પુરુષોના પગના વાળ મામલે ટોક્યોમાં કેમ થઈ રહ્યો છે વિવાદ

જાપાનમાં આ ઉનાળામાં તાપમાન વધવાની સાથે, જાપાનના પુરુષો કામના સ્થળે પહેલાં કરતાં વધુ પગ દેખાડવાનું પસંદ કરી રહ્યા છે.

ટોક્યો મેટ્રોપૉલિટન સરકાર કંપનીના કર્મચારીઓને તેમના સામાન્ય સૂટ અને ટાઈ છોડીને ટી-શર્ટ, શૂઝ અને શૉર્ટ્સ જેવા વધુ આરામદાયક કપડાં પહેરવા પ્રોત્સાહિત કરી રહી છે.

ટોક્યોના ગવર્નર યુરિકો કોઈકે એપ્રિલમાં "ટોક્યો કૂલ બિઝ"ની શરૂઆત કરી હતી, જે તેમની આ સિગ્નેચર કૂલ ડાઉન પહેલનો વધુ વિસ્તાર કરી શકાય, જે હવે એક લોકપ્રિય વાર્ષિક પરંપરા બની ગઈ છે.

લગભગ ચાર મહિના વિત્યા પછી ઑફિસ પૉલિસીમાં નવા મંજૂર કરાયેલા શૉર્ટ્સ પર મિશ્ર પ્રતિભાવો મળી રહ્યા છે.

કેટલાક લોકો આ હળવા નિયમોથી ખુશ છે કારણ કે તેનાથી તેઓ વધુ આરામથી કામ કરી શકે છે. જ્યારે અન્ય લોકોનું માનવું છે કે આ નીતિ મહિલાઓ પ્રત્યે અન્યાયી છે.

જોકે આ કોઈ સરકારી નિયમ નથી પરંતુ માત્ર એક શિષ્ટાચાર છે, છતાં જાપાનની પરંપરાગત ઑફિસ સંસ્કૃતિમાં જ્યારે મહિલાઓના પગ ખુલ્લા હોય તેવા કપડાં પહેરે, ત્યારે તેમની પાસે ટાઇટ્સ (પગ ઢાંકતા મોજાં) પહેરવાની અપેક્ષા રાખવામાં આવે છે.

બીજી તરફ, કેટલીક મહિલાઓએ આ અનુભવને "પગના વાળ દ્વારા ઉત્પીડન" અથવા ઇન્ટરનેટ પર પ્રખ્યાત થયેલા શબ્દ "સુનેહારા" તરીકે ઓળખાવ્યો છે, જેનો અર્થ સાથી પુરુષ કર્મચારીઓના પગના વાળ જોવા પડવાથી થતી અગવડતા છે.

"અમે લોકોને તીવ્ર ગરમીમાં વધુ વિકલ્પો આપવા માંગીએ છીએ, તેમને શું પહેરવું તે કહેવાની નહીં. જ્યાં સુધી કામનો પોશાક કોઈને વાંધાજનક ન લાગે ત્યાં સુધી કોઈ સમસ્યા ન હોવી જોઈએ," ટોક્યો મેટ્રોપોલિટન સરકારના પર્યાવરણ અધિકારી નોબોરુ વાતાનાબેએ બીબીસીને જણાવ્યું.

ટોક્યો મેટ્રોપોલિટન સરકારના પર્યાવરણ અધિકારી નોબોરુ વાતાનાબેએ બીબીસીને જણાવ્યું હતું કે, "અમે લોકોને અસહ્ય ગરમીથી રાહત મળે તે અર્થે વધુ વિકલ્પો આપવા માંગીએ છીએ, તેમને શું પહેરવું તે આદેશ આપવા નથી માંગતા. જ્યાં સુધી કામનાં કપડાં કોઈને અપ્રિય ન લાગે ત્યાં સુધી તેમાં કોઈ વાંધો ન હોવો જોઈએ."

ગોરિલા ક્લિનિક દ્વારા જૂનમાં કરાયેલા સરવેમાં જાણવા મળ્યું છે કે ઉનાળામાં કામ પર શૉર્ટ્સ પહેરવાનો 53.5 ટકા લોકોએ વિરોધ કર્યો હતો જ્યારે 46.5 ટકા નવી ભલામણના પક્ષમાં હતા.

જે લોકો ઑફિસમાં શૉર્ટ્સ પહેરવાની વિરુદ્ધમાં હતા, તે બંને જેન્ડરના લોકો માટે મુખ્ય કારણ શારીરિક દેખાવ અને શરીરના વાળ અંગેની ચિંતા હતી.

ક્લિનિકના જણાવ્યા અનુસાર, જવાબ આપનારાઓમાં પુરુષો કરતાં મહિલાઓની સંખ્યા નોંધપાત્ર રીતે વધુ હતી, જે દર્શાવે છે કે મહિલાઓ પુરુષ સહકર્મીઓના ખુલ્લા પગ જોવા પ્રત્યે વધુ અણગમો ધરાવે છે.

તાજેતરનાં વર્ષોમાં, ખાસ કરીને સ્ટાર્ટઅપ અને ટેક કંપનીઓમાં કામ કરતા જાપાની કર્મચારીઓએ કેઝ્યુઅલ (હળવા) કપડાં પહેરવાનું શરૂ કર્યું છે.

પરંતુ આ વર્ષે, ટોક્યો સરકારની ભલામણે આ વાતને સામાજિક રીતે વધુ સ્વીકાર્ય બનાવી દીધી છે. છતાં પણ, કેટલાક પુરુષો પોતાના પગના વાળને લઈને સંકોચ અનુભવી રહ્યા છે.

ગોરિલા ક્લિનિકના ડિરેક્ટર અકીફુમી ફુનાત્સુ કહે છે કે, તેમણે નોંધ્યું છે કે વધુ ગ્રાહકો માત્ર સુંદર દેખાવા માટે જ નહીં, પરંતુ "શૉર્ટ્સ પહેરતી વખતે સામાજિક શિષ્ટાચાર જાળવવા" માટે પણ ક્લિનિકમાં આવી રહ્યા છે. તેમનું માનવું છે કે મહિલાઓ એવું ઇચ્છે છે કે "પુરુષોના પગ પર ઓછા વાળ હોવા જોઈએ", જેના કારણે પુરુષો આસપાસના લોકોને અસ્વસ્થતા ન થાય તે માટે લેઝર હેર રિમૂવલ કરાવી રહ્યા છે.

કોઈકે સૌપ્રથમ 2005માં જાપાનના પર્યાવરણ મંત્રી તરીકે ઉનાળાનાં કપડાં બદલવાની શરૂઆત કરી હતી. તેમણે કંપનીના કર્મચારીઓને ટૂંકી બાયના શર્ટ પહેરવા પ્રોત્સાહિત કરવા માટે "કૂલ બિઝ" નામનું નૅશનલ એનર્જી સેવિંગ કૅમ્પેઇન શરૂ કર્યું હતું

સરકારી નેતાઓએ આ પહેલમાં ભાગ લીધો હતો, જેમાં તત્કાલીન વડા પ્રધાન જુનિચિરો કોઈઝુમી ઘણીવાર ટાઈ કે જૅકેટ પહેર્યા વિના જાહેરમાં જોવા મળ્યા હતા, જેથી લોકો સુધી આ સંદેશ પહોંચાડી શકાય.

માર્ચ 2011 માં તોહોકુ ભૂકંપ અને સુનામી પછી થોડાં વર્ષો પછી, સરકારે "સુપર કૂલ બિઝ" શરૂ કર્યું હતું જેના લીધે કાર્યસ્થળ અને ઘરે બંને જગ્યાએ ઊર્જાનો ઉપયોગ ઘટાડવામાં મદદ કરવા માટે માર્ગદર્શિકાનો વિસ્તાર કર્યો.

વિશ્વના અન્ય ભાગોની જેમ, જાપાન પણ તાજેતરના મહિનાઓમાં રેકૉર્ડબ્રેક ગરમીનો સામનો કરી રહ્યું છે અને સાથે સાથે મધ્ય પૂર્વમાં અસ્થિરતાને કારણે વધતા ઊર્જાના ભાવથી પણ ઝઝૂમી રહ્યું છે.

હવામાન શાસ્ત્રીઓએ આ ઉનાળામાં ભારે ગરમીની ચેતવણી આપી છે.

જાપાન હવામાન એજન્સીએ પારો 40°Cને વટાવી જાય ત્યારે જાગરૂકતા ફેલાવવા માટે "કોકુશો-બી" શબ્દની જાહેરાત કરી છે, જેનો અર્થ "અત્યંત ગરમ દિવસ" થાય છે.

ફાયર ઍન્ડ ડિઝાસ્ટર મૅનેજમેન્ટ એજન્સીના જણાવ્યા અનુસાર, તાજેતરના સાપ્તાહિક ડેટા દર્શાવે છે કે જાપાનમાં 6થી 12 જુલાઈ દરમિયાન સાત દિવસમાં હીટસ્ટ્રોકથી સાત લોકોનાં મોત થયાં હતાં અને 4,580 લોકોને હૉસ્પિટલમાં દાખલ કરવામાં આવ્યા હતા.

હાઇડ્રેટેડ રહેવા અને ઍર કન્ડિશનિંગ ચાલુ કરવા ઉપરાંત, સરકારી અધિકારીઓ દ્વારા વારંવાર પ્રોત્સાહિત કરાયેલા કેટલાંક મૂળભૂત પગલાંઓમાંથી રહેવાસીઓ ગરમીનો સામનો કરવા માટે નવા ઉત્પાદનો અને ગેજેટ્સ તરફ વળ્યા છે.

બિલ્ટ-ઇન પંખાવાળાં કપડાં, ડિસ્પોઝેબલ ભીના રૂમાલ, યુવી કિરણો અને તડકો રોકતી છત્રીઓ અને પોર્ટેબલ હૅન્ડહેલ્ડ પંખા જેવી વસ્તુઓ દેશભરની દુકાનોમાં વેચાઈ રહી છે.

જાપાન ઍકેડૅમિક નેટવર્ક ફૉર ડિઝાસ્ટર રિડક્શનના નિષ્ણાતો ગરમીને અનુકૂલિત કરવાની જરૂરિયાત પર ભાર મૂકી રહ્યા છે કારણ કે શરીરને ઊંચા તાપમાને અનુકૂલન કરવામાં ઘણાં અઠવાડિયાં લાગે છે.

તેઓ કહે છે કે મુખ્ય વાત એ છે કે દેશમાં ચોમાસાની ઋતુ દરમિયાન જ, ઉનાળાની સખત ગરમી આવે તે પહેલાં, ગરમ હવામાન માટેની તૈયારીઓ અને હીટસ્ટ્રોકથી બચવાના ઉપાયો શરૂ કરી દેવા જોઈએ.

જાપાનમાં ભેજનું પ્રમાણ પણ ઘણું વધારે હોય છે, જેના કારણે પરસેવો સુકાવામાં મુશ્કેલી પડે છે અને શરીરની પોતાની જાતને ઠંડુ રાખવાની ક્ષમતા ઘટી જાય છે.

બીબીસી માટે કલેક્ટિવ ન્યૂઝરૂમનું પ્રકાશન