Make we pause di live coverage!
Dis na wia we go pause di live coverage of di Osun State govnorship election.
We go resume wen Inec begin announce di results.
Also check hia for di election results wen Inec begin announce am.
Osun governorship election live updates: APC Bola Oyebamiji, Adeleke win dia polling units - collation of election results go soon begin
Dis na di live update of di governorship election for Osun state.
Summary
- Adeleke, Oyebamiji, Najeem await results of election
- Vote counting dey go on for different polling units
- Osun State get 30 LGAs wit over 3000 polling units
Live Coverage
Victor Ezeama and Adebola Ajayi
APC candidate Bola Oyebamiji win im polling unit
Wia dis foto come from, Bola Oyebamiji/Facebook
Di Candidate of di All Progressives Congress for di Osun State govnorship election Bola Oyebamiji don win im polling unit for Ward 9, Unit 11, Open Space, Gantry Sawmill, for di Irewole govment area, Ikire.
E poll 709 votes, while Ademola Adeleke of Accord party get 37 votes.
Wia dis foto come from, INEC
How winner go emerge for Osun govnorship election
Wia dis foto come from, INEC
According to Section 179 of di Constitution of di Federal Republic of Nigeria (as amended), di winner of di election gatz satisfy two important conditions. First, di candidate gatz secure di highest number of votes for di election. Second, di candidate gatz obtain at least one-quarter, or 25 per cent, of di votes for at least two-thirds of all di local govment areas.
For Osun, wey get 30 local govment areas, two-thirds mean 20 local govment areas. Wetin e mean be say di candidate gatz demonstrate reasonable spread of support across di state.
So, wetin go happun if any candidate no meet di constitutional requirements?
Inec go organise rerun wey involve di candidate wey secure di highest number of votes and di candidate wey secure majority of votes for di highest number of local govments.
Even for di rerun, if no candidate satisfy di condition, Inec go conduct anoda election between dose two candidates, and di candidate wey win di majority na im Inec go declare as winner of di election.
EU observers record 323 electoral offences, 38 security incidents
Wia dis foto come from, EU in Nigeria/X
Civil society organisations wey dey monitor di Osun State govnorship election don report 323 cases of electoral offences and irregularities across 726 polling units for di ongoing poll.
For one preliminary report dem issue on Saturday evening on X, di organisations wey dey operate under di European Union Support to Democratic Governance for Nigeria Election Observation Hub (EU-SDGN EOH), say dem don document “38 security incidents wit 25 reported cases of thuggery, 12 attacks on electoral officials and nine voter intimidation by security personnel".
Di election observers add say for di 726 polling units dem observe “323 reported cases of electoral offences and irregularities, wey include 103 cases of vote trading, 12 cases of multiple voting, 28 cases of inducement of polling and security officials, 38 cases of campaigning for polling units, 14 cases of voter impersonation, seven cases of misconduct by election officials, 31 cases of obstruction of voters and 85 cases wey involve exposure of ballot papers”.
On security, di organisation say despite di plenty security personnel authorities deploy to polling units, most of dem act professionally, but dem observe cases of voter intimidation by security agents at three locations.
“Although most of di security personnel show professional conduct ova di course of voting, some reported cases of voter intimidation by security agents dey for PU 29-10-10-005 for Igbon DC. School for Ejigbo, PU 29-26-01-002 and PU 29-30-06-015 for one open space, opposite No 22, Oke Ola Street, Okanla Area, Osogbo,” according to di statement.
Di EU-SDGN EOH cova Yiaga Africa, Centre for Media and Society (CEMESO), International Press Centre (IPC), Nigerian Women Trust Fund (NWTF), TAF Africa and The Kukah Centre (TKC).
Di organisations say dem deploy 823 accredited observers across di 30 local govment areas of di state to monitor di election.
'Protect your votes' - APC govnorship candidate Oyebamiji tell supporters
Wia dis foto come from, Bola Oyebamiji/X
Di gubernatorial candidate of di All Progressives Congress (APC) Bola Oyebamiji for di Osun state govnorship election don ask im supporters to protect di sanctity of di votes dem cast for dia polling units.
“No allow anyone under any guise or through any means to subvert di will of di pipo or undermine di mandate dem freely chose to give us for today election.”
Oyebamiji tok afta di electoral commission begin collate di results of di govnorship election wey hold on Saturday.
“We don come too far to allow our collective efforts to dey compromised. Make we remain peaceful, watchful and confident as we await di final outcome. May di will of di pipo prevail.”
Di APC govnorship candidate wey give dis informate on X tok say pipo come out well-well to exercise dia civic right.
Osun State govnorship election as e happun
Wetin we call dis Video, Osun State govnorship election as e happun More dan half of Osun election result uploaded on IRev
Wia dis foto come from, Inec Irev
More dan 50 percent of all di result of di Osun State govnorship election don dey uploaded for di Inec Result Viewing Portal (IRev) so far.
As at wen our tori pesin check di portal by 6.10 PM, e show say out of di total 3,763 polling units for di state, di result of 2,183 polling units don already upload for di portal, wia anybodi fit view am.
Irev na technology wey di Independent National Electoral Commission (Inec) bin introduce to help reduce wuruwuru for election.
How e dey work be say, afta di Presiding Officer don collate di votes for di polling unit and announce am for di pipo present, e go use di Biometric Voter Accreditation System (BVAS) take snap picture of di form EC8A wia e record di votes, and send am immediately to di IRev.
Dis go mean say anybodi for go fit dey see and download di election results in real time as e dey come in from di different polling stations, and e go make am almost impossible for anybodi to try to change di results.
For di 2023 general elections, pipo criticise Inec well-well afta dem tok say di IRev bin get glitch wey make am impossible to upload di presidential election result as dem suppose.You fit head here to see Osun govnorship election results wen Inec begin announce am.
'Let di will of di pipo prevail' - Govnor Ademola Adeleke
Wia dis foto come from, Ademola Adeleke/X
Osun State Govnor Ademola Adeleke don call on di Independent National Electoral Commission (Inec) to uphold di highest standards of integrity for di ongoing state govnorship election.
Di govnor give dis informate on X as electoral officials begin sort and count votes for polling units across di state. E say make di “will of di pipo prevail”.
E hail di security agencies wey dey deployed for di election and urge dem to remain vigilant as di electoral process move into collation of results; from polling units to wards to local govment areas.
Adeleke also express confidence for all di institutions wey dey involved for di election as e say di federal govment don try well-well wit security.
Democracy dey at im strongest wen we honour di wishes of our pipo and protect di sanctity of dia votes.
“To evri Osun citizen: I urge you to remain peaceful, law-abiding, and committed to dis democratic moment,” Adeleke add.
Govnor Adeleke Accord party win polling unit
Wia dis foto come from, Ademola Adeleke/X
Govnor Ademola Adeleke of Accord party don win im own polling unit.
Adeleke defeat im rival Bola Oyebamiji of APC wit 421 votes. APC get 29 votes.
Adeleke dey among di first voters for im Polling Unit 009 Abogunde compound, Ward 02 Sagba, Ede North.
Govnor Adeleke dey seek re-election for second term under di Accord Party.
Inec don begin upload election results on IREV
Wia dis foto come from, INEC
Di Independent National Electoral Commission (Inec) don begin upload results from di ongoing Osun State govnorship election for dia Result Viewing Portal (IREV).
Di kontri electoral bodi begin upload di results shortly afta voting end for several polling units across di state.
Inec bin fix 2:30pm as di closing time for voting for di election.
As of di time wey BBC News Pidgin file dis report, dem don upload 663 polling units results to di IReV portal out of 3,763, wey represent 17.62% of di total results expected.
Dis development show di commencement of di electronic transmission and public viewing of polling unit results as officials proceed wit di collation of results from di election.
Di IReV portal dey allow members of di public plus oda stakeholders to view results dem upload from polling units. E dey provide more transparency for di electoral process.
Govnor Ademola Adeleke condemn alleged arrest of Osun PDP chairman
Wia dis foto come from, Gov Ademola Adeleke/Facebook
Di govnor of Osun State and candidate of di Accord Party for di ongoing election don condemn di alleged arrest of state Peoples Democratic Party chairman, Sunday Bisi.
Di govnor say security pipo gbab Sunday Bisi for im house afta e cast im vote.
“Information wey reach me indicates say Hon. Bisi bin dey accosted for im home for Ilesa shortly afta e returned afta voting, and dem take am away to location wey neva dey known,” e tok for statement.
E say di security pipo no tell anyone di reason for im arrest.
Sorting and counting of votes don start for some polling units
Sorting and counting of votes don start for some polling units for Osun State as di govnorship election still dey go on.
Electoral officials don begin count votes for Unit 1, Ward 1, Itakogun/Egbe-Idi, Ilesa West LGA, Osun East Senatorial District.
Counting of ballot papers don also start for Polling Unit 007, Ward 02, Ede North.
Meanwhile, confusion dey for Polling Unit 007, Ward 02, Ede North ova void votes on ballot paper.
Di Coordinating DIG for di Osun State Govnorship Election Isyaku Mohammed, during one aerial surveillance and real-time monitoring of security deployments across di state tok say di police tanda gidigba to protect lives and secure di electoral process.
Wetin we call dis Video, Osun governorship election: Vote counting dey go on afta polls close Former Osun state govnor Adegboyega Oyetola don cast im vote
Wia dis foto come from, Adegboyega Oyetola/X
Former govnor of Osun State Adegboyega Oyetola don cast im vote for di Ward 1, Unit 10, Iragbiji, for di ongoing election.
Oyetola wey also be di Minister of Marine and Blue Economy tok say di voting exercise dey peaceful across di state.
E advise evrione to remain peaceful and allow di will of di pipo to prevail. Oyetola also tok say pipo turn out well-well for di exercise.
Oyetola also hail di security personnel for dia professionalism and dedication to maintain peace throughout di exercise.
Party agents for one polling unit unite for peace
Party agents gada togeda to show say dem dey peaceful during di election process.
At least dem unite to show say kasala no dey for dia side, evriwia dey okay.
Wetin we call dis foto, Party agents gada to show say kasala no dey for dia unit. Lines for some polling units dey empty but pipo wey don vote dey wait for counting
For some areas, voters no too show face like dat.
BBC News Pidgin tori pesin wey dey cova di election say for polling unit 001 Baptist Day Primary School, Ward 09 Ojo/Aro Egbedore LGA, out of ova 700 registered voters na only 300 pipo don vote so far.
E send dis tori around few minutes past 1pm for afternoon.
Di line dey empty. Plenti pipo neva come out to come vote, while dose wey don vote still hang around to wait for counting of votes.
Wetin we call dis foto, Foto of polling unit 001 Baptist Day Primary school Ward 09 Ojo/Aro Egbedore LGA Osun election 2026: Young pipo still come out to vote, Even though some polling unit dey almost empty odas get plenti pipo
Wetin we call dis foto, Inec oficials wit voters wey stand for line dey wait to vote Young pipo come out to cast dia vote for di Osun State govnorship election.
While some polling unit dey almost empty, Polling unit 10 Ejigbo get crowd.
Voting process dey go on as men and women queue for different lines to cast dia votes.
Some.young voters also dey queue as dem dey enjoy di peaceful process.
Wetin we call dis foto, Voters arrange diasef for two lines ad dem dey wait peacefully to vote 
Wetin we call dis foto, Close-up foto of young pipo wey stand for line to vote ADC candidate comot from wia dem destroy im polling unit, Tori be say pipo bin no know wia im dey wen di kasala happun
Wetin we call dis foto, ADC candidate, Najeem Salam Tori pipo don confam say di candidate of di African Democratic Congress (ADC) safely comot for di area wey kasala bin happun.
Tori be say e escape through anoda route.
Kasala bin burst for di African Democratic Congress (ADC) candidate polling unit.
BBC News Pidgin tori pesin wey dey on ground wen e happun tok say some guys come di polling unit wia dem break all di ballot box.
According to him police showface for di polling unit to intervene for di mata.
Fotos of destruction wey happun for ADC candidate polling unit
Wetin we call dis foto, Foto of ballot box wey don break wey dey for ground. Dis na fotos of di destruction wey happun almost immediately afta di African Democratic Congress (ADC) govnorship Candidate Najeem Salam cast im vote for Polling unit 13 Ward 04 Ejigbo LGA
BBC News Pidgin tori pesin wey bin dey on ground wen e happun tok say some guys come di polling unit and dem break all di ballot box.
According to him police showface for di polling unit to intervene for di mata.
Nigeria secret police di DSS don arrest di man.
Wetin we call dis foto, Foto of bus window glass wey break 
Wetin we call dis foto, Canopy wey bin stand dey for ground 
Wetin we call dis foto, Pesin wey look like electoral official dey pack di polling unit voting boot Moment wey thugs scata polling unit wia ADC candidate vote
We don confam say candidate of di ADC Najeem Salam don comot for di area wey violence happun.
E escape through anoda route.
Wetin we call dis Video, Osun govnorship election: Live from ADC Candidate polling unit wia thugs scatta election, Breaking, APC candidate Bola Oyebamiji cast im vote
Wetin we call dis foto, Di All Progressives Congress (APC) candidate, Bola Oyebamiji cast im vote for polling unit 11, ward 9 Gantry Are for Ikire, Irewole LGA Bola Oyebamiji, govnorship candidate of All Progressives Congress (APC) don cast im vote for im polling unit, for Irewole for Osun State on Saturday.
Di candidate arrive for im polling unit 11, ward 9, Gantry Are for Ikire, Irewole LGA wit im wife and party faithfuls to vote dis morning.
Na 15 candidates dey contest for di election, including di top contenders, Ademola Adeleke of Accord Party and Bola Oyebamiji of All Progressive Party.
Osun get 2,339,233 registered voters, but na only 1,906,390 of dem, wey be 81.50%, don collect dia Permanent Voter Cards (PVCs) wey dey eligible to participate for di Saturday poll.
Skip YouTube postAllow Google YouTube content?Warning: Di BBC no dey responsible for di content of external sites. YouTube content fit contain adverts.Dis article contain content wey Google YouTube provide. We ask for una permission before anytin dey loaded, as dem fit dey use cookies and oda technologies. You fit wan read di Google YouTube cookie policy and privacy policy before accepting. To view dis content choose 'accept and continue'.
End of YouTube post
