တိုက်ရိုက်ထုတ်လွှင့်မှု, အိန္ဒိယ-မြန်မာ နှစ်နိုင်ငံနယ်စပ်မှာ လက်နက်ကိုင်တပ်တွေ မရှိရေး နေပြည်တော်နဲ့ ဒေလီဆွေးနွေး

တိုက်ရိုက် ထုတ်လွှင့်ချက်

1. လွန်ခဲ့သော ၂၉ မိနစ် ကအတ္တလန္တိတ် အပျော်စီးသင်္ဘောပေါ်မှာ ကူးစက်ခဲ့တဲ့ ဟန်တာဗိုင်းရပ်စ် ဆိုတာ ဘာလဲ

   

   ဓာတ်ပုံ ရင်းမြစ်, Getty Images

   အတ္တလန္တိတ် သမုဒ္ဒရာမှာ ရွက်လွှင့်သွားနေတဲ့ အပျော်စီး သင်္ဘောတစ်စင်းပေါ်မှာ ဟန်တာဗိုင်းရပ်စ်လို့ ယူဆရတဲ့ ရောဂါပိုး ကူးစက်ဖြစ်ပွားခဲ့အပြီး လူ သုံးဦး သေဆုံးခဲ့တယ်လို့ WHO ကမ္ဘာ့ကျန်းမာရေးအဖွဲ့က ပြောပါတယ်။

   လူတစ်ဦးမှာ ဟန်တာဗိုင်းရပ်စ် ကူးစက်ခံခဲ့ရကြောင်း အတည်ပြုနိုင်ခဲ့ပြီး နောက်ထပ် ငါးဦးကို စစ်ဆေးနေဆဲပဲ လို့ ဆိုပါတယ်။

   ဟန်တာဗိုင်းရပ်စ် လို့ ယူဆရတဲ့ ကူးစက်ဖြစ်ပွားမှုတွေနဲ့ ပတ်သက်လို့ နောက်ထပ် ဓာတ်ခွဲစစ်ဆေး စမ်းသပ်မှုအပါအဝင် အသေးစိတ် စစ်ဆေးမှုတွေ လုပ်နေဆဲ ဖြစ်တယ်လို့ WHO က ဘီဘီစီကို ပြောပါတယ်။

   အာဂျင်တီးနားကနေ ကိတ်ပ် ဗာဒ် ဆီ သွားနေတဲ့ MV Hondius အပျော်စီးသင်္ဘောပေါ်မှာ ဒီရောဂါကူးစက်ဖြစ်ပွားမှုခဲ့တာလို့ သတင်းတွေအရ သိရပါတယ်။

   အပြည့်အစုံကို ဒီလင့်ခ် ကိုနှိပ်ပြီး ဆက်လက်ဖတ်ရှုနိုင်ပါတယ်။

2. လွန်ခဲ့သော တစ်နာရီ ကအိန္ဒိယ-မြန်မာ နှစ်နိုင်ငံနယ်စပ်မှာ လက်နက်ကိုင်တပ်တွေ မရှိရေး နေပြည်တော်နဲ့ ဒေလီဆွေးနွေး

   

   ဓာတ်ပုံ ရင်းမြစ်, တယ်လီဂရန်

   အိန္ဒိယ-မြန်မာ နှစ်နိုင်ငံနယ်စပ်ဒေသအတွင်း လက်နက်ကိုင်တပ်တွေ မရှိဖို့ နှစ်နိုင်ငံကြား လုံခြုံရေးအရ ပူးပေါင်းဆောင်ရွက်မှုတွေ လုပ်ဖို့ ဆွေးနွေးထားတယ်လို့ အိန္ဒိယ‌ရေတပ်ဦးစီးချုပ်နဲ့ မြန်မာစစ်ခေါင်းဆောင်သစ် ဗိုလ်ချုပ်ကြီး ရဲဝင်းဦးတို့ ဆွေးနွေးထားတယ်လို့ နေပြည်တော်ဘက်က သတင်းထုတ်ပါတယ်။

   အိန္ဒိယရေတပ် ဗိုလ်ချုပ်ကြီး ဒီနေရှ် ကေ တရီပါသီနဲ့ စစ်‌ခေါင်းဆောင် ဗိုလ်ချုပ်ကြီး ရဲဝင်းဦးတို့ မနေ့ မေ ၄ ရက်က နေပြည်တော်မှာ တွေ့ဆုံချိန် ဆွေးနွေးခဲ့တာလို့ ဆိုပါတယ်။ အိန္ဒိယရေတပ်ရဲ့ထုတ်ပြန်ချက်မှာတော့ နယ်စပ်က လက်နက်ကိုင်တပ်တွေအကြောင်း ထည့်သွင်းဖော်ပြထားတာမျိုး မရှိပေမဲ့ ဒေသတွင်းတည်ငြိမ်မှုနဲ့ လုံခြုံရေးကို မြှင့်တင်ဖို့ နှစ်နိုင်ငံကာကွယ်ရေးဆိုင်ရာ ဆောင်ရွက်မှုတွေကို မဟာဗျူဟာအဆင့်အထိ သက်ရောက်မှုရှိရေး ဆွေးနွေးခဲ့ကြတယ်လို့ ကြေညာထားပါတယ်။

   တရီပါသီရဲ့မြန်မာပြည်ခရီးစဉ်ဟာ မေ ၂ ရက်ကနေ ၅ ရက်အထိဖြစ်ပြီး အဲဒီအချိန်အတွင်း မြန်မာရေတပ် ဗဟိုကွပ်ကဲမှုဌာနက အရာရှိတွေနဲ့လည်း တွေ့ဆုံထားတယ်လို့ အိန္ဒိယရေတပ်ဘက်က ပြောထားပါတယ်။

   နှစ်နိုင်ငံနယ်စပ်ဒေသမှာ မြန်မာဘက်ခြမ်း စစ်ကိုင်းအနောက်ဘက်က တမူးအပါအဝင် ချင်းပြည်နယ်အနောက်ခြမ်းက တီးတိန်နဲ့ ဖလမ်းစတဲ့ဒေသတွေမှာ ချင်းကာကွယ်ရေးတပ်ဖွဲ့၊ အာရက္ခတပ်တော်(အေအေ)အပါအဝင် တော်လှန်ရေးပူးပေါင်းတပ်တွေနဲ့ မြန်မာစစ်တပ်တို့ကြား တိုက်ပွဲတွေဖြစ်ပွားနေဆဲဖြစ်ပါတယ်။

   အလားတူ အိန္ဒိယအစိုးရကို တော်လှန်နေတဲ့ နာဂနဲ့ ကသည်းလက်နက်ကိုင်အဖွဲ့တချို့လည်း မြန်မာ-အိန္ဒိယနယ်စပ်တကြောမှာ ပျံ့နှံ့အခြေစိုက်ထားကြတာဖြစ်ပါတယ်။

   အိန္ဒိယစစ်တပ်ဟာ ပြီးခဲ့တဲ့နှစ်တုန်းက နယ်စပ်က အဲဒီလက်နက်ကိုင်တပ်တွေကို နှိမ်နင်းတဲ့စစ်ဆင်ရေးလုပ်တယ်လို့ဆိုပြီး ဒရုန်းနဲ့ တိုက်ခိုက်မှုတွေလုပ်ခဲ့တယ်လို့ လူသိရှင်ကြားကြေညာပြီး အဲဒီစစ်ဆင်ရေးကို ဉီးဆောင်ခဲ့သူ အရာရှိကိုလည်း ဂုဏ်ပြုဆုတံဆိပ်ချီးမြှင့်ခဲ့ဖူးပါတယ်။

   ဒါပေမဲ့ မြန်မာနယ်စပ်မှာ အိန္ဒိယရဲ့ စစ်ရေးလုပ်ဆောင်ချက်တွေကို နေပြည်တော် ဘက်က တိတ်ဆိတ်နေခဲ့ပြီး အိန္ဒိယရေချုပ်ရဲ့ အခုခရီးစဉ်ရောက်မှ နှစ်နိုင်ငံ နယ်စပ်တည်ငြိမ်ရေးလုပ်ဆောင်မယ်လို့ မြန်မာစစ်တပ်ခေါင်းဆောင် ဗိုလ်ချုပ်ကြီး ရဲဝင်းဦးက ပြောလာတာဖြစ်ပါတယ်။

   အမျိုးသားညီညွတ်ရေးအစိုးရ(NUG) ကတော့ နာဂနဲ့ ကသည်းလက်နက်ကိုင်အဖွဲ့အချို့ဟာ မြန်မာစစ်တပ်နဲ့ ပူးပေါင်းပြီး ပြည်သူ့ကာကွယ်ရေးတပ်ဖွဲ့(PDF)တွေကို တိုက်ခိုက်တာတွေရှိနေတယ်လို့ အစောပိုင်းကတည်းက ထုတ်ပြန်ထားပါတယ်။

   အိန္ဒိယရေချုပ်နဲ့ ဗိုလ်ချုပ်ကြီး ရဲဝင်းဦးတို့ နေပြည်တော် တွေ့ဆုံမှုကနေ ပင်လယ်ရေကြောင်း ကုန်သွယ်မှုဆိုင်ရာကိစ္စရပ်တွေအပြင် နှစ်နိုင်ငံရေတပ်ကြား စစ်ရေးလေ့ကျင့်ရေးတွေကိုလည်း ပူးပေါင်းလုပ်သွားတယ်လို့ သတင်းထုတ်ပြန်ချက်ထဲမှာ ဖော်ပြပါတယ်။

   အိန္ဒိယရေတပ်ချုပ်ရဲ့ ခရီးစဉ်အတွင်း အိန္ဒိယအစိုးရက ပံ့ပိုးပေးထားတဲ့ စစ်ဘက်ဆိုင်ရာ ကိရိယာတွေကို မြန်မာ‌‌ ရေတပ်ဘက်ကို လွှဲပြောင်းပေးထားသလို အဲဒီထဲမှာ သင်္ဘောအသုံးအဆောင်ပစ္စည်းတွေ၊ ကမ်းရိုးတန်းလုံခြုံရေးအတွက် အသုံးပြုနိုင်တဲ့ကိရိယာတွေ ပါဝင်တယ်လို့ အိန္ဒိယဘက်က ဆိုပါတယ်။

   အိန္ဒိယရေတပ်ရဲ့ စစ်ရေယာဉ် ၂ စင်းဟာ ချစ်ကြည်ရေးခရီးလည်ပတ်ဖို့ဆိုပြီး မနေ့ ဧပြီ ၄ ရက် ညနေပိုင်းမှာပဲ ရန်ကုန်မြို့ သီလဝါဆိပ်ကမ်းကို ရောက်ရှိနေပြီဖြစ်ပါတယ်။

3. လွန်ခဲ့သော တစ်နာရီ က

   မင်္ဂလာပါ။ မေ ၅ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။