Netanyahu yahishuye ko mu gihe cy'intambara na Iran yasuye UAE 'mu ibanga'

Minisitiri w'Intebe Benjamin Netanyahu wa Israel yavuze ko mu gihe cy'intambara na Iran "yasuye mu ibanga" Emira Zunze Ubumwe z'Abarabu (UAE) agahura na perezida w'iki gihugu.

Ibiro bya Netanyahu byavuze ko inama hagati ye na Perezida Sheikh Mohammed bin Zayed yageze "ku bwumvikane bw'amateka".

Gusa nyuma gato, minisiteri y'ububanyi n'amahanga ya UAE yahakanye amakuru y'urwo rugendo ivuga ko "nta shingiro na rito" afite, ko umubano w'ibihugu byombi udashingiye "ku nama zitazwi".

Iran yarashe ibisasu byinshi kuri UAE muri iyi ntambara, kandi Tehran yanenze kenshi iki gihugu ku byo yita imikoranire ya hafi na Israel na Amerika.

Ubu, Minisitiri w'ububanyi n'amahanga Abbas Araghchi wa Iran yavuze ko Netanyahu "yahishuriye mu ruhame ibyo inzego z'umutekano za Iran mu gihe cyashize" zabwiye abakuru b'iki gihugu.

Yongeyeho ko uko gufatanya na Israel "kutihanganirwa" kandi ko ababikora bose "bazabiryozwa".

Mu itangazo, Minisiteri y'ububanyi n'amahanga ya UAE yahakanye amakuru y'urugendo rwa Netanyahu cyangwa intumwa z'ingabo za Israel muri icyo gihugu.

Itangazo ryabo rigira riti: "UAE irongera gushimangira ko umubano wayo na Israel uba mu ruhame kandi ugengwa n'imikoranire izwi yatangajwe mu masezerano ya Abraham Accords, ntabwo ushingiye ku nzira zitari mu mucyo cyangwa zitazwi".

Amasezerano ya Abraham Accords ni ayashyizweho umukono hagati ya Israel n'ibihugu byinshi by'abarabu mu gihe cya manda ya mbere ya Perezida Trump agendanye no gusubizaho umubano wa Israel n'ibyo bihugu.

Ibiro ntaramakuru Reuters bisubiramo isoko y'amakuru ivuga ko inama ya Netanyahu na perezida wa Emira z'Abarabu yabereye i Al-Ain, umujyi uri hafi ya Oman, ikamara amasaha menshi.

Ku wa kabiri, ambasaderi wa Amerika muri Israel, Mike Huckabee yavuze ko Israel yoherereje UAE ibikoresho byifashishwa na 'Iron Dome system' kugira ngo iyifashe guhangana n'ibitero bya Iran.

Iron Dome ni uburyo buteye umbere bw'igisirikare cya Israel bukoreshwa mu gufata no gushwanyaguza ibisasu, misile na za drones birashwe bikiri mu kirere.

Huckabee yavuze ko uko kohereza Iron Dome kwari umusaruro "w'umubano udasanzwe hagati ya UAE na Israel" ushingiye ku masezerano ya Abraham Accords.

Intambara ya Israel na Amerika kuri Iran isa n'iyatumye uwo mubano ukomera kurushaho – ndetse uzamo no gufashanya mu bya gisirikare.

Mu ntambara, Iran yarashe ibisasu byinshi na za 'drones kamikaze' kuri UAE.

Tariki 10 z'uku kwezi kwa Gicurasi Minisiteri y'ingabo ya UAE yavuze ko ubwo buryo bwo kwirinda bwarashe drones ebyiri zaturutse muri Iran.

Bongeyeho ko muri rusange icyo gihugu kimaze kurasa 'ballistic misiles' 551, 'cruise missiles' 29 na 'drones' 2,265 kuva iyi ntambara yatangira mu mpera za Gashyantare(2) ubwo Israel na Amerika bateraga Iran.

Ku wa mbere ikinyamakuru Wall Street Journal cyavuze ko UAE na yo yagabye ibitero kuri Iran, ibyo itaremera mu ruhame, harimo ibitero ku nganda zitunganya ibitoro ku kirwa cya Lavan cya Iran mu kwezi gushize.

Ku wa gatatu, Anwar Gargash umujyanama wa Perezida wa UAE yavuze ko iki gihugu cyifuza dipolomasi ariko cyari gifite uburenganzira bwo kwirengera.

Mu butumwa yashyize ku mbuga nkoranyambaga, Gargash yavuze ko UAE itigeze yifuza intambara kandi yagerageje kuyirinda, ko "umubano wa Iran n'Abarabu mu Kigobe udashobora kubakirwa ku makimbirane no guhangana".

Agahenge kadakomeye hagati ya Amerika na Iran kamaze ukwezi.

Gusa Iran yakomeje gufunga umuhora wa Hormuz mu kwihimura ku bitero bya Amerika na Israel, ibyatumye ibiciro by'ibitoro ku isi bizamuka kuko uwo muhora ucamo ibigera kuri 20% bijya ku isoko ry'isi.

Amerika na yo yakomeje gufunga ibyambu bya bya Iran mu gushyira igitutu kuri Tehran ngo yemere ibyo Washington isaba.

Ku cyumweru, mu gusubiza Amerika, Iran yatangaje na yo ibyo isaba ngo intambara irangire inafungure umuhora wa Hormuz.

Gusa Trump yanze ibyo Iran isaba avuga ko "bitakwihanganirwa" abyita "umwanda" kandi avuga ko agahenge kariho ubu kari "ku byuma binini bifasha guhumeka"

Mohammad Ghalibaf umukuru w'inteko ishingamategeko ya Iran yasubirije ku rubuga X ko ingabo za Iran "ziteguye gusubiza no guha isomo ubushotoranyi bwose".