Hii ni tovuti ya maandishi pekee ambayo inatumia data kidogo. Tazama toleo kuu la tovuti likijumuisha picha na video zote.

Bofya kuelekea tovuti kuu

Pata maelezo zaidi kuhusu toleo hili la linalotumia kiasi kidogo cha data

Elon Musk aungana na vigogo kutaka bosi wa Nvidia arejeshwe kazini

Musk ni miongoni mwa watu mashuhuri wanaounga mkono kampeni ya kurejeshwa kazini Nvidia, Huang. Mkurugenzi Mtendaji wa Epic Games, kampuni inayotengeneza mchezo wa Fortnite, Tim Sweeney, pia amejiunga na kampeni hiyo.

Muhtasari

Moja kwa moja

Na Faidha Ngaga

  1. Robert Pattinson athibitishwa kuwa James Bond mpya

    Muigizaji wa filamu za Batman, Robert Pattinson, amethibitishwa kuwa mwigizaji mpya atakayeigiza nafasi ya jasusi maarufu James Bond katika filamu zijazo za 007.

    Pattinson atakuwa muigizaji wa saba kupewa nafasi hiyo katika mfululizo rasmi wa filamu za James Bond.

    Katika taarifa yake iliyoripotiwa na jarida la Variety, Pattinson amesema kupewa nafasi ya kuigiza mhusika huyo ni heshima kubwa zaidi katika maisha yake.

    "James Bond ni mmoja wa wahusika mashuhuri zaidi katika historia ya filamu, na kukabidhiwa nafasi ya 007 ni heshima ya maisha yangu," amesema.

    Ameongeza kuwa anawashukuru mkurugenzi wa filamu hiyo, Denis Villeneuve, pamoja na timu ya Amazon MGM Studios kwa kumuamini na kumpa nafasi hiyo, akisema ana furaha kubwa kuanza kazi hiyo na timu hiyo.

    Steven Knight, aliyetengeneza tamthilia maarufu ya Peaky Blinders, ndiye anayeandika mswada wa filamu hiyo mpya, huku Villeneuve akitarajiwa kuiongoza.

    Tangazo la Pattinson limeambatana na picha yake akiwa katika mwonekano wa James Bond, amevalia suti rasmi na kushika bunduki. Video iliyotolewa kuthibitisha uteuzi wake inaishia kwa maneno: "James Bond atarejea".

    Mwezi Mei, Amazon MGM Studios ilitangaza kuwa mchakato wa kumpata mwigizaji mpya wa James Bond ulikuwa umeanza baada ya kampuni hiyo kuchukua udhibiti wa haki za utayarishaji wa filamu hizo.

  2. Elon Musk aungana na vigogo kutaka bosi wa Nvidia arejeshwe kazini

    Mkurugenzi Mtendaji wa kampuni ya SpaceX, Elon Musk, amejiunga na kampeni inayotaka aliyekuwa mkuu wa kampuni ya teknolojia ya Nvidia, Jensen Huang, arejeshwe katika nafasi yake baada ya kujiuzulu kufuatia kashfa ya 'kuchepuka' au mahusiano ya kimapenzi nje ya ndoa.

    Musk ni miongoni mwa watu mashuhuri wanaounga mkono kampeni hiyo, inayoongozwa na washirika wa Huang kwa lengo la kushinikiza bodi ya Nvidia kumrejesha. Mkurugenzi Mtendaji wa Epic Games, kampuni inayotengeneza mchezo wa Fortnite, Tim Sweeney, pia amejiunga na kampeni hiyo.

    Huang alijiuzulu wiki iliyopita baada ya kuwepo kwa madai ya kuwa na wapenzi wawili nje ya ndoa. Moja lilihusisha mwanamke anayedaiwa kuwa jasusi wa China, huku jingine likihusisha mfanyakazi wa kampuni ya Nvidia aliyekuwa chini ya usimamizi wake.

    Barua ya wazi inayoiomba bodi ya Nvidia kumrejesha Huang wakati uchunguzi huru ukiendelea imekusanya saini zaidi ya 175,000, zikiwemo za Musk na Sweeney. Waandaaji wa kampeni hiyo wanasema wanajumuisha wafanyakazi wa sasa na wa zamani, washirika, wanahisa na wafuasi wa kampuni hiyo.

    Washirika wa Huang wanasema wana wasiwasi kuwa aliondolewa madarakani bila kufuata taratibu za haki. Pia wanataka bodi ya kampuni hiyo kutoa ushahidi wa msingi wa uamuzi wake wa kumwondoa kabla ya kuchukua hatua nyingine.

    Gazeti la Financial Times limeripoti kuwa Huang anaangalia uwezekano wa kurejea Nvidia na washirika wake. Kwa mujibu wa gazeti hilo, kundi la viongozi wa kampuni za Silicon Valley linaandaa kampeni ya ushawishi, inayojulikana kama war room, ili kupata uungwaji mkono wa kurejeshwa kwake, ikiwemo kutoka Ikulu ya Marekani.

    Kashfa hiyo pia imeibua mvutano kati ya Wizara ya Hazina na Wizara ya Biashara ya Marekani kuhusu usafirishaji wa vifaa vya kisasa vya Nvidia kwenda kampuni ya Megaspeed, ambayo mwanamke anayedaiwa kuwa jasusi wa China aliwahi kufanya kazi. Hali hiyo imezua maswali kuhusu uwezekano wa teknolojia hizo kufikishwa China licha ya vikwazo vya Marekani vya kuuza nje bidhaa hizo.

  3. Romelu Lukaku astaafu soka la kimataifa Ubelgiji

    Mshambuliaji wa Fenerbahce, Romelu Lukaku, ametangaza kustaafu soka la kimataifa akiwa na umri wa miaka 33, akisema amefurahia kila wakati aliocheza akiitumikia timu ya taifa ya Ubelgiji.

    Lukaku, aliyeichezea Ubelgiji kwa mara ya kwanza mwaka 2010, ndiye mfungaji bora wa muda wote wa timu hiyo kwa upande wa wanaume, akiwa na mabao 94 katika mechi 135.

    Kwa idadi hiyo, anashika nafasi ya tano katika orodha ya wafungaji bora wa muda wote wa timu za taifa kwa wanaume. Anatanguliwa na Sunil Chhetri, Ali Daei, Lionel Messi na Cristiano Ronaldo, ambaye anaongoza kwa mabao 146.

    Katika kipindi chake cha miaka 16, Lukaku alifunga mabao manane katika mashindano manne ya Kombe la Dunia, yakiwemo ya michuano ya mwaka huu, pamoja na mabao sita katika mashindano matatu ya Euro.

    Katika ujumbe aliouchapisha Instagram, mshambuliaji huyo wa zamani wa Everton, Chelsea na Manchester United aliwashukuru wachezaji wenzake na makocha kwa kumuamini na kumsaidia kuipa timu mchango wake.

    Lukaku alikosa mechi ya Ligi ya Mataifa dhidi ya Uturuki wiki iliyopita kutokana na jeraha la nyonga, kabla ya kuwa mchezaji wa akiba ambaye hakutumika katika ushindi wa Ubelgiji wa mabao 4-1 dhidi ya Italia Jumapili.

    Alisema katika kipindi hicho alipitia hisia mbalimbali na kujivunia kuwakilisha nchi yake katika Kombe la Dunia mara nne na michuano ya Euro mara tatu. Aliongeza kuwa amefanya uamuzi huo akiwa na amani moyoni na anashukuru kwa kila alichopitia.

    Mwaka 2023, Lukaku alifunga mabao 14 katika mechi nane za kufuzu Euro 2024, na kuvunja rekodi ya mchezaji aliyefunga mabao mengi zaidi katika kampeni moja ya kufuzu michuano hiyo.

  4. Infantino ni hovyo kuliko Blatter – Klopp

    Kocha mkuu wa timu ya taifa ya Ujerumani, Jurgen Klopp, amesema rais wa Shirikisho la Soka Duniani (FIFA), Gianni Infantino, anapaswa kuondoka madarakani, akidai amefanya mambo kuwa mabaya zaidi kuliko mtangulizi wake, Sepp Blatter.

    Klopp amesema hakutarajia hali ya uongozi wa FIFA ingeweza kuwa mbaya zaidi baada ya Blatter, aliyejiuzulu mwaka 2015 kufuatia kashfa ya rushwa. Infantino alichukua nafasi yake Februari 2016.

    Infantino anatarajiwa kuwania tena urais wa FIFA katika uchaguzi wa Machi, lakini amekuwa akikabiliwa na shinikizo baada ya kufuta pendekezo la Fifa Forward Enterprise (FFE), lililohusisha kuuza hisa za Kombe la Dunia na mashindano mengine ya FIFA kwa wawekezaji binafsi.

    Infantino aliomba radhi kwa Baraza la FIFA kuhusu pendekezo hilo, lakini akaambiwa hafai kuendelea kuongoza soka duniani iwapo hatatoa nyaraka zote zinazohusiana na mpango huo na kujibu maswali muhimu.

    Klopp amesema watu wengi wanaofuatilia soka wanakubaliana kuwa mabadiliko ya uongozi wa FIFA yanaweza kuwa na manufaa. Ameongeza kuwa anaamini mtu atakayechukua nafasi ya Infantino anaweza kufanya kazi nzuri zaidi.

    Shirikisho la Soka Ulaya (UEFA) limekuwa miongoni mwa wakosoaji wakubwa wa Infantino, likimtaka mara kadhaa ajiuzulu. Pia limeandaa hatua za kisheria za jinai dhidi yake na kuwasilisha madai katika mahakama tatu za Marekani likitaka nyaraka zote kuhusu mpango wa FFE zitolewe.

    Muda wa mwisho kwa wagombea kuthibitisha rasmi nia yao ya kuwania urais wa FIFA ni Jumatano. Aliyekuwa kocha wa Arsenal, Arsene Wenger, ambaye alikuwa akifikiria kuwania nafasi hiyo, amejiondoa, huku aliyekuwa beki wa Tottenham, Ramon Vega, na rais wa heshima wa Shirikisho la Soka la Japan, Kozo Tashima, wakitangaza nia ya kuwania nafasi hiyo.

    Klopp amesema FIFA inahitaji kuongozwa na mtu anayejali mustakabali wa soka badala ya maslahi ya kifedha.

  5. Uingereza inapoteza zaidi kuliko inachokipata kwa kujitoa EU - Waziri Mkuu

    Waziri Mkuu wa Uingereza, Andy Burnham, anatarajiwa kuiambia nchi hiyo kuwa imepoteza zaidi kuliko ilivyonufaika tangu kujitoa katika Umoja wa Ulaya (EU), akieleza kuwa makubaliano ya Brexit hayajatoa matokeo yaliyoahidiwa.

    Akizungumza katika hafla ya Lord Mayor's Banquet Jumatatu, Burnham anatarajiwa kuuulezea umma wa waingereza kuwa Brexit iliweka vikwazo kwa biashara na kwamba ahadi ya kurejesha mamlaka kwa Uingereza haikutimizwa.

    Kauli hiyo inakuja kabla ya mkutano wa kilele kati ya Uingereza na EU utakaofanyika Ijumaa, ambapo Burnham anatarajiwa kusaini makubaliano mapya kuhusu chakula, nishati na fursa za vijana kusafiri na kufanya kazi katika pande hizo mbili.

    Hata hivyo, Burnham amesema makubaliano yoyote mapya lazima yazingatie ahadi ya chama cha Labour kutorejea katika soko la pamoja la EU, umoja wa forodha au mfumo wa uhuru wa watu kuhama. Pia, mabadiliko makubwa hayatafanyika kabla ya uchaguzi mkuu ujao.

    Wakati huo huo, chama cha Conservative kimeikosoa serikali ya Labour, kikisema juhudi zake za kuboresha uhusiano na EU ni njia ya siri ya kuirejesha Uingereza ndani ya umoja huo kupitia mlango wa nyuma.

  6. Dunia yapata mwezi mwingine

    Dunia imepata mwezi mwingine mdogo wa muda angani, hii ni kwa mujibu wa wanaastronomia.

    Jiwe hilo la angani, lililopewa jina la 2026 QQ8, lilionekana kwa mara ya kwanza mwezi Agosti na mwanaastronomia kutoka Hungary, Krisztián Sárneczky. Hata hivyo, Umoja wa Kimataifa wa Wanaastronomia (IAU) ulitangaza rasmi habari hiyo mwezi uliopita.

    Jiwe hilo ni dogo sana, likiwa na kipenyo cha kati ya mita moja na mbili, na liko umbali wa zaidi ya kilomita 500,000 (maili 323,000) kutoka Duniani — umbali ambao ni mkubwa zaidi ya ule uliopo kati ya Dunia na Mwezi wetu wa kawaida.

    Miezi hiyo midogo ya muda ni mawe ya angani ambayo huvutwa na nguvu ya uvutano ya Dunia na hivyo kuzunguka karibu na sayari yetu kwa kipindi fulani.

    Wanaastronomia wanaamini kuwa Dunia iligusana na jiwe hilo la angani, QQ8, mwaka 2026, kutokana na tukio la mtikisiko wa ardhi lililoathiri Dunia mwezi Aprili. Hata hivyo, linatarajiwa kuondoka na kuendelea na safari yake ya angani ndani ya miezi miwili ijayo.

    Mwezi wa muda

    Mawe hayo huitwa miezi ya muda kwa sababu yanapotazamwa kutoka Duniani, huonekana kana kwamba yanazunguka sayari yetu kama Mwezi wa kawaida.

    Lakini ukiangalia kwa makini, utagundua kuwa hayazunguki Dunia moja kwa moja. Badala yake, yanazunguka Jua katika njia inayoyapitisha karibu na sayari yetu.

    Mfano wa hivi karibuni ni asteroid iliyopewa jina la utani 2025 PN7, jiwe dogo la angani lililogunduliwa mwezi Agosti mwaka jana na ambalo limekuwa likizunguka katika eneo la karibu na Dunia kwa miaka kadhaa.

    "Miezi midogo kama hii inavutia kwa sababu haizunguki sayari yetu kama vile Mwezi unavyoizunguka Dunia. Badala yake, inakuwa tu karibu nasi," alisema mwanaastronomia Dkt Jenifer Millard.

    Asteroid ya 2025 PN7 ina urefu wa takribani mita 20.

    "Si kubwa sana — ukubwa wake unalingana na jengo dogo la ofisi. Tunadhani imekuwa karibu nasi kwa takribani miaka 60, na huenda ikaendelea kuwepo kwa miaka mingine 60, kwa kuzingatia mwenendo wake wa sasa," Dkt Millard aliiambia BBC.

    Hata hivyo, hakuna hata moja ya miezi hiyo ya muda inayoweza kushindana na satelaiti ya asili ya Dunia — Mwezi wetu.

    Unaweza pia kusoma:

  7. DR Congo: Zaidi ya 5,500 wafariki tangu kutangazwa kwa mlipuko wa Ebola

    Mamlaka za afya katika Jamhuri ya Kidemokrasia ya Congo (DRC) zinasema vifo vilivyothibitishwa vya Ebola vilivyorekodiwa katika vituo maalumu vya matibabu vimekuwa vingi zaidi kuliko vile vilivyotokea katika jamii katika kipindi cha saa 24 kilichopita.

    Takwimu zilizotolewa na Wizara ya Afya ya Umma, zinazohusisha kipindi cha hadi Novemba 14, zinaonesha kuwa wagonjwa 22 walifariki dunia katika vituo vya matibabu, ikilinganishwa na vifo 14 vilivyoripotiwa kutokea nyumbani.

    Wataalamu wa afya ya umma wanasema takwimu hizo zinaweza kuashiria kuwa wagonjwa wengi zaidi wanafika katika vituo vya kutengwa na kutibiwa, ingawa baadhi yao hufika wakiwa katika hali mbaya kiasi cha kushindwa kunufaika kikamilifu na matibabu.

    Kutibiwa kwa wagonjwa katika vituo maalumu pia hupunguza hatari ya maambukizi kwa wanafamilia kupitia mgusano wa moja kwa moja.

    Wizara imethibitisha visa vipya 60 vya Ebola ya aina ya Bundibugyo, vilivyorekodiwa zaidi katika majimbo ya mashariki ya Ituri na Kivu Kaskazini.

    Tangu mlipuko huo ulipotangazwa Mei 15, zaidi ya watu 11,300 wameambukizwa na zaidi ya 5,500 wamefariki dunia. Watu wengine zaidi ya 3,000 wamepona na kuruhusiwa kutoka hospitalini.

    Maafisa wa afya wanasema ufuatiliaji wa watu waliokutana na wagonjwa bado ni miongoni mwa changamoto kubwa zinazokwamisha juhudi za kudhibiti mlipuko huo.

    Zaidi ya watu 25,000 waliobainika kuwa na mawasiliano na wagonjwa waliothibitishwa kuwa na Ebola wanafuatiliwa, lakini ni takribani asilimia 83 pekee waliofikiwa hadi Novemba 14. Kiwango hicho ni chini ya kile ambacho wataalamu wanasema kinahitajika ili kukatiza minyororo ya maambukizi.

    Mamlaka za afya kwa kushirikiana na wadau wa kimataifa zinaendelea kuwafanyia uchunguzi wasafiri katika vituo vya usafiri, kusambaza chanjo na matibabu, pamoja na kushirikiana na jamii kuhamasisha wagonjwa kutafuta matibabu mapema na kuzingatia taratibu salama za mazishi.

    Unaweza pia kusoma:

  8. Niger yaamuru jamii ya wanaohamahama kutoka Chad kuondoka nchini humo ndani ya miezi miwili

    Mamlaka katika eneo la kusini-mashariki mwa Niger zimewaagiza viongozi wa jamii ya Waarabu wa Mohamid kujiandaa kwa wanajamii wao kuondoka nchini humo ndani ya kipindi cha miezi miwili.

    Agizo hilo lilitolewa Jumamosi na mkuu wa mkoa wa Diffa, Mamoudou Bonkano Abdoul Salam, wakati wa mkutano na viongozi wa kimila katika mji wa Chetimari, kwa mujibu wa Shirika la Habari la Taifa la Niger (ANP).

    Amesema muda huo wa miezi miwili umewekwa na mamlaka za juu zaidi nchini humo, huku akiwataka viongozi wa jamii hiyo kuwafahamisha wanajamii wao na kuhakikisha wanatekeleza agizo hilo.

    BBC imewasiliana na mamlaka za Chad ili kupata maoni yao kuhusu agizo hilo.

    Agizo hilo linakuja wakati kukiwa na wasiwasi unaoongezeka kuhusu usalama katika eneo la Diffa, ambako Niger imekuwa ikipambana kwa zaidi ya muongo mmoja na uasi wa makundi yenye itikadi kali ya Kiislamu yanayoongozwa na Boko Haram na kundi hasimu la Islamic State West Africa Province (Iswap).

    Makundi hayo yanaendesha shughuli zao katika ukanda wa Ziwa Chad, unaopakana na Niger, Nigeria, Chad na Cameroon. Mashambulizi yao yamesababisha mamilioni ya watu kuyahama makazi yao na kuvuruga maisha ya jamii katika eneo hilo.

    Mamlaka za kikanda nchini Niger zimewahi kuwatuhumu baadhi ya wanajamii wa Mohamid kujihusisha na biashara haramu ya silaha na kutoa msaada wa vifaa na mahitaji mengine kwa makundi yenye silaha.

    Katika mkutano wa usalama uliofanyika Agosti, Gavana Mahamadou Ibrahim Bagadoma alisema kuwa silaha zilizokamatwa pamoja na taarifa za kiintelijensia zilizokusanywa kati ya mwaka 2023 na 2026 zilionesha madai ya kuhusika kwa baadhi ya watu katika kusambaza silaha na risasi kwa wapiganaji.

    Hata hivyo, mamlaka zimesisitiza kuwa tuhuma hizo zinawahusu watu maalumu na hazipaswi kuhusishwa na jamii nzima ya Waarabu nchini Niger.

    Jamii ya Mohamid ni ya watu wanaohamahama, ambao wanachama wake walianza kuhamia Niger katika miaka ya 1970 wakikimbia ukame na migogoro katika nchi jirani ya Chad. Kwa sasa, wanakadiriwa kuwa maelfu kadhaa nchini humo.

    Uwepo wao pia umekuwa chanzo cha mvutano na jamii za wenyeji, hasa kutokana na ushindani wa rasilimali adimu za maji na maeneo ya malisho ya mifugo.

    Agizo hilo la hivi karibuni linaongeza shinikizo kwa jamii hiyo wakati serikali ya kijeshi nchini Niger ikijitahidi kuimarisha usalama na kuongeza udhibiti wa maeneo yake, huku mashambulizi ya makundi yenye silaha yakiendelea.

    Unaweza pia kusoma

  9. Kenya yatabiri mvua na upepo mkali katika kaunti zote 47

    Idara ya Hali ya Hewa nchini Kenya imetabiri mvua za kiwango cha chini hadi cha wastani katika kaunti kadhaa, huku upepo mkali wenye kasi inayozidi mafundo 25 (mita 12.5 kwa sekunde) ukitarajiwa katika baadhi ya maeneo ya Marsabit na Turkana.

    Idara hiyo imewaonya wakazi wa maeneo yaliyoathiriwa kuwa macho na kufuatilia mabadiliko ya hali ya hewa.

    Katika utabiri wake wa kila wiki wa Novemba 10 hadi 16, 2026, mamlaka hiyo ilisema mvua zinatarajiwa katika baadhi ya maeneo ya kaunti zote 47 za Kenya, huku baadhi ya maeneo yakitarajiwa kupata mvua asubuhi, mchana na usiku.

    Kaunti zinazotarajiwa kupata mvua za asubuhi ni pamoja na Nairobi, Kiambu, Machakos, Meru, Nyeri, Kisumu, Kisii, Homa Bay, Migori, Turkana na Wajir. Maeneo ya pwani ya Kwale, Mombasa, Kilifi, Tana River na Lamu pia yanatarajiwa kupata mvua.

    Utabiri huo umetolewa wakati hofu kuhusu uwezekano wa kutokea kwa El Niño ikiongezeka, huku wakazi wa makazi yasiyo rasmi ya Kibera jijini Nairobi wakihofia kuwa mvua kubwa zinaweza kusababisha mafuriko na kuhatarisha maisha yao.

    "Ninahisi kwamba hali hii inaweza kutuua. Nyumba hizi hazijajengwa kwa mawe. Zinaweza kutuangukia au maji yakatuzamisha," mkazi mmoja wa Kibera ameiambia BBC.

    Hofu hiyo inatokana pia na mafuriko ya Machi 6 yaliyosababisha vifo vya watu 60 nchini Kenya baada ya mvua kubwa kunyesha usiku kucha na kusababisha uharibifu mkubwa.

    Wasiwasi umeongezeka kufuatia tahadhari kuwa El Niño inayotarajiwa huenda ikawa kali zaidi kuwahi kurekodiwa, na kusababisha hali mbaya ya hewa katika maeneo mbalimbali duniani.

    Unaweza pia kusoma:

  10. Ruto ajitetea dhidi ya ripoti ya rushwa: 'Wakosoaji wanachagua wanachotaka'

    Rais wa Kenya, William Ruto, ametetea serikali yake dhidi ya ukosoaji ulioibuka kufuatia ripoti ya hivi karibuni ya Benki ya Dunia iliyoibua wasiwasi kuhusu rushwa na changamoto za utawala nchini humo, akisisitiza kuwa ripoti hiyo pia imetambua hatua za mageuzi zinazotekelezwa na serikali yake.

    Akizungumza wakati wa ibada ya kanisani katika kaunti ya Narok, Ruto alisema ni serikali yake iliyosukuma ripoti hiyo kuwekwa wazi kwa umma. Alidai kuwa wakosoaji wamejikita katika sehemu zinazozungumzia rushwa huku wakipuuza matokeo yanayotambua mafanikio katika mageuzi ya sekta ya umma, ukusanyaji wa mapato na mifumo ya utawala wa kidijitali.

    "Nimesikia baadhi ya watu wakizungumzia ripoti ya Benki ya Dunia. Nataka kuwaambia kuwa ni serikali ya Kenya, ninayoiongoza, iliyosema tunataka ripoti iliyo wazi iwekwe hadharani," alisema Rais huyo.

    Ripoti hiyo iliyotolewa na Benki ya Dunia kupitia chapisho lake la Kenya Economic Update, inachunguza jinsi udhaifu katika mifumo ya utawala unavyoendelea kuathiri ukuaji wa uchumi, upatikanaji wa ajira na uwekezaji wa umma.

    Miongoni mwa masuala yaliyoibuliwa katika ripoti hiyo ni rushwa, kasoro katika mifumo ya ununuzi wa umma na mapungufu katika uwajibikaji ndani ya taasisi za umma.

    Mojawapo ya maeneo yaliyojadiliwa zaidi katika ripoti hiyo ni mradi wa Reli ya Kisasa (SGR), ambao Benki ya Dunia imeutaja kama mfano wa gharama za kifedha zinazoweza kusababishwa na udhaifu wa kiutawala katika miradi mikubwa ya miundombinu.

    Kwa mujibu wa tathmini hiyo, udhaifu katika mifumo ya utawala na taratibu za ununuzi huenda vilichangia kwa kiasi kikubwa kuongeza gharama za ujenzi wa reli hiyo ikilinganishwa na miradi inayofanana katika ukanda huo.

    Ruto amejitenga na maamuzi ya ununuzi yaliyohusishwa na mradi wa SGR unaounganisha Nairobi na Mombasa, akibainisha kuwa mradi huo ulitekelezwa chini ya serikali iliyotangulia.

    Alihoji kwa nini serikali yake inapaswa kulaumiwa kwa madai ya ukiukwaji wa taratibu katika mradi ulioanzishwa kabla hajachukua madaraka.

    Hata hivyo, Rais huyo amekubaliana na mapendekezo ya ripoti hiyo kuhusu kuimarishwa kwa hatua za kupambana na rushwa, akisema serikali yake imeendelea kujizatiti kuimarisha uwajibikaji na uwazi.

    Unaweza pia kusoma:

  11. Al-Nassr yamtosa Sadio Mané licha ya ofa ya kupunguziwa mshahara

    Klabu ya Al-Nassr ya Saudi Arabia imeamua kutomuongeza mkataba nyota wake raia wa Senegal, Sadio Mané, ambaye anatarajiwa kuondoka klabuni hapo mwishoni mwa msimu huu, licha ya kiwango kizuri alichoonyesha katika kipindi cha miaka michache iliyopita.

    Mkataba wa Mané na Al-Nassr unatarajiwa kumalizika mwishoni mwa msimu huu, hali inayomruhusu kuanza mazungumzo na klabu nyingine katika dirisha dogo la usajili la majira ya baridi na kujiunga na klabu atakayoichagua bila ada ya uhamisho majira yajayo ya kiangazi.

    Mwandishi wa habari za michezo nchini Saudi Arabia, Falah Al-Qahtani, amedai kuwa Al-Nassr haina nia ya kumuongezea mkataba nyota huyo wa Senegal baada ya mkataba wake wa sasa kumalizika.

    Kupitia ujumbe aliouchapisha katika akaunti yake binafsi ya mtandao wa X, Al-Qahtani alidai kuwa wakala wa Mané alifanya jitihada kubwa kuhakikisha mchezaji huyo anaongezewa mkataba wa msimu mmoja zaidi.

    Alisema wakala huyo alikuwa tayari kukubali kupunguzwa kwa asilimia 60 ya mshahara wa sasa wa Mané ili kufanikisha makubaliano hayo, lakini klabu hiyo ilikataa ombi hilo.

    Unaweza pia kusoma:

  12. Rais wa Iraq amtaka Trump kumaliza vita na Iran

    Rais wa Iraq, Nizar Amidi, amemuomba Rais wa Marekani Donald Trump kumaliza mzozo wa kijeshi na Iran kwa kurejea katika kauli mbiu yake ya kampeni ya "kumaliza vita visivyoisha vya Marekani".

    Katika mahojiano na chombo cha habari cha Marekani chenye msimamo wa mrengo wa kulia, Breitbart, yaliyochapishwa Jumapili, Novemba 15, Bw. Amidi amesema:

    "Donald Trump ni mtu muhimu sana na mwenye ushawishi mkubwa. Ni kiongozi wa nchi kubwa sana. Nataka arejee katika msimamo uleule alioutangaza mwanzoni mwa kampeni yake ya uchaguzi, ambao ni kumaliza vita vyote, iwe ni vita kati ya Ukraine na Urusi au vita vingine vyovyote duniani.

    "Anapaswa kurejea katika msimamo huo, kurejesha amani katika eneo hili na kumaliza vita, kama alivyofanikiwa kumaliza baadhi ya vita hapo awali."

    Rais huyo wa Iraq ameitaja nchi yake kuwa miongoni mwa mataifa yenye nafasi muhimu ya kuwa mpatanishi kati ya Tehran na Washington.

    Amesema ujumbe wake kwa pande zote mbili ni kutumia fursa iliyopo sasa kufanikisha amani ya kweli na ya kudumu.

    "Iraq iko katika nafasi nzuri zaidi kijiografia na katika suala la mawasiliano kati ya Iran na Marekani. Marekani inaweza kuwa mshirika wa Iraq kwa miaka mingi, huku Iran ikiwa jirani yetu wa muda mrefu," amesema.

    Wito wa rais huyo wa Iraq kwa Donald Trump kumaliza vita na Iran unakuja wakati Ikulu ya Marekani ikiongeza shinikizo kwa Baghdad kuzuia shughuli katika mipaka yake ya nchi kavu na Iran, pamoja na kusitisha safari za ndege kati ya nchi hizo mbili.

    Unaweza pia kusoma:

  13. Eisenkot: Netanyahu hapaswi kuendelea kuwa madarakani hata kwa dakika moja

    Gadi Eisenkot, mpinzani wa Benjamin Netanyahu ambaye amepewa jukumu na rais wa Israel kuunda serikali mpya kufuatia uchaguzi nchini humo, amesema tabia ya Netanyahu ni "tishio kwa demokrasia ya Israel" na kwa maoni yake, hapaswi kuendelea kuwa madarakani hata kwa dakika moja zaidi.

    Eisenkot, ambaye anajaribu kuunda baraza jipya la mawaziri nchini Israel, amesema hayo Jumapili, Novemba 15:

    "Tabia ya Benjamin Netanyahu na watu wake wa karibu ni tishio la wazi, la moja kwa moja na la haraka kwa demokrasia ya Israel. Hakuna sehemu yoyote ya Israel iliyo salama dhidi ya ufisadi, upotoshaji na kutumiwa kwa maslahi ya kisiasa ya Netanyahu ili kuendelea kubaki madarakani.

    "Haheshimu tena mipaka yoyote na amevuka kila mstari mwekundu. Hakuna mazingira yoyote yanayopaswa kumruhusu Netanyahu kuendelea kuwa madarakani hata kwa dakika nyingine."

    Unaweza pia kusoma:

  14. Maelfu ya safari za ndege Marekani zakwama kwa siku tatu

    Maelfu ya safari za ndege nchini Marekani zilifutwa au kucheleweshwa siku ya Jumapili, wakati mfumo wa udhibiti wa safari za ndege ukiendelea kurejeshwa katika hali yake ya kawaida kufuatia hitilafu ya kiufundi iliyosababisha kusitishwa kwa safari za ndege kote nchini humo.

    Waziri wa Uchukuzi wa Marekani, Sean Duffy, amesema huenda shughuli za usafiri wa anga zisirejee katika hali ya kawaida Jumatatu.

    "Tuna ndege na wafanyakazi ambao hawapo katika maeneo yao yaliyopangwa, hivyo inahitaji muda kidogo kurejesha hali ya kawaida," aliiambia CBS, mshirika wa BBC nchini Marekani.

    Zaidi ya safari 8,800 za ndege zilichelewa huku nyingine 2,400 zikifutwa siku ya Jumapili.

    Rais Donald Trump ameitaka Bunge la Marekani kuidhinisha fedha zaidi kwa ajili ya kuboresha mfumo wa udhibiti wa safari za ndege.

    Hatua ya kusitisha safari zote za ndege zilizokuwa zimepangwa kuondoka Marekani siku ya Ijumaa ilisababisha vurugu katika viwanja vya ndege kote nchini.

    Zaidi ya ndege 3,500 zilikuwa angani wakati Mamlaka ya Usafiri wa Anga ya Marekani (FAA) ilipotangaza saa 15:54 kwa saa za Marekani (20:54 GMT) kwamba safari za ndege zingesitishwa hadi itakapotangazwa vinginevyo.

    Baadhi ya ndege zilielekezwa katika viwanja vingine vya ndege, huku nyingine zikiendelea na safari zake hadi zilipofika kwenye vituo vilivyokusudiwa.

    Kwa mujibu wa tovuti ya ufuatiliaji wa safari za ndege ya FlightAware, baada ya tangazo hilo, safari 8,500 zilicheleweshwa na nyingine 8,000 zikafutwa.

    Kusitishwa kwa safari hizo kuliwaacha baadhi ya abiria wakiwa wamekwama ndani ya ndege zilizokuwa kwenye njia za kurukia na kutua, bila uwezo wa kuruka wala kurejea kwenye maeneo ya kuegesha ndege.

    Abiria wengine walikwama ndani ya viwanja vya ndege, wakilala sakafuni na kujaribu kwa kila hali kuwasiliana na mashirika ya ndege.

    Hatua hiyo pia iliathiri ratiba za safari za ndege katika maeneo mengine duniani, huku baadhi ya safari kutoka Uingereza na Ulaya zikifutwa.

    Unaweza pia kusoma:

  15. Mfalme wa biashara ya dawa za kulevya Mexico, Miguel Ángel Félix Gallardo, afariki dunia

    Miguel Ángel Félix Gallardo, mmoja wa wafanyabiashara mashuhuri wa dawa za kulevya nchini Mexico, amefariki dunia hospitalini akiwa na umri wa miaka 80.

    Félix Gallardo alitambuliwa kama mmoja wa wasafirishaji wakubwa zaidi wa dawa za kulevya katika historia. Alisifiwa kwa kuanzisha ushirikiano kati ya makundi ya uhalifu nchini Colombia na genge lake la dawa za kulevya nchini Mexico.

    Akijulikana kwa majina ya utani ya The Godfather (Baba wa Magenge) na Boss of Bosses (Kiongozi wa Viongozi), Félix Gallardo alikuwa mkuu wa genge lenye nguvu la Guadalajara Cartel, lililotawala biashara ya dawa za kulevya nchini Mexico wakati wa ongezeko kubwa la biashara ya kokeni katika miaka ya 1980.

    Wakati huo, alianzisha mfumo mpya wa biashara haramu ya dawa za kulevya ambao unaendelea kutumika hadi leo. Alikuwa gerezani tangu mwaka 1989.

    Jina la Félix Gallardo litabaki katika historia ya biashara ya dawa za kulevya, likitajwa pamoja na majina ya vinara wengine wakubwa wa biashara hiyo, hususan Pablo Escobar.

    Aliongoza mtandao uliobadilisha kwa kiasi kikubwa namna dawa za kulevya zilivyosafirishwa katika eneo hilo. Alifanya mikataba na makundi ya magendo ya dawa za kulevya nchini Colombia, hususan Medellín Cartel iliyoongozwa na Escobar.

    Ushirikiano huo uliunganisha uzalishaji wa kokeni katika eneo la Andes na usafirishaji wake kupitia Mexico hadi Marekani.

    Soma Zaidi Hapa:

  16. Zelensky: Vikwazo vya Starlink vinahujumu mapambano ya Ukraine dhidi ya Urusi

    Huduma muhimu ya intaneti ya satelaiti ya Marekani bado inafanya kazi kwa kasi ndogo, hali inayoathiri uwezo wa Ukraine kuzuia mashambulizi ya Urusi, Rais Volodymyr Zelensky amesema.

    "Tunatarajia vikwazo hivi vitaondolewa. Ulinzi wa maisha ya watu na miundombinu ya nishati ya Ukraine kuelekea majira ya baridi hutegemea moja kwa moja hatua hiyo," amesema.

    Mvutano kuhusu vikwazo vya kasi ya mfumo wa Starshield, huduma ya kijeshi ya Starlink inayomilikiwa na Elon Musk na kutolewa kwa Ukraine na serikali ya Marekani, umekuwa ukiendelea kwa wiki kadhaa.

    Zelensky amesema amewaagiza maafisa wa Ukraine "kushirikiana kwa karibu kadri iwezekanavyo" na serikali ya Marekani pamoja na kampuni ya Musk.

    "Ni muhimu kuwa upande sahihi wa historia," amesema.

    BBC imewasiliana na Ikulu ya Marekani na kampuni ya Starlink kutaka maoni yao kuhusu suala hilo.

    Ukraine hutumia huduma ya kawaida ya Starlink kwa mawasiliano katika uwanja wa vita, huku Starshield ikitumika kusaidia kuzuia makombora na ndege zisizo na rubani katika anga ya Ukraine.

    Suala la vikwazo vya kasi lilianza kubainika mwezi Oktoba na kusababisha maelezo yanayokinzana kati ya Elon Musk na Rais wa Marekani Donald Trump.

    Musk alisema serikali ya Marekani ndiyo iliyohusika na vikwazo hivyo kwa kuwa mfumo wa Starshield uko chini ya udhibiti wake. Hata hivyo, Trump alikanusha kuhusika na kusema alikuwa amemwambia bilionea huyo "kuurudisha katika hali yake ya kawaida".

    Kwa muda ilionekana huduma hiyo kurejea katika hali yake ya kawaida baada ya wiki moja, lakini baadaye Ukraine ilisema kuwa vikwazo hivyo bado vinaendelea kutekelezwa.

    Changamoto hizo za mawasiliano ziliibuka wakati kukiwa na mvutano wa kidiplomasia kati ya Zelensky na Trump kuhusu mashambulizi ya Ukraine dhidi ya miundombinu ya mafuta ndani ya Urusi.

    Trump alisema mashambulizi dhidi ya viwanda vya kusafisha mafuta vya Urusi, ambayo Kyiv inasema ni muhimu katika kudhoofisha chanzo kikuu cha mapato ya Moscow kwa ajili ya vita, yamesababisha kupanda kwa bei ya mafuta duniani.

    Siku ya Jumapili, Zelensky alisema Ukraine inakabiliwa na changamoto ya kuzuia ndege zisizo na rubani zinazoendeshwa kwa injini za jet, ambazo Urusi inazitumia kulenga vituo vya usambazaji wa umeme.

    Alisema hali hiyo inatokana na "vikwazo vya kasi ya uendeshaji wa vituo vya Starshield vilivyo katika mstari wa mbele wa mapigano na maeneo yanayokaliwa kwa muda na Urusi".

    "Droni zetu za kuzuia mashambulizi hupoteza mawasiliano na waendeshaji wake zinapofikia kasi ya kilomita 161 kwa saa, na hivyo kushindwa kabisa kuzipita droni za Urusi zinazoendeshwa kwa injini za jet aina ya Shahed," aliandika, akirejelea droni zilizoundwa kwa kufuata teknolojia ya Iran.

    Unaweza pia kusoma:

  17. Hujambo! Karibu katika matangazo yetu mubashara, Jumatatu ya leo, 16/08/2026.