Ethiopia: Umwanditsi mukuru w'urubuga rw'amakuru rwigenga yafashwe na polisi – bivugwa na nyirarwo

Umwanditsi mukuru w'urubuga rw'amakuru rwigenga rukomeye rwo muri Ethiopia yarashimuswe ndetse akubitwa n'abashinzwe umutekano, nkuko kompanyi nyir'urwo rubuga ibivuga.

Umwanditsi mukuru Yonas Kedir w'urubuga rw'amakuru Addis Standard yafashwe ku wa gatandatu ushize, afungwa amasaha 24 ndetse "ahatwa ibibazo igihe kirekire", nkuko itangazo rya Jakken Publishing ryo ku wa kane ribivuga, rikanavuga ku isaka ryakozwe ku biro by'urwo rubuga rw'amakuru.

Imiryango iharanira uburenganzira yasobanuye ibi bishya byabaye nk'ibiri muri gahunda imaze igihe kirekire yo kwibasira imbuga z'amakuru zigenga.

Leta ya Ethiopia ntiyasubije ubusabe bwa BBC bwo kugira icyo ibivugaho.

Muri Gashyantare (2) uyu mwaka, abategetsi bandukuye icyo gitangazamakuru Addis Standard, bavuga ko cyarenze ku mategeko agenga umwuga w'itangazamakuru ndetse banavuga ko giteje inkeke ku "nyungu z'igihugu" ariko ntibasobanuye amakuru bakomozagaho yo muri icyo gitangazamakuru.

Urwo rubuga rw'amakuru rwari rwashoboye gukomeza gukora mu gihe rwari ruhanganye n'icyo cyemezo mu rukiko.

Kompanyi Jakken Publishing itangaza icyo kinyamakuru yavuze ko iryo shimutwa rivugwa rya Yonas ryabaye ku munsi wa mbere mu minsi itatu y'igikorwa cyo kwibasira Addis Standard.

Ibiro ntaramakuru AFP byasubiyemo itangazo ryanditse rya Yonas agira ati: "Abantu babiri bambaye imyenda ya gisivile... bamfashe mu buryo bw'urugomo."

"Barankubise ndetse yanyinjiza ku gahato mu modoka ya 'pick-up' ifite ibice bibiri byo kwicaramo. Banshinje 'kugambanira igihugu'."

Ku munsi wa kabiri, hari ku cyumweru ku itariki ya 2 Kanama (8), itsinda ry'abashinzwe umutekano ryasatse ibiro by'icyo gitangazamakuru "mu buryo budakurikije amategeko", nkuko Jakken Publishing yabivuze, rifatira ibikoresho byo muri 'studio' by'icyo gitangazamakuru.

Nuko ku itariki ya 3 Kanama, polisi itangaza itegeko risaba iyo kompanyi kuva mu biro ikoreramo mu gihe kitarenze iminsi itatu, ibyo bishyira iherezo ku myaka 16 urwo rubuga rwari rumaze rukora.

Urubuga rw'amakuru rwa Addis Standard ruracyagaragara ndetse ruri gushyirwaho amakuru mashya ajyanye n'iryo saka n'ibyabaye nyuma yaho. Kompanyi nyir'urwo rubuga ivuga ko irimo kugisha inama ku cyo yakora nyuma y'ibyabaye.

Umuryango urengera abanyamakuru, Committe to Protect Journalists, wasobanuye ibyabaye nk'ibiri mu "kwiyongera guteye ubwoba kwo mu gikorwa cy'abategetsi ba Ethiopia cyo gusenya kimwe mu bigo bikomeye byigenga by'itangazamakuru byo muri icyo gihugu".

Umuryango uharanira uburenganzira bwa muntu, Human Rights Watch (HRW), na wo wanenze ibikorwa bya leta, uvuga ko itotezwa rya Addis Standard rihuye n'igikorwa kigari cya leta cyo gucecekesha abatangaza amakuru asesenguye.

HRW yatanze urugero rwo mu mwaka ushize, aho abategetsi ba Ethiopia bataye muri yombi nta gishingiweho abanyamakuru benshi, babafungira ahatazwi, ndetse bambura ibitangazamakuru impushya zo gukora.

Ikigo cya leta ya Ethiopia kigenzura imikorere y'ibitangazamakuru giherutse gutangaza "kuburira kwa nyuma mu nyandiko" ku bitangazamakuru Arts TV na Ahadu FM, gikangisha guhagarika cyangwa kwandukura impushya zabyo nyuma yo kubishinja gukomeza kurenga ku mategeko agenga itangazamakuru.

Amakuru y'inyongera yatawe na Damian Zane na BBC Monitoring