تاجیکستان به انتقادها درباره اخراج پناهندگان افغان‌ پاسخ داد

کمیته دولتی امنیت ملی تاجیکستان اطلاعیه‌ای را تحت عنوان «پاسخ به مراجعه شهروند افغانستان، محمد حکیم تورسن» در مورد قضیه اخراج گروهی مهاجران افغان از این‌ کشور منتشر کرده است.

این اطلاعیه از طریق، «خاور»، خبرگزاری دولتی تاجیکستان، منتشر شده است.

ظاهرا آقای تورسن، کاندیدای سابق ریاست جمهوری افغانستان، که فعلا ساکن آلمان است در شبکه‌های اجتماعی از مقامات تاجیکستان خواسته بود تا در مورد چگونگی قضیه اخراج گروهی مهاجران افغان از این کشور وضاحت بدهند.

کمیته دولتی امنیت ملی تاجیکستان در این اطلاعیه گفته است که برخی مهاجران افغان «قوانین کشور میزبان را نقض کرده‌اند.»

در این اطلاعیه موارد نقض قوانین شامل اتهام‌های جرایم جنایی از جمله قتل، قاچاق مواد مخدر، خشونت جنسی، جعل اسناد، و ایجاد مراکز قمار خوانده شده است.

برخی از موارد شامل اتهام‌های سیاسی است؛ از جمله همکاری با احزاب و «حرکت‌های تروریستی و سازمان‌های خرابکار.»

با این‌حال اعلامیه از وضاحت کافی در مورد اینکه مهاجران افغان با کدام «حرکت‌های تروریستی» یا «سازمان‌های خرابکار» ارتباط داشته‌اند، برخوردار نیست.

در قسمت جرایم جنایی نیز مدرکی از چگونگی رویدادها، صحبت‌های متهمین یا وکیل آنها منتشر نشده است.

تنها به یک مورد که ظاهرا شروع داستان اخراج‌ها از همانجا بوده، اشاره شده و آمده است که «۳۰ اپریل ۲۰۲۶ در شمال تاجیکستان یک شهروند افغانستان، بنام رحمان محمدعمر، عزیزه واحدوا، ساکن محله چشمه شهر خجند را با قساوت خاصی کشته است». گفته شده که این زن در یک سالن خصوصی ماساژ در مرکز ولایت سغد تاجیکستان مشغول کار بوده است.

نظر متهم این دوسیه یا وکیل مدافع او در رابطه به اتهامات مطرح‌شده در دسترس نیست.

کمیته دولتی امنیت ملی تاجیکستان گفته که تصمیم اخراج مهاجران افغان «برای تضمین حاکمیت قانون و آرامش ساکنان» و«جلوگیری از ارتکاب جرایم در آینده» اتخاذ شده است.

هفته قبل، ساکنان محلی تاجیکستان که در ناحیه جباررسول‌اف، ولایت سغد در شمال تاجیکستان زندگی می‌کنند به خبرگزاری آسیا-پلاس گفته‌ بودند که حدود ۲۵۰ شهروند، پس از بازداشت یک مهاجر افغان به اتهام «قتل یک زن تاجیکستانی از این منطقه رد مرز شده‌اند.»

منابع محلی در ولایت قندوز هم به نقل از مهاجرینی که به این ولایت رد مرز شده‌‌اند، گفتند که به آنان «حتی اجازه داده نشده بود تا وسایل‌شان را با خود بردارند».

اخراج گروهی مهاجران افغان در هفته گذشته واکنش‌های زیادی را در شبکه‌های اجتماعی، رسانه‌های افغانستان و رسانه‌های بین‌المللی به دنبال داشت. بسیاری، این اقدام دولت تاجیکستان را «مجازات جمعی برای جرم یک نفر» خوانده و آن را محکوم کرده بودند.

تاجیکستان می‌گوید «بیشتر از ده هزار خانواده افغان»، که مقررات قوانین را رعایت می‌کنند، در این کشور با آرامش زندگی می‌کنند و از همه امتیازات برخوردارند.