لائیو, ایران کے خلاف بحری ناکہ بندی بدستور نافذ، خلاف ورزی کرنے والے 12 جہازوں کا رُخ موڑا: امریکی فوج

لائیو کوریج

1. 26 منٹ قبلٹرمپ کا فی الحال ایران پر حملوں میں شدت نہ لانے کا فیصلہ: امریکی ذرائع ابلاغ

   

   ،تصویر کا ذریعہGetty Images

   امریکی میڈیا اداروں نیو یارک ٹائمز، ایگزیوس، سی این این اور ایسوسی ایٹڈ پریس نے رپورٹ کیا ہے کہ ڈونلڈ ٹرمپ نے فی الحال ایران کے خلاف امریکی فوجی حملوں میں شدت نہ لانے کا فیصلہ کیا ہے۔

   ان ذرائع ابلاغ کے مطابق یہ فیصلہ جمعے کے روز اس وقت کیا گیا جب حکام نے پیٹریاٹ دفاعی میزائلوں کے ذخائر میں کمی اور خلیج فارس میں امریکہ کے عرب اتحادیوں کے دور ہونے کے خدشات پر تشویش کا اظہار کیا۔

   وائٹ ہاؤس نے ابھی تک ان رپورٹس کی باضابطہ تصدیق نہیں کی، تاہم اس کا کہنا ہے کہ صدر ٹرمپ ہمیشہ سفارتی حل کو ترجیح دیتے ہیں۔

   جمعے کی رات تقریباً دو ہفتوں میں پہلی رات تھی جب امریکہ نے ایران پر کوئی فضائی حملہ نہیں کیا، جبکہ سنیچر کی رات بھی کسی حملے کی اطلاع موصول نہیں ہوئی۔

2. 43 منٹ قبلجنگ اور جنگ بندی کے دوران 18 ارب ڈالر کا تیل فروخت کیا: ایرانی وزارتِ تیل

   

   ،تصویر کا ذریعہBloomberg via Getty Images

   بی بی سی فارسی کے مطابق ایران کی وزارتِ تیل کا کہنا ہے کہ اس نے امریکہ کے ساتھ جنگ اور اس کے بعد نافذ ہونے والی جنگ بندی کے دوران مجموعی طور پر 18 ارب ڈالر مالیت کا تیل فروخت کیا۔

   وزارت کے بیان کے مطابق ایران نے جنگ کے دوران 11 ارب 50 کروڑ ڈالر اور جنگ بندی کے عرصے میں 6 ارب 50 کروڑ ڈالر کا تیل فروخت کیا۔ وزارتِ تیل نے کہا کہ یہ رقم رواں مالی سال کے بجٹ میں متوقع تیل کی آمدنی کے 60 فیصد سے زیادہ کے برابر ہے۔

   یہ اعداد و شمار ایک ایسے وقت میں سامنے آئے ہیں جب ایرانی پارلیمان کے سپیکر اور ایران کے سینیئر مذاکرات کار محمد باقر قالیباف نے جولائی کے آغاز میں کہا تھا کہ امریکہ کی جانب سے ایرانی بندرگاہوں کے تقریباً 50 سے 60 روزہ محاصرے کے دوران ایران ایک بیرل تیل بھی برآمد نہیں کر سکا تھا۔ ان کا کہنا تھا کہ محاصرہ ختم ہونے کے بعد ایران کی تیل برآمدات دوبارہ بڑھ گئی ہیں۔

   ایران اور امریکہ کے درمیان جنگ 28 فروری کو امریکہ اور اسرائیل کے حملوں کے بعد شروع ہوئی تھی، جبکہ اپریل میں ہونے والی جنگ بندی کے نتیجے میں بیشتر لڑائی رک گئی تھی۔

   تاہم آبنائے ہرمز کے کنٹرول سے متعلق اختلافات میں شدت آنے کے بعد یہ جنگ بندی جولائی کے آغاز میں ختم ہو گئی تھی۔

   پابندیوں کے دباؤ میں ایران نے کیا حکمتِ عملی اپنائی؟ جاننے کے لیے یہ رپورٹ پڑھیں۔

3. ایک گھنٹہ قبلایران میں ناکہ بندی کی خلاف ورزی کرنے والے 12 جہازوں کا راستہ تبدیل کر دیا: امریکی فوج

   

   ،تصویر کا ذریعہCENTCOM

   امریکی فوج کی مرکزی کمان سینٹکام نے کہا ہے کہ ایران کے خلاف بحری ناکہ بندی بدستور مکمل طور پر نافذ ہے اور اس نے خلاف ورزی کرنے والے 12 بحری جہازوں کا راستہ تبدیل کیا۔

   سوشل میڈیا ویب سائٹ ایکس پر جاری بیان میں سینٹکام نے کہا کہ امریکی فوج نے احکامات کی تعمیل نہ کرنے والے دو جہازوں کو ناکارہ بنا دیا اور ناکہ بندی پر مکمل عمل درآمد یقینی بنانے کے لیے دو جہازوں پر چڑھ کر تلاشی لی۔

   سینٹکام نے بتایا کہ سنیچر کے روز امریکی افواج نے بحیرۂ عرب میں کوموروس کے پرچم بردار آئل ٹینکر چارمینار پر سوار ہو کر جانچ پڑتال کی اور کارروائی مکمل ہونے کے بعد اس تیل بردار بحری جہاز کو اپنا سفر جاری رکھنے کی اجازت دے دی گئی۔

   بیان کے مطابق امریکی افواج نے 24 جولائی کو خلیج عمان میں موزمبیق کے پرچم بردار آئل ٹینکر لاوین کو ناکارہ بنا دیا، کیونکہ اس کے عملے نے متعدد بار ناکہ بندی کی خلاف ورزی کرنے کی کوشش کی اور امریکی افواج کی بار بار کی تنبیہ کو نظر انداز کیا۔ سینٹکام کا کہنا ہے کہ یہ جہاز اب ایران کی جانب سفر نہیں کر رہا۔

   امریکہ نے 14 جولائی سے ان جہازوں کی ناکہ بندی دوبارہ شروع کر رکھی ہے جو ایران کی بندرگاہوں اور ساحلی علاقوں کی طرف جاتے ہیں یا وہاں سے روانہ ہوتے ہیں۔

4. ایک گھنٹہ قبلکیٹی پیری نے ایران پر حملے کی ویڈیو میں اپنے گانے کے استعمال پر وائٹ ہاؤس پر اعتراض کر دیا

   

   ،تصویر کا ذریعہEPA

   امریکی گلوکارہ کیٹی پیری نے کہا ہے کہ ایران پر امریکی فوجی حملوں کی ویڈیو میں ان کے گانے ’فائر ورک‘ کے استعمال پر وہ ’حیران ہیں اور کراہت محسوس‘ کر رہی ہیں۔

   ٹک ٹاک پر شائع کی گئی اس ویڈیو میں بم دھماکوں کی تصاویر کو گانے کے اس حصے کے ساتھ ہم آہنگ کیا گیا ہے جس میں کیٹی پیری ’بوم، بوم، بوم‘ گاتی ہیں۔

   ان کا کہنا ہے کہ یہ گانا اصل میں امید، شفا یابی اور اندرونی طاقت کے بارے میں ایک ترانے کے طور پر لکھا گیا تھا اور وائٹ ہاؤس کی جانب سے اس کا استعمال اس مفہوم کے منافی ہے جس کی یہ گانا نمائندگی کرتا ہے۔

   اس سے قبل بھی متعدد گلوکار، جن میں اولیویا روڈریگو اور آریانا گرانڈے شامل ہیں، ٹرمپ انتظامیہ کی جانب سے اپنی موسیقی کے استعمال پر اعتراض کر چکے ہیں۔

5. 2 گھنٹے قبلشام میں ٹریفک حادثہ، 35 افراد ہلاک، 30 زخمی

   

   ،تصویر کا ذریعہAnadolu via Getty Images

   شام کے مشرقی حصے میں دمشق کو دیر الزور سے ملانے والی شاہراہ پر ٹریفک حادثے کے نتیجے میں 35 افراد ہلاک اور 30 زخمی ہو گئے۔

   شام کی سرکاری خبر رساں ایجنسی سانا کے مطابق سنیچر کو ہونے والا یہ حادثہ سکیورٹی فورسز کے اہلکاروں کو لے جانے والی ایک بس اور شہریوں کو لے جانے والی دوسری بس کے درمیان تصادم کے نتیجے میں پیش آیا۔

   حادثے کے بعد بنائی گئی ویڈیوز میں دونوں بسوں کو آگ کی لپیٹ میں دیکھا جا سکتا ہے۔

   سانا کے مطابق وزارتِ دفاع نے متعدد ہیلی کاپٹر روانہ کیے تاکہ زخمیوں کو حمص کے فوجی ہسپتال منتقل کیا جا سکے۔

6. 2 گھنٹے قبلجرمنی میں ہم جنس پرستوں کی تقریب کے دوران گاڑی ہجوم پر چڑھ دوڑی، ایک شخص ہلاک، 16 زخمی

   

   ،تصویر کا ذریعہNadja Wohlleben/Getty Images

   جرمنی کے دار الحکومت برلن میں ہم جنس پرستوں کی سالانہ تقریب ’کرسٹوفر سٹریٹ ڈے‘ کے دوران ایک گاڑی کے ہجوم پر چڑھ دوڑنے سے ایک شخص ہلاک اور کم از کم 16 افراد زخمی ہو گئے ہیں۔

   پولیس کا کہنا ہے کہ واقعہ شہر کے وسط میں واقع ٹیئرگارٹن پارک کے قریب پیش آیا، جس کے بعد تقریب منسوخ کر دی گئی۔

   خبر رساں ادارے اے ایف پی کے مطابق ٹیئرگارٹن پارک میں ایک گاڑی ملی جسے لا وارث چھوڑ دیا گیا تھا، پولیس کو شبہ ہے کہ یہی گاڑی واقعے میں استعمال ہوئی۔ جرمن نشریاتی ادارے ڈی ڈبلیو کے رپورٹر جیرڈ ریڈ نے بی بی سی کو بتایا کہ بظاہر گاڑی ایک درخت سے ٹکرا گئی تھی، جس کے بعد ممکنہ طور پر ڈرائیور وہاں سے فرار ہو گیا۔

   پولیس کے ایک ترجمان نے اے ایف پی کو بتایا کہ واقعے میں ملوث مشتبہ شخص یا افراد کی تلاش کے لیے پولیس ہیلی کاپٹروں اور حرارت کی بنیاد پر نشاندہی کرنے والے کیمروں (تھرمَل امیجنگ کیمروں) کا استعمال کر رہی ہے اور تلاش کا دائرہ پورے شہر تک وسیع کر دیا گیا ہے۔

   کرسٹوفر سٹریٹ ڈے برلن میں ہر سال منعقد کیا جاتا ہے اور انتظامیہ کے مطابق اس سال تقریباً 10 لاکھ افراد کی شرکت متوقع تھی۔ یہ ایونٹ 1969 میں نیو یارک شہر میں کرسٹوفر سٹریٹ پر واقع سٹون وال اِن میں ایل جی بی ٹی کمیونٹی کی معروف بغاوت کی یاد میں منعقد کیا جاتا ہے۔

   تب اس مقام پر پولیس کے چھاپے کے بعد مقامی رہائشیوں نے احتجاج اور ہنگامے کیے تھے، اور بعد میں اس جگہ کو تاریخی حیثیت دی گئی۔ برلن میں اس تقریب میں موسیقی، سیاسی تقاریر، ایک بڑی پریڈ اور شام تک جاری رہنے والی مختلف تقریبات شامل ہوتی ہیں۔

7. 25 جولائی 2026مذاکرات ناکام، جموں کشمیر جوائنٹ عوامی ایکشن کمیٹی کا 26 جولائی سے لانگ مارچ دوبارہ شروع کرنے کا اعلان, شہزاد ملک، بی بی سی اردو ڈاٹ کام، اسلام آباد

   

   ،تصویر کا ذریعہFacebook/Sardar Umar Nazir

   پاکستان کے زیرِ انتظام کشمیر کی کالعدم قرار دی گئی تنظیم جموں کشمیر جوائنٹ عوامی ایکشن کمیٹی نے حکومت کے ساتھ مذاکرات ناکام ہونے کے بعد 26 جولائی سے لانگ مارچ دوبارہ شروع کرنے کا اعلان کیا ہے۔

   کالعدم تنظیم کی کور کمیٹی کے رکن عابد شاہین نے بی بی سی کو بتایا کہ پہلے مرحلے میں میرپور سے ان کی تنظیم کے حامی لانگ مارچ کرتے ہوئے راولاکوٹ کے علاقے دریک پہنچیں گے۔ اس کے بعد 27 جولائی کو راولاکوٹ سے مظفرآباد کی جانب لانگ مارچ کیا جائے گا۔

   واضح رہے کہ 27 جولائی کو پاکستان کے زیرِ انتظام کشمیر کی قانون ساز اسمبلی کے مرحلہ وار انتخابات ہو رہے ہیں۔ پہلے مرحلے میں میرپور ڈویژن کی 13 نشستوں پر پولنگ ہوگی۔

   عابد شاہین سے جب یہ پوچھا گیا کہ آیا ان کی تنظیم لانگ مارچ کے ذریعے انتخابات ملتوی کروانے کے لیے کسی سیاسی جماعت یا بااثر شخصیت کا آلۂ کار تو نہیں بن رہی، تو ان کا کہنا تھا کہ ان کی تنظیم اور اس کے حامیوں کو انتخابات میں کوئی دلچسپی نہیں ہے۔

   انھوں نے کہا کہ رواں سال مئی میں پاکستانی حکومت کے ساتھ ہونے والے مذاکرات کے دوران ان کی تنظیم انتخابات میں حصہ لینے پر متفق ہو گئی تھی، تاہم بعد میں ایسے حالات پیدا کیے گئے کہ تنظیم انتخابی عمل کا حصہ نہ بن سکی۔

   عابد شاہین نے مذاکرات کی ناکامی کی ذمہ داری حکومت پر عائد کرتے ہوئے کہا کہ حکومت ان کے مطالبات کو سنجیدگی سے نہیں لے رہی اور اس معاملے میں لیت و لعل سے کام لے رہی ہے۔

   انھوں نے بتایا کہ دریک کے مقام پر جاری دھرنے میں خواتین اور بچے موجود ہیں، تاہم 27 جولائی کو جب وہاں سے مظفرآباد کی جانب لانگ مارچ شروع ہوگا تو اس میں خواتین اور بچوں کو شامل نہیں کیا جائے گا۔

   دوسری جانب کالعدم تنظیم کے نمائندہ وفد کے ساتھ مذاکرات کرنے والی حکومتی ٹیم کے ایک رکن نے بی بی سی کو بتایا کہ مذاکرات کے دوران ایکشن کمیٹی کے نمائندے اس بات پر اصرار کر رہے تھے کہ جموں کشمیر جوائنٹ عوامی ایکشن کمیٹی کو کالعدم قرار دینے کا فیصلہ فوری طور پر واپس لیا جائے۔

   انھوں نے کہا کہ تنظیم کے وفد کو بتایا گیا کہ حکومت چھ ماہ تک اس کے طرزِ عمل کا جائزہ لے گی، جس کے بعد اسے کالعدم تنظیموں کی فہرست سے نکالنے کے بارے میں فیصلہ کیا جا سکتا ہے۔

   ان کے مطابق تنظیم کا دوسرا بڑا مطالبہ یہ تھا کہ اس کے کارکنوں کے خلاف قتل، اقدامِ قتل اور انسدادِ دہشت گردی کی دفعات کے تحت درج مقدمات فوری طور پر واپس لیے جائیں۔ تاہم حکومتی نمائندوں نے واضح کیا کہ ایسا کرنا حکومت کے لیے ممکن نہیں اور ان مقدمات کا فیصلہ عدالتیں ہی کریں گی۔

   مذاکرات میں شامل اس شخص کا کہنا تھا کہ تنظیم کے نمائندہ وفد کو یقین دہانی کرائی گئی کہ جن افراد کے خلاف مقدمات درج ہیں، ان کی عدالتوں تک رسائی کے معاملے میں حکومت نرم رویہ اختیار کر سکتی ہے۔

   انھوں نے مزید کہا کہ تنظیم سے وابستہ جن افراد کو خدشۂ نقضِ امن کے تحت نظر بند کیا گیا ہے، ان کی مشروط رہائی اس صورت میں ممکن ہو سکتی ہے جب جوائنٹ عوامی ایکشن کمیٹی پہلے اپنا احتجاج ختم کرنے کا اعلان کرے۔

   ادھر میرپور پولیس کے ڈی آئی جی کامران کا کہنا ہے کہ کسی بھی ناخوشگوار واقعے سے نمٹنے کے لیے پولیس مکمل طور پر متحرک ہے۔ اس کے علاوہ ایف سی کے اہلکار بھی مختلف علاقوں میں تعینات کر دیے گئے ہیں۔

   میرپور ڈویژن میں انتخابی مہم آج رات بارہ بجے ختم ہو جائے گی۔

8. 25 جولائی 2026قطر اور مصر میں خطے کی کشیدگی کم کرنے کی کوششوں پر اتفاق، دوحہ میں اعلیٰ سطح ملاقات

   

   ،تصویر کا ذریعہMOFAQatar

   قطر کے وزیراعظم اور وزیرِ خارجہ شیخ محمد بن عبدالرحمن بن جاسم آل ثانی نے دوحہ میں مصر کے وزیرِ خارجہ بدر عبدالعاطی سے ملاقات کی۔

   قطری وزارتِ خارجہ نے ایکس پر جاری بیان میں کہا کہ ملاقات کے دوران دونوں رہنماؤں نے خطے میں کشیدگی کم کرنے، مشترکہ رابطے کو فروغ دینے اور امن و استحکام کے قیام سے متعلق امور پر تبادلہ خیال کیا۔

   بیان کے مطابق قطر نے امریکہ اور ایران پر زور دیا کہ وہ مذاکرات اور سفارت کاری کے راستے پر قائم رہیں اور جون میں دونوں ممالک کے درمیان طے پانے والی یادداشتِ مفاہمت پر عمل درآمد یقینی بنائیں۔

   قطری وزیرِاعظم نے اس بات پر بھی زور دیا کہ دونوں فریق آبنائے ہرمز میں جہاز رانی کی آزادی کو یقینی بنائیں تاکہ خطے کے امن و سلامتی کو برقرار رکھا جا سکے۔

9. 25 جولائی 2026اربیل میں امریکی قونصل خانے کے قریب ڈرون مار گرائے جانے کی اطلاعات

   

   ،تصویر کا ذریعہGetty Images

   خبر رساں ادارے رائٹرز نے سکیورٹی ذرائع کے حوالے سے رپورٹ کیا ہے کہ عراقی فضائی دفاعی نظام نے عراقی کردستان کے دارالحکومت اربیل میں امریکی قونصل خانے کے قریب ایک ڈرون کو مار گرایا ہے۔

   بی بی سی فارسی کے مطابق گزشتہ روز عراقی کردستان کی انسدادِ دہشت گردی فورسز نے بھی اعلان کیا تھا کہ امریکہ کی قیادت میں قائم بین الاقوامی اتحاد نے اربیل کی فضائی حدود میں پانچ ڈرون تباہ کیے تھے۔

   خطے میں کشیدگی دوبارہ بڑھنے کے بعد سے اربیل کی فضائی حدود میں متعدد ڈرون مار گرائے جا چکے ہیں۔ کردستان کی ریجنل حکومت کے حکام کی جانب سے ان ڈرونز کا ذمہ دار ایران کو قرار دیتے ہیں۔ اربیل میں خطے میں واقع امریکہ کے بڑے قونصل خانوں میں سے ایک موجود ہے۔

   یہ پیش رفت ایسے وقت میں سامنے آئی ہے جب امریکہ کی جانب سے ایران پر مسلسل 13 راتوں تک حملوں اور اس کے جواب میں ایران کی کارروائیوں کے بعد گزشتہ رات سے اب تک دونوں ممالک کے درمیان کسی نئے حملے یا جوابی کارروائی کی اطلاعات سامنے نہیں آئی ہیں۔

10. 25 جولائی 2026انڈیا: دھرمیندر پردھان کے مستعفی ہونے کے بعد پرہلاد جوشی کو وزارتِ تعلیم کا اضافی قلمدان سونپ دیا گیا

    

    ،تصویر کا ذریعہGetty Images

    انڈین صدر دروپدی مرمو نے ایک سرکاری اعلامیے میں کہا ہے کہ انھوں نے وزیراعظم نریندر مودی کے مشورے پر وفاقی وزیر پرہلاد جوشی کو وزارتِ تعلیم کا اضافی چارج سونپنے کی منظوری دے دی ہے۔

    اعلامیے کے مطابق پرہلاد جوشی بدستور صارفین کے امور، خوراک اور عوامی تقسیم کے وفاقی وزیر رہیں گے، جبکہ ان کے پاس قابلِ تجدید توانائی کی وزارت بھی برقرار رہے گی۔

    صدر مرمو نے یہ بھی بتایا کہ انھوں نے سابق وزیرِ تعلیم دھرمیندر پردھان کا استعفیٰ باضابطہ طور پر منظور کر لیا ہے۔

    دوسری جانب بی بی سی ہندی کے جنتر منتر پر موجود نامہ نگار وکاس پانڈے نے بتایا ہے کہ سی جے پی کی جانب سے احتجاج ختم کرنے کے اعلان کو کئی گھنٹے گزر چکے ہیں، تاہم مظاہرین اب بھی احتجاجی مقام پر موجود ہیں اور جشن منانے، نعرے لگانے اور رقص کرنے میں مصروف ہیں۔

    یہ وہ دن ہے جس کا مظاہرین کئی ہفتوں سے انتظار کر رہے تھے، اسی لیے وہ اس کامیابی کا بھرپور جشن منائے بغیر وہاں سے جانے کے لیے تیار نہیں۔

    مقامی وقت کے مطابق رات 8:30 بج چکے ہیں اور جنتر منتر کا احتجاجی مقام اب کسی احتجاجی کیمپ کے بجائے جشن کے مقام کا منظر پیش کر رہا ہے۔

    اگرچہ سی جے پی کی بیشتر قیادت وہاں سے جا چکی ہے، تاہم تنظیم کے رضاکار اب بھی ہجوم کو منظم رکھنے کی کوشش کر رہے ہیں۔

    مرکزی سٹیج کے باہر تعینات پولیس اہلکار صورتحال پر گہری نظر رکھے ہوئے ہیں۔ ایک پولیس اہلکار نے بتایا کہ وہ صرف اسی صورت میں مداخلت کریں گے جب امن و امان کی صورتحال خراب ہونے کا خدشہ پیدا ہوگا۔

11. 25 جولائی 2026سپین اور فرانس کے جنگلات میں لگنے والی آگ سے دو لاکھ 70 ہزار سے زائد افراد بے گھر

    

    ،تصویر کا ذریعہEPA/Shutterstock

    فرانس اور سپین میں اب تک کی اطلاعات کے مطابق دو لاکھ 70 ہزار سے زیادہ افراد جنگلات میں لگنے والی آگ کی وجہ سے بے گھر ہو گئے ہیں۔

    فرانس سے سامنے آنے والی اطلاعات کے مطابق انتظامیہ کی جانب سے مزید 60 ہزار افراد کے انخلا کا حکم بھی دے دیا گیا ہے۔

    فرانسیسی حکام نے شہر بورڈو کے اطراف کے علاقوں سے مزید تقریباً 60 ہزار افراد کو محفوظ مقامات پر منتقل ہونے کا حکم دے دیا ہے، جس کے بعد فرانس اور سپین میں جنگلات میں لگنے والی آگ کے باعث بے گھر ہونے والے افراد کی تعداد میں اضافہ ہوتا چلا جا رہا ہے۔

    فرانس کے جنوب مغربی علاقوں گیروند اور لاند سے تقریباً دو لاکھ افراد کو محفوظ مقامات پر منتقل کیا جا چکا ہے۔ فرانسیسی صدر ایمانوئل میکرون نے بحران پر قابو پانے کے لیے فوج کو بھی طلب کر لیا ہے۔

    

    ،تصویر کا ذریعہGetty Images

    دوسری جانب سپین کے حکام نے اعلان کیا ہے کہ دارالحکومت میڈرڈ کے قریب بھڑکنے والی ایک بڑی آگ پر قابو پانا فائر فائٹرز کے بس کی بات نہیں لگ رہی اور یہ ایک انتہائی خطرناک حد تک پہنچ چُکی ہے۔

    یہ صورتحال اس وقت پیدا ہوئی جب دارالحکومت کے مغربی علاقوں میں تین مختلف مقامات پر لگنے والی آگ ایک مقام پر مل کر شدت اختیار کر گئی۔

    سپین کی حکومت نے ملک میں ’قومی سطح پر ہنگامی حالت‘ کا اعلان کر دیا ہے۔ اس فیصلے کے تحت 25 ہزار افراد کو متاثرہ علاقوں سے نکلنے کا حکم بھی دیا گیا ہے، جبکہ تقریباً 40 ہزار دیگر افراد کو اپنے گھروں میں رہنے کی ہدایت کی گئی ہے۔

    

    ،تصویر کا ذریعہGetty Images

    سپین کی مقامی ریسکیو سروسز نے بھی خبردار کیا ہے کہ جنگلات میں لگنے والی آگ دارالحکومت میڈرڈ سے تقریباً 50 کلومیٹر (31 میل) دور واقع شہری علاقوں روبلیڈو دے چاویلا اور فریسنیدیاس دے لا اولیوا کی جانب بڑھ رہی ہے۔

    حکام کے مطابق میڈرڈ کے علاقے میں اب تک کم از کم چھ ہزار ہیکٹر رقبہ آگ کی لپیٹ میں آ چکا ہے، جبکہ صوبہ ایویلا میں لگنے والی آگ نے تقریباً نو ہزار ہیکٹر اراضی کو تباہ کر دیا ہے۔

    

    ،تصویر کا ذریعہGetty Images

    

    ،تصویر کا ذریعہGetty Images

12. 25 جولائی 2026دشمن کے ’ہتھیار ڈالنے‘ تک حملے جاری رہیں گے: محمد باقر ذوالقدر

    

    ،تصویر کا ذریعہIRNA

    ایران کی سپریم نیشنل سکیورٹی کونسل کے سیکریٹری محمد باقر ذوالقدر نے کہا ہے کہ ’ایرانی فورسز دشمن کے ’مکمل ہتھیار ڈالنے‘ تک حملے جاری رکھیں گی اور میناب میں ہلاک بچوں کی ہلاکتوں کا بدلہ لیا جائے۔‘

    سنیچر کے روز محمد باقر ذوالقدر نے اپنے ایک بیان میں کہا کہ ’خطے میں اٹھنے والا دھویں کا بادل اس بات کی نشاندہی کرتا ہے کہ کسی امریکی فوجی، سکیورٹی یا مالیاتی مرکز کو نشانہ بنایا گیا ہے۔‘

    انھوں نے کہا کہ ’ہمارے جنگجوؤں کی جانب سے مسلسل حملے ایرانی قوم کے غصے کی علامت ہیں۔‘

    ذوالقدر نے مزید کہا کہ ’یہ حملے ’اللہ کی مرضی سے، دشمن کے مکمل ہتھیار ڈالنے اور مظلوم بچوں، خصوصاً میناب اور لامرد کے بچوں سمیت دیگر افراد کے خون کا بدلہ لینے تک جاری رہیں گے۔‘

    ایرانی عہدیدار نے یہ بیان حالیہ جنگ کے دوران امریکہ اور اسرائیل کی جانب سے ایران میں کیے گئے حملوں کے حوالے سے دیا، جن میں جنوبی شہروں میناب اور لامرد سمیت مختلف شہری مقامات کو نشانہ بنایا گیا تھا۔

    ایرانی حکام کے مطابق ان حملوں میں سکولوں اور دیگر شہری تنصیبات کو نقصان پہنچا جبکہ بچوں سمیت متعدد عام شہری ہلاک ہوئے۔

13. 25 جولائی 2026حوثیوں کا جیزان اور ينبع میں آرامکو تنصیبات پر حملے کا دعویٰ

    ایرانی حمایت یافتہ یمنی حوثیوں نے دعویٰ کیا ہے کہ ’انھوں نے سعودی عرب کے شہروں جیزان اور ينبع میں واقع سعودی آرامکو کی تیل تنصیبات کو نشانہ بنایا ہے۔‘

    حوثیوں کے فوجی ترجمان یحییٰ سریع نے سنیچر کے روز جاری اپنے بیان میں کہا کہ ’گروہ نے ’جیزان اور ينبع میں سعودی آرامکو کی تنصیبات پر کامیاب کارروائیاں کی ہیں۔‘

    سعودی عرب کی جانب سے حوثیوں کی جانب سے کیے جانے والے اس دعوے پر تاحال کوئی باضابطہ ردِعمل سامنے نہیں آیا ہے۔

    حوثیوں نے گزشتہ چند روز کے دوران سعودی عرب کے خلاف سمندری تجارتی ناکہ بندی کا اعلان کرنے کے بعد بحیرۂ احمر میں جہاز رانی کو متعدد حملوں کا نشانہ بنانے کا دعویٰ بھی کیا ہے۔

    اس سمندری ناکہ بندی کے جواب میں سعودی عرب نے یمن کی بندرگاہ پر واقع شہر الحدیدہ میں حوثیوں کے ٹھکانوں اور قریبی جزیرے پر حملے کیے۔

    اس سے قبل یونانی سکیورٹی ذرائع نے خبر رساں ادارے رائٹرز کو بتایا ہے کہ سعودی عرب میں یونانی فوج کے زیرِ انتظام فضائی دفاعی نظام نے سنیچر کے روز یمن سے داغے گئے دو بیلسٹک میزائل ینبع میں واقع آئل ریفائنریوں کو نشانہ بنانے سے قبل ہی فضا میں تباہ کر دیے۔

14. 25 جولائی 2026کاکروچ جنتا پارٹی کا احتجاج ختم کرنے کا اعلان: ’مجھے آپ سب پر فخر ہے‘، راہول گاندھی

    

    ،تصویر کا ذریعہGetty Images

    کاکروچ جنتا پارٹی کی جانب سے ترجمان نے اعلان کیا ہے کہ ’حکومت کی جانب سے تنظیم کے دیگر مطالبات بھی تسلیم کیے جانے کے بعد احتجاج ختم کیا جا رہا ہے۔‘

    ترجمان کے مطابق حکومت کی جانب سے مطالبات منظور کیے جانے کے بعد تنظیم نے اپنا احتجاج باضابطہ طور پر واپس لینے کا فیصلہ کیا ہے۔

    دوسری جانب پارلیمنٹ میں قائدِ حزبِ اختلاف راہول گاندھی نے انڈیا کے وزیرِ تعلیم دھرمیندر پردھان کے استعفے کو ’تعلیمی نظام کی اصلاح کی جانب ایک بڑا قدم‘ قرار دیا ہے۔

    راہول گاندھی نے ایکس پر اپنے بیان میں کہا کہ ’ان تمام نوجوانوں اور طلبہ کو دلی مبارک باد جنھوں نے جمہوریت، آئین اور اپنے مستقبل کے تحفظ کے لیے سڑکوں پر نکل کر ثابت قدمی کا مظاہرہ کیا۔‘

    

    ،تصویر کا ذریعہGetty Images

    راہول گاندھی نے مزید کہا کہ ’مجھے آپ سب پر فخر ہے۔‘

    انھوں نے وزیراعظم نریندر مودی سے مطالبہ کیا کہ ’وہ طلبہ سے معافی مانگیں، جبکہ حکومت مظاہرین کے خلاف تشدد کے ذمہ دار افراد کے خلاف فوری کارروائی کرے۔‘

15. 25 جولائی 2026یمن سے داغے گئے دو بیلسٹک میزائل ینبع پہنچنے سے پہلے تباہ کر دیے گئے: یونانی فوج

    یونانی سکیورٹی ذرائع نے خبر رساں ادارے رائٹرز کو بتایا ہے کہ سعودی عرب میں یونانی فوج کے زیرِ انتظام فضائی دفاعی نظام نے سنیچر کے روز یمن سے داغے گئے دو بیلسٹک میزائل ینبع میں واقع آئل ریفائنریوں کو نشانہ بنانے سے قبل ہی فضا میں تباہ کر دیے۔

    اس سے چند گھنٹے قبل سعودی سول ڈیفنس نے اعلان کیا تھا کہ صوبہ ینبع میں ممکنہ حملے کا خطرہ ٹال دیا گیا ہے۔

    یہ انتباہ ایسے وقت میں سامنے آیا جب یمن کے حوثیوں نے اعلان کیا تھا کہ وہ الحدیدہ میں اپنے ٹھکانوں پر سعودی قیادت میں قائم اتحادی افواج کے حملوں کا جواب دیں گے۔

    یاد رہے کہ یونان نے سنہ 2021 سے ایک معاہدے کے تحت امریکی ساختہ پیٹریاٹ فضائی دفاعی نظام سعودی عرب میں تعینات کر رکھا ہے، جسے یونانی فوجی اہلکار چلاتے ہیں۔ اس کا مقصد سعودی عرب کے توانائی کے بنیادی ڈھانچے کا تحفظ ہے۔

    سنیچر کے روز ہونے والی یہ کارروائی دوسرا موقع تھا جب یونانی عملے نے اس دفاعی نظام کو میزائلوں کو روکنے کے لیے استعمال کیا۔

16. 25 جولائی 2026یوکرین کا بحیرۂ کیسپین میں ایرانی فوج کے لیے سامان لے جانے والے روسی جہازوں کو نشانہ بنانے کا دعویٰ

    یوکرین کے صدر ویلادیمیر زیلنسکی نے دعویٰ کیا ہے کہ یوکرینی افواج نے بحیرہ کیسپین یا بحیرۂ قزوین میں ایران کے لیے فوجی سامان لے جانے والے روسی جہازوں کو نشانہ بنایا ہے۔

    زیلنسکی نے ایکس پر جاری بیان میں کہا کہ ’ان طویل فاصلے کے حملوں کے دوران بحیرۂ کیسپین کے علاقے میں ایک روسی جنگی جہاز کو بھی نشانہ بنایا گیا۔‘

    انھوں نے ان حملوں کی مزید تفصیلات فراہم نہیں کیں، تاہم یہ ضرور بتایا کہ یوکرینی افواج نے روس کے شہر کیروف میں واقع ایک کارخانے کو بھی نشانہ بنایا، جو دونوں ممالک کی سرحد سے تقریباً 1,200 کلومیٹر دور واقع ہے۔‘

    ان کے بقول یہ کارخانہ ’ان ہتھیاروں کے پرزے تیار کرتا ہے جنھیں روسی فوج ہمارے لوگوں کے خلاف استعمال کر رہی ہے۔‘

    زیلنسکی کے مطابق یوکرینی حملوں میں روس کے شہر تیومین میں ایک آئل ریفائنری، یکاترنبرگ میں ایک اہم تنصیب اور روستوف آن ڈان میں ایک ایندھن کے ڈپو کو بھی نشانہ بنایا گیا ہے۔‘

    اس دعوے پر روسی حکام کی جانب سے فوری طور پر کوئی باضابطہ ردِعمل سامنے نہیں آیا۔

17. 25 جولائی 2026وزیرِ تعلیم کا استعفیٰ ’جمہوریت کی فتح‘ ہے: سونم وانگچک

    

    ،تصویر کا ذریعہSonam Wangchuk/X

    سی جے پی کی حمایت میں 26 روز تک بھوک ہڑتال کرنے والے سماجی کارکن سونم وانگچک نے انڈیا کے وزیرِ تعلیم کے استعفے کا خیرمقدم کرتے ہوئے اسے ’جمہوریت کی فتح‘ قرار دیا ہے۔

    وانگچک نے ایکس پر جاری اپنے بیان میں سی جے پی، جنریشن زیڈ اور ملک بھر کے تمام شہریوں کو مبارکباد دیتے ہوئے کہا کہ انھوں نے ’خوف اور خوف کے احساس پر قابو پا کر ملک کے ہر کونے سے آواز بلند کی۔‘

    سونم وانگچک نے جمعہ کی علی الصبح اپنی 26 روزہ بھوک ہڑتال ختم کر دی تھی۔

    انھوں نے اپنی پوسٹ کے اختتام پر کہا کہ ’اب احتساب کے بعد اصلاحات کی باری ہے۔‘

18. 25 جولائی 2026دو ہفتوں میں پہلی بار ایران اور امریکہ کے درمیان گزشتہ رات سے کسی نئے حملے یا جوابی کارروائی کی رپورٹ سامنے نہیں آئی

    گزشتہ دو ہفتوں کے دوران پہلی بار ایران اور امریکہ کے درمیان گزشتہ رات سے کسی نئے حملے یا جوابی کارروائی کی اطلاع سامنے نہیں آئی۔

    مسلسل 13 راتوں تک امریکہ کی جانب سے ایران پر حملوں اور اس کے جواب میں ایران کی کارروائیوں کے بعد گزشتہ رات سے اب تک دونوں ممالک کے درمیان کسی نئی فوجی جھڑپ یا حملے کی کوئی رپورٹ جاری نہیں کی گئی۔

    تاہم سمندر میں کشیدگی برقرار ہے۔ امریکی فوج کا کہنا ہے کہ اس نے اپنی بحری ناکہ بندی توڑنے کی کوشش کرنے والے ایک آئل ٹینکر پر فائرنگ کی اور اسے روک دیا۔

    اس نسبتاً پرسکون صورتحال کی کوئی باضابطہ وجہ بیان نہیں کی گئی، تاہم ایرانی میڈیا نے گزشتہ روز رپورٹ کیا تھا کہ عمان کا ایک سفارتی وفد مذاکرات کے لیے تہران پہنچا ہے۔

19. 25 جولائی 2026ہم نے یہ کر دکھایا مگر جدوجہد ابھی ختم نہیں ہوئی: سی جے پی

    

    ،تصویر کا ذریعہReuters

    انڈیا کے وزیرِ تعلیم دھرمیندر پردھان کے استعفے کی خبر سامنے آتے ہی دہلی کے مرکزی احتجاجی مقام پر سی جے پی کے حامیوں میں خوشی کی لہر دوڑ گئی اور بڑے پیمانے پر جشن منایا گیا۔

    سی جے پی کے بانی ابھیجیت دیپکے نے جذباتی انداز میں عارضی سٹیج سے خطاب کرتے ہوئے کہا کہ ’ہم نے یہ کر دکھایا۔‘ ان کے اس اعلان پر مظاہرین نے بھرپور نعرے بازی اور تالیاں بجا کر خوشی کا اظہار کیا۔

    بعد ازاں انھوں نے تحریک کی کامیابی میں تعاون کرنے والے تمام افراد کا شکریہ ادا کیا، جبکہ خاص طور پر ان طلبہ کا ذکر کیا جو کارکن سونم وانگچک کے ہمراہ کئی ہفتوں سے بھوک ہڑتال پر تھے۔

    سی جے پی نے اپنے بانی ابھیجیت دیپکے کا ایک بیان ایکس پر جاری کرتے ہوئے کہا ہے کہ تحریک کی جدوجہد ابھی ختم نہیں ہوئی۔

    دیپکے نے مطالبہ کیا کہ ’داخلہ امتحان کی منسوخی کے بعد خودکشی کرنے والے طلبہ کے اہلِ خانہ کو مناسب معاوضہ دیا جائے اور واضح کیا کہ ان کی تنظیم اس مطالبے سے دستبردار نہیں ہوگی۔‘

    انھوں نے 20 جولائی کو پارلیمنٹ کی جانب مارچ کرنے والے ہزاروں سی جے پی حامیوں کے خلاف کارروائی کے دوران پولیس پر مظاہرین کے ساتھ مبینہ طور پر ضرورت سے زیادہ طاقت استعمال کرنے کا الزام بھی دہرایا اور متعلقہ پولیس اہلکاروں کے خلاف کارروائی کا مطالبہ کیا۔

    اپنے بیان کے اختتام پر دیپکے نے خبردار کرتے ہوئے کہا کہ ’یاد رکھیں، ’کاکروچ‘ سے نہ الجھیں۔‘

20. 25 جولائی 2026پیٹرولیم مصنوعات کی قیمتوں میں اضافے کی وجہ سے ہفتہ وار مہنگائی کی شرح میں 9.66 فیصد اضافہ, تنویر ملک، صحافی

    

    ،تصویر کا ذریعہGetty Images

    پاکستان میں ہفتہ وار مہنگائی کی شرح میں سالانہ بنیاد پر 9.66 فیصد کا اضافہ ریکارڈ کیا گیا ہے۔

    پاکستان کے ادارہ برائے شماریات (پی بی ایس) کے مطابق گذشتہ ہفتے کے مقابلے میں رواں ہفتے حساس قیمتوں کے اشاریے میں بھی 0.91 فیصد اضافہ دیکھنے میں آیا۔

    سرکاری اعداد و شمار کے مطابق مہنگائی میں اضافے کی بڑی وجہ سبزیوں اور دیگر جلد خراب ہونے والی غذائی اشیا کی بلند قیمتیں اور پیٹرولیم مصنوعات کی قیمتوں میں روزانہ ہونے والا اضافہ ہے، جس کے باعث ٹرانسپورٹ کے اخراجات بھی بڑھ گئے ہیں۔

    سالانہ بنیاد پر بجلی کے نرخوں میں 22.79 فیصد، آٹے کی قیمت میں 74.13 فیصد اور ایل پی جی کی قیمت میں 46.87 فیصد اضافہ ریکارڈ کیا گیا، جبکہ پیاز، ٹماٹر، آلو، گائے اور بکرے کے گوشت اور آٹے کی قیمتوں میں بھی نمایاں اضافہ دیکھا گیا۔

    ادارہ شماریات کے مطابق مسلسل بڑھتی ایندھن کی قیمتوں نے نہ صرف گھریلو بجٹ پر اضافی بوجھ ڈالا بلکہ ٹرانسپورٹ کے اخراجات میں بھی اضافہ کیا۔

    

    ،تصویر کا ذریعہGetty Images

    گزشتہ ہفتے کے دوران سب سے زیادہ مہنگی ہونے والی اشیا میں ٹماٹر (39.92 فیصد)، ڈیزل (15.87 فیصد)، انڈے (7.31 فیصد)، پیٹرول (5.23 فیصد)، آلو (3.70 فیصد)، ایل پی جی (0.91 فیصد)، چائے (0.59 فیصد)، سرسوں کا تیل (0.45 فیصد)، لہسن (0.41 فیصد) اور کپڑے دھونے کا صابن (0.21 فیصد) شامل ہیں۔

    اس کے برعکس گزشتہ ہفتے مرغی کی قیمت میں 4.66 فیصد، کیلے میں 1.72 فیصد، مونگ کی دال میں 1.08 فیصد، ماش کی دال میں 1.07 فیصد، چاول میں 0.52 فیصد، مسور کی دال میں 0.40 فیصد، چینی میں 0.09 فیصد اور چنے کی دال میں 0.03 فیصد کمی ریکارڈ کی گئی۔

    سالانہ بنیاد پر ٹماٹر کی قیمت میں سب سے زیادہ 253.04 فیصد اضافہ ہوا، جبکہ پیاز 81.55 فیصد، آٹا 74.13 فیصد، ایل پی جی 46.87 فیصد، ڈیزل 31.92 فیصد، بجلی کے نرخ 22.79 فیصد، پیٹرول 20.32 فیصد، بکرے کا گوشت 16.02 فیصد، مرچ پاؤڈر 15.20 فیصد، گائے کا گوشت 13.09 فیصد، کیلے 12.06 فیصد اور سادہ ڈبل روٹی 9.69 فیصد مہنگی ہوئی۔

    دوسری جانب سالانہ بنیاد پر آلو کی قیمت میں 33.69 فیصد، چنے کی دال میں 21.48 فیصد، چینی میں 17.67 فیصد، نمک میں 14.09 فیصد، مرغی میں 13.73 فیصد، مسور کی دال میں 13.55 فیصد، انڈوں میں 9.59 فیصد اور مونگ کی دال میں 8.67 فیصد کمی ریکارڈ کی گئی۔