Cymuned ralïo yn 'teimlo'n hollol wag' ar ôl marwolaeth swyddog

Mae'r gymuned ralïo yn "teimlo'n hollol wag" yn dilyn marwolaeth swyddog 70 oed yn ystod digwyddiad yn Sir Ddinbych.

Cadarnhaodd Motorsport UK a Clwyd Vale Motor Club fod Ian Williams wedi marw, ar ôl yr hyn y maen nhw'n amau oedd yn "ddigwyddiad meddygol".

Yn wreiddiol cafodd y digwyddiad, The Bob Twin Cam Memorial 12 Car Navigational Rally ei sefydlu er cof am dad y dyn fu farw, Bob Williams ac mae ralïo wedi bod yn rhan fawr o'r teulu ers blynyddoedd maith.

Cafodd Heddlu'r Gogledd eu galw i wrthdrawiad ar lôn gefn rhwng y B5105 a Melin-y-Wig, ger Corwen, toc wedi hanner nos fore Sadwrn.

Wrth roi teyrnged dywedodd Clwyd Vale Motor Club fod y newyddion wedi'u "llorio".

"Roedd Ian yn un o'r dynion hyfrytaf y gallwch chi fyth gwrdd ag ef a bydd pawb oedd yn ei adnabod yn ei golli'n fawr."

Cafodd y digwyddiad ei stopio a'i ohirio ar ôl y gwrthdrawiad a dywedodd Motorsport UK eu bod nhw, ynghyd a'r tîm trefnu, yn cefnogi ymholiadau'r awdurdodau.

Dywedodd y llu ar y penwythnos fod y gwrthdrawiad yn ymwneud â char rali Ford Escort melyn o 1992 ac y bu farw'r gyrrwr 70 oed yn y fan a'r lle.

Ddydd Sadwrn cyhoeddodd Motorsport UK ddatganiad yn dweud bod Ian Williams wedi marw yn dilyn yr "hyn sy'n cael ei amau o fod yn episod meddygol".

"Er gwaethaf ymateb ac ymdrechion gorau'r gwasanaethau brys...bu farw Ian yn ystod y digwyddiad," meddai'r llefarydd.

"Mae ralïo wedi bod wrth wraidd y teulu Williams ers pedair cenhedlaeth," meddai'r llefarydd.

"Roedd mab ac ŵyr Ian hefyd yn swyddogion yn y digwyddiad neithiwr, gan adlewyrchu ymrwymiad oes y teulu i'r gamp a natur glos y gymuned ralïo."

Ychwanegodd y llefarydd fod eu meddyliau gyda theulu a ffrindiau'r diweddar Mr Williams "yn yr amser eithriadol o anodd yma".

"Mae'r teulu wedi gofyn am breifatrwydd yn ystod yr amser anodd yma ac ni fydd unrhyw wybodaeth bellach yn cael ei rhyddhau ar hyn o bryd."