Yıldırımhan - 'Inkuba': Menya iyi misile ya mbere ya Turukiya irasa kure cyane

Ikigo cy'ubushakashatsi n'iterambere cya Minisiteri y'Ingabo ya Turukiya cyashyize ahagaragara misile ya mbere y'igihugu iraswa kure cyane, yitwa "Yıldırımhan".

Iyo misile yerekanywe ku munsi wa mbere w'imurikagurisha mpuzamahanga ry'ingabo, indege, n'ikoranabuhanga ryo mu kirere ryiswe Saha-2026 ryabereye mu murwa mukuru Istanbul.

Mu gice cy'iyi misile, hari ishusho ya Bayezid wa mbere, sultani w'Ubwami bwa Ottoman uzwi ku izina rya "Yıldırım", bisobanura "Inkuba".

Nanone, umukono wa 'Field marshal' Mustafa Kemal Atatürk perezida wa mbere wa Turkiya ufatwa nk'uwashinze iki gihugu - ugaragara ahagana imbere ya misile.

Minisitiri w'ingabo wa Turukiya, Yaşar Güler, yavuze mu itangazo rigenewe abanyamakuru ko iyi misile ari yo ntwaro ya mbere mu ntwaro za gisirikare za Turukiya ishobora kuguruka ku muvuduko utangaje.

Misile 'ballistic' ziri mu bubiko bwa Turukiya

Mu myaka ya vuba aha, ibikorwa by'ubwirinzi bya Turukiya byakuruye amaso y'isi bitewe n'ubushobozi na gahunda yayo yo guteza imbere intwaro zirasa kure, ndetse n'indege za drones n'ibikoresho byigenga.

Mu imurikagurisha mpuzamahanga rya gisirikare ryabereye i Istanbul muri Nyakanga 2025, hagaragajwe misile y'intambara ya Typhoon Block-4 yakozwe na Roketsan.

Icyo gihe, iyo misile ifite uburebure bwa metero 10, ibiro 7.200 byavuzwe ko ari "misile yakozwe hifashishijwe ubushobozi bwite bwa Turukiya."

Nk'uko uwakoze ibisasu bya Typhoon abivuga, izindi misile za Typhoon zishobora gukora urugendo rungana na kilometero 280, mu gihe ubwoko bwa Block-4 bivugwa ko bushobora gukora urugendo rwa kilometero 1,000.

Biteganijwe ko misile ya "Genk" yo mu bwoko bwa "ballistic" iri gukorwa izagenda ahangana n'intera ya kilometero zigera ku 2,000 uvuye aho yarasiwe.

Mu myaka ya vuba aha, Uburusiya bwakoresheje ibisasu bya misile byo mu bwoko bwa ballistic birasa mu ntera yo hagati mu gutera uduce two muri Ukraine.

Mu buryo nk'ubwo, Iran yarashe ibisasu bya misile bikoreshwa mu kurasa kure n'ibiciriritse yerekeza muri Israel.

Misile ishobora kuraswa ku wundi mugabane ni iki?

Ibisasu bya misile biraswa kure cyane bizwi nka 'Intercontinental Ballistic Missiles (ICBM), ni intwaro zagenewe kurasa intego iri mu ntera ndende cyane.

Buri misile ishobora gutwara imitwe myinshi y'ibindi bisasu (warheads), kandi buri mutwe ufite ubushobozi bwo kuyoborwa ku giti cyawo no kurasa intego yawo.

Ibihugu nk'Uburusiya, Leta Zunze Ubumwe za Amerika, n'Ubushinwa biri ku isonga mu bitunze ubwo bwoko bw'intwaro.

Ibihugu nk'Ubwongereza, Ubufaransa, Ubuhinde, Koreya ya Ruguru, Israel na Iran nabyo bifite umubare muto w'ubu bwoko bwa misile, iraswa iturutse ku butaka cyangwa mu bwato bunini.

Zimwe muri izi misile zishobora gutwara imitwe y'intambara ya nikleyeri, ariko zishobora no gukoreshwa hamwe n'ibisasu bisanzwe.

Misile zisanzwe zikoreshwa mu kurasa zishobora kurasa hagati ya kilometero 300 na 5.500, mu gihe zimwe muri misile zikoreshwa mu kurasa kure cane zishobora kurenza kilometero 10.000.