарланды.

Андан бир күн мурун Орусиянын ракетасы Киевдин чыгышындагы Прилуки шаарындагы беш кабаттуу турак жайга тийип, 22 адамдын өмүрү кыйылган. Набыт болгондордун арасында 5 бала бар.

Бейшемби күнү Улуу Британиянын тышкы иштер министри Эд Милибанд Украинанын президенти Владимир Зеленский менен бирге чабуул болгон жерге барды.

Президент Зеленский жайкын тургундардын өмүрүн сактап калуу үчүн, Украинанын ракетадан коргонуу мүмкүнчүлүктөрүн бекемдөө керек экенин баса белгиледи. Ал Краматорск шаарындагы ракеталык сокку "жоопсуз калбайт" деп эскертти.

"Бул сокку жоопсуз калбайт. Орусия Донбасстагы жашоону жок кылууга аракет кылууда. Дүйнө буга жооп кайтарышы керек. Орусиялыктар татыктуу болгон жооп кайтарылышы керек", - деп билдирди Зеленский.

Украина Орусияга жооп иретинде дрон чабуулдарын улантууда. Орусиянын Yandex компаниясы Рязань облусундагы маалымат борбору соккуга кабылып, өрт чыкканын маалымдады. Аталган компания Би-Би-Синин Орус кызматына "Жабыркагандар жок. Тиешелүү кызматтар окуянын кесепеттерин жоюп жатышат. Маалымат борборунун иши толугу менен токтотулду", - деп билдирди.

Прилукиде беш кабаттуу үйгө урулган соккунун чоо-жайы

Чернигов облусунун прокуратурасы Прилукиге шаршембинин таңында канаттуу ракеталар менен сокку урулганын билдирген. Орусиянын Коргоо министрлиги соккунун бутасы "Пластмасс-Прилуки" заводу болгонун айтып, анда украиналык FP-5 "Фламинго" канаттуу ракеталары үчүн тетиктер өндүрүлүп жана сакталат деп маалымдады.

Прокуратуранын маалыматына караганда, соккудан беш кабаттуу турак үйдүн эки подъезди талкаланган. Бул чабуулда каза тапкандардын арасында балдар да бар.

Куткаруучулар кыйраган үйдүн урандыларынын алдынан бир нече баланы алып чыгышты.

"Александр, Кирилл жана Сергей, алар болгону бир жашта, Максим сегиз жашта болчу", - деп жазды Зеленский Telegram'дагы баракчасына.

Шаарда башка турак үйлөр, Балдар чыгармачылык борбору, ишканалар жана унаалар да жабыркаганы прокуратура билдирди. Прилукиде үч күндүк аза күтүү жарыяланды.

Куткаруучулар шаардагы урандыларды тазалап жаткан учурда облустун борборуна дагы бир жолу канаттуу ракеталар менен сокку урулган. Бийликтин маалыматына караганда, административдик имаратта өрт чыккан.

Кременчугга сокку

Полтава облусуна жасалган массалык ракеталык чабуул учурунда Кременчуг шаарындагы турак жай кварталы да соккуга кабылган.

Жарыяланган кадрлардан ракета тогуз кабаттуу үч турак үйдүн жанындагы короого түшкөнүн көрүүгө болот. Ал жерде 72 жаштагы аял жана 40 жаштагы эркек каза болуп, 40тан ашуун адам жаракат алганы бийликтин билдирүүлөрүнөн улам белгилүү болду.

Куткаруучулардын маалыматына караганда, Орусиянын аскерлери Полтава облусундагы "ишканалардын бирине" сокку урган. Орусиянын Коргоо министрлиги бул Кременчугда жайгашкан Кременчуг автомобиль заводу "КрАЗ" экенин билдирди.

Орусиянын аскерлери өз билдирүүсүндө "КрАЗ" заводун, ошондой эле Прилукидеги пластмасса заводун "Фламинго" ракеталарынын тетиктерин чыгарууга байланыштырды. Тактап айтканда, ракеталарды учуруучу түзүлүштөр үчүн атайын шассилер чыгарылары айтылды.

Киевде каза болгондор

Киев облусу бул аптада массалык түнкү чабуулдун негизги багыттарынын бири болгонун Украинанын Аба күчтөрү эртең менен билдирди. Киев шаарында үч район зыян тарткан.

Дарницкий районунда гараж кооперативинин аймагында 66 жана 73 жаштагы эки күзөтчү каза болгонун полиция билдирди.

Ошол эле райондо баллистикалык ракета көп кабаттуу турак үйлөрдүн ортосуна түшүп, бирок жарылбай калган. Куткаруучулардын маалыматына караганда, сапёрлор жана жардыруучу заттар боюнча адистер баллистикалык ракетанын негизги бөлүгүн жерден алып чыгып, кийин жок кылуу үчүн коопсуз жерге жеткиришкен.

Украинанын Маданият министрлиги дагы бир ракетанын сыныктары Киевдеги Шевченко районунда жайгашкан Довженко атындагы Улуттук киностудиянын эки павильонунун чатырын тешип өткөнүн билдирди. Соккудан келтирилген зыяндын көлөмү азырынча аныктала элек.

Бул киностудияга быйыл июнь айында да эки жолу ракеталык сокку урулган. Анда 1927-1928-жылдары курулган башкы павильон, музей, фильмдер сакталган жай жана башка имараттар жабыркаган. Костюмдардын коллекциясы сакталган цехке да сокку тийген.

Киевге жасалган сокку күнү-түнү уланды. Соломенск районунда беш кабаттуу турак үйдө өрт чыгып, жети адам жаракат алган.

Оболонск районунда дрондун сыныктары турак үйдүн короосунда турган унааны өрттөп кеткен. Өрттөнгөн унаанын жанынан аялдын сөөгү табылганын Киев шаарынын мэри Виталий Кличко билдирди.

Анын айтымында, Киевдин оң жээгин суу менен камсыздоо үзгүлтүккө учураган. "Укрэнерго" кечинде Украинанын борбор шаарында электр энергиясын авариялык өчүрүү башталганын жарыялады.

Киев шаардык аскердик администрациясы кечки чабуулдан эки адам (аял жана эркек) каза болгонун билдирди. Кийин Кличко эркек киши Оболонск районунда каза болгонун тактады.

Башка аймактарга жасалган соккулар

Орусиянын аскерлери "Фламинго" ракеталарын жана дрондорду чыгарууга байланыштуу объектилер деп Александрия шаарына, Кировоград облусуна, Днепрдеги машина куруу заводго жана Харьков облусундагы Лозовая шаарына да сокку урулганын билдирди.

Александрияда бийликтин маалыматына караганда, эки адам каза болуп, үчөө жаракат алган. Дагы бир адам дайынсыз.

"Өнөр жай объектисине зыян келтирилип, 2 миң чарчы метр аянтта өрт чыкты", - деп айтылат куткаруучулардын билдирүүсүндө.

Украин бийлиги Днепр шаарындагы өнөр жай ишканасына сокку урулганын да ырастады. Кезектеги чабуулдан шаарда 16 көп кабаттуу үй жабыркап, үйлөрдөгү 500гө жакын терезе талкаланганын шаардын мэри Борис Филатов билдирди.

Соккулар менен алмашуу

Апта башында Зеленский Орусия чабуул даярдап жатканын эскерткен.

"Чалгындоо кызматынан Орусия массалык сокку урууга даярданып жатканы тууралуу жаңыртылган маалымат келди. Баарыңыздардан сак болуңуздар деп суранам. Ракеталык коркунуч тууралуу сигналдарга көңүл буруп, тиешелүү чараларды көрүңүздөр", - деп жазган Украинанын президенти шейшемби күнү кечинде Facebook баракчасына.

Украина шейшемби күнү эртең менен Москваны массалык түрдө дрондор менен чабуулга алган. Кечинде болсо Сочи шаарына жакын Кара деңизде мунай ташыган танкерге сокку урган.

Москва облусунун губернатору Андрей Воробьев эки райондо эки адам каза болуп, 10 адам жаракат алганын жана 50гө жакын үй жабыркаганын билдирди.

Ал ошондой эле Telegram баракчасына шейшембиге караган түнү Москва облусунун үстүнөн 185 украиналык дрон атып түшүрүлгөнүн жазды. Ал эми Орусиянын Коргоо министрлиги өлкөнүн аймагынан жалпысынан 868 дрон жок кылынганын билдирди.

Зеленский Москванын аткыланышы тууралуу комментарий берген эмес. Бирок шаршемби күнү эртең менен Сочиге жакын деңизде мунай ташыган танкерге жарылуучу кайыктар менен сокку урулганын иш жүзүндө ырастап, күчтүү өрттүн видеосун жарыялаган. Өрттүн кесепеттерин жоюу иштери уланууда.

Болгария да бир күн мурда Кара деңиздеги өзүнүн экономикалык аймагында эки соода кемесине дрондор менен чабуул жасалганын билдирди. Алардын бири чөгүп кеткен. Экипаждын тагдыры азырынча белгисиз.

Орусия менен Украинанын ортосундагы акыркы массалык соккулар 25-сентябрда болгон. Ошол кезде Украинанын Куралдуу күчтөрүнүн Башкы штабы Пермь жана Ростов облустарындагы мунай иштетүүчү заводдорго, ошондой эле Ульяновск, Воронеж жана Тула облустарындагы ишканаларга сокку урулганын билдирген. Орусия болсо Киевге үзгүлтүксүз сокку уруусун уланткан.

Өткөн аптада Орусиянын аскерлери биринчи жолу Украинанын борборундагы Днепр аркылуу өткөн көпүрөлөргө сокку ура баштаган. Бул транспорттук башаламандыкка алып келген. Зеленский Орусиянын президенти Владимир Путин буга чейин колдонулуп келген чектөөлөрдү алып салып, аскерлерге каалаган бутага сокку урууга уруксат бергенин айткан.

"Ал эми азыр эч кандай эреже жок деп айтты", - деген Зеленский Financial Times басылмасына берген маегинде.

Путин августтун аягында эле Зеленский Орусиянын мунай иштетүүчү заводдоруна, дан ташыган кемелерине, логистикалык кампаларына жана башка объектилерине массалык сокку уруп, "Пандоранын кутусун өзү ачканын" билдирген.

Орусия буга жооп катары Украинанын металлургиялык заводдоруна, портторуна, кампаларына, маалымат борборлоруна, көпүрөлөрүнө жана башка инфраструктуралык объектилерине жаңы соккуларды жасай баштаган.

АКШнын "энергетикалык тыныгуу" жарыялоо боюнча чакырыктары азырынча эч кандай натыйжа берген жок.