Heddlu'n chwilio am ddau berson ar ôl i fechgyn gael eu trywanu yng Nghaerdydd

Parc Lydstep, CaerdyddGoogle

Cafodd dau fachgen, 16 ac 17 oed, eu cludo i'r ysbyty ar ôl cael eu trywanu ym Mharc Lydstep, Caerdydd, nos Sul

Mae'r heddlu'n chwilio am ddau berson ar ôl i ddau fachgen yn eu harddegau gael eu trywanu yng Nghaerdydd.

Cafodd dau fachgen lleol, 16 ac 17 oed, eu cludo i Ysbyty Athrofaol Cymru ar ôl cael eu trywanu ym Mharc Lydstep, Gabalfa, ychydig cyn 19:00 nos Sul.

Dywedodd Heddlu'r De nad yw'r anafiadau'n rhai sy'n peryglu bywyd a bod un o'r bechgyn bellach wedi gadael yr ysbyty.

Mae'r llu yn chwilio am ddau berson y maen nhw'n credu oedd yn teithio ar feic Surron yn y parc o gwmpas amser yr ymosodiad.

Ychwanegon nhw eu bod wedi dod o hyd i gyllell.

Presenoldeb yr heddlu am gynyddu

Dywedodd y Ditectif Arolygydd Phil Marchant, o Heddlu'r De: "Mae'n destun pryder mawr pan gaiff unrhyw un ei drywanu, ond mae oedran y ddau ddioddefwr yn debygol o bryderu rhieni a phobl ifanc eraill yn yr ardal.

"Rydym yn cynnal ymholiadau helaeth i adnabod y rhai sy'n gyfrifol cyn gynted â phosibl, a bydd lluniau teledu cylch cyfyng yn allweddol i'r ymchwiliad.

"Rydym yn annog tystion neu unrhyw un sydd â system deledu cylch cyfyng i gysylltu â Heddlu De Cymru neu Crimestoppers."

Ychwanegodd bod y llu yn ymwybodol o bryderon yn yr ardal am ddefnydd anghyfreithlon a gwrthgymdeithasol o feiciau trydan a beiciau modur a dylai trigolion weld cynnydd ym mhresenoldeb yr heddlu dros y dyddiau nesaf.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.