د خيبرپښتونخوا په بنو کې وسله والو د پوليسو پر پوسته مرګونی برید کړی

د خيبرپښتونخوا د پوليسو په وینا د دغه ایالت د بنو په فتح خېل پوسته د وسله والو برید کې لږ ترلږه ۱۲پوليس وژل شوي دي.

د پوليسو يوه افسر سجاد خان په وینا د ۱۲ تنو مړي له کنډوالو رايستل شوي او په وینا یې دوه تنه ټپي دي چې د درملنې لپاره د بنو مرکزيروغتون ته لېږدول شوی دي.

رويټرز د پوليسو د يوه چارواکي له خولې ويلي وسله والو هڅه کوله چې له چاودېدونکو ډک موټر د پوليسو مرکز ته دننه کړي چې پوليسو پرې ډزې وکړې.

نوموړی وايي د پوليسو پوسته په بشپړه توګه ويجاړه شوې ده.

ویل کېږي د برید پر مهال ۱۵ تنه پوليس په پوسته کې موجود وو. پوليس وايي سيمه يه بشپړه توګه کلابنده شوې او چاڼيز عمليات روان دي.

د پوليسو يوه بل چارواکي د نوم نه ښودل په شرط رويټرز ته ويلي، "ترهګرو لومړی د چاودېدونکو توکو ډک موټر په واسطه پر پوسته برید وکړ او وروسته وسله وال د پوستې انګړ ته ننوتل او پر پوليسو یې ډزې پيل کړې."

دی وايي، "نور امنيتي ځواکونه د پوليسو مرستې ته واستول شول او پر هغوی هم وسله والو برید کړی چې ځينو ته یې مرګژوبله اوښتې ده".

د پوليسو ځينو سرچينو رويټرز خبري اژانس ته ويلي، وسله والو په دغه برید کې "ډرونونه" هم کارولي دي خو په خپلواکه توګه د دې ادعا پخلی نشي کېدلی.

د ژغورنې ادراو او ملکي روغتونونو امبولاسونه سيمې ته استول شوي او چارواکو ويلي، د بنو په دولتي روغتونونو کې بېړنۍ حالت اعلان شوی دی.

د روټيرز خبري اژانس له مخې د "اتحاد المجاهدين" په نامه ډلې د دغه برید مسووليت منلی دی.

وړاندې پاکستان د دا ډول بریدونو ګوته تر ډېره پاکستاني طالبانو ته نيوله او په افغانستان کې یې د طالبانو پر حکومت تور پورې کاوه چې هغو وسله‌ والو ته پناه ورکوي چې د افغانستان له خاورې په پاکستان کې د بریدونو پلان جوړوي.

خو د طالبانو حکومت دا ډول تورونه رد کړي او وايي هېچاته اجازه نه ورکوي چې د افغانستان خاوره د بل چا پر ضد وکاروي او په پاکستان کې امنيتي پېښې یې د دوی کورنۍ ستونزه بللې ده.

خو دا ډول وسله وال بریدونه کولی شي د پاکستان او په افغانستان کې د طالبانو حکومت تر منځ د جګړو او تاوتریخوالي د بيا راپورته کېدو سبب وګرځي.

په وروستیو څو مياشتو کې د پاکستان پوځ او طالبانو حکومت د ځواکونو تر منځ سختې نښتې شوې او پاکستان د افغانستان پر خاوره ګڼ هوايي بریدونه کړي چې ملکي وګړو ته هم په کې درنه مرګژوبله اوښتې ده. خو پاکستان وايي د افغانستان دننه په هوايي بریدونو کې د وسله والو او د هغوی د همکارانو پټنځايونه په نښه کوي.

که څه هم په دې وروستيو کې نښتې يو څه کمې شوې دي خو بيا هم کله ناکله د کرښې په اوږدو کې د نښتو راپورونه ورکول کېږي او د دواوړو هېوادونو تر منځ سوداګري په ټپه درېدلې ده.

د خيبر پښتونخوا سيمو کې له څه مودې راهیسې امنيتي پېښې زياتې شوې چې د چاودنو تر څنګ د ډرون بریدونو راپورونه هم ورکړل شوي دي. د دې تر څنګ د هدفي وژنو او تښتنو د پېښو خبرونه هم ترلاسه شوي دي.

څو ورځې وړاندې جنوبي وزيرستان کې موټر بم چاودنې کې څو تنو ته مرګژوبله اوښتنې وه او له دې وړاندې د شمالي وزيرستان په میرانشاه کې د وسله له خوا یو قومي مشر ملک سيف خان په ډزو ووژل شو چې وروسته ځايي خلکو د وسله والو پر پټنځايونو بریدونه وکړل.