لائیو, مجتبیٰ خامنہ ای کے لیے فیلڈ مارشل کا ’خاص خط‘ اور وزیر اعظم کا پیغام لایا ہوں: محسن نقوی
تہران پہنچنے والے پاکستان کے وزیر داخلہ محسن نقوی نے میڈیا سے گفتگو میں کہا ہے کہ وہ فیلڈ مارشل عاصم منیر کی طرف سے مجتبیٰ خامنہ ای کے لیے ’خاص خط‘ دینے پہنچے ہیں، اور وزیر اعظم شہباز شریف کی طرف سے پیغام۔
خلاصہ
فیلڈ مارشل عاصم منیر کی دعوت پر لبنانی فوج کے سربراہ پاکستان روانہ
پاکستان کے وزیرِ داخلہ تہران پہنچ گئے، ’محسن نقوی ایران کے رہبر اعلیٰ مجتبیٰ خامنہ ای کے لیے پیغام لے کر آئے ہیں‘: ایرانی میڈیا
پاکستان کے زیر انتظام کشمیر کی سپریم کورٹ نے مہاجرین کی 12 نشستوں سے متعلق صدارتی ریفرنس پر سماعت مکمل کرکے فیصلہ محفوظ کرلیا ہے
راولاکوٹ میں فائرنگ کے نتیجے میں جوائنٹ عوامی ایکشن کمیٹی کا ایک رکن ہلاک ہو گیا ہے جس کے بعد علاقے میں حالات کشیدہ ہیں
بحرین کی وزارتِ خارجہ نے کہا ہے کہ امن میزائلوں اور ڈرونز کے ذریعے قائم نہیں کیا جا سکتا، ایران فوری طور پر حملوں سے باز آئے۔'
لائیو کوریج
جنوبی لبنان میں اسرائیلی ٹھکانوں کو نشانہ بنایا: حزب اللہ
لبنان کی مسلح تنظیم حزب اللہ نے ایک
بیان میں کہا ہے کہ اس نے ابابیل ڈرونز کا استعمال کرتے ہوئے جنوبی لبنان کے شہر
ناقورہ میں اسرائیلی فوج کے ایک کمانڈ ہیڈ کوارٹر کو نشانہ بنایا۔
حزب اللہ نے یہ بھی دعویٰ کیا کہ اس
کی فورسز نے حداثا شہر کے جنوبی نواح میں اسرائیلی فوجیوں کے ایک اجتماع کو دو
ڈرونز کے ذریعے اور بیوفورٹ قلعے کے قریب راکٹ اور توپ خانے کی گولہ باری سے نشانہ
بنایا۔
گذشتہ
شب اسرائیلی فوج نے کہا تھا کہ اس نے 48 گھنٹوں کے دوران جنوبی لبنان میں 150 حملے
کیے اور ان حملوں میں حزب اللہ کے ٹھکانوں کو نشانہ بنایا گیا۔
گلگت بلتستان اسمبلی کی 24 نشستوں پر الیکشن آج ہو رہے ہیں
،تصویر کا ذریعہAFP via Getty Images
گلگت بلتستان میں 10 اضلاع کی 24
نشستوں پر جنرل الیکشن آج ہو رہے ہیں۔ امیدواروں کی تعداد 396 ہے جس میں آٹھ
خواتین بھی بطور امیدوار میدان میں ہیں۔
انتخابات کو پر امن بنانے کے لیے سکیورٹی
کے انتظامات کیے گئے ہیں۔
گلگت بلتستان پولیس کے سربراہ آئی جی
اکبر ناصر خان نے بی بی سی کو بتایا تھا کہ انتخابات میں امن و امان برقرار رکھنے
کے لیے پولیس اور قانون نافذ کرنے والے اداروں کے 17 ہزار اہلکار تعینات کیے جائیں
گے، جن میں پنجاب اور سندھ پولیس کے علاوہ رینجرز اور ایف سی کے اہلکار بھی شامل
ہیں۔
وفاق میں برسراقتدار پاکستان مسلم
لیگ ن اور اتحادی جماعت پاکستان پیپلز پارٹی کے سینیئر رہنماؤں نے اپنی اپنی جماعت
کے امیدواروں کے لیے یہاں انتخابی مہمات چلائی ہیں۔ نواز شریف اور بلاول بھٹو
زرداری نے بھی انتخابی جلسوں سے خطاب کیے۔
جبکہ
اپوزیشن کی بڑی جماعت پاکستان تحریک انصاف کو ان انتخابات میں بطور پارٹی حصہ لینے
کی اجازت نہیں دی گئی۔ تحریک انصاف کا الزام ہے کہ اس کے چیئرمین سلمان اکرم راجہ
سمیت متعدد سینیئر رہنماؤں کو امیدواروں کی حق میں مہم چلانے کے لیے گلگت بلتستان
داخل ہونے کی اجازت تک نہیں دی گئی، اور جو رہنما وہاں پہنچنے میں کامیاب رہے
انھیں بعد ازاں علاقہ بدر کر دیا گیا۔
مجتبیٰ خامنہ ای کے لیے فیلڈ مارشل کا ’خاص خط‘ اور وزیر اعظم کا پیغام لایا ہوں: محسن نقوی
،تصویر کا ذریعہIRNA
پاکستان کے وزیر داخلہ محسن نقوی
تہران پہنچے ہیں۔ وہاں میڈیا سے ان کی گفتگو کا ایک حصہ ایرانی خبر رساں ادارے تسنیم
نے جاری کیا ہے۔
اپنی گفتگو میں محسن نقوی کہتے ہیں
کہ ’میں یہاں فیلڈ مارشل (عاصم منیر) کی طرف سے آیت اللہ مجتبیٰ خامنہ ای کے لیے خاص
خط دینے کے لیے پہنچا ہوں، اور وزیر اعظم (شہباز شریف) کی طرف سے پیغام۔‘
محسن نقوی کہتے ہیں کہ مجتبیٰ خامنہ
ای کے لیے جو خط اور پیغام لے کر وہ پہنچے ہیں، وہ ’موجودہ صورتحال‘ کے حوالے سے
ہے۔
محسن نقوی نے گذشتہ ماہ ایک ہفتے میں
دو بار ایران کا دورہ کیا تھا اور ان دوروں کے دوران اُنھوں نے ایران کے صدر،
پارلیمنٹ کے سپیکر، وزیر خارجہ اور وزیر داخلہ سے ملاقات کی تھی۔
پاکستان،
ایران اور امریکہ کے درمیان جنگ کے خاتمے کے لیے کسی ممکنہ معاہدے کی کوششوں میں
اہم ثالث کا کردار ادا کر رہا ہے۔
ایران کی طرف سے داغے گئے دو ڈرون مار گرائے: سینٹکام
،تصویر کا ذریعہAFP via Getty Images
،تصویر کا کیپشنفائل فوٹو
امریکی فوج کی
مرکزی کمان (سینٹکام) نے دو ڈرون مار گرانے کا دعویٰ کیا ہے جو اس کے مطابق ایران
کی طرف سے داغے گئے۔
سوشل میڈیا
پلیٹ فارم ایکس پر جاری بیان میں سینٹکام نے کہا: ’مشرقِ وسطیٰ میں امریکی افواج نے ایران کے دو حملہ
آور ڈرون مار گرائے، جو آبنائے ہرمز میں بین الاقوامی بحری آمد و رفت کے لیے خطرہ
بن رہے تھے۔‘
بیان
میں کہا گیا کہ امریکی افواج اپنی پوزیشن پر برقرار ہیں اور ایرانی جارحیت کے خلاف
دفاع جاری رکھنے کے لیے تیار ہیں۔
فیلڈ مارشل عاصم منیر کی دعوت پر لبنانی فوج کے سربراہ پاکستان روانہ
،تصویر کا ذریعہLebanon Army
،تصویر کا کیپشنلبنانی فوج کے کمانڈر جنرل روڈولف ہیکل
لبنانی فوج کے کمانڈر جنرل روڈولف ہیکل نے اپنے پاکستانی ہم منصب کی دعوت پر پاکستان کا دورہ کیا ہے۔ لبنانی فوج نے اعلان کیا کہ وہ اپنے دورے کے دوران پاکستانی مسلح افواج کے کمانڈر انچیف فیلڈ مارشل عاصم منیر سے ملاقات اور بات چیت کریں گے۔
ایک باخبر ذریعے نے خبر رساں ادارے اے ایف پی کو بتایا کہ یہ دورہ ایران اور امریکہ کے درمیان پاکستان کی ثالثی کی کوششوں کے فریم ورک کے اندر کیا جا رہا ہے۔
اس ذریعے کے مطابق لبنان جنگ اور علاقائی کشیدگی کے خاتمے کے لیے تہران اور واشنگٹن کے درمیان ہونے والے مذاکرات کا ایک اہم محور ہے۔
حالیہ مہینوں میں عاصم منیر نے ایران اور امریکہ کے درمیان ثالثی میں نمایاں کردار ادا کیا ہے اور پاکستان نے سفارتی بات چیت کے ذریعے کشیدگی کو کم کرنے اور دونوں فریقوں کے درمیان معاہدے تک پہنچنے کی بنیاد فراہم کرنے کی کوشش کی ہے۔
ادھر لبنان کے صدر جوزف عون نے گذشتہ روز ایک ٹیلی ویژن انٹرویو میں تاکید کی کہ ایران کو لبنان کے اندرونی معاملات میں مداخلت نہیں کرنی چاہیے۔ انھوں نے اسرائیل کے ساتھ بیروت کے براہ راست مذاکرات کا حوالہ دیتے ہوئے کہا کہ ’لبنان لبنانی عوام کا ہے اور کسی بھی ملک کو اس کے فیصلوں میں مداخلت نہیں کرنی چاہیے۔‘
صدر جوزف عون نے یہ بھی کہا کہ لبنان کو امریکہ کے ساتھ مذاکرات میں ایران کی ’سودے بازی‘ کا آلہ کار نہیں بننا چاہیے۔
اسی دوران لبنانی فوج نے جنوبی لبنان میں اسرائیلی حملے میں اپنے تین فوجیوں کی ہلاکت کا اعلان کیا۔
پاکستان کے وزیرِ داخلہ تہران پہنچ گئے، ’محسن نقوی ایران کے رہبر مجتبیٰ خامنہ ای کے لیے پیغام لے کر آئے ہیں‘: ایرانی میڈیا
،تصویر کا ذریعہSocial Media/Mohsin Naqvi/Facebook
ایرانی میڈیا کے مطابق پاکستان کے وزیرِ داخلہ محسن نقوی تہران پہنچ گئے ہیں۔ خلیج فارس میں تنازع بڑھتے ہی پاکستان کے وزیر داخلہ نے تہران کا دورہ کیا ہے۔
ایرانی خبر رساں اداروں ارنا اور تسنیم کے مطابق، اپنے دورے کے دوران محسن نقوی کی ایران کے وزیرِ خارجہ عباس عراقچی سمیت دیگر حکام سے ملاقاتیں متوقع ہیں۔
ایران کے بعض ذرائع ابلاغ کا کہنا ہے کہ محسن نقوی ایران کے رہبر مجتبیٰ خامنہ ای کے لیے پیغام لے کر آئے ہیں۔
محسن نقوی نے گذشتہ ماہ ایک ہفتے میں دو بار ایران کا دورہ کیا تھا اور ان دوروں کے دوران اُنھوں نے ایران کے صدر، پارلیمنٹ کے سپیکر، وزیر خارجہ اور وزیر داخلہ سے ملاقات کی تھی۔
ایران اور امریکہ کے درمیان مذاکرات میں پاکستان اہم ثالث ہے۔
تہران روانگی سے قبل محسن نقوی نے پاکستانی وزیر اعظم شہباز شریف سے ملاقات کی اور اپنے تہران کے سفر کے لیے ہدایات حاصل کیں۔
اطلاعات کے مطابق پاکستان، ایران اور امریکہ کے درمیان جنگ کے خاتمے کے لیے کسی ممکنہ معاہدے کی کوششوں میں اہم ثالث کا کردار ادا کر رہا ہے۔
اسلام آباد میں ایک صحافی کے لاپتہ ہونے کی اطلاعات، ٹی وی چینل نے پولیس کو درخواست دے دی
،تصویر کا ذریعہSocial Media
اسلام آباد میں ایک نجی ٹی وی چینل جی این این کے صحافی کے لاپتہ ہونے کا معاملہ سامنے آیا ہے، جس کے بعد ادارے کی جانب سے پولیس کو باضابطہ درخواست جمع کرا دی گئی ہے۔
چینل کی جانب سے جمع کرائی گئی درخواست میں کہا گیا ہے کہ صحافی یاسر ایاز خان گذشتہ روز شام تقریباً پانچ بجے اپنے گھر سے نکلے تھے، تاہم اس کے بعد سے ان کا کوئی سراغ نہیں مل سکا۔
درخواست کے مطابق، اہلِ خانہ اور ادارے کی جانب سے صحافی سے رابطہ کرنے کی متعدد کوششیں کی گئیں، جن میں موبائل فون کے ذریعے رابطہ بھی شامل ہے، لیکن کوئی کامیابی حاصل نہیں ہو سکی۔ اس صورتحال کے باعث اہلِ خانہ میں شدید تشویش پائی جا رہی ہے۔
رپورٹ میں کہا گیا ہے کہ صحافی کے اچانک لاپتہ ہونے سے نہ صرف ان کے گھر والوں بلکہ میڈیا حلقوں میں بھی بے چینی بڑھ رہی ہے۔
چینل نے پولیس سے مطالبہ کیا ہے کہ واقعے کا فوری نوٹس لیتے ہوئے صحافی کی بازیابی کے لیے اقدامات کیے جائیں۔
درخواست میں عوام سے بھی اپیل کی گئی ہے کہ اگر کسی کے پاس یاسر ایاز خان کے بارے میں کوئی معلومات ہوں تو متعلقہ حکام کو آگاہ کریں تاکہ ان تک جلد رسائی ممکن بنائی جا سکے۔
جی این این چینل میں کام کرنے والے ایک سینیئر عہدیدار نے بی بی سی کو بتایا کہ آبپارہ پولیس اس واقعے کو دیکھ رہی ہے اور مانسہرہ کے ایک گاؤں میں مقیم یاسر ایاز کے گھر والوں سے بھی رابطہ کیا گیا ہے۔
ایران کی لبنانی فوج پر اسرائیلی حملے کی مذمت
،تصویر کا ذریعہFatemeh Bahrami/Anadolu via Getty Images
،تصویر کا کیپشناسماعیل بقائی
ایران کی وزارتِ خارجہ کے ترجمان اسماعیل بقائی نے کہا ہے کہ اسرائیل کی جانب سے لبنانی فوج کے دو افسران اور ایک اہلکار کو قتل کرنا اس بات کی تصدیق کرتا ہے کہ اسرائیل ’لبنان کو اس کے تمام پہلوؤں سمیت اپنا بنانے کا دعویٰ کر رہا ہے‘۔
سماجی رابطے کی ویب سائٹ ایکس پر ایک بیان میں اسماعیل بقائی نے اس حملے کو ’لبنان، اس کی فوج اور اس کی خودمختاری کے خلاف ایک سنگین جرم‘ قرار دیا، اور کہا کہ یہ کھلی جارحیت کا پیغام ہے جس سے ظاہر ہوتا ہے کہ اسرائیل لبنان کے لیے نہ سکیورٹی چاہتا ہے، نہ استحکام اور نہ ہی خوشحالی۔
انھوں نے اسرائیل پر الزام لگایا کہ وہ فوجیوں، مزاحمت کاروں اور عام شہریوں میں کوئی فرق نہیں کرتا، اور سب کو نشانہ بنایا جا رہا ہے۔
اسماعیل بقائی نے ہلاک ہونے والوں کے خاندانوں، لبنانی فوج، حکومت اور عوام سے تعزیت کا اظہار بھی کیا۔
سی ٹی ڈی کا کوہ سلیمان میں جھڑپ کے دوران ٹی ٹی پی کے ایک اہم کمانڈر سمیت دو شدت پسندوں کی ہلاکت کا دعویٰ
،تصویر کا ذریعہGetty Images
انسدادِ دہشت گردی ڈیپارٹمنٹ (سی ٹی ڈی) نے کوہ سلیمان میں دہشت گردوں کے ساتھ جھڑپ میں کالعدم تحریکِ طالبان (ٹی ٹی پی) کے ایک اہم کمانڈر سمیت دو شدت پسندوں کی ہلاکت کا دعویٰ کیا ہے۔
سی ٹی ڈی کے دعوے کے مطابق خفیہ اطلاع پر کارروائی کرتے ہوئے کالعدم تحریک طالبان پاکستان (ٹی ٹی پی) سے وابستہ شدت پسندوں کے ایک گروہ کا سراغ لگا لیا، جس کے نتیجے میں ہونے والی جھڑپ میں ایک اہم کمانڈر سمیت دو شدت پسند ہلاک ہو گئے جبکہ ان کے دیگر ساتھی اپنے دو زخمی ساتھیوں کو لے کر پسپا ہو گئے۔
ترجمان سی ٹی ڈی کے دعوے کے مطابق مطابق مصدقہ انٹیلی جنس اطلاعات موصول ہوئی تھیں کہ جنوبی پنجاب سے تعلق رکھنے والے ٹی ٹی پی کے 12 سے 15 مسلح افراد پنجاب، بلوچستان اور خیبر پختونخوا کے سرحدی علاقے کے راستے تمن قیصرانی کے قبائلی علاقے میں داخل ہوئے ہیں۔
سی ٹی ڈی کا دعویٰ ہے کہ یہ عناصر تحصیل کوہ سلیمان، وہوا اور تونسہ کے آباد علاقوں میں دہشت گردی کی کارروائیوں کی منصوبہ بندی کر رہے تھے۔
اطلاع ملتے ہی جدید ہتھیاروں، نگرانی کے آلات اور ڈرون ٹیکنالوجی سے لیس سی ٹی ڈی کی خصوصی ٹیمیں متحرک کر دی گئیں۔ اہلکاروں نے جنڈوگا کے قریب کاچی گورو-لکھنی کے دشوار گزار پہاڑی علاقے میں رات بھر خفیہ نگرانی جاری رکھی۔
ترجمان کے مطابق دن کے وقت ڈرون اور دیگر جدید ذرائع کی مدد سے مشتبہ دہشت گردوں کی موجودگی کی نشاندہی کی گئی، جس کے بعد سی ٹی ڈی اور دہشت گردوں کے درمیان فائرنگ کا تبادلہ شروع ہو گیا۔
ترجمان کے مطابق کراس فائرنگ کے دوران دو نامعلوم دہشت گرد موقع پر ہلاک ہو گئے جبکہ دو زخمی ہوئے۔ ہلاک ہونے والوں کی شناخت کا عمل جاری ہے۔ جانی نقصان کے بعد باقی دہشت گرد ناہموار پہاڑی راستوں اور قدرتی آڑ کا فائدہ اٹھاتے ہوئے فرار ہونے میں کامیاب ہو گئے۔
سی ٹی ڈی کا کہنا ہے کہ فرار ہونے والے دہشت گردوں کی تلاش کے لیے انٹیلی جنس بیسڈ سرچ اور سویپ آپریشن جاری ہے۔
روس نے جنگ کی وجہ سے ایران میں تباہ ہونے والے انفراسٹرکچر کی تعمیر نو پر آمادگی ظاہر کی ہے: ایرانی عہدے دار کا دعویٰ
،تصویر کا ذریعہGetty Images
ایران نے دعویٰ کہا ہے کہ روس نے ایران کے جنگ سے تباہ ہونے والے انفراسٹرکچر اور بنیادی ڈھانچے کی تعمیر نو کے لیے آمادگی ظاہر کی ہے۔
ایران کی وزارت برائے بین الاقوامی اُمور کے سربراہ محمد ولی الادینی نے کہا کہ جنگ کے دوران ملک کے اہم بنیادی ڈھانچے کو پہنچنے والے نقصان کے بعد، روس کے نائب وزیر توانائی مارشاوین نے تعمیر نو میں حصہ لینے کے لیے اپنے ملک کی تیاری کا اعلان کیا ہے۔
اُنھوں نے کہا کہ توانائی اور بجلی کے شعبوں میں روسی کمپنیوں کی تکنیکی اور اعلیٰ صلاحیت کو دیکھتے ہوئے ماسکو کے لیے یہ ضروری ہے کہ وہ تباہ شدہ انفراسٹرکچر کی تعمیرِ نو اور تزئین و آرائش اور ضروری آلات کی فراہمی میں حصہ لینے کے لیے اپنی تیاری کا اعلان کرے۔
الادینی نے امید ظاہر کی کہ یہ تعاون پانی اور بجلی کے شعبوں میں دونوں ممالک کے درمیان تکنیکی اور انتظامی تعاون کو مضبوط اور وسعت دینے کی راہ ہموار کر سکتا ہے۔
وزیرِ داخلہ محسن نقوی تہران روانہ ہو گئے
،تصویر کا ذریعہGetty Images
پاکستان کے وزیرِ داخلہ محسن نقوی تہران روانہ ہو گئے ہیں۔
ایران کے بعض ذرائع ابلاغ کا کہنا ہے کہ محسن نقوی اسلامی جمہوریہ کے رہبر مجتبیٰ خامنہ ای کے لیے پیغام لے کر جا رہے ہیں۔
محسن نقوی نے گذشتہ ماہ ایک ہفتے میں دو بار ایران کا دورہ کیا تھا اور ان دوروں کے دوران اُنھوں نے ایران کے صدر، پارلیمنٹ کے سپیکر، وزیر خارجہ اور وزیر داخلہ سے ملاقات کی تھی۔
ایران اور امریکہ کے درمیان مذاکرات میں پاکستان اہم ثالث ہے۔
تہران روانگی سے قبل محسن نقوی نے پاکستانی وزیر اعظم شہباز شریف سے ملاقات کی اور اپنے تہران کے سفر کے لیے ہدایات حاصل کیں۔
متحدہ عرب امارات کی بحرین اور کویت پر ایرانی حملوں کی مذمت،’یہ حملے دہشت گردی کی کارروائیاں ہیں‘
متحدہ عرب امارات نے بحرین اور کویت پر ایران کے میزائل اور ڈرون حملوں کی مذمت کی ہے اور کہا ہے کہ ’یہ حملے دہشت گردی کی کارروائیاں ہیں۔‘
ایکس پر جاری بیان میں متحدہ عرب امارات کی وزارتِ خارجہ نے کہا ہے کہ ’ہم سخت ترین الفاظ میں برادر ممالک کویت اور مملکتِ بحرین کے خلاف ایران کے دہشت گردانہ حملوں کی مذمت کرتے ہیں، جنھیں میزائلوں اور ڈرونز سے نشانہ بنایا گیا۔‘
بیان میں کہا گیا کہ ’یہ حملے دہشت گردی کی کارروائیاں ہیں اور کویت اور مملکتِ بحرین کی خودمختاری کی واضح خلاف ورزی ہیں، جو ان ممالک کی سلامتی اور استحکام کے لیے خطرہ ہیں۔‘
وزارت نے کویت اور مملکتِ بحرین کے ساتھ مکمل یکجہتی کا اظہار کرتے ہوئے کہا کہ متحدہ عرب امارات ایسے ہر اقدام کی حمایت کرتا ہے جو ان ممالک کی سلامتی اور استحکام کو برقرار رکھنے میں معاون ہو۔
اس سے قبل بحرین اور کویت نے بھی ان حملوں کی سخت مذمت کی تھی۔
مہاجرین کی 12 نشستوں سے متعلق صدارتی ریفرنس: پاکستان کے زیرِ انتظام کشمیر کی سپریم کورٹ نے فیصلہ محفوظ کر لیا, شہزاد ملک، بی بی سی اردو ڈاٹ کام، اسلام آباد
،تصویر کا ذریعہSupreme Court of Pakistan administered Kashmir
پاکستان کے زیر انتظام کشمیر کی سپریم کورٹ نے مہاجرین کی 12 نشستوں سے متعلق صدارتی ریفرنس پر سماعت مکمل کرکے فیصلہ محفوظ کرلیا ہے۔
چیف جسٹس راجہ سعید اکرم کی سربراہی میں دو رکنی بینچ نے اس صدارتی ریفرنس کی سماعت کی جسٹس خالد یوسف چوہدری بھی بینچ میں شامل ہیں۔
عدالت نے صدارتی ریفرنس میں اٹھائے گئے آئینی سوالات پر عدالتی معاونین اور فریقین کے تفصیلی دلائل سنے۔
سینئر قانون دان راجہ سجاد احمد خان ایڈووکیٹ نے مؤقف اختیار کیا کہ آرٹیکل 33 کے تحت اسمبلی کو مکمل قانون سازی کا اختیار حاصل ہے۔
اُنھوں نے کہا کہ آل پارٹیز کانفرنس میں ارکانِ اسمبلی مہاجرین نشستوں کے معاملے پر اپنی رائے واضح کر چکے ہیں۔
اُنھوں نے کہا کہ مہاجرین نشستوں کا معاملہ ہائی پاور کمیٹی میں زیرِ غور لایا جانا چاہیے تھا، سماعت کے دوران وفاقی کمیٹی اور جوائنٹ عوامی ایکشن کمیٹی کے مذاکرات کا حوالہ بھی عدالت کے سامنے پیش کیا گیا۔
بیرسٹر ہمایوں نواز، راجہ صداقت حسین اور سردار عبدالرازق نے بھی قانونی نکات پر دلائل دیے۔
پاکستان کے زیر انتظام کشمیر کے سابق وزیراعظم راجہ فاروق حیدر خان اور رکن اسمبلی عبدالماجد خان سماعت کے دوران عدالت میں موجود رہے۔
عدالت نے اس سوال کا جائزہ لیا کہ آیا 12 مہاجرین نشستیں آئینی ترمیم کے بغیر ختم یا تبدیل کی جا سکتی ہیں اور اس کے ساتھ ساتھ موجودہ قانون ساز اسمبلی کے آئینی ترمیم کے اختیار اور حدود پر بھی تفصیلی بحث ہوئی۔
انتخابات روکنے یا آئینی ترمیم کے لیے دباؤ ڈالنے کی قانونی حیثیت پر عدالت نے رائے طلب کی۔
صدر سپریم کورٹ بار راجہ افتاب، صدر سینٹرل بار راجہ زیغم افتخار اور صدر ہائی کورٹ بار راجہ جہانگیر اسلم بھی عدالت میں پیش ہوئے۔
سابق ایڈیشنل سیکریٹری فرحت علی میر، خواجہ منظور قادر اور ایم تنویر چوہدری ایڈووکیٹ نے بھی اپنے مؤقف عدالت کے سامنے رکھے۔
سپریم کورٹ کے ڈویژن بینچ نے تمام فریقین کے دلائل مکمل ہونے پر فیصلہ محفوظ کر لیا۔
سپریم کورٹ نے پاکستان کے زیرِ انتظام کشمیر کے صدر کو اپنی آئینی رائے سے آگاہ کرنے کی ہدایت جاری کر دی۔
ایرانی حملوں کے بعد کویت کی فضائی حدود دوبارہ کھول دی گئیں
،تصویر کا ذریعہGetty Images
کویت نے گزشتہ رات ہونے والے حملوں کے بعد اپنی فضائی حدود دوبارہ کھولنے کا اعلان کیا ہے۔
کویت کی سول ایوی ایشن اتھارٹی کے مطابق ایرانی حملوں کے باعث فضائی ٹریفک کئی گھنٹوں تک معطل رہی تاہم اب پروازوں کی آمد و رفت بحال کر دی گئی ہے۔
اس سے قبل کویت نے احتیاطی تدابیر کے تحت اپنی فضائی حدود عارضی طور پر بند کر دی تھیں۔ حکام کے مطابق کویت ایئرویز اور الجزیرہ ایئرویز کی 11 پروازوں کا رخ قریبی ہوائی اڈوں کی جانب موڑ دیا گیا تھا۔
کویتی حکام کا دعویٰ ہے کہ ملک کے دفاعی نظام نے ’دشمن میزائل اور ڈرون کے خطرات‘ کا مقابلہ کیا ہے۔
دوسری جانب پاسدارانِ انقلاب نے دعویٰ کیا ہے کہ انھوں نے کویت میں امریکی فضائی اڈے اور بحرین میں موجود امریکی بحریہ کے پانچویں بیڑے کو نشانہ بنایا۔ ان کا کہنا تھا کہ یہ کارروائی قشم اور سرک میں امریکی ڈرون حملوں کے ’جواب‘ میں کی گئی۔
ادھر امریکی فوج کے مطابق سینٹرل کمانڈ (سینٹکام) کے کمانڈر ایڈمرل بریڈ کوپر نے حال ہی میں مشرقِ وسطیٰ کا دورہ کیا جس کے دوران انھوں نے بحرین، قطر، کویت اور اردن کے اعلیٰ حکام سے ملاقاتیں کیں۔
پاکستان کے زیرِ انتظام کشمیر میں ڈیوٹی سے انکار پر اسلام پولیس کا اہلکار برطرف
پاکستان کے زیرِ انتظام کشمیر میں ڈیوٹی پر جانے سے انکار کرنے والے اسلام آباد پولیس کے ایک اہلکار کو برطرف کر دیا گیا ہے۔
اسلام آباد پولیس کے ترجمان نے بھی برطرفی کی تصدیق کی ہے۔ اس حوالے سے جاری ہونے والے حکم نامے میں کہا گیا ہے کہ کانسٹیبل احمد علی کو پاکستان کے زیرِ انتظام کشمیر میں آئندہ ماہ ہونے والے انتخابات میں ڈیوٹی کے لیے طلب کیا گیا۔
حکم نامے میں کہا گیا ہے کہ پولیس ہیڈ کوارٹر طلبی کے باوجود کانسٹیبل احمد علی ڈیوٹی پر نہیں آئے اور اُنھوں نے پاکستان کے زیرِ انتظام کشمیر جانے سے انکار کیا۔
اسلام آباد پولیس کے ایس پی اویس علی خان کے مطابق اس غیر پیشہ ورانہ طرز عمل اور فرائض سے غفلت برتنے پر مذکورہ کانسٹیبل کو نوکری سے برخاست کر دیا گیا ہے۔
واضح رہے کہ پاکستان کے زیرِ انتظام کشمیر میں آئندہ ماہ انتخابات شیڈول ہیں، لیکن اس سے قبل ہی وہاں جوائنٹ ایکشن کمیٹی نے نو جون کو احتجاج کی کال بھی دے رکھی ہے اور وہااں صورتحال کشیدہ ہے۔
،تصویر کا ذریعہIslamabad Police
شہباز شریف سے محسن نقوی کی ملاقات، تہران کے دورے کے حوالے سے مشاورت
،تصویر کا ذریعہPMO
وزیراعظم محمد شہباز شریف سے وفاقی وزیر داخلہ سید محسن نقوی نے لاہور میں ہونے والی ملاقات میں کرغستان کے دارالحکومت بشکیک میں ہونے والی شنگھائی تعاون کانفرنس کے موقع پر اپنی مختلف اہم ملاقاتوں سے آگاہ کیا۔
اعلامیے کے مطابق اس موقع پر وزیراعظم اور وزیر داخلہ کے درمیان وزیر داخلہ کے آئندہ تہران کے دورے کے حوالے سے بھی مشاورت ہوئی جس دوران وزیر اعظم نے دورے سے متعلق رہنمائی فراہم کی۔
اس ملاقات میں ملک کی مجموعی امن و امان اور سیکیورٹی صورتحال پر تفصیلی تبادلۂ خیال کیا گیا۔
وزیر داخلہ نے وزیراعظم کو ملک میں امن و امان کے قیام اور شہریوں کے تحفظ کے لیے کیے جانے والے اقدامات کے بارے میں بریفنگ دی۔
اعلامیے کے مطابق وزیراعظم نے ملک میں امن و امان کے قیام اور سکیورٹی کو مزید مؤثر بنانے کے لیے تمام متعلقہ اداروں کے درمیان قریبی رابطے اور مربوط حکمت عملی کی ضرورت پر زور دیا۔
انسانی حقوق کمیشن کی انسدادِ دہشت گردی قوانین کے تحت جوائنٹ ایکشن کمیٹی پر پابندی کے فیصلے کی مذمت
،تصویر کا ذریعہGetty Images
انسانی حقوق کمیشن نے پاکستان کے زیر انتظام کشمیر میں حکومت کی جانب سے جوائنٹ عوامی ایکشن کمیٹی پر انسدادِ دہشت گردی قوانین کے تحت پابندی عائد کرنے کے فیصلے پر گہری تشویش کا اظہار کیا ہے۔
یہ پابندی ایسے وقت میں عائد کی گئی ہے جب مذکورہ کمیٹی نےنو جون کو عوامی احتجاج کی کال دے رکھی تھی۔
ایچ آر سی پی کے مطابق ایک ایسے گروہ کے خلاف انسدادِ دہشت گردی قوانین کا استعمال، جو سیاسی اور سماجی و معاشی مطالبات کے لیے متحرک رہا ہے، سنگین سوالات کو جنم دیتا ہے۔
کمیشن کا کہنا ہے کہ اس اقدام سے خطے میں پُرامن اجتماع اور اختلافِ رائے کے لیے گنجائش میں کمی کے خدشات پیدا ہو رہے ہیں۔
،تصویر کا ذریعہ@HRCP87
ادارے نے خبردار کیا ہے کہ اس طرح کے اقدامات شہری آزادیوں پر ممکنہ قدغن کی نشاندہی کرتے ہیں۔
ایچ آر سی پی نے کہا ہے کہ ایسے وقت میں جب جولائی میں کشمیر میں انتخابات قریب آ رہے ہیں، یہ انتہائی ضروری ہے کہ بنیادی حقوق کا مکمل تحفظ یقینی بنایا جائے۔ان حقوق میں اظہارِ رائے کی آزادی، تنظیم سازی کا حق اور پُرامن اجتماع کا حق شامل ہیں۔
کمیشن کے مطابق جمہوری عمل کی ساکھ کے لیے یہ لازم ہے کہ شہریوں کو بغیر خوف کے اپنے خیالات کے اظہار اور پُرامن احتجاج کی اجازت دی جائے۔
پاکستان کے زیر انتظام کشمیر کے مختلف علاقوں سے جوائنٹ عوامی ایکشن کمیٹی کے کارکنوں سمیت 72 افراد زیر حراست, شہزاد ملک، بی بی سی اردو ڈاٹ کام، اسلام آباد
،تصویر کا ذریعہGetty Images
پاکستان کے زیر انتظام کشمیر کے مختلف علاقوں سے گزشتہ اٹھارہ گھنٹوں کے دوران امن و اماں اور شہریوں کے جان و مال کے تحفظ کے لیے کارروائی کرتے ہوئے کم از کم 72 افراد کو حراست میں لے لیا گیا ہے۔
مقامی پولیس کے مطابق مظفرآباد سے جوائنٹ عوامی ایکشن کمیٹی کے کارکنوں اور کور کمیٹی کے ارکان کو بھی گرفتار کیا گیا ہے۔
مقامی پولیس کے مطابق جن کور ممبران کو حراست میں لیا گیا ہے ان میں انجم الزماں اور راجہ صہیب جاوید شامل ہیں۔
یاد رہے کہ پاکستان کے زیر انتظام کشمیر میں ان دنوں حالت کشیدہ ہیں۔
جموں و کشمیر قانون ساز اسمبلی میں پاکستان میں مقیم مہاجرین (جنھیں ’مہاجرین مقیم پاکستان‘ کہا جاتا ہے) کی 12 نشستوں پر عوامی ایکشن کمیٹی نے کسی قسم کا سمجھوتہ کرنے سے انکار کرتے ہوئے نو جون (منگل) کو غیر معینہ مدت کے لیے احتجاج کی کال دے رکھی ہے اور شہریوں کو ہنگامی صورتحال کے لیے راشن ذخیرہ کرنے کی ہدایت کی ہے۔
احتجاج کی ممکنہ صورتحال سے نمٹنے کے لیے کشمیر حکومت نے پاکستان کی وفاقی حکومت سے اضافی نفری طلب کی ہے جبکہ احتجاج کے پیش نظر جموں و کشمیر یونیورسٹی اور میرپور انٹرمیڈیٹ بورڈ نے آٹھ جون سے شروع ہونے والے امتحانات منسوخ کر دیے ہیں۔
حالت میں کشیدگی سنیچر کی صبح اس وقت بڑھ گئی جب آج صبح کے وقت راولاکوٹ میں فائرنگ کے نتیجے میں جوائنٹ عوامی ایکشن کمیٹی کا ایک رکن ہلاک ہو گیا۔
جوائنٹ عوامی ایکشن کمیٹی نے الزام عائد کیا ہے کہ قانون نافذ کرنے والے اداروں کے اہلکاروں کی جانب سے فائرنگ کے نتیجے میں شاہ زیب نامی شخص کی ہلاکت ہوئی ہے ۔
مقامی پولیس کے مطابق جن کور ممبران کو حراست میں لیا گیا ہے ان میں انجم الزماں اور راجہ صہیب جاوید شامل ہیں۔
پولیس کے مطابق ابتدائی کارروائی کے دوران بعض افراد سے اسلحہ اور مواصلاتی آلات مشتبہ دستاویزات ، امن و اماں کو متاثر کرنے کے منصوبوں سے متعلق مواد، احتجاجی اور پر تشدد سر گرمیوں کے منظم طریقہ کار ڈٹرنس اور غیر ملکی افراد سے مشکوک افراد کے اشارے بھی ملے ہیں جن کی توتیش قانون کے مطابق جاری ہے۔
آئی جی پولیس پاکستان زیر انتظام کشمیر نے واضح کیا ہے کہ کسی شخص گروہ یا غیر قانونی سر گرمی میں ملوث عناصر تشدد اشتعال انگزیز اسلحہ کے استمال سڑکوں کی بندش عوامی املاک کو نقصان پہنچانے یا شہریوں کو معمولات زندگی متاثر کرنے کی اجازت نہیں دی جاۓ گی
پاکستان کے زیر انتظام کشمیر کے محکمہ داخلہ کے اہلکار کے مطابق جوائنٹ عوامی ایکشن کمیٹی کو جب سے کالعدم قرار دیا گیا ہے اس کے بعد اس کمیٹی سے منسلک جن افراد کو انسداد دہشت گردی ایکٹ کے شیڈول ون میں شامل کیا گیا ہے ان کے خلاف قانونی کارروائی کی جا رہی ہے۔
یاد رہے کہ پاکستان کے زیر انتظام کشمیر کے ہوم ڈپارٹمنٹ کے ایک اہلکار نے نام ظاہر نہ کرنے کی شرط پر بی بی سی کو بتایا تھا کہ ڈھائی سو سے زیادہ ایسے افراد کی فہرست تیار کر لی گئی ہے جن کے بارے میں کہ بتایا جاتا ہے کہ وہ جوائنٹ عوامی ایکشن کمیٹی کے سرکردہ رہنما ہیں۔
اہلکار کے مطابق اس فہرست میں شامل افراد کو انسداد دہشت ایکٹ کے شیڈول ون میں ڈالا جائے گا جس کے مطابق ان افراد کی نہ صرف نقل و حرکت پر پابندی ہوگی بلکہ وہ اپنے بینک اکاونٹس بھی اجازت کے بغیر استعمال نہیں کر سکیں گے۔
وفاقی وزیرداخلہ محسن نقوی آج پاکستان سے ایران کے لیے روانہ ہوں گے, روحان احمد، بی بی سی اردو
،تصویر کا ذریعہIRNA
،تصویر کا کیپشنفائل فوٹو: حالیہ ہفتوں میں محسن نقوی کا تیسرا دورہ تہران ہے اور وہ اس سے قبل فیلڈ مارشل عاصم منیر کے ساتھ بھی ایران کا سفر کر چکے ہیں
وفاقی وزیرداخلہ محسن نقوی آج پاکستان سے ایران کے لیے روانہ ہوں گے۔ اس حوالے سے وزارت داخلہ کے ایک اہلکار نے بی بی سی اردو کو بتایا کہ وزیر داخلہ ثالثی کی کوششوں کے تحت ایران جا رہے ہیں۔
اہلکار کے مطابق ’وزیر داخلہ فیلڈ مارشل عاصم منیر کا پیغام رہبر اعلیٰ کے لیے لے کر جا رہے ہیں جبکہ وزیراعظم شہباز شریف نے بھی ایرانی قیادت کے لیے انھیں خصوصی پیغام دیا ہے۔‘
خیال رہے یہ حالیہ ہفتوں میں محسن نقوی کا تیسرا دورہ تہران ہے اور وہ اس سے قبل فیلڈ مارشل عاصم منیر کے ساتھ بھی ایران کا سفر کر چکے ہیں
دوسری جانب وزارت داخلہ سے جاری اعلامیے میں بتایا گیا ہے کہ وزیر محسن نقوی کرغزستان سے وطن واپس پہنچ گئے ہیں اور اب وہ وزیراعظم شہباز شریف اور اعلیٰ حکام سے ملاقات کے بعد آج وہ تہران روانہ ہوں گے۔
ایران کی سرکاری نیوز ایجنسی ارنا نے بھی اس خبر کے حوالے سے بیان جاری کیا ہے کہ ’یہ دورہ اس کے فوراً بعد ہوا ہے جب محسن نقوی نے شنگھائی تعاون تنظیم کے وزرائے داخلہ کے اجلاس کے موقع پر اپنے ایرانی ہم منصب اسکندر مومنی کے ساتھ دو ملاقاتیں کی تھیں۔
ارنا کے مطابق ایران کی وزارتِ خارجہ کے ترجمان اسماعیل بقائی نے حال ہی میں کہا ہے کہ دونوں فریق ایک مفاہمتی یادداشت کے مسودے کی تیاری کے آخری مراحل میں ہیں جس کا مقصد تنازع کے خاتمے پر مرکوز ہے۔
پاکستان میں سونے کی قیمت میں فی تولہ 12 ہزار 489 روپے کی کمی, تنویر ملک ، صحافی
،تصویر کا ذریعہGetty Images
عالمی مارکیٹ میں قیمتوں میں کمی کے بعد سنیچر کے روز مقامی مارکیٹ میں سونے کی قیمت میں فی تولہ 12 ہزار 489 روپے کی نمایاں کمی ریکارڈ کی گئی۔
آل پاکستان صرافہ جیمز اینڈ جیولرز ایسوسی ایشن کے مطابق 24 قیراط سونے کی فی تولہ قیمت کم ہو کر چار لاکھ 55 ہزار 327 روپے ہو گئی۔
اسی طرح 10 گرام سونے کی قیمت 11 ہزار 240 روپے کمی کے بعد تین لاکھ 89 ہزار 772 روپے تک آ گئی۔
ایسوسی ایشن کے مطابق عالمی مارکیٹ میں سونے کی قیمت 124.89 ڈالر کمی کے بعد 4 ہزار 328.92 ڈالر فی اونس ہو گئی۔
مقامی مارکیٹ میں سونے کی قیمتوں کا تعین عالمی نرخوں کے مقابلے میں 20 ڈالر پریمیم شامل کر کے کیا جاتا ہے۔
دوسری جانب چاندی کی قیمت میں بھی کمی دیکھنے میں آئی۔ فی تولہ چاندی 463 روپے سستی ہو کر سات ہزار 267 روپے کی سطح پر آ گئی جبکہ 10 گرام چاندی کی قیمت 421 روپے کمی کے بعد چھ ہزار 202 روپے ہو گئی۔
