Umutoza mushya Vieira avuga ko gutoza Sénégal ari 'inzozi zuzuye' kuri we

Patrick Vieira avuga ko ari "icyubahiro" kuri we kuba umutoza w'ikipe y'igihugu y'umupira w'amaguru ya Sénégal, avuga ko icyemezo cyo kwemera ako kazi "cyavuye ku mutima".

Vieira, w'imyaka 50, yavukiye muri icyo gihugu cyo muri Afurika y'uburengerazuba ariko aza gukinira Ubufaransa, ndetse ari kumwe n'ikipe y'igihugu y'Ubufaransa izwi nka 'Les Bleus' batsindiye igikombe cy'isi cyo mu 1998 n'igikombe cy'Uburayi cyo mu 2000.

Ubwo yamurikwaga ku wa gatanu nk'umutoza mushya w'iyo kipe izwi nka 'Les Lions de la Teranga', uyu wahoze ari umukinnyi wo hagati mu kibuga w'ikipe ya Arsenal yavuze ko atewe "ishema ryinshi cyane" no gutangira akazi ke ka mbere nk'umutoza w'ikipe y'igihugu, nyuma yo gutoza amakipe ya New York City FC, Nice, Crystal Palace, Strasbourg na Genoa.

Mu kiganiro n'abanyamakuru mu murwa mukuru Dakar, yagize ati: "Kuba umutoza mukuru w'ikipe y'igihugu ya Sénégal ni inzozi zuzuye.

"Navukiye hano, ababyeyi banjye bavukiye hano, kandi rwose [uku] ni ugusubira mu rugo.

"Kuva ku nama za mbere na mbere nagiranye na perezida [w'ishyirahamwe ry'umupira w'amaguru muri Sénégal], nahise nemera uyu mukoro, kuko [ubu] hari n'igisekuru kidasanzwe cy'abakinnyi.

"Ndabibona ibyo abaturage biteze – miliyoni 20 zose z'Abanya-Sénégal. Kandi ndabizi ko hamwe n'ubunararibonye mfite, n'ishyaka [umuhate] mfite, nzashobora gusohoza uyu mushinga."

Vieira agiye kuri uyu mwanya nyuma yuko Pape Thiaw yirukanwe.

Asanze ikipe yasezerewe mu buryo butunguranye mu gikombe cy'isi cya 2026 muri kimwe cya 16 cy'irangiza itsinzwe n'Ububiligi ibitego 3-2, mu gihe nyamara yari yamaze iminota 85 ifite ibitego 2-0 bw'Ububiligi, ariko bukaza kuyigaranzura ndetse bukayitsinda mu gihe cy'inyongera.

Mbere yaho, ikipe y'igihugu ya Sénégal yatsindiye igikombe cy'Afurika cy'ibihugu (CAN/AFCON) cya 2025 muri Mutarama (1) muri uyu mwaka wa 2026, itsinze Maroc igitego 1-0 mu gihe cy'inyongera cy'umukino.

Ariko amaherezo aho icyo gikombe kizerekeza hazafatwaho umwanzuro n'urukiko nkemurampaka mu mikino (CAS/TAS), nyuma yuko ukwikura mu kibuga kwa bamwe mu bakinnyi na bamwe mu batoza b'ikipe ya Sénégal bamaganaga icyemezo cya penaliti muri uwo mukino wa nyuma, gitumye icyo gikombe ahubwo gihabwa Maroc muri Werurwe (3) uyu mwaka.

Vieira yagize ati: "Uyu munsi, Sénégal ni kimwe mu bihugu bikomeye mu mupira w'amaguru ku isi." Yavuze ko agiye kubakira ku byagezweho.

Yagize ati: "Icyiciro gishya gisobanuye ko akazi kanjye atari ugusenya buri kintu cyose...

"[Ahubwo] Ni ukugumishaho imbaraga z'iyi kipe: ikiyiranga, ubumwe bwayo, ubushobozi bwayo bwo kubabarana [nk'ikipe].

"Kugira ngo uyu mushinga ukunde, nzacyenera igihugu cyose cyunze ubumwe. Nzakorana umutima na roho kugira ngo nsubizeho ishema ry'ikipe."