KAI TSAYE, Yaƙin Iran da abubuwan da ke faruwa a Najeriya da sauran sassan duniya 02/06/2026

Rahoto kai-tsaye

Nabeela Mukhtar Uba da Haruna Kakangi

1. Mintuna 34 da suka wuceMalamai na zanga-zanga a faɗin Najeriya kan sace ɗaliban Borno da Oyo

   Dubban malamai a sassan Najeriya sun fantsama tituna a zanga-zangar gama gari inda suke neman a kuɓutar da gomman ɗaliban da aka sace a jihohin Oyo da Borno.

   A ranar Litinin aka soma zanga-zangar da ƙungiyar malamai ta Najeriya ta shirya inda sauran jihohi ciki har da Borno da Kano da Legas da Akwa Ibom da Abuja suka bi sahun jihohin Oyo da Ogun da suka fara tun farko.

   Ƙungiyar malaman ta ce zanga-zangar nuna goyon baya ce ga takwarorinsu da kuma ɗaliban da aka sace a wasu hare-hare da aka kai kan makarantu a Oyo da Borno wani lamari da ya jefa fargaba game da tsaron makarantu a zukatan mutane musamman iyaye.

   A biranen Maiduguri da Uyo da Legas, ɗaruruwan malamai ne suka yi tattaki kan tituna ɗauke da alluna inda suke rera waƙoƙi tare da neman a gaggauta sakin ɗalibai da malaman da aka sace.

   Akasarinsu kuma sun yi kira ga gwamnatin tarayya da gwamnatocin jihohi da su ƙarfafa matakan tsaro domin magance matsalar tsaro da ke ƙara taɓarɓarewa a sassan ƙasar.

2. Sa'o'i 2 da suka wuceƘarin mutum shida sun kamu da Ebola a Uganda

   Ma'aikatar lafiyar Uganda ta tabbatar da ƙarin mutum shida da suka kamu da Ebola, a jimulla yawan mutanen da suka kamu sun kai 15.

   Cikin wata sanarwa a shafin X, ma'aikatar lafiyar ta ce mutanen da suka kamu a yanzu na cikin waɗanda suka yi mu'amala da waɗanda a baya suka kamu da cutar.

   An fara samun ɓullar cutar a ranar 15 ga watan Mayu sakamakon mutuwar wani ɗan Congo da aka kwantar a wani asibitin kuɗi.

   Tun lokacin kuma aka yi ta samun ƙarin mutane da suka kamu da cutar ciki har da ma'aikatan lafiya.

   Ma'aikatar lafiyar ta kuma ce tana sa ido kan mutum 668 da ake zargin sun kamu da cutar a wani ɓangare na ƙoƙarin da take na daƙile bazuwar cutar.

   A gefe guda kuma, an sallami mutum biyu da suka warke daga cutar.

3. Sa'o'i 3 da suka wuce'Duniya za ta fuskanci tsananin yanayin zafi a bana'

   Sakatare Janar na Majalisar Ɗinkin Duniya, Antonio Guterres, ya ce ya zama dole duniya ta kalli yanayin zafin da ake ciki a matsayin wata matsala ta sauyin yanayi a duniya.

   Hukumar kula da yanayi ta duniya ta ce ana buƙatar a yi shirye-shirye domin tunkarar tasirin yanayin inda ake da yaƙinin za a yi tsananin zafi a watanni masu zuwa.

   Yanayin na iya janyo ɗumamar yanayi a sassan duniya.

   Hakan na faruwa duk shekara biyu zuwa bakwai inda na ƙarshe ya janyo 2024 ta zama shekara mafi zafi a tarihi.

4. Sa'o'i 4 da suka wuceMajalisar Turai ta amince a cire haraji kan kayayyakin Amurka

   Kwamitin kasuwancin ƙasa da ƙasa na majalisar dokokin Turai ya amince da wata yarjejeniya don cire harajin da aka ƙaƙaba kan wasu kayayyakin Amurka.

   Hakan muhimmin mataki ne aiwatar da yarjejeniyar da aka cimma ta Amurka don sassauta rikicin ƙasuwanci tsakanin Amurka da yankin na Turai.

   Ƙarƙashin yarjejeniyar, Brussels za ta soke duk wasu haraje-haraje kan kayayyakin Amurka yayin da a ɓangarenta Amurka za ta ƙayyade yawan harajin da za ta sa kan kayayyakin da ƙasashen Turai suke fitarwa a kan kashi 15.

   Har yanzu dokar na buƙatar amincewar majalisar Turai a wani taro da za a yi nan gaba a wannan watan.

5. Sa'o'i 4 da suka wuceShugaba Faye ya naɗa sabuwar majalisar ministoci

   Shugaban Senegal Bassirou Diomaye Faye ya sanar da sabuwar majalisar ministocin ƙasar da ta ƙunshi wasu mambobin jam'iyyar da suka yi aiki ƙarƙashin jagorancin tsohon ubangidansa kuma amininsa Ousmane Sonko.

   Mista Sonko, wanda aka kora daga muƙamin firaminista a kwanaki goma da suka gabata, bayan shafe watanni ana takun saƙar siyasa, ya sha alwashin jam'iyyarsa ta Pastef, ba za ta shiga cikin sabuwar gwamnati ba.

   Wakilin BBC ya ce Mista Sonko a gaban bainar jama'a ya riƙa sukar matakan da shugaban ƙasar ke ɗauka domin magance matsalar bashin da ƙasar ke fuskanta kafin ya kore shi daga aiki.

   Jam'iyyar Pastef ta Mista Sonko ita ce take da rinjaye a majalisar dokokin ƙasar kuma yan majalisar sun maida martani kan korar da aka yi wa Mista Sonko ta hanyar naɗa shi a matsayin kakakin majalisar dokokin ƙasar, wanda wani abu ne da zai ba shi damar ƙalubalantar shugaban na Senegal.

6. Sa'o'i 5 da suka wuceSojoji sun kuɓutar da fasinjoji 23 da aka sace a babbar hanyar Kogi

   Rundunar sojin Najeriya ta kuɓutar da fasinjoji 23 da wasu da ake zargin ƴanbindiga ne suka sace a kan hanyar Ayegunle zuwa Bunu a ƙaramar hukumar Kabba-Bunu da ke jihar Kogi.

   Cikin wata sanarwa a shafin X, rundunar sojin ta ce an kai samamen ne sakamakon kiran gaggawa da suka samu da sanyin safiya lamarin da ya sa sojoji suka gaggauta kai ɗauki yankin.

   A cewar sanarwar, maharan sun toshe babbar hanyar tare da garkuwa da matafiya da dama kafin jami'an tsaro su isa wajen.

   "Duk da cewa masu garkuwar sun tsere kafin jami'an tsaro su zo, sojoji sun yi hanzarin kai farmaki kan hanyoyin da mayaƙan ke bi," in ji sanarwar.

   Sojojin sun ce samamen ya sa sun gano motocin bas da motar dakon kaya da aka yasar kan titi.

   Sanarwar ta ƙara da cewa akwai mutum biyu da suka mutu sai wasu biyar da suka ji rauni inda aka gaggauta kai su asibitin St Joseph da ke Kabba kuma a nan ake kula da su.

7. Sa'o'i 6 da suka wuceMutum biyu sun mutu a zanga-zangar adawa da cibiyar Ebola ta Amurka a Kenya

   An harbe mutum biyu a garin Nanyuki da ke tsakiyar Kenya yayin da ake ci gaba da zanga-zanga kan shirin Amurka na buɗe cibiyar killace masu Ebola a sansanin soji da ke kusa.

   An harbi ɗaya daga cikin mutanen a wani yanki kusa da sansanin sojin sama da ke Laikipia inda ake zanga-zangar. Ya mutu ne bayan da abokansa suka kai shi asibitin garin.

   Ɗaya mutumin kuma gawarsa sojoji suka kai asibiti.

   Zuwa yanzu ba a san musabbabin mutuwarsu ba kuma jami'ai ba su ce komai ba kan lamarin.

   A ranar Litinin, ɗaruruwan masu zanga-zangar sun yi tattaki kan titunan garin inda suka toshe tituna tare da ƙona tayoyi a gefe guda kuma ƴan sanda sun yi ta harba haƴaki mai sa hawaye domin tarwatsa masu zanga-zangar.

   Shirin na Amurka na kafa cibiyar kula da masu Ebola a Kenya ya janyo damuwa a tsakanin al'ummar Kenya inda suke fargabar haɗarin bazuwar cutar a ƙasar.

   Likitoci daga Amurka ne za su kula da cibiyar mai gadaje 50 kuma za a yi amfani da ita ne wajen kula da Amurkawa da suka kamu da Ebola a Jamhuriyar Dimokraɗiyyar Congo.

   Zuwa yanzu babu rahoton ɓullar cutar ta Ebola a Kenya.

8. Sa'o'i 6 da suka wuce'Gwamnati ta yi watsi da yaranmu da aka sace a Borno'

   Gwamnatin Najeriya na ci gaba da fuskantar matsin lamba kan gaza kuɓutar da ɗaliban makaranta 42 da aka sace a jihar Borno da har yanzu ke hannun ƴanbindiga.

   Iyayen ɗaliban sun bayyana fargaba cewa kamar gwamnati ta manta da ƴaƴansu, saɓanin irin matakan da suke jin ana ɗauka a jihar Oyo na ƙoƙarin ceto ɗaliban da aka sace.

   Sai dai tuni mai bai wa shugaban Najeriyar shawara kan harkokin yaɗa labarai, Abdulaziz Abdulaziz ya musanta zargin da iyayen ɗaliban jihar ta Borno suka yi.

   Yaran dai sun shafe kwana 17 a hannun ƴanbindiga tun bayan sace su a garin Mussa a ƙaramar hukumar Askira Uba.

   Dakta Chi Namke shugaban al'umma ne a yankin ya shaida wa BBC cewa suna cikin tashin hankali kasancewar yaran da aka sace ƙanana ne.

   "Daga gwamnatin Borno, akwai kwamishinan ilimi da ya zo amma daga wajen gwamnatin tarayya ba mu ga ko mutum ɗaya ba," in ji Dakta Chi Namke.

   A cewarsa, irin haka tana faruwa a wasu jihohin kuma gwamnatin tarayya tana aika tawaga domin jajanta musu.

   Ambasada Ahmad Shehu, shugaban wata gamayyar ƙungiyar farar hula a yankin arewa maso gabas ya ce haƙƙin gwamnati ne ta gaggauta ceto ɗaliban.

   "Da aka yi na Mussa, ya faru a jihar Oyo a lokaci ɗaya, namu ba abin da aka yi, sai wancan kuma gwamnati ta ɗauki mataki." in ji shi.

   Ya ƙara da cewa "shugaban ƙasa ya buƙaci manyan jami'an tsaro da su tare a jihar Oyo domin ganin an kuɓutar da yaran da aka sace.

   Fadar gwamnatin ta bakin Abdulaziz Abdulaziz dai ta danganta iƙirarin iyayen ɗaliban jihar ta Borno da shelar ƴan adawa saboda a cewarsa shugaba Bola Tinubu yana ƙoƙari ya ga an yi abin da ya dace domin kuɓutar da ɗaliban.

   A yau Talata ne ƙungiyar ƙwadago ta malaman makaranta NUT za ta jagoranci zanga-zanga a sassan Najeriya domin tilasta wa gwamnati ɗaukar matakan gaggawa na ceto ɗaliban.

9. Sa'o'i 7 da suka wuceIsra'ila da Hezbollah na gwabza ƙazamin faɗa a Lebanon

   An ci gaba da gwabza ƙazamin faɗa a kudancin Lebanon duk da sanarwar da shugaba Donald Trump ya yi cewa Isra'ila da Hezbollah sun amince su daina faɗa da juna.

   Rahotanni sun ce ɓangarorin biyu sun kai wa juna hare-hare.

   Firayim Ministan Isra'ila, Benjamin Netanyahu ya tabbatar da yarjejeniyar, amma ya yi gargaɗin cewa za a ci gaba da kai hare-hare ta sama idan ƙungiyar Hezbollah ta ci gaba da kai farmaki kan Israila.

   Shugaba Trump ya ce ya tattauna da Netanyahu da wakilan Hezbollah kan shirin, bayan da Iran ta yi gargaɗin cewa matakin sojan da Isra'ila ta ɗauka a Lebanon barazana ce ga yarjejeniyar tsagaita wuta tsakanin Amurka da Iran a halin yanzu.

10. Sa'o'i 7 da suka wuceRasha ta kai farmakin da ya halaka mutum 13 a Ukraine

    Aƙalla mutum 13 ne aka kashe a jerin hare-haren da Rasha ta kai wa wasu biranen Ukraine ta hanyar amfani da jirage marasa matuƙa da makamai masu linzami.

    Magajin garin Kyiv, Vitali Klitschko ya ce an kashe mutane huɗu a babban birnin ƙasar, sannan an raunata fiye da hamsin, ciki har da yara da dama.

    Wakilin BBC ya ce magajin garin Kyiv ya kuma ce an kai wa wani asibiti hari, lamarin da ya sa wani ɓangare na ginin rugujewa.

    Hukumomin birnin Dnipro da ke gabashin ƙasar sun ce mutane tara ne suka mutu a hare-haren da aka kai a can.

    Tun farko shugaba Zelensky ya ce bayanan sirri sun nuna cewa Rasha na shirin kai wa ƙasarsa gagarumin farmaki.

11. Sa'o'i 8 da suka wuceBarka da Safiya

    A yau ma shafin Kai Tsaye na BBC Hausa na yi muku maraba, da fatan mun wayi gari lafiya.

    Kamar kodayaushe, za mu kawo maku labarai game da yaƙin Iran da sauran abubuwan da ke faruwa a Najeriya da sauran sassan duniya.

    Nabeela Mukhtar Uba tare da abokin aiki Haruna Kakangi za mu kasance tare da ku.

    Za ku iya leƙawa shafukanmu na sada zumunta domin kallon bidiyo da ma tafka muhawara game da labaran da muka wallafa.