'Ndashimira Nyagasani n'umucunguzi Yezu Kristu' – Désiré Doué wa PSG yongeye gutsindira Champions League

Abakinnyi ba Paris Saint-Germain bishimira kwegukana igikombe cya Champions League, bambaye imyenda yiganjemo ubururu, bambaye imidari mu ijosi, umwe muri bo ateruye igikombe acyerekeza hejuru, inyuma yabo hari ibishashi by'umuhondo by'urumuri rw'ibyishimo. Ifoto yo ku wa gatandatu, ku itariki ya 30 Gicurasi (5) mu mwaka wa 2026. — Insiguro y'isanamu, PSG ibaye ikipe ya kabiri gusa itwaye ibikombe byikurikiranya kuva Champions League itangiye kwitwa gutyo guhera mu mwaka wa 1993

Yatangajwe Haciye isaha 1

Igihe co gusoma: iminota 3

Ikipe ya Paris Saint-Germain (PSG) yo mu Bufaransa yashimangiye umwanya wayo nk'imwe mu makipe y'ibihangange yabayeho i Burayi nyuma yo kuba ikipe ya kabiri gusa yegukanye igikombe cya Champions League yikurikiranya.

Iyo ntsinzi igoranye yayigezeho kuri penaliti 4-3 mu mukino wa nyuma na Arsenal yo mu Bwongereza, wari warangiye i Budapest muri Hongrie mu gihe gisanzwe no mu gihe cy'inyongera amakipe yombi anganya igitego 1-1, yunga mu ntsinzi yagezeho mu mezi 12 ashize ubwo yanyagiraga Inter Milan ibitego 5-0 ku wundi mukino wa nyuma wa Champions League.

Mu gukora ibyo, PSG ihindutse ikipe ya mbere ishoboye kugumana iki gikombe kuva Real Madrid ibigezeho igatwara ibikombe bitatu yikurikiranya hagati y'umwaka wa 2016 n'uwa 2018, ndetse iba iya kabiri gusa ibikoze kuva Champions League itangiye kwitwa gutyo – ni ukuvuga guhera mu mwaka wa 1993.

Mu mateka y'imyaka 71 iri rushanwa rimaze, PSG ni yo kipe ya 10 gusa yegukanye ibikombe byikurikiranya.

PSG ni na yo kipe ya mbere yo mu Bufaransa yegukanye Igikombe cy'Uburayi (European Cup) / Champions League mu buryo bwikurikiranya.

Nyuma y'uwo mukino, umutoza wayo Luis Enrique yagize ati: "Ni uruvange kuri jye."

"Ibyishimo, umunaniro – buri kintu cyose. Ariko aka ni ko kanya keza cyane muri uyu mwaka w'imikino. Turacyafite igikombe, bibiri byikurikiranya, biratangaje."

Arsenal ni yo yari yafunguye amazamu ku munota wa gatandatu w'umukino ku gitego cya Kai Havertz, cyaje kwishyurwa mu gice cya kabiri na Ousmane Dembélé kuri penaliti ku munota wa 65.

Skip Ibisomwa cane and continue reading

Ibisomwa cane

End of Ibisomwa cane

Désiré Doué afashe ku gikombe cya Champions League, areba hejuru. Yambaye ikabutura n'umupira w'amaboko magufi byiganjemo ubururu bwijimye, yambaye n'umudari mu ijosi. — Insiguro y'isanamu, Désiré Doué yavuze ko kwegukana iki gikombe ari isengesho rye ryasubijwe

Mu kiganiro n'igitangazamakuru TNT Sports nyuma yuko PSG itsinze Arsenal, Désiré Doué yagize ati: "Biduteye ishema cyane, cyane, cyane, turishimye cyane kandi turashima.

"Wari umukino ukomeye twakinaga n'ikipe nziza. Tugomba kwishimira ibi nk'ikipe, [kandi] nk'umuryango kuko turabikwiye. Ndebera imbaga [uko imeze]! Ndashimira Nyagasani n'umucunguzi Yezu Kristu kuko ryari ryo sengesho ryanjye."

Avuga ku gutera penaliti ye yinjije, yagize ati: "Biri mu kazi kanjye. Ugomba kuguma utuje."

Ku cyo iyi ntsinzi ivuze kuri PSG, yagize ati: "Simbizi, ugomba kubyibwira. Tugomba gukomeza kwicisha bugufi kandi tuzongera dukore, turashaka byinshi, turi ikipe y'abakiri bato, bashonje [ku bikombe]. Tuzongera nanone."