500 سے زائد روہنگیا باشندوں کے سمندر میں لاپتہ ہونے کا خدشہ, جوناتھن ہیڈ، جنوب مشرقی ایشیا کے نامہ نگار
،تصویر کا ذریعہAFP via Getty Images
29 جون کو میانمار کی ریاست رخائن سے تقریباً 530 روہنگیا پناہ گزینوں کو لے جانے والی دو کشتیاں روانہ ہوئیں جن کے بارے میں اس کے بعد کوئی خبر نہیں ملی۔
خدشہ ہے کہ دونوں کشتیاں الٹ گئی ہوں۔ مون سون کا موسم شروع ہو چکا ہے، سمندر میں طوفانی لہریں ہیں، اور یہ کشتیاں، جو عموماً پرانی ماہی گیری کی کشتیوں کو تبدیل کر کے بنائی جاتی ہیں تاکہ زیادہ سے زیادہ لوگوں کو سوار کیا جا سکے، بمشکل سمندر کے قابل ہوتی ہیں اور ان کے انجن بھی غیر قابلِ اعتماد ہوتے ہیں۔
یہ بھی بہت ممکن ہے کہ بہت کم لوگ، یا شاید کوئی بھی زندہ نہ بچا ہو۔ ان مسافروں میں تقریباً نصف خواتین اور بچے ہو سکتے تھے۔
رخائن کئی برسوں سے جنگ کی حالت میں ہے۔ باغیوں نے میانمار کی فوج کو زیادہ تر علاقوں سے باہر نکال دیا ہے اور ریاستی دارالحکومت سٹوے میں فوج کے آخری مضبوط ٹھکانے کا محاصرہ کر رکھا ہے، جہاں اب صرف فضائی یا سمندری راستے سے پہنچا جا سکتا ہے۔ فوج نے تقریباً تمام مواصلاتی رابطے بھی منقطع کر دیے ہیں۔
روہنگیا کے حالات بہتر بنانے کے لیے کام کرنے والی تنظیم اراکان پروجیکٹ کی سربراہ کرس لیوا یہ جاننے کی کوشش کر رہی ہیں کہ ان دونوں کشتیوں کے ساتھ کیا ہوا ہوگا۔
مختلف ذرائع اور معلومات کو ملا کر انھیں یقین ہے کہ دونوں کشتیاں واقعی 29 جون کو روانہ ہوئی تھیں، ایک صبح کے وقت اور دوسری دن میں بعد میں۔
ان کے مطابق یہ کشتیاں میانمار کے جنوبی ساحل کی طرف جا رہی تھیں، جہاں مسافروں کو اتارا جانا تھا۔ وہاں سے انھیں سڑک کے ذریعے، جنگلوں میں قائم عارضی اور غیر منظم کیمپوں سے گزارتے ہوئے، تھائی لینڈ کے راستے ملائیشیا کی سرحد تک لے جایا جانا تھا۔
عام طور پر ان کے خاندان ایک ہفتے یا دس دن کے اندر ان کی خیریت کی خبر کی توقع کرتے ہیں۔ لیکن تقریباً تین ہفتے گزرنے کے بعد بھی انھیں کوئی اطلاع نہیں ملی۔
بنگلہ دیشی حکام کو ایک خاتون کی لاش ملی ہے جو سمندر سے بہہ کر ساحل تک پہنچی تھی۔ ادھر ایراوادی ڈیلٹا اور مون ریاست کے ساحل کے درمیان سمندر میں ماہی گیری کرنے والوں کو نو دن بعد مزید کئی لاشیں بھی ملیں۔
کرس لیوا کا خیال ہے کہ یہ تمام شواہد اس بات کی طرف اشارہ کرتے ہیں کہ دونوں کشتیاں الٹ گئی تھیں۔ ایک سن ٹیٹ ماؤ سے روانگی کے چند گھنٹوں بعد، جبکہ دوسری جنوب مشرق کی سمت کئی دن سفر کرنے کے بعد۔
بنگلہ دیش کے جنوبی حصے میں قائم گنجان آباد کیمپوں میں دس لاکھ سے زیادہ روہنگیا رہتے ہیں، جہاں امداد کم ہوتی جا رہی ہے، روزگار کے مواقع تقریباً نہ ہونے کے برابر ہیں، اور منظم جرائم پیشہ گروہ آزادانہ طور پر سرگرم ہیں۔ انھیں کیمپوں سے باہر جانے کی اجازت بھی نہیں ہے۔
