ဇွန် ၇ ရက် နိုင်ငံတဝန်းသတင်းများ အနှစ်ချုပ် - နေပြည်တော်တိုင်းကို ဝိုင်းပတ်တဲ့ စစ်ဆင်ရေးအရှိန်မြှင့်နေတယ်လို့ PDF တိုင်းစစ်ဌာနပြော
ဓာတ်ပုံ ရင်းမြစ်, Nay Pyi Daw PDF
စစ်ဘက် အရပ်ဘက် အာဏာဗဟိုချက်ရှိရာ နေပြည်တော်တိုင်းကို ဝိုင်းပတ်တဲ့ စစ်ဆင်ရေး အရှိန်မြှင့်နေတယ်လို့ အမျိုးသားညီညွတ်ရေးအစိုးရ(NUG)၊ ပြည်သူ့ကာကွယ်ရေးတပ်(PDF)ရဲ့ နေပြည်တော်တိုင်းစစ်ဌာနက သတင်းထုတ်လာပါတယ်။
ပဲခူးတိုင်း၊ ဆွာမြို့နယ်၊ စစ်တောင်းမြစ်အရှေ့ဘက်ကမ်းမှာရှိပြီး နေပြည်တော်နဲ့ မိုင် ၄၀ ကျော် အကွာမှာရှိတဲ့ ဆွာမကြီး(ဆွာရွာမ) ကျေးရွာက စစ်တပ် စခန်းကို သိမ်းတဲ့ထုတ်ပြန်ချက်မှာ PDF နေပြည်တော်တိုင်း စစ်ဌာနက အခုလို ပြောလာတာဖြစ်ပါတယ်။
စစ်တပ် အင်အား ၆၀ ခန့် တပ်စွဲထားတဲ့ အဲဒီစခန်းကို ဇွန် ၃ ရက်မှာ သိမ်းခဲ့ပေမဲ့ ဇွန်လ ၆ ရက်မှ သတင်းထုတ်တာဖြစ်ပါတယ်။
ဇွန်လ ၃ ရက်၊ မနက် ၅ နာရီကျော်မှာ စတင်တိုက်ခိုက်တာဖြစ်ပြီး ၁ နာရီ နီးပါးအတွင်း စခန်းသိမ်းခဲ့တယ်လို့လည်း ဆိုပါတယ်။
အခုသိမ်းပိုက်လိုက်တဲ့ စခန်းကို PDF တပ်ဖွဲ့ဝင်တွေက ၂၀၂၅ ခုနှစ်မှာ တိုက်ခိုက်ခဲ့ဖူးပေမဲ့ မအောင်မြင်ခဲ့ဘဲ ဒီတစ်ကြိမ်မှသာ စခန်းသိမ်းနိုင်ခဲ့တာလို့လည်း ဆိုပါတယ်။
PDF နေပြည်တော်တိုင်းစစ်ဌာနနဲ့နီးစပ်တဲ့ စစ်ရေးသတင်းအရင်းအမြစ်တစ်ဦးကတော့ ဒီစခန်းဟာ စစ်တပ်ရဲ့ ထောက်ပို့ရေးလမ်းကြောင်းအတွက် အရေးပါတဲ့ စခန်းဖြစ်တယ်လို့ပြောပါတယ်။
PDF နေပြည်တော်တိုင်းစစ်ဌာနကတော့ တိုက်ပွဲအတွင်း စစ်တပ် တကရ (၆၀၁၇) တင့်ကားတပ်ရင်းက ဗိုလ်မှူး ကျော်လင်းအောင် (ကြည်း - ၄၄၇၂၉) အပါအဝင် အယောက် ၂၀ သေဆုံးခဲ့တယ်လို့ ထုတ်ပြန်ပါတယ်။
စစ်တပ်ဘက်က ထိခိုက်သေဆုံးမှုနဲ့ ပတ်သက်ပြီး ဘီဘီစီက သီးခြားအတည်မပြုနိုင်ပါဘူး။
PDF ဘက်ကတော့ သေနတ်တွေ၊ ကျည်တွေနဲ့ မိုင်းတွေပါသိမ်းမိတဲ့ အခုစခန်းသိမ်းတိုက်ပွဲမှာ PDF နေပြည်တော်တိုင်းစစ်ဌာန၊ ဗျူဟာ အမှတ် ၁၈ နဲ့ ၁၉ အောက်က PDF တပ်ရင်းတွေ၊ နေပြည်တော်ပြည်သူ့ကာကွယ်ရေးအဖွဲ့(ပကဖ)တို့ ပူးပေါင်းပြီးပြုလုပ်ခဲ့တာလို့ ဆိုပါတယ်။
စစ်တပ်ဟာလက်ရှိ ရေတာရှည်နဲ့ ဆွာမြို့နယ်ထဲက ကျေးရွာတွေကို စစ်ကြောင်းထိုးလာနေလို့ နေပြည်တော်တိုင်းစစ်ဌာနကွပ်ကဲမှုအောက်မှာရှိတဲ့ တပ်ရင်း၊ တပ်ဖွဲ့တွေ နဲ့ စစ်တပ်တို့ တိုက်ပွဲတွေပြင်းထန်နေတယ်လို့ ဆိုပါတယ်။
စစ်တပ်ဘက်က ဒီတိုက်ခိုက်မှုမှာ ထိခိုက်သေဆုံးမှုနဲ့ ပတ်သက်ပြီး ဘီဘီစီက သီးခြားအတည်မပြုနိုင်ပါဘူး။
ရန်ကုန်-မန္တလေးအမြန်လမ်းမှာ ခရီးသည်တင်ကားတွေ ဆင့်တိုက်မှုဖြစ်
ဓာတ်ပုံ ရင်းမြစ်, Myanmar Fire Services Department
နောက်ဆုံးရ သတင်းနဲ့ မျက်မှောက်ရေးရာအစီအစဉ်များ
ပေါ့ဒ်ကတ်စ်အစီအစဉ်များ
End of podcast promotion
နေပြည်တော်၊ ဥတ္တရသီရိမြို့နယ်ထဲက ရန်ကုန်- မန္တလေး အမြန်လမ်းပေါ်မှာ မိုးများချိန် လမ်းဘေးချရပ်ဖို့ လုပ်တဲ့ခရီးသည်တင်ကားတစ်စီးနဲ့ နောက်ထပ် ကားတွေ ၆ စီးအထိ ဆင့်တိုက်မှု မေလ ၆ ရက်၊ ညပိုင်းက ဖြစ်ခဲ့တယ်လို့ သွားရောက်ကယ်ဆယ်ခဲ့တဲ့ မီးသတ်ဦးစီးမှူးက ဘီဘီစီကို ပြောပါတယ်။
အမြန်လမ်း မိုင်တိုင်အမှတ် (၂၂၁/၇)၊ တောင်တွင်းကြီးလမ်းခွဲအနီးမှာ မိုးများပြီး ကားလမ်းချော် သွားတဲ့ ကောင်းမြတ်မန်း ခရီးသည်တင်ကားကို လမ်းဘေးဆွဲနေတဲ့အချိန် ကားဆင့်တိုက်မှု ဖြစ်ခဲ့တာလို့ ပန်းတင်အမြန်လမ်း မီးသတ်တပ်ဖွဲ့ ဦးစီးမှူး ဦးဇော်ထက်က ပြောပါတယ်။
လမ်းချော်သွားတဲ့ ခရီးသည်တင် ကားကို လမ်းဘေးဆွဲချနေတဲ့အချိန် ပေ ၁၅၀ အကွာလောက်မှာ ရပ်တန့်နေတဲ့ အိမ်စီးကားတွေကို အနောက်မှာမောင်းလာတဲ့ သိန်းသန်းကုဋေ ခရီးသည်တင်ကား နဲ့ ဇေယျာမြိုင်ကြီး ခရီးသည်တင်ကားတွေက ထပ်ဆင့်တိုက်မှုဖြစ်ခဲ့တာလို့လည်း သူက ပြောပါတယ်။
"ဇေယျာမြိုင်ကြီး ခရီးသည်တင်ယာဉ်မှာ ယာဉ်မောင်းက ခေါင်းခန်းမှာ ညပ်နေပါတယ်။ သူ့ကို ကျွန်တော်တို့ မီးသတ်တပ်ဖွဲ့က ကယ်ထုတ်နိုင်ခဲ့ပါတယ်။ ခေါင်းခန်းညပ်နေတဲ့ လူနာကလည်း ဘယ်ဘက် ခြေထောက်ကျိုးတယ်။ ညာဘက်ခြေဖနောင့် ကွဲတယ်" လို့ ဦးဇော်ထက် က ပြောပါတယ်။
ဇေယျာမြိုင်ကြီးခရီးသည်တင်ယာဉ်က ခရီးသည် အမျိုးသား ၃ ဦး၊ အမျိုးသမီး ၅ဦး ထိခိုက်ဒဏ်ရာ ရခဲ့ပြီး သိန်းသန်းကုဋေ ခရီးသည်တင်ယာဉ်က အမျိုးသမီး ၁ ဦး ထိခိုက်ဒဏ်ရာရခဲ့ပါတယ်။
အခုဖြစ်ရပ်မှာ သေဆုံးသူ မရှိဘူးလို့လည်း သူက ပြောပါတယ်။
ထိခိုက်ဒဏ်ရာရသူတွေကို နေပြည်တော် ကုတင် ၁,၀၀၀ ဆေးရုံကို ပို့ဆောင်ထားတယ်လို့ ဆိုပါတယ်။
ကောင်းမြတ်မန်း ခရီးသည်တင်ယာဉ် နဲ့ အိမ်စီးကား ၃ စီးမှာ လိုက်ပါလာတဲ့ ခရီးသည်တွေကတော့ ထိခိုက်မှုမရှိဘူးလို့ သိရပါတယ်။
အခုဖြစ်ရပ်ကို ရဲတပ်ဖွဲ့က စုံစမ်းစစ်ဆေးမှုလုပ်နေပြီလို့လည်း မီးသတ်တပ်ဖွဲ့ဘက်က ပြောပါတယ်။
