ቀጥታ, ሁቲዎች እና ሳዑዲ አረቢያ ተኩስ ሲለዋወጡ፤ አሜሪካ ወደ ኢራን ለመጓዝ የሞከረ መርከብ ላይ ጥቃት ፈጸመች

የቀጥታ ሽፋን

1. ከ 55 ደቂቃዎች በፊትበሰደድ እሳት ምክንያት ከ220 ሺህ በላይ ሰዎች ፈረንሳይ እና ስፔንን ለቅቀው እንዲወጡ ተደረገ

   

   የፎቶው ባለመብት, Getty Images

   በፈረንሳይ እና ስፔን በተነሳው ሰደድ እሳት ምክንያት ከ220,000 በላይ ሰዎች አካባቢያቸውን ለቅቀው እንዲወጡ መደረጉ ተገለጸ።

   ከፈረንሳይ፣ ቦርዴውክስ አካባቢ ወደ 60,000 ገደማ ሰዎች ለቅቀው ወጥተዋል።

   ፕሬዝዳንት ኢማኑኤል ማክሮን የአገሪቱን መከላከያ ሠራዊት ያሰማሩ ሲሆን፤ በደቡብ ምሥራቅ ከሚገኙት ጊርዎንዴ እና ላንደርስ አካባቢዎች ወደ 200,000 ሰዎች ለቅቀው እንዲወጡ ተደርጓል።

   በስፔን ማድሪድ አቅራቢያ የተነሳው ሰደድ እሳት የአደጋ ጊዜ ሠራተኞች “መቆጣጠር ከሚችሉት በላይ” መሆኑ ተገልጿል።

   ከመዲናዋ በስተምዕራብ ሦስት ሰደድ እሳቶች ተነስተዋል።

   የስፔን መንግሥት የአስቸኳይ ጊዜ አዋጅ ደንግጎ 25,000 ሰዎች አካባቢውን ለቅቀው እንዲወጡ ሲደረግ፤ 40,000 ሰዎች ደግሞ ከቤት እንዳይወጡ ታዝዘዋል።

   የማድሪድ ቀጣና ፕሬዝዳንት ኢዛቤል ዲዬዝ አዩሶ “በአካባቢያችን ከተከሰቱ ሰደድ እሳቶች የከፋው ነው” ብለዋል።

   ከፍተኛ ሙቀት እና ንፋስ ተደራርበው እሳቱን እያስፋፉት እንደሚገኙ ገልጸዋል።

   ሰደድ እሳቱ ወደ ሮቤልዶ ደ ቼቫላ እና ፈርሲንዳሌዝ ደ ላ ኦሊቪያ ግዛቶች እየተስፋፋ እንደሆነ ተገልጿል። እነዚህ አካባቢዎች ከመዲናዋ 50 ኪሎሜትር ይርቃሉ።

   የፈረንሳይ የአደጋ ጊዜ ሠራተኞች እንደገለጹት ሰደድ እሳቶቹ 19 ሺህ ሄክታር ደን አውድመው፣ 80 መኖሪያ ቤቶችን አጋይተዋል።

   

   የፎቶው ባለመብት, EPA

   

   የፎቶው ባለመብት, Reuters

   

   የፎቶው ባለመብት, Getty Images

2. ከ 4 ሰአት በፊትአሜሪካ በኢራን ወደቦች ላይ የጣለችውን እገዳ ለመጣስ የሞከረ መርከብን መምታቷን አስታወቀች

   

   የፎቶው ባለመብት, U.S. Central Command

   የአሜሪካ ጦር ወደ ኢራን ወደቦች የሚደረግ ጉዞ ላይ የተጣለውን እገዳ በመጣስ በኦማን ባሕረ ሰላጤ ላይ ሊጓዝ የሞከረ ነዳጅ ጫኝ መርከብ ላይ ተኩስ ከፍቶ ማስቆሙን አስታወቀ።

   አሜሪካ በዚህ ሐምሌ መጀመሪያ በድጋሚ የጉዞ እገዳ ከጣለች ወዲህ የንግድ መርከብ ላይ ጥቃት ስትፈጽም ይህ ለሁለተኛ ጊዜ ነው።

   አሁን የተመታው መርከብ ለአራት ጊዜ ያህል እገዳ በተጣለበት የሆርሙዝ ወሽመጥ ለማለፍ መሞከሩን የአሜሪካ ማዕከላዊ ዕዝ ቃል አቀባይ ናቪ ካፒቴን ቲም ሀውኪንስ ለኤኤፍፒ ተናግረዋል።

   ቃል አቀባዩ፣ "የመርከቧ ሠራተኞች ቢያንስ አራት ጊዜ እገዳውን ጥሰው ለማለፍ ከሞከሩ በኋላ የነዳጅ ጫኝ መርከቡ እንዳይንቀሳቀስ አድርገዋል” ብለዋል።

   "የመርከቡ ሠራተኞች በተደጋጋሚ ማስጠንቀቂያ ተሰጥቷቸው፤ ትዕዛዙን አላከበሩትም። በሥፍራው የነበሩት የአሜሪካ ኃይሎች ወደ መርከቡ የሞተር ክፍል በመተኮስ መርከቡ እንዳይሠራ አድርገውታል” ሲሉም አብራርተዋል።

   "መርከቡ አሁን ወደ ኢራን እየተጓዘ አይደለም" ሲሉም አክለዋል።

   ይህ ከመሆኑ አስቀድሞ፤ የኦማን ልዑክ አባላት ስለ ሆርሙዝ ወሽመጥ ለመነጋገር በኢራን ዋና ከተማ ቴህራን መድረሳቸውን የኢራን መንግሥት የዜና ወኪል ኢርና ዘግቧል። ኦማን በወሽመጡ ደቡባዊ ክፍል የሚገኘውን የባሕር ዳርቻ ትቆጣጠራለች።

   አሜሪካ እና ኢራን ላለፈው ሁለት ሳምንታት ገደማ ተኩስ ሲለዋወጡ ቆይተዋል። ሐሙስ ሌሊት አሜሪካ ለ13ተኛ ተከታታይ ምሽት ኢራን ላይ ጥቃት ከፈጸመች በኋላ ቴህራን በመላው መካከለኛው ምሥራቅ የሚገኙ አሜሪካ ወታደራዊ ተቋማትን እና ጦር ሠፈሮችን ማጥቃቷን አስታውቃለች።

   አርብ ምሽት በዋይት ሀውስ ከጋዜጠኞች ጋር የተገናኙት ፕሬዝዳንት ዶናልድ ትራምፕ፤ ከኢራን ጋር የሚደረገው ድርድሩ መቀጠሉን ቢገልጹም፣ ተጨማሪ ጥቃቶችን ለመፈጸም ዝተዋል።

   "እያናገርናቸው ነው። ቁም ነገረኛ እየሆኑ ይመስላል። እንደማስበው... እስካሁን ስናያቸው ከነበረው በበለጠ ከልባቸው እየተነጋገሩ ነው። ያ ማለት ግን [ስምምነት ላይ] እንደርሳለን ማለት አይደለም" ሲሉ ተናግረዋል።

3. ከ 5 ሰአት በፊትሁቲዎች የሳዑዲ ከተማን ሲመቱ፤ ሪያድ በአማጺው ቡድን ላይ የአየር ጥቃት ፈጸመች

   

   የፎቶው ባለመብት, Reuters

   የየመን ሁቲዎች በሳዑዲ አረቢያ ላይ የባሕር ጉዞ እገዳ መጣላቸውን እና የአገሪቱን መርከቦች ማጥቃታቸውን ተከትሎ፤ ሳዑዲ በየመን የወደብ ከተማ ሆዴዳ እና በቅርብ ያለ ደሴት ላይ በሚገኙ የአማጺ ቡድኑ ዒላማዎች ላይ የአየር ጥቃት ፈጸመች።

   ሁቲዎች፣ በሳዑዲ አረቢያ ጂዛን ከተማ ለተፈጸመው የሚሳዔል ጥቃት ኃላፊነት ከወሰዱ በኋላ ደግሞ የሪያድ ባለሥልጣናት በጂዛን አውራጃ የአደጋ ጊዜ ማስጠንቀቂያ አውጥተዋል።

   የሁቲዎች መገናኛ ብዙኃን የሆነው ‘አንሳሩላህ’ ቅዳሜ ንጋት ላይ ባወጣው ዘገባ፤ "የየመን የሚሳዔል ጥቃት" በሳዑዲ ጂዛን ከተማ እሳት ማስነሳቱን ገልጿል።

   ከሁለቱ አካላት ተኩስ ልውውጥ በኋላ ደግሞ "የሳዑዲ ጠላት በሆዴዳ እና በካማራን ደሴት የሚገኙ የሲቪል ተቋማትን ዒላማ” አድርጓል ሲል ከስሷል። “እነዚህ ወንጀሎች ምላሽ ሳይሰጣቸው እንደማያልፉ እናረጋግጣለን” ሲልም አክሏል።

   የሳዑዲ ባለሥልጣናት ስለ ጥቃት ልውውጡ ምላሽ አልሰጡም።

   ሁቲዎች በዚህ ሳምንት ሳዑዲ ላይ የባሕር ጉዞ ማዕቀብ መጣላቸው ካስታወቁ በኋላ፤ ይህንን እገዳ ጥሰዋል የተባሉ ሁለት የአገሪቱ ነዳጅ ጫኝ መርከቦችን መትተዋል።

   ይህ የሁቲዎች ጥቃት፤ በቀይ ባሕር በኩል የሚደረግ የመርከብ ጉዞ ላይ አዲስ ስጋት የፈጠረ ሲሆን በዚህ የተነሳም የነዳጅ ዋጋ ከግንቦት ወዲህ ለመጀመሪያ ጊዜ በበርሜል ከ100 ዶላር ተሻግሮ ነበር።

   አርብ ከሰዓት ግን የነዳጅ ዋጋ መለኪያ ተደርጎ የሚቆጠረው ብሬንት ዋጋው በአራት ዶላር ቀንሶ 96 ዶላር ገደማ መድረሱን ሮይተርስ ዘግቧል።

   እንደ ሮይተርስ ዘገባ የዋጋ ቅናሹ የታየው ቻይና የተከራየቻቸው ሁለት ግዙፍ ነዳጅ ጫኝ መርከቦች በባብ ኤል ማንደብ ወሽመጥ በኩል ካለፉ በኋላ ነው።

4. 24 ሀምሌ 2026“ፑቲን እና ዢ ለኢራን መሣሪያ እንደማይሸጡ ነግረውኛል” - ትራምፕ

   

   የፎቶው ባለመብት, Getty Images

   የሩሲያው ፕሬዝዳንት ቭላድሚር ፑቲን እና የቻይናው ፕሬዝዳንት ዢ ጂንፒንግ ለኢራን የጦር መሣሪያ ላለመሸጥ “ቃል ገብተውልኛል” ሲሉ የአሜሪካው ፕሬዝዳንት ዶናልድ ትራምፕ ተናገሩ።

   ትራምፕ በትሩዝ ሶሻል ማኅበራዊ ገጻቸው ላይ “ከፕሬዝዳንት ዢ ጋር በቅርቡ ቤጂንግ፣ ቻይና ስንገናኝ በማንኛውም ሁኔታ ለኢራን መሣሪያ እንደማይሰጡ ወይም እንደማይሸጡ ነግረውኛል” ብለዋል።

   ይህም የቻይና መሣሪያ አምራች ተቋማትን እንደሚያካትት ገልጸዋል።

   ትራምፕ እንደተናገሩት ፑቲንም ተመሳሳይ ቃል ገብተውላቸዋል።

   “ለኔቶ አገራት እንጂ ለዩክሬን መሣሪያ እንደማልሸጥ [ፑቲን] ይረዳሉ። [ኔቶ አባል አገራት] ሙሉ ክፍያ ነው የሚፈጽሙት። መሣሪያዎቹን ምን እንደሚያደርጓቸው አላውቅም” ብለዋል።

   ከኢራን ጋር በተያያዘ ስማቸው በተደጋጋሚ የሚጠራው አገራት “እጃቸው አለበት ብዬ አላምንም” ሲሉም ተናግረዋል። “እጃቸው ቢኖርበትም አያዋጣቸውም” ሲሉም አክለዋል።

5. 24 ሀምሌ 2026የአውሮፓ ኅብረት አምስት ኢራናውያን ዳኞች ላይ ማዕቀብ ጣለ

   

   የፎቶው ባለመብት, THE EUROPEAN PARLIAMENT

   የአውሮፓ ኅብረት ምክር ቤት አምስት ኢራናውያን ዳኞችን “ከከፍተኛ የሰብአዊ መብት ጥሰት ጋር በተያያዘ” በማዕቀብ ዝርዝር ውስጥ ማካተቱን አስታወቀ።

   አምስቱ የኢራን አብዮታዊ ፍርድ ቤት ዳኞች “የፖለቲካ ተቃዋሚዎች እና ውስን ተከታይ ያለው ሃይማኖት አባላት” ላይ ከተላለፉ ውሳኔዎች ጋር በተያያዘ ነው ማዕቀብ የተጣለባቸው።

   ከብሔራዊ ደኅንነት ጋር የተያያዘ “ግልጽ ያልሆነ ክስ” እንዲሁም የሃይማኖት ክስ ማቅረባቸውን የአውሮፓ ኅብረት ምክር ቤት አስታውቋል። ከተከሳሾቹ መካከል የኖቤል የሰላም ተሸላሚ ናርገስ መሐማዲ ትገኝበታለች።

   የኢራን አብዮታዊ ፍርድ ቤቶች የፖለቲካ ተቃዋሚዎች እና የሰብአዊ መብት ተሟጋቾች ላይ የሞት፣ የረዥም ጊዜ እስራት፣ የድብደባ እና የገንዘብ ቅጣት መጣላቸውም ተመልክቷል።

   የአውሮፓ ኅብረት ምክር ቤት፤ ኢራናዊ የኮምፒውተር ምህንድስና ባለሙያ እና መረጃ ሰርሳሪ ኒማ ሳሌህ ላይም ማዕቀብ ጥሏል።

   በኢራን የዲጂታል ደኅንነት ቡድን ከአገሪቱ ፖሊስ እና እስላማዊ አብዮታዊ ዘብ ጋር በመሥራት ተቃዋሚዎች እና የለውጥ አቀንቃኞች ላይ የበይነ መረብ ጥቃት ያደርሳል ተብሏል።

6. 24 ሀምሌ 2026ኔታንያሁ እና ትራምፕ የፊታችን ማክሰኞ በዋይት ሀውስ እንደሚወያዩ ተገለጸ

   

   የፎቶው ባለመብት, Getty Images

   የእስራኤል ጠቅላይ ሚኒስትር ጽሕፈት ቤት፤ ቤንያሚን ኔታንያሁ ከፕሬዝዳንት ዶናልድ ትራምፕ ጋር የፊታችን ማክሰኞ በዋይት ሐውስ እንደሚገናኙ አስታወቀ።

   ኔታንያሁ እና ትራምፕ እንደሚወያዩ ይፋ የተደረገው ከኢራን ጦርነት ጋር በተያያዘ የሁለቱ መሪዎች ግንኙነት በሻከረበት ወቅት ነው።

   የኔታንያሁ ጽሕፈት ቤት ባወጣው መግለጫ “በዚህ ጉዞ ማክሰኞ ዕለት ጠቅላይ ሚኒስትሩ በዋይት ሐውስ ከፕሬዝዳንት ትራምፕ ጋር ይገናኛሉ። የእስራኤል ወዳጅ የነበሩት ሴናተር ሊንዚ ግርሃምን የቀብር ሥነ ሥርዓትም ይታደማሉ” ብሏል።

   ጠቅላይ ሚኒስትር ኔታንያሁ ወደ ዋሽንግተን ጉዟቸውን የሚጀምሩት ሰኞ እንደሆነም ተገልጿል።

7. 24 ሀምሌ 2026በዌስት ባንክ በተከፈተ ተኩስ አራት ፍልስጤማውያን እና ሁለት እስራኤላውያን ተገደሉ

   

   የፎቶው ባለመብት, Magen David Adom

   በወረራ ሥር በሚገኘው ዌስት ባንክ በተከፈተ ተኩስ ምክንያት ቢያንስ አራት ፍልስጤማውያን እና ሁለት እስራኤላውያን መገደላቸው ተገለጸ። ባለፉት ወራት ውስጥ ከተፈጠሩ ክስተቶች የከፋው ነው ተብሏል።

   ታል በሚባለው መንደር ስለተከሰተው ግጭት እርስ በርስ የሚቃረኑ መረጃዎች ወጥተዋል።

   ቢቢሲ ያነጋገራቸው ፍልስጤማውያን እንዳሉት፤ አይሁዳውያን ሰፋሪዎች ጥቃት ሲያደርሱባቸው ነዋሪዎች ጣልቃ ገብተዋል።

   የዐይን እማኞች እንዳሉት፤ በዚህ ወቅት ወታደሮች በቦታው ደርሰው መተኮስ ጀምረዋል።

   የእስራኤል ጦር እንደሚለው፤ ተራራ የሚወጡ ሰዎች ጥቃት እንደተሰነዘረባቸው ሪፖርት ደርሶታል። “አሸባሪዎች የደኅንነት ጠባቂ መሣሪያ ቀምተው ገድለውታል” ብሏል።

   ሌላ ወታደርም መገደሉን ቢገልጽም ዝርዝር መረጃ አልሰጠም።

   ፍልስጤማውያኑን ማን እንደገደላቸው የእስራኤል ጦር አልተናገረም።

   የጋዛ ጦርነት ከተጀመረ ወዲህ በዌስት ባንክ ፍልስጤማውያን ላይ በሰፋሪዎች የሚደርሰው ጥቃት ተባብሶ ቀጥሏል።

   አሕመድ ዘይዲን የተባለ የዐይን እማኝ ለቢቢሲ እንደገለጸው፤ ዛሬ ማለዳ በፍልስጤማውያን መኖሪያ ላይ ጥቃት ሲያደርሱ የነበሩ 30 ሰፋሪዎችን የታል መንደር ነዋሪዎች ተጋፍጠዋል።

   የእስራኤል ወታደሮች ባሉበትም ግጭቱ መነሳቱን ተናግሯል።

8. 24 ሀምሌ 2026ተመድ 6 ሺህ መርከበኞች ከሆርሙዝ ወሽመጥ የሚወጡበት መንገድ እንዲፈጠር ጠየቀ

   

   የፎቶው ባለመብት, Getty Images

   ከሆርሙዝ ወሽመጥ አካባቢ መውጣት ያልቻሉ ወደ ስድስት ሺህ የሚጠጉ መርከበኞች መውጫ መንገድ ሊመቻችላቸው እንደሚገባ የተበባሩት መንግሥታት ድርጅት አሳሰበ።

   በመካከለኛው ምሥራቅ ጦርነት ተሳታፊ የሆኑ አካላት መርከበኞቹ ከሆርሙዝ ወሽመጥ እንዲወጡ ተገቢውን ትብብር ማድረግ እንዳለባቸው አስታውቋል።

   የመንግሥታቱ ድርጅት የሰብአዊ መብቶች ከፍተኛ ኮሚሽነር ቮልከር ቱርክ በሺህዎች የሚቆጠሩት መርከበኞች “ከፍተኛ ሰብአዊ እና የሰብአዊ መብት ቀውስ” እንደገጠማቸው ገልጸዋል። አፋጣኝ እርምጃ መወሰድ እንዳለበትም አሳስበዋል።

   ኢራን እና አሜሪካ ዳግመኛ ወደ ግጭት ከመመለሳቸው በፊት የተባበሩት መንግሥታት የማሪታይም ተቋም ስድስት ሺህ መርከበኞች፣ በመቶዎች በሚቆጠሩ መርከቦች ውስጥ ሳሉ ከሆርሙዝ ወሽመጥ መውጣት እንዳልቻሉ ይፋ አድርጓል።

   እነዚህን መርከበኞች እስካሁን ድረስ ከቀጣናው ማስወጣትም አልተቻለም።

9. 24 ሀምሌ 2026አሜሪካ በርካታ አገራት ላይ አዲስ ታሪፍ ጣለች

   

   የፎቶው ባለመብት, Getty Images

   ባለፈው ዓመት ወደ ሥልጣን ከወጡ ወዲህ በድጋሚ የንግድ ጦርነትን ያቀጣጠሉት የአሜሪካ ፕሬዝዳንት ዶናልድ ትራምፕ፣ በ60 የአገሪቱ የንግድ አጋራት ላይ ታሪፍ ጣሉ።

   አዲሱ ዙር እርምጃ የተካተቱትን ዩናይትድ ኪንግደም፣ ቻይና እና አውሮፓ ኅብረትን ጨምሮ በርካታ አገራት፣ ወደ አሜሪካ በሚልኳቸው ምርቶች ላይ ከ10 እስከ 12.5 በመቶ የሚደርስ ቀረጥ ይጠብቃቸዋል። ወደ አሜሪካ የሚገቡ ምርቶችን በሙሉ በሚባል ደረጃ ታሪፍ ተጥሎባቸዋል።

   ይህ ታሪፍ ከዚህ ቀደም ትራምፕ የጣሉትን እና ተፈጻሚነቱ ዛሬ አርብ የሚያበቃውን ተመሳሳይ ቀረጥ ውሳኔ የሚተካ ነው። ትራምፕ ይህንን እርምጃ የወሰዱት እነዚህ ቁልፍ የኢኮኖሚ አጋሮች የጉልበት ብዝበዛን ለማስቀረት አልቻሉም በሚል ነው።

   አሜሪካዊቷ የኢኮኖሚ ባለሙያ ካሮሊን ፍሬውንድ ግን ለእርምጃው የቀረበው ክስ ትራምፕ "ታሪፎቹን ለመጣል የሚያስችል ሕጋዊ ምክንያት ለመፈለግ" ሲሉ ያቀረቡት እንጂ “ለግዳጅ ሠራተኝነት ሲባል የተወሰደ አይደለም” ብለዋል።

   የአሜሪካ ጠቅላይ ፍርድ ቤት በተያዘው የአውሮፓውያኑ 2026 መጀመሪያ ባስተላለፈው ውሳኔ፤ ከዚህ ቀደም የአደጋ ጊዜ አዋጅን በመጠቀም በዓለም አቀፍ ደረጃ የተጣለው ታሪፍ ሕገ ወጥ እንደሆነ ገልጾ ነበር።

   ዋይት ሀውስ ባለፈው ወር ላይ የጉልበት ብዝበዛን ለማስቆም በቂ ሥራ አልተከናወነም የሚል ስጋት በማንሳት ከ10 እስከ 12.5 በመቶ ቀረጥ እንዲጣል ሀሳብ አቅርቦ ነበር።

   የአሜሪካ የንግድ መስሪያ ቤት ተወካይ ጄሚሰን ግሪር፤ “የዛሬው እርምጃ የሰብአዊ መብት ጥሰት እና አሳሳች የንግድ ልምምድ ላይ የሚታየውን [ችግር] ማስተካከል” እንደሚጀምር ተናግረዋል። በዚህ ምክንያት “በሁሉም ቦታ የሚገኙ ሠራተኞችን ደህንነት ያሻሽላል” ብለዋል።

   አዲሱ ቀረጥ በ60 የአሜሪካ የንግድ አጋራት ላይ የሚጣል ሲሆን የእነዚህ አጋራት ወደ አሜሪካ ከሚገባው ምርት ውስጥ 99.4 በመቶ እንደሚሸፍን ገልጸዋል።

   በ’ዩሲ ሳን ዲዬጎ’ የዓለም አቀፍ ፖሊሲ እና ስትራቴጂ ትምህርት ቤት ዲን ፍሬውንድ ቀረጡን ለመጣል ስለቀረበው ምክንያት ከቢቢሲ ጥያቄ ቀርቦላቸዋል። የኢኮኖሚ ባለሙያዋ፤ “እንደማስበው፣ ታሪፍ ለመጣል ሕጋዊ እና እርምጃውን ለማስጠበቅ የሚያስችላቸው ምክንያት እየፈለጉ ነበር” ብለዋል።

   “ምክንያቱም [የአሜሪካ የንግድ መስሪያ ቤት ተወካይ] ግሪር እና ትራምፕ በደንብ ግልጽ እንዳደረጉት ዋና ግባቸው ከንግድ ሚዛን ጉድለት ጋር የተያያዘ ነው። ለአሜሪካ ማኑፋክቸሪንግ ዘርፍ ሲባል ነው፤ ለጉልበት ብዝበዛ አይደለም” ሲሉም መልዕከታቸውን አብራርተዋል።

10. 24 ሀምሌ 2026በሰሜናዊ ኢራቅ በሚገኘው የአሜሪካ ጦር ሠፈር በርካታ ፍንዳታዎች ተሰሙ

    

    የፎቶው ባለመብት, AFP

    የአሜሪካ ጦር በኢራን ለ13ኛ ሌሊት የፈጸመውን ድብደባ ማጠናቀቁን ካስታወቀ በኋላ በሰሜናዊ ኢራቅ በሚገኝ የአሜሪካ ጦር ሠፈር ተከታታይ ፍንዳታዎች መሰማታቸውን ኤፒ ዘገበ።

    የአሶሺዬትድ ፕሬስ ጋዜጠኛ አርብ ማለዳ የኢራቅ ከፊል ራስ ገዝ ግዛት በሆነው የኩርዶች ዋና ከተማ ኢርቢል አቅራቢያ ሰባት ፍንዳታዎችን መስማቱን ዘግቧል።

    በተጨማሪም ከጦር ሰፈሩ አቅራቢያ በሚገኝ የአውሮፕላን ማረፊያ አቅራቢያ ወይም ውስጥ አራት ጭሶችን መመልከቱን ዘግቧል።

    የአሜሪካ እና ኢራን ጦርነት ዳግመኛ ካገረሸ በኋላ ቴህራን በሆርሙዝ ወሽመጥ ላይ እና በባሕረ ሰላጤው አገራት ላይ የምትፈጽመውን ጥቃት ቀጥላለች።

    የኢራን አጋር የሆኑት ሁቲዎችም በዚህ ሳምንት በቀይ ባህር ላይ የሚቀዝፉ ሁለት የሳዑዲ መርከቦች ላይ ጥቃት መፈጸማቸውን በመግለጽ ቀጣናው እንደ አማራጭ የሚተላለፍበት የባህር መስመር ላይ አደጋ ደቅነዋል።

    የኢራን ጤና ሚኒስቴር ዳግመኛ ጦርነቱ ካገረሸ በኋላ 55 ሰዎች መገደላቸውን እና ከ600 በላይ መጎዳታቸውን ይፋ አድርጓል።

    በመካከለኛው ምሥራቅ እየተካሄደ የሚገኘው ይህ ጦርነት በኢራን እንዲሁም በመላው ዓለም ምጣኔ ሃብት ላይ ከፍተኛ ጉዳት አድርሷል።

    አሜሪካ ኢራንን ስትደበድብ ቴህራን በቀጣናው የሚገኙ በርካታ የአሜሪካ ጦር ሠፈሮችን ዒላማ አድርጋለች።

11. 24 ሀምሌ 2026ኢራን ለሁቲዎች ወታደራዊ አዛዦችን እና የሚሳዔል ቁሳቁሶችን መላኳን ሮይተርስ ዘገበ

    

    የፎቶው ባለመብት, reuters

    ኢራን በዚህ ወር የእስላማዊ አብዮታዊ ዘብ አዛዦችን፣ ወታደራዊ አማካሪዎችን እንዲሁም ከሚሳዔል እና ድሮን ጋር የተያያዙ ቁሳቁሶችን ወደ የመን መላኳን ምንጮችን ጠቅሶ ሮይተርስ ዘገበ።

    ቴህራን ይህንን እርምጃ የወሰደችው በየመን የሚገኙት አጋሮቿ ሁቲዎች፣ በቀይ ባሕር የሚደረጉ የመርከብ ጉዞዎች ላይ አደጋ እንዲጥሉ በማለም እንደሆነ ምንጮቹ ጠቅሰዋል።

    በጉዳዩ ላይ መረጃው ያላቸው አራት ምንጮች እንዲሁም የየመን ማስታወቂያ ሚኒስትር እና የቀጣው ደኅንነት ተንታኝ፣ ኢራን ወደ የመን ወታደራዊ ቁሳቁሶችን ያጓጓዘችው እአአ ሐምሌ 13 ነው ሲሉ ለሮይተርስ ተናግረዋል።

    ለደኅንነታቸው በሚል ስማቸው እንዳይጠቀስ ጠየቁ ሁለት የኢራን ምንጮች የአብዮታዊ ዘብ አዛዦች ቁጥር ከ10 እስከ 21 የሚደርስ መሆኑን ለሮይተርስ ተናግረዋል። ከእነዚህም መካከል ከፍተኛ አዛዦች እንደሚገኙበት ገልጸዋል።

    ከኢራን የተነሳው አውሮፕላን በሁቲ ቁጥጥር ስር ወደሚገኘው ሰነዓ በረራ ቢያደርግም አውሮፕላን ማረፊያው በሳዑዲ ጥቃት ከደረሰበት በኋላ ግን ወደ ቀይ ባሕር ወደብ ከተማዋ ሆዴይዳህ ማምራቱን ዘገባው ያመለክታል።

    አንድ ምንጭ “የአብዮታዊ ዘብ አዛዦች ወደዚያ የተጓዙት የሁቲን ዘመቻዎች ለመደገፍ እንዲሁም በአዲስ የሚሳዔል ሥርዓት ላይ ስልጠና ለመስጠት ነው” ብለዋል።

    በተጨማሪም ኢራን የሁቲን እንቅስቃሴዎች ለመደገፍ በአውሮፕላኑ ወርቅ መላኳ ተጠቅሷል።

    ቴህራን በተደጋጋሚ በየመን የሚንቀሳቀሱት ሁቲዎችን የሚሳዔል አቅም ለመገንባት ምንም ዓይነት ድጋፍ እንዳላደረገች በመግለጽ ስታስተባብል ቆይታለች።

    የኢራን መንግሥት በጉዳዩ ላይ ምላሽ እንዲሰጥ ሮይተርስ ያደረገው ጥረት ለጊዜው አልተሳካም፥።

    አውሮፕላኑ ውስጥ እንደነበሩ የተናገሩት የሁቲ የሚዲያ ኃላፊ አብደል ራህማን አል አህኖሚ፣ ኢራን ወደ የመን ወታደራዊ ባለሙያዎችን ልካለች የሚለውን ክስ "ውሸት እና ፈጠራ" ሲሉ የገለጹ ሲሆን፣ በአውሮፕላኑ ውስጥ የነበሩት ሁሉም ተሳፋሪዎች ሲቪሎች እንደነበሩም ተናግረዋል።

    ሁቲዎች ከዚህ ቀደም የኢራን ተቀጽላ መሆናቸውን ያስተባበሉ ሲሆን፣ የራሳቸውን የጦር መሣሪያዎች እንደሚያመርቱም ገልጸዋል።

    በየመን የሚንቀሳቀሰው ሁቲ ሳዑዲ አረቢያ አድርሳዋለች ባለው የሐምሌ 13 የሰነዓ አውሮፕላን ማረፊያ ድብደባ ምላሽ ለመስጠት፣ ሳዑዲ ላይ የባህር ላይ እገዳ መጣሉን ሰኞ ዕለት አስታውቋል።

    በሳዑዲ መንግሥት የሚደገፈው የየመን መንግሥት የማስታወቂያ ሚኒስትር ሞአመር አል ኢርያኒ በበኩላቸው፣ የኢራን አብዮታዊ ዘብ አዛዦች እና መሳሪያዎች ወደ የመን መምጣታቸውን ለሮይተርስ በስልክ በሰጡት ቃለ ምልልሰ ላይ አረጋግጠዋል።

    "ተልዕኳቸው የሚሊሻዎቹን ወታደራዊ አቅም ማጠናከር እና በቀይ ባሕር እና በባብ አል ማንዳብ የባህር መስመር ላይ ያለው ዓለም አቀፍ መተላለፊያ ደኅንነትን አደጋ ላይ እንዲጥሉ ማዘጋጀት ነው" ብለዋል።

12. 24 ሀምሌ 2026ትራምፕ የታገደው የኢራን ሀብት ጥቃት የተፈጸመባቸው መርከቦችን ለመጠገን እንደሚውሉ ተናገሩ

    

    የፎቶው ባለመብት, Reuters

    ፕሬዝዳንት ዶናልድ ትራምፕ በአሜሪካ የተያዙት የኢራን ሀብቶች “በመርከቦች፣ ጭነቶች ወይም የትኛውም ተያያዥ ነገር ላይ ለደረሰው ጉዳት” ክፍያ ለመፈጸም እንደሚጠቀሙበት ተናገሩ።

    የአሜሪካ ጦር በበኩሉ ለ13ተኛ ተከታታይ ምሽት ኢራን ላይ ጥቃት መፈጸሙን ያስታወቀ ሲሆን የቴህራን መገናኛ ብዙኃን ደግሞ አራት ሰዎች መገደላቸውን እና አምስት ሰዎች መሞታቸውን ዘግበዋል።

    የኢራን ውጭ ጉዳይ ሚኒስቴር አባስ አራግቺ የትራምፕን አስተያየት “አቀጣጣይ ሁኔታ” ሲሉ ጠርተውታል።

    አሜሪካ ትናንት ምሽት ጥቃት የፈጸመችው፤ በኢራን የሚደገፉት ሁቲዎች በቀይ ባሕር ሲጓዙ የነበሩ ሁለት የሳዑዲ አረቢያ ነዳጅ ጫኝ መርከቦችን መምታታቸውን ካስታወቁ በኋላ ነው። ይህ የሁቲ ጥቃት የዓለም የመርከብ ጉዞ ላይ ስጋት በመፍጠሩ የነዳጅ ዋጋ ጨምሯል።

    የአሜሪካ ጥቃትን ተከትሎ በኢራን ባንዳር አባስ የተባለው የወደብ ከተማ እና ቀሽም ደሴትን ጨምሮ በአገሪቱ ደቡባዊ ክፍል በሚገኙ ቁልፍ ወታደራዊ እና የንግድ ቦታዎች ላይ ፍንዳታዎች መከሰቱን የመንግሥት መገናኛ ብዙኃን ዘግበዋል።

    ይህ ጥቃት ከመድረሱ አስቀድሞ ፕሬዝዳንት ትራምፕ፣ ሁቲዎች ወይም ኢራን ጥቃት የሚፈጽሙ ከሆነ ቴህራን ላይ “ትልቅ ወታደራዊ ቅጣት” እንደሚጥሉ ዝተው ነበር።

    የአሜሪካ ጦር የኢራንን በቀጣናው የሚጓዙ ሲቪሊያን መርከቦች ላይ ስጋት የመጣል አቅም ለማዳከም ያለመ ጥቃት መፈጸሙን ገልጿል።

    የአሜሪካ ማዕከላዊ ዕዝ ባወጣው መግለጫ፣ “የኢራን ወታደራዊ የዕዝ ማዕከላትን፣ የድሮን ማከማቻዎችን፣ የኮሚዩኒኬሽን ኔትዎርኮችን፣ የባህር ዳርቻ የክትትል ስፍራዎች እንዲሁም የባህር ኃይል አቅሞችን" ዒላማ ማድረጉን አስታውቋል።

    አሜሪካ በሆርሙዝ ወሽመጥ ላይ የነበራትን ቁጥጥር መልሳ ለማግኘት ግፊት እያደረገች ባለችበት በዚህ ወቅት፤ በኢራን የሚደገፉት ሁቲዎች በቀይ ባሕር በኩል የሚደረግ የመርከብ ጉዞ ላይ አዲስ ስጋት ደቅነዋል።

    ይህንንም ተከትሎ የነዳጅ ዋጋ ከግንቦት ወዲህ ለመጀመሪያ ጊዜ በበርሜል ከ100 ዶላር ተሻግሯል።

    ይህ ቀጣናዊ ውጥረት በቀጠለበት ሁኔታ፤ ፕሬዝዳንት ትራምፕ መርከቦች እና ጭነቶች ላይ ለደረሰው ጉዳት የሚሰጥ ካሳ “አሜሪካ እጇ በሚገኘው እና በምትቆጣጠረው የኢራን ገንዘብ እንደሚከፈል” ተናግረዋል። ለዚህ የሚውለው የገንዘብ መጠንም “እጅግ ከፍተኛ” ሊሆን እንደሚችል ገልጸዋል።

    ለዚህ የትራምፕ አስተያየት በጽሑፍ ምላሽ የሰጡት የኢራን ውጭ ጉዳይ ሚኒስቴር አባስ አራግቺ፣ “በዚህ አይነት ገንዘቦች የሚደሰቱ ወይም የሚያተርፉ አካላት ማስታወስ ያለባቸው፤ መንግሥታት አንዴ ንብረት መውረስን ከተለማመዱ በኋላ የማንም ሀብት ደኅንነቱ የተጠበቀ እንደማይሆን ነው” ብለዋል።

    “ተከትሎ የሚመጣው ቀውስ ያማረ ወይም ሰላማዊ አይሆንም” ሲሉም አስጠንቅቀዋል።

13. 24 ሀምሌ 2026ኢራን የብሪታኒያ ጦር ሠፈሮች “ሕጋዊ ዒላማ” ናቸው ማለቷን ተከትሎ ዩኬ “ራሷን ለመከላከል ዝግጁ” መሆኗን ገለጸች

    

    የፎቶው ባለመብት, EPA

    ኢራን የዩናይትድ ኪንግደም ጦር ሠፈሮች ለአሜሪካ ጥቃቶች ጥቅም ላይ እየዋሉ ስለሆነ “ሕጋዊ ዒላማ” እንደሆኑ መግለጿን ተከትሎ፤ የብሪታኒያ መንግሥት "ራሱን ለመከላከል 24/7 ዝግጁ" መሆኑን አስታወቀ።

    ዩናይትድ ኪንግደም የአሜሪካ ሠራዊት አባላት እና አውሮፕላኖች ለሚወስዷቸው "የመከላከል" እርምጃዎች የጦር ሠፈሯን እንዲጠቀሙ ፈቅዳለች። ጦር ሠፈሮቹ ኢራን ላይ ለሚደረጉ የማጥቃት እርምጃዎች እንዲያገለግሉ ግን ፍቃድ አልሰጠችም።

    የኢራን ውጭ ጉዳይ ሚኒስቴር ባወጣው መግለጫ፤ ዩናይትድ ኪንግደም የአሜሪካ ጦርነት “ተባባሪ ነች” ሲል ከስሷል። የኢራን እስላማዊ አብዮት ጠባቂ ዘብ በበኩሉ ለአሜሪካ ጦር ድጋፍ የሚያቀርብ ማንኛውም አገር ለሚከተለው “መዘዝ እና ውጤት ኃላፊነቱን ይወስዳል” ብሏል።

    ሁለቱ አገራት እዚህ ውዝግብ ውስጥ የገቡት፤ አሜሪካ ለ12ተኛ ተከታታይ ምሽት ኢራን ውስጥ በሚገኙ ዒላማዎች ላይ ጥቃት በፈጸመችበት ወቅት ነው።

    የአሜሪካ ፕሬዝዳንት ዶናልድ ትራምፕ በኢራን ለሚያደርጉት ጦርነት ድጋፍ አልሰጡም በማለት የሚወቅሷቸውን የብሪታንያ መንግሥትን እና የቀድሞውን ጠቅላይ ሚኒስትር ኪር ስታርመርን በተደጋጋሚ ሲተቹ ቆይተዋል። ኢራን ትናንት ሐሙስ ያወጣችው መግለጫ በአንጻሩ ዩናይትድ ኪንግደም የጦርነቱ አጋር እንደሆነች አድርጎ የሚያሳይ ነው።

    አሜሪካ እና እስራኤል የከፈቱት ጦርነት ከተጀመረ ከቀናት በኋላ መጋቢት ውስጥ ዋሽንግተን እንደ በግሎስተርሻየር የሚገኘው ‘ሮያል ኤር ፎርስ ፌር ፎርድ’ እንዲሁም በሕንድ ውቅያኖስ ያለው ዲዬጎ ጋርሲያ ያሉ የብሪታንያ የጦር ሰፈሮችን እንድትጠቀም ፈቃድ ተሰጥቷታል።

    እነዚህ ጦር ሠፈሮች የተፈቀዱት አሜሪካ በፋርስ ባህረ ሰላጤ አገራትን እና በሆርሙዝ ወሽመጥ በሚያልፉ መርከቦችን ለማጥቃት ጥቅም ላይ የሚውሉ የኢራን ወታደራዊ መሠረተ ልማቶችን ዒላማ እንድታደርግ ነበር።

    በፈቃዳቸው ከሥልጣን የተለቀቁትን ጠቅላይ ሚኒስትር የተኩት አንዲ በርንሃም፣ ከአሜሪካ ጋር የተደረገው ስምምነት ስለመራዘሙ የተገለጸላቸው ሲሆን በቀድሞው አስተዳደር የተላለፈውን ይህንን የብሪታኒያ ውሳኔም አልቀየሩም።

    ከኢራን አብዮታዊ ዘብ ጋር ግንኙነት ያለው ታስኒም የዜና ወኪል ሐሙስ ዕለት የወጣው መግለጫ፤ ከቀናት በፊት የተፈጸመው የአሜሪካ የድብደባ ተልዕኮ የተነሳው ከብሪታኒያው ጦር ሠፈር ‘ሮያል ኤር ፎርስ ፌር ፎርድ’ እንደሆነ ገልጿል።

    የዩናይትድ ኪንግደም መከላከያ ሚኒስትር በዚህ ሳምንት ኢራን ላይ በተፈጸሙ ጥቃቶች አገሪቱ ጦር ሠፈሮች ጥቅም ላይ ውለው እንደሆነ አስተያየት አልሰጠም።

    ለኢራን ዛቻዎች ምላሽ የሰጡት የዩኬ መንግሥት ቃል አቀባይ “ጦር ኃይሎቻችን የዩናይትድ ኪንግደምን ደኅንነት በመሬታችንም ሆነ በውጭ አገራት ከሚፈጸሙ ከማንኛውም ጥቃቶች ለመጠበቅ ዝግጁ ናቸው” ብለዋል። ዩኬ ራሷን ለመከላከል በቀን 24 ሰዓት በሳምንት ሰባት ቀናት ዝግጁ መሆኗንም ጠቅሰዋል።

14. 23 ሀምሌ 2026የነዳጅ ዋጋ ከግንቦት ወዲህ ለመጀመሪያ ጊዜ ከፍተኛ ጭማሪ አሳየ

    

    የፎቶው ባለመብት, Getty Images

    በአሜሪካ እና ኢራን መካከል የሚካሄደው ግጭት መልሶ ከተቀሰቀሰ በኋላ ከግንቦት ወዲህ ለመጀመሪያ ጊዜ የነዳጅ ዋጋ በበርሜል 100 ዶላር ደረሰ።

    የነዳጅ ዋጋ የአሜሪካ ጥቃት በቀጠለባቸው ባለፉት ቀናት በየዕለቱ እየጨመረ ሲሆን የድፍድፍ በርሜል ዋጋ የሚተመንበት ብሬንት ዛሬ ሐሙስ በአምስት በመቶ ጨምሮ 100 ዶላር ደርሷል።

    የአሁኑ ከፍተኛ ጭማሪ የተመዘገበው የየመን ሁቲ ታጣቂዎች በቀይ ባሕር ላይ በሚያልፉ ነዳጅ ጫኝ መርከቦች ላይ ጥቃት ከፈጸሙ በኋላ ነው። ይህ ጥቃት የሆርሙዝ ወሽመጥ መዘጋቱን ተከትሎ ሳዑዲ አረቢያ የነዳጅ ምርቷን ወደ ውጭ የምትልክበትን ወሳኙን የቀይ ባሕር መስመር አደጋ ላይ ጥሏል።

    ከነዳጅ በተጨማሪ የጋዝ ዋጋም ከፍተኛ ጭማሪ አሳይቷል።

    በዛሬው ዕለት በሆርሙዝ ወሽመጥ በኩል ለማቋረጥ የሞከረ አንድ ነዳጅ ጫኝ መርከብ ላይ ፍንዳታ ተከስቶ እሳት ከተነሳ በኋላ ሦስት መርከቦች ጉዟቸውን ማቋረጣቸውን የኢራን እስላማዊ አብዮታዊ ዘብ አስታውቋል።

15. 23 ሀምሌ 2026የሳዑዲ እና አሜሪካ የኒውክሌር ስምምነት እንዲፈጸም ሪያድ ለእስራኤል ዕውቅና መስጠት እንዳለባት ትራምፕ ተናገሩ

    

    የፎቶው ባለመብት, EPA

    አሜሪካ እና ሳዑዲ አረቢያ የተፈራረሙት ግዙፍ የኒውክሌር ስምምነት ተግባራዊነት የሚወሰነው፤ ሪያድ ለእስራኤል የአገርነት ዕውቅና እንድትሰጥ የሚያደርገውን ‘የአብርሃ አኮርድስ’ ስትቀላቀል እንደሆነ ፕሬዝዳንት ዶናልድ ትራምፕ ተናገሩ።

    ፕሬዝዳንቱ ትሩዝ ሶሻል በተሰኘው የማኅበራዊ ሚዲያ ገጻቸው ባሰፈሩት ጽሑፍ፤ “ወታደራዊ ላልሆነ ጥቅም ብቻ የሚውለው… የሲቪል ኒውክሌር ስምምነቱ (ዩራኒየም ማበልጸግ አይኖርም).. ይጽድቃል” ብለዋል።

    የስምምነቱ መጽደቅ “ግን ሳዑዲ አረቢያ እጅጉን የተከበረው እና ስኬታማውን የአብርሃም ስምምነቶችን መቀላቀሏ ላይ የተመሠረተ ነው” ሲሉ ቅድመ ሁኔታውን ይፋ አድርገዋል።

    ትራምፕ ይህንን ያሉት፤ የተፈረመው ስምምነት ቀድሞውኑም አለመረጋጋት ውስጥ ባለው ቀጣና ውስጥ ወደፊት የኒውክሌር መሣሪያ መስፋፋትን ሊያስከትል ይችላል የሚል ወቀሳ ከተሰማ በኋላ ነው።

    ከዚህ ቀደም ሳዑዲ አረቢያ ፍልስጤም አገር ሆና ሳትመሠረት ለእስራኤል ዕውቅና እንደማትሰጥ ገልጻ ነበር።

    ፕሬዝዳንት ትራምፕ በአውሮፓውያኑ 2020 እንዲፈረም ያደረጉት አብርሃም አኮርድስ፣ በታሪካዊ ሁኔታ እስራኤል አረብ አገራት ከሆኑት የተባበሩት አረብ ኤምሬቶች እና ባህሬን ጋር ግንኙነት እንዲኖራት ያደረገ ነው።

    ቀጥሎም ሱዳን፣ ሞሮኮ እና ካዛኪስታን ስምምነቱን ተቀላቅለዋል። እስካሁን ድረስ ሳዑዲ ለትራምፕ አስተያየት ምላሽ አልሰጠችም።

    ፕሬዝዳንቱ ይፋ ያደረጉት የአብርሃም አኮርድስን የመቀላቀል ቅድመ ሁኔታ ከሳዑዲ ጋር በተፈረመው ስምምነት ውስጥ በጽሑፍ ተካትቶ፣ ሪያድ ለቅድመ ሁኔታው ተስማምታ አልያም ስምምነቱን ለመቀበል ትገደድ እንደሆነ አልታወቀም። የአሜሪካ እና የሳዑዲ ስምምነት እስካሁን ይፋ አልሆነም።

    እስራኤል በበኩሏ የትራምፕን መግለጫ በበጎ እንደምትቀበለው አስታውቃለች። የጠቅላይ ሚኒስትር ቤንያሚን ኔታንያሁ ጽሕፈት ቤት በኤክስ ገጹ ባወጣው መግለጫ፤ ሳዑዲ አረቢያ ስምምነቱን መቀላቀሏ "በመካከለኛው ምሥራቅ ሰላም ለማስፈን ትልቅ ታሪካዊ እርምጃ ይሆናል" ብሏል።

    የእስራኤል መግለጫ ላይ ስለ ኒውክሌር ስምምነቱ አልተጠቀሰም። የእስራኤል የኢኮኖሚ ሚኒስትር ኒር ባርካት ከዚህ ቀደም፤ ሳዑዲ አረቢያ ለሰላማዊ ዓላማ የሚውል ኒውክሌር ኃይል አገራቸው ጉዳዩን “ማስተዳደር እንደምትችል” ተናግረው ነበር።

    እስራኤል ራሷ የኒውክሌር መሣሪያ እንዳላት በሰፊው የሚታመን ቢሆንም አገሪቱ ግን ማረጋገጫ ሰጥታም ይሁን አተስባብላ አታውቅም።

16. 23 ሀምሌ 2026የአፍሪካ ኅብረት ሁቲዎች በቀይ ባሕር መርከቦች ላይ የሚፈጽሙትን ጥቃት “በአስቸኳይ እንዲያቆሙ” ጠየቀ

    

    የፎቶው ባለመብት, Reuters

    የአፍሪካ ኅብረት ኮሚሽን ሊቀ መንበር ማህሙድ አሊ ዩሱፍ፤ የየመኑ አማጺ ሁቲ በቀይ ባሕር መርከቦች ላይ የሚፈጽማቸውን ጥቃቶች "በሙሉ በአስቸኳይ እንዲያቆም" ጠየቁ።

    ሁቲዎች በቀይ ባሕር ሲጓዙ የነበሩ ሁለት ነዳጅ ጫኝ መርከቦች ላይ የፈጸሙትን ጥቃት “አደገኛ የውጥረት መባባስ” ሲሉም አውግዘዋል።

    በኢራን የሚደገፉት ሁቲ ጥቃቱን የፈጸመው ሳዑዲ አረቢያ ላይ “የባሕር ጉዞ ማዕቀብ” መጣሉን ካስታወቀ በኋላ ነው። ይህንን እገዳ ጥሰዋል የተባሉ ነዳጅ ጫኝ መርከቦች በድሮን እና ሚሳዔሎች መመታታቸውን የታጣቂ ቡድኑ ወታደራዊ ቃል አቀባይ ያህያ ሳሬ ተናግረዋል።

    የአፍሪካ ኅብረት ዛሬ ሐሙስ ሐምሌ 16/2018 ዓ.ም. ባወጣው መግለጫ ድርጊቱን “በጽኑ እንደሚኮንን” አስታውቋል። “እነዚህ እርምጃዎች ለቀጣናው ሰላም እና ደኅንነት ከፍተኛ አንድምታ የሚኖራቸው አደገኛ [የውጥረት] መባባሶች ናቸው” ብሏል።

    መርከቦቿ ለተመቱባት ሳዑዲ አረቢያ አጋርነቱን የገለጸው አፍሪካ ኅብረት፤ ለአገሪቱ “ደኅንነት፣ ሉዓላዊነት እና መረጋጋት የማይናወጥ ድጋፍ” እንዳለውም አስታውቋል።

    የኮሚሽኑ ሊቀ መንበር ማህሙድ አሊ ዩሱፍ፣ ይህ አይነቱ ድርጊት “ለዓለም አቀፍ የባሕር ጉዞ ደኅንነት እንዲሁም ከዓለም ስትራቴጂካዊ የውሃ መስመሮች አንዱ” ለሆነው ቀይ ባሕር “መረጋጋት ከፍተኛ ስጋት” መሆኑን በአጽንኦት አንስተዋል።

    “ነጻ የመርከብ ጉዞን ለማደናቀፍ የሚደረግ ማንኛውም ሙከራንም” አውግዘዋል። በዓለም አቀፍ ሕግ መሠረት የባሕር ጉዞ ነፃነት ዝውውር እና የንግድ መርከቦች ደኅንነት እና ጥበቃ ሙሉ በሙሉ መከበር እንዳለበትም በመግለጫቸው ጠቅሰዋል።

    ሁቲዎችም “ንግድ መርከቦች ላይ የሚያደርሱትን ጥቃት በሙሉ በአስቸኳይ እንዲያቆሙ” እንዲሁም “ውጥረቱን የበለጠ ሊያባብሱ የሚችሉ የትኛውም እርምጃዎችን ከመውሰድ እንዲቆጠቡ” ሊቀ መንበሩ ጥሪ አቅርበዋል። “የባሕር ጉዞ የሚመራባቸው ዓለም አቀፍ ሕጎችን ሙሉ በሙሉ እንዲያከብሩም” ጠይቀዋል።

17. 23 ሀምሌ 2026ኢራን በሲአይኤ ተቋማት ላይ የፈጸመችው ጥቃት የሩሲያ እጅ አለበት የሚል ጥርጣሬን ፈጠረ

    

    የፎቶው ባለመብት, Reuters

    የኢራን ድሮኖች በባሕረ ሰላጤው በሚገኙ የሲአይኤ ተቋማት ላይ ጥቃት ከማድረሳቸው ጋር በተያያዘ ሩሲያ መረጃ በመስጠት ወይም የተሻሻለ የድሮን ቴክኖሎጂ በማቅረብ ተሳትፎ አድርጋ ስለመሆኑ ምርመራ መደረግ እንዳለበት የአሜሪካ የደኅንነት ባልደረቦች ለሮይተርስ ተናገሩ።

    ለጉዳዩ ቅርበት ያላቸው አራት የአሜሪካ ደኅንነት መሥሪያ ቤት ባልደረቦች ለዜና ወኪሉ እንደተናገሩት የኢራን ጥቃት ላይ የሩሲያ ተሳትፎ መኖሩ ላይ ምርመራ መደረግ ይኖርበታል።

    ስማቸው ሳይጠቀስ ለሮይተርስ አስተየየታቸውን የሰጡት ምንጮች ኢራን በሲአይኤ ተቋማት ላይ ለፈጸመችው ጥቃት ሩሲያ እጇ ስለመኖሩ ድምዳሜ ላይ አልተደረሰም ብለዋል።

    ነገር ግን የጥቃቱ ‘ዒላማውን የጠበቀ መሆን እና ውጤታማነቱ’ እንዲሁም ሩሲያ ለኢራን የምትሰጠው ሰፊ የቴክኒክ ድጋፍ ለጥርጣሬው በማስረጃት ግብዓት የመሆን ዕድል አለው ተብለዋል።

    ሮይተርስ እና ሌሎች መገናኛ ብዙኃን የአሜሪካ ባለሥልጣናት ሩሲያ ኢራን በባሕረ ሰላጤው ላይ በምትፈጽማቸው ጥቃቶች ላይ የቴክኒክ ድጋፍ እንደምታደርግ እንደሚያውቁ ዘግበዋል።

    መጋቢት ወር በባሕረ ሰላጤው የሚገኙ ሁለት የሲአይኤ ተቋማት ላይ ጥቃት መድረሱን ሮይተርስ ዘግቧል።

    አንዱ ተቋም በሪያድ ከሚገኘው የአሜሪካ ኤምባሲ አቅራቢያ ያለ ሲሆን ሌላኛው ደግሞ በምሥራቃዊ ኢራቅ ያለ ነው።

    ሮይተርስ ያነጋገራቸው ምንጮች ሌሎች የሲአይኤ ተቋማትም ጥቃት እንደተፈጸመባቸው ገልጸው ዝርዝር መረጃ ከመስጠት ተቆጥበዋል።

18. 23 ሀምሌ 2026በስደተኞች ጥቃት ምክንያት ደቡብ አፍሪካ በዓለም አቀፉ የወንጀል ፍርድ ቤት ተከሰሰች

    

    የፎቶው ባለመብት, AFP via Getty Images

    ሁለት ጋናውያን በደቡብ አፍሪካ ውስጥ በውጭ አገር ዜጎች ላይ የሚፈጸመው ጥቃት በሰብአዊነት ላይ ከሚፈጸሙ ወንጀሎች ጋር የሚስተካከል ነው በማለት የዓለም አቀፉ የወንጀል ፍርድ ቤት ምርመራ እንዲያደርግ ጥያቄ አቀረቡ።

    ክሱን ያቀረቡት የቀድሞው የጋና መንግሥት ቃል አቀባይ የሆኑት ፓልግሬቭ ቦአካይ-ዳንኬህ እና የፀረ ሽብርተኝነት እና የደኅንነት ተንታኝ የሆኑት ኢማኑኤል ኮቲን ናቸው።

    ሮይተርስ የዜና ወኪል የተመለከተው እና ከ10 ቀናት በፊት ለፍርድ ቤቱ የቀረበው ክስ በደቡብ አፍሪካ ውስጥ “መጠነ ሰፊ እና የተቀናጀ ቅርጽ ያለው” ጥቃት በስደተኞች ላይ እንደሚፈጸም ያመለክታል።

    በተጨማሪም የፕሬዝዳንት ሲሪል ራማፎሳ መንግሥት ጥቃቱን ለመከላከል እና የወንጀሉን ፈጻሚዎች ለመቅጣት አልቻለም ሲል ይወቅሳል።

    የደቡብ አፍሪካ የውጭ ጉዳይ ሚኒስቴር ቃል አቀባይ የቀረበውን ክስ አጋጣሚውን ለመጠቀም የታሰበ እንዲሁም ሕጋዊ ቅድመ ሁኔታዎችን እና ፍርድ ቤቱ እርምጃ እንዲወስድ የሚያስችለውን ሁኔታ የማያሟላ በማለት አጣጥሎታል።

    ጋና በደቡብ አፍሪካ የሚካሄደውን የፀረ ስደተኞች ተቃውሞ ተከትሎ ዜጎቻቸውን ካስወጡ አገራት መካከል አንዷ ናት። በዚህ ጥቃትም አንድ ዜጋዋ ተገድሏል በማለት የምትከስ ሲሆን፣ የደቡብ አፍሪካ ባለሥልጣናት ግን ግድያውን ያስተባብላሉ።

    በዚህም የተነሳ ባለፉት ወራት በጋና እና በደቡብ አፍሪካ መካከል የተጋጋለ ዲፕሎማሲያዊ ውጥረት ተፈጥሯል።

19. 23 ሀምሌ 2026አሜሪካ የጦር መሣሪያ ለዩክሬን መስጠቷን ሩሲያ ተቃወመች

    

    የፎቶው ባለመብት, AP

    የሩሲያ ውጭ ጉዳይ ሚኒስትር አሜሪካ ለዩክሬን የጦር መሣሪያ መስጠቷ “ተቀባይነት የለውም” ሲሉ ተቃውሟቸውን ገለጹ።

    የሩሲያ ውጭ ጉዳይ ሚኒስትር ሰርጌይ ላቭሮቭ ከአሜሪካ አቻቸው ማርኮ ሩቢዮ ጋር በፊሊፒንስ ዋና ከተማ ማኒላ ሐሙስ ዕለት ተገናኝተው ተወያይተዋል።

    ሰርጌይ ላቭሮቭ “በኪየቭ ለሚገኘው መንግሥት የጦር መሣሪያ ማቅረብ መቀጠል ተቀባይነት የሌለው መሆኑን አጽንኦት ሰጥተዋል” ሲል ሚኒስቴር መሥሪያ ቤቱ ባወጣው መግለጫ ላይ ጠቅሷል።

    እንደ ሩሲያ ውጭ ጉዳይ ሚኒስቴር መግለጫ ከሆነ ላቭሮቭ ሩሲያ በዩክሬን ግጭት ዙሪያ ለፖለቲካዊ እና ለዲፕሎማሲያዊ መፍትሔዎች ዝግጁ መሆኗን ተናግረዋል።

    ላቭሮቭ በማኒላ እየተካሄደ በሚገኘው የእስያ አገራት ጉባዔ ላይ ባደረጉት የጎንዮሽ ውይይት “በሩሲያ ላይ ‘ስትራቴጂያዊ ሽንፈት’ እንዲደርስ ዒላማ እያደረጉ ያሉ የአውሮፓ አገራትን አፍራሽ ሚና” ኮንነዋል።

    የአሜሪካ ውጭ ጉዳይ ሚኒስቴሩ ባወጣው መግለጫ ሁለቱ ሚኒስትሮች “በአገራቱ መካከል ስላለው ግንኙነት እና የሩሲያ ዩክሬን ጦርነት ማብቃት አስፈላጊነት ላይ ተነጋግረዋል” ብለዋል።

    ከስብሰባው በኋላ ማርኮ ሩቢዮ በሰጡት መግለጫ አሜሪካው ፕሬዝዳንት ዶናልድ ትራምፕ “የማይረባ ጦርነት” እንደሆነ ያስባሉ፤ እንዲሁም አሜሪካ በዩክሬን ከስምምነት ለመድረስ ዕድል በኖረ ጊዜ “እርምጃ ለመውሰድ ዝግጁ ናት” ማለታቸውን ጋርዲያን ዘግቧል።

    ረቡዕ ዕለት ማርኮ ሩቢዮ ለጋዜጠኞች በዩክሬን የሚካሄደው ጦርነት “አሜሪካ እና ሩሲያ ሊስማሙ የሚችሉበትን ነጥብ በበርካታ መንገዶች ጎድቷል” ብለዋል።

20. 23 ሀምሌ 2026በሜታ ላይ ማኅበራዊ ሚዲያዎቹ ሱስ ሆነውብኛል ሲል ክስ የመሠረተው ታዳጊ ክሱን አቋረጠ

    

    የፎቶው ባለመብት, Reuters

    እንደ ኢንስታግራም ባሉ የማኅበራዊ መድረኮች ሱስ በመያዙ ጉዳት እንደደረሰበት በመግለጽ ሜታ ላይ ክስ የመሠረተው የፍሎሪዳ ታዳጊ ክሱን አቋርጧል።

    የ15 ዓመቱ ከሳሽ አርኬኤስ በሚል ምህጻረ ቃል የሚታወቅ ሲሆን በቲክቶክ፣ በስናፕቻት እና በዩቲዩብ ላይ ተመሳሳይ ክሶችን መሥርቷል።

    የታዳጊው ክሶች በሙሉ ለሕፃናት ጎጂ የሆኑ ሱስ የሚያስይዙ የማኅበራዊ መድረኮችን በመፍጠር ላይ ያተኮሩ ናቸው።

    የአርኬሲ ክሶች ሜታ እና ዩቲዩብ ከዚህ በፊት በተመሠረቱባቸው የሎስ አንጀለስ ችሎት በሚቀጥለው ሳምንት ይቀርባሉ ተብሎ ይጠበቅ ነበር።

    የሜታ ቃል አቀባይ ለቢቢሲ "ክሱ ውሃ አይቋጥርም፤ እናም ይህ ውጤትም መሠረተ ቢስ ክሶችን ከመከላከል ወደኋላ እንደማንል ግልጽ ያደርገዋል" ሲሉ አስተያየታቸውን ሰጥተዋል።

    የአርኬሲ ጠበቆች ኤሚሊ ጄፍኮት እና ራሁል ራቪፑዲ ለቢቢሲ እንደተናገሩት ታዳጊው ከሳሽ "በዚህ ሂደት ውስጥ የማኅበራዊ ሚዲያ ኩባንያዎችን ተጠያቂ ለማድረግ እና እንደ እርሱ ያሉ ታዳጊዎችን ለመጠበቅ ለውጦችን እንዲያደርጉ እየሞከረ ነው" ብለዋል።

    “ይህንን ነው ያደረገው” ሲሉ አክለዋል።

    ጠበቆቹ ለሳምንታት የተራዘመውን የፍርድ ቤት ቀጠሮ ጠቅሰው ስጋታቸውን ገልጸው የነበረ ሲሆን፣ አርኬሲ "ይህንን ምዕራፍ ለመዝጋት እና በራሱ በማተኮር መደበኛ ሕይወቱን ለመቀጠል ስለሚፈልግ የሕክምና ድጋፍ ለማግኘት ዝግጁ ነው" ብለዋል።

    የሜታ ቃል አቀባይ ክሱ ውድቅ እንዲደረግ ምንም ዓይነት ክፍያ እንዳልከፈሉ ተናግረዋል።

    አርኬሲ በማኅበራዊ ሚዲያዎቹ ላይ ያለ ገደብ እየቀያየሩ መመልከት መቻል እና ያለ ፈቃድ በገጽ ላይ የሚመጡ ይዘቶችን በመጥቀስ ሁለቱም በተከታታይ እና ወዲያው ወዲያው ለተጠቃሚዎች አዲስ ይዘት እንዲመለከቱ ስለሚያደርጉ ሱስ እንዲሆኑ ያደርጋል ብሏል።

    ይህ ጭንቀት እና እንቅልፍ ማጣት እንዲሁም ሌሎች ችግሮችን እንዳስከተለበት በመግለጽ ተከራክሯል።

    ሜታ እና ዩቲዩብ የችሎት ሂደቱ ሲጀመር ከአንዲት ወጣት ሴት ተመሳሳይ ክሶች ቀርቦባቸው ነበር።