KAI TSAYE, AC Milan ta kori kociyanta Massimiliano Allegri

Rahoto kai-tsaye

Mohammed Abdu

1. 26 Mayu 2026, Daga Jaridu

   Tottenham ta sake nuna sha'awarta a kan cinikin dan wasan gaba na gefe na Manchester United Savinho, dan Brazil mai shekara 22, a kan fam miliyan 60. (Mail), external

   Liverpool ta fi son maye gurbin Mohamed Salah, da matashin dan wasan RB Leipzig, Yan Diomande, mai shekara 19, dan Ivory Coast, wanda kwantiraginsa ya tanadi damar sayar da shi a kan fam miliyan 86.

   Haka kuma daga cikin zabin da Liverpool din ke dubawa akwai dan wasan Newcastle da Ingila Anthony Gordon, mai shekara 25, da kuma dan gaban Paris St-Germain da Faransa Bradley Barcola, mai shekara 23. (Telegraph)

   Sai dai kuma suma zakarun gasar Jamus - Bundesliga - Bayern Munich suna son Gordon din na Newcastle, kuma Bayern za ta iya hadawa da mai tsaron ragar Jamus Alexander Nubel mai shekara 29, ta bayar a cinikin na Gordon. (Bild)

   Barcelona za ta yi sabuwar tattaunawa da Manchester United kafin wasan Kofin Duniya, domin kammala cinikin Marcus Rashford, inda kungiyar ta Sifaniya tauni ta kammala yarjejeniya tsakaninta da dan gaban na Ingila mai shekara 28 (Talksport)

2. 26 Mayu 2026Kocin Sifaniya ya ce kishin ƙasa ya fi kowacce ƙungiya girma, Gasar kofin duniya

   Kocin Sifaniya, Luis de la Fuente, ya jaddada cewa kishin tawagar ƙasa ya fi na kowacce ƙungiya muhimmanci.

   Ya bayyana hakan bayan fitar da jerin ƴan wasan da za su buga wasa ksar FIFA World Cup ba tare da wani ɗan ƙwallon Real Madrid ba a ciki.

   Sifaniya, wacce ita ce zakarar kofin nahiyar Turai, na cikin manyan kasashen da ake ganin za su iya lashe gasar Kofin Duniya mai zuwa. Tawagar ƴan wasa 26 da De la Fuente ya zaba ta kunshi takwas daga Barcelona, abin da ya sake jawo cece-kuce kan hamayyar El Clasico zuwa cikin tawagar ƙasa.

   Masu tsaron baya Dean Huijsen da Dani Carvajal suna cikin fitattun ƴan wasan Real Madrid da aka bari daga tawagar da ke neman lashe kofin duniya na biyu bayan nasarar da ta samu a 2010 a Afirka ta Kudu.

   Sai dai De la Fuente ya yi watsi da ra’ayin cewa wannan hukunci zai rage masa goyon bayan magoya bayan Real Madrid.

   Ya bayyana cewa a wurinsa, abin da ya fi muhimmanci shi ne wakiltar Sifaniya yadda ya kamata, ba wai duba daga wace ƙungiya ɗan wasa ya fito ba.

3. 26 Mayu 2026, Daga Jaridu

   Dan wasan tsakiya na Chelsea da Argentina Enzo Fernandez, mai shekara 25, ya zama wanda Manchester City ta fi son saye a kasuwar bazara. (Fichajes)

   Roma na sha'awar sayen dan wasan gaba na Marseille Mason Greenwood, mai shekara 24, da Joshua Zirkzee na Manchester United, dan Netherlands mai shekara 25, da kuma, Crysencio Summerville na West Ham, mai shekara 24 shi ma dan Netherlands, a shirin da kungiyar ta Italiya ke yi na tunkarar gasar Zakarun Turai mai zuwa.(La Gazzetta dello Sport )

   End of contentJulian Alvarez na son barin Atletico Madrid, kuma ana ganin Arsenal, za ta dage wajen ganin ta dauki dan wasan na gaba na Argentina mai shekara 26. (Teamtalk)

   Yayin da Aston Villa ke shirin tunkarar gasar Zakarun Turai ta kaka mai zuwa, tana sa ran sayen dan wasan gaba na gefe na Newcastle kuma dan Ingila Harvey Barnes, mai shekara 28. (Mail)

4. 26 Mayu 2026Gundogan ya gargadi magoya baya kan kwatanta wani koci da Guardiola, Premier League

   Tsohon ƙyaftin ɗin Manchester City, Ilkay Gundogan, ya gargadi mutane da kada su rika kwatanta wanda zai maye gurbin Pep Guardiola da fitaccen kocin da ke barin ƙungiyar din.

   Guardiola ya yi bankwana da Manchester City a karshen mako bayan shekara 10 a filin Etihad inda ya lashe kofuna 20 tare da ƙungiyar.

   Tsohon kocin Chelsea, Enzo Maresca, wanda ya taba zama mataimakin Guardiola a kakar da City ta lashe uku a 2022-23, shi ne ake ganin zai fi kusa da maye gurbinsa.

   Gundogan, wanda ya jagoranci ƙungiyar lokacin da ta lashe kofi uku rigis, ya ce akwai sunaye da dama da ake dangantawa da aikin, kuma nan gaba za a san wanda zai zama sabon koci.

   Sai dai ya ce bai kamata a rika kwatanta sabon kocin kai tsaye da Guardiola ba.

   Ɗan wasan na Jamus ya bar Manchester City a bazarar bara kuma yanzu yana taka leda a Galatasaray.

5. 26 Mayu 2026Bowen ya nemi afuwar magoya bayan West Ham bayan faduwa, Premier League

   Ƙyaftin ɗin West Ham United, Jarrod Bowen, ya nemi afuwar magoya baya, saboda “kunya da raɗaɗin” faduwa daga Premier League da ta jawowa ƙungiyar.

   Zaman shekara 14 da West Ham ta yi a gasar Premier League ya zo karshe a ranar Lahadi, duk da nasarar da suka samu da cin Leeds United 3-0. Sai dai nasarar ta zo ne a makare bayan mummunar kakar da ta hana su wuce Tottenham a teburi.

   Faɗuwar West Ham zuwa Championship ta zo shekara uku bayan ɗaya daga cikin manyan nasarorin da ta samu, lokacin da kwallon Bowen a Prague ta bai wa kungiyar nasara kan Fiorentina domin lashe kofin UEFA Europa Conference League.

   Bowen ya bayyana takaicinsa kan yadda kakar ta kare, yana mai cewa ƴan wasan sun fahimci irin zafin da magoya baya ke ciki bayan da ƙungiyar ta kasa tsira.

   A gefe guda kuma, ana sa ran koci Nuno Espirito Santo zai bar ƙungiyar a wannan makon bayan ganawa da shugabannin West Ham.

   Nuno ya karɓi aikin horar da ƙungiyar ne a watan Satumba lokacin da take matsayi na 19 a teburin Premier League, amma bai samu nasarar ceto ƙungiyar daga faduwa ba.

6. 26 Mayu 2026, Daga Jaridu

   Juventus na dab da cimma yarjejeniya a cinikin mai tsaron ragar Liverpool da Brazil Alisson, wanda ke da ragowar sama da wata 12 a kwantiraginsa da Liverpool. (Goal Italia)

   Liverpool ta shiga gogayyar sayen matashin danwasan tsakiya na Jamus Kennet Eichhorn, mai shekara 16, daga Hertha Berlin. (Sky Germany)

   Bernardo Silva ya yi tattaunawa mai armashi da Atletico Madrid a yunkurin da kungiyar ta Sifaniya ke yi na yi wa Juventus shigar sauri a kan danwasan na tsakiya na Manchester City da Portugal, mai shekara 31, wanda zai tafi a matsayin wanda babu wani kwantiragi a kansa. (Teamtalk)

   Masu horad da 'yan wasa, Scott Parker, mai shekara 45, wanda a kwanan nan ya bar Burnley, da kuma na Strasbourg Gary O'Neil, mai shekara 43, dukkansu 'yan Ingila, na daga cikin wadanda West Ham, ke so idan ta rabu da kociyanta Nuno Espirito Santo, dan Portugal mai shekara 52, a bazaran nan. (Guardian)

   AC Milan ta tuntubi wakilan kociyan Bournemouth Andoni Iraola, dan Sifaniya mai shekara 43, bayan da kungiyar ta Italiya ta kori kociyanta Massimiliano Allegri mai shekara 58. (Sky Sports).

7. 26 Mayu 2026Morgan Gibbs-White na ganin Ingila za ta lashe Kofin Duniya, Gasar kofin duniya

   Dan wasan Nottingham Forest, Morgan Gibbs-White, ya bayyana cewa yana da yakinin Ingila za ta iya lashe gasar FIFA World Cup, duk da bai samun gurbin wakiltar kasar ba.

   Gibbs-White, wanda ya buga wa Ingila wasa shida, yana cikin ƴan ƙwallon da koci Thomas Tuchel ya bari a jerin sunayen da aka fitar a makon da ya gabata.

   Duk da cewa an cire wasu fitattun ƴan wasa kamar Phil Foden da Cole Palmer saboda rashin gamsarwa a kakar bana, Gibbs-White ya zura kwallaye 15 a Premier League.

   Ɗan wasan mai shekara 26 ya ce yana jin ya yi duk abin da zai iya domin samun dama a tawagar, kuma yanzu yana bai wa waɗanda aka zaba cikakken goyon baya.

   Ya nuna cewa Ingila na da ingantattun ƴan wasa da zai su iya lashe Kofin Duniya, duk da takaicinsa na rashin kasancewa cikin tawagar.

8. 26 Mayu 2026Portland Timbers ta raba gari da koci Neville, MLS

   Ƙungiyar Portland Timbers ta tabbatar da raba gari da kocinta, Phil Neville ta hanyar yarjejeniyar da aka cimma a tsakanin bangarori biyu.

   Wasan karshe da Neville ya jagoranta shi ne rashin nasara 3-1 da suka yi a hannun San Jose Earthquakes a ranar Lahadi, sakamakon da ya bar Timbers a matsayi na uku daga kasan teburi a Western Conference, maki takwas a baya da gurbin shiga play-offs na MLS kai tsaye.

   Neville, mai shekaru 49, ya gode wa ƙungiyar da duk waɗanda suka yi aiki tare da shi a Oregon, amma ya amince cewa bai cimma sakamakon da ake bukata ba a wannan kakar.

   Tsohon ɗan wasan Manchester United da tawagar Ingila ya koma Portland Timbers a 2023, watanni biyar bayan da aka kore shi daga Inter Miami.

   Kafin haka, ya taɓa horar da tawagar mata ta Ingila, inda ya jagorance su zuwa zagayen kusa da na karshe a gasar Kofin Duniya ta 2019.

9. 26 Mayu 2026Nicky ya naɗa mahaifinsa mataimakinsa a Quuens of the South, Queens of the South

   Nicky Clark ya naɗa mahaifinsa mataimakinsa a lokacin da tsohon ɗan wasan Rangers da Dundee United zai fara aikin kociyan, Queens of the South.

   Ɗan wasan mai shekara 34 ya koma Palmerston Park a zagaye na biyu a kakar wasan da ta gabata, inda ya zura ƙwallaye bakwai a wasa 13 da ya buga.

   Zai ci gaba da taka leda a kakar wasa mai zuwa, yayin da ƙungiyar Queen of the South ta Scottish League One ke da kwarin gwiwar cewa suna da tsarin da zai ba shi damar hada aikin wasa da kuma horarwa a lokaci guda.

   Sandy, mai shekara 69, ya dawo a matsayin mataimakin koci na Queens karo na uku, bayan da ya taɓa aiki sau biyu a karkashin Allan Johnston a baya.

   A matsayinsa na tsohon ɗan wasan gaba a Rangers da Heart of Midlothian, ya bar aikin koci a ƙungiyar Albion Rovers ta Lowland League domin komawa aiki tare da dansa.

   A karo na karshe da suka yi aiki tare a Palmerston shi ne a kakar 2012–13, lokacin da suka lashe Second Division da Challenge Cup, inda Nicky Clark ya zura ƙwallaye 41 a wasanni 46.

10. 26 Mayu 2026AC Milan ta kori kociyanta Massimiliano Allegri, Serie A

    AC Milan ta kori kocinta, Massimiliano Allegri bayan gazawar da ta yi wajen samun gurbin shiga gasar Champions League, a kakar da shugabancin ƙungiyar ya bayyana a matsayin “babban gazawa mai girma”.

    Milan ta faɗi daga matsayi na uku a teburin Serie A zuwa Ta biyar a Serie A, sakamakon shan kashi 2-1 a hannun Cagliari a wasan karshe na kakar ranar Lahadi, wanda ya sa ta rasa tikitin Champions League a karo na biyu a jere.

    A sakamakon haka, Inter Milan, Napoli, Roma da Como — wacce za ta fara shiga gasar a karon farko a tarihinta — za su wakilci Italiya a Champions League a baɗi, yayin da AC Milan tare da Juventus za su buga Europa League.

    Allegri mai shekara 58 ya dawo Milan ne a watan Mayun bara domin wa’adi na biyu, bayan da ya maye gurbin Sergio Conceição.

    A baya ya horar da Milan tsakanin 2010 zuwa 2014, inda ya lashe Serie A a kakar 2010–11 da kuma Super Cup na Italiya a kakar da ta biyo baya.

    Milan ta sha kashi a wasanni bakwai daga cikin 13 na karshe a kakar nan, yayin da abokiyar hamayya Inter Milan ta lashe Scudetto na biyu cikin shekaru uku.

11. 25 Mayu 2026Sifaniya ta gayyaci Yamal gasar kofin duniya, amma ba ɗan Real Madrid ko ɗaya, Gasar kofin duniya

    Ɗan wasan Barcelona, Lamine Yamal, ya samu goron gayyata a cikin tawagar Sifaniya da za ta buga gasar FIFA World Cup, duk da cewa yana jinya.

    Matashin mai shekara 18 ya bai buga wasu wasannin karshen kakar La Liga ba, sakamakon raunin da ya ji ranar 22 ga watan Afirilu.

    Sai dai kuma a karon farko babu wani ɗan ƙwallo daga Real Madrid a tawagar ta Sifaniya, yayin da ba aka ajiye mai tsaron baya, Dean Huijsen da kuma Dani Carvajal.

    Kocin Sifaniya, Luis de la Fuente, ya ce bai duba ƙungiya ko ɗan wasa ya duba cancanta da wanda yake kan ganiya.

    Ƙungiyar Real Madrid ta ci karo da koma baya a kakar nan, bayan da ta kasa lashe kofi ko ɗaya kuma karo na biyu a jere a tarihi.

    Haka shima ɗan wasan Athletic Bilbao, Nico Williams, wanda ke jinya shima yana cikin tawagar ta mutum 16.

    Gasar Kofin Duniya za ta gudana daga 11 ga watan Yuni zuwa 19 ga watan Yuli.

    Sifaniya za ta fara da fuskantar Cape Verde ranar 15 ga watan Yuni, sannan ta kara da Saudi Arabia ranar 21 ga watan Yuni, kafin ta haɗu da Uruguay ranar 26 ga watan Yuni a wasannin cikin rukuni.

    Ga jerin ƴan wasan tawagar Sifaniya:

    Masu tsare raga: Unai Simon (Athletic Bilbao), David Raya (Arsenal), Joan Garcia (Barcelona).

    Masu tsare baya: Marcos Llorente (Atletico Madrid), Marc Pubill (Atletico Madrid), Pedro Porro (Tottenham), Aymeric Laporte (Athletic Bilbao), Eric Garcia (Barcelona), Pau Cubarsi (Barcelona), Marc Cucurella (Chelsea), Alejandro Grimaldo (Bayer Leverkusen).

    Masu buga tsakiya: Rodri (Manchester City), Martin Zubimendi (Arsenal), Mikel Merino (Arsenal), Pedri (Barcelona), Gavi (Barcelona), Fabian Ruiz (Paris St-Germain), Alex Baena (Atletico Madrid).

    Masu cin ƙwallaye: Yeremy Pino (Crystal Palace), Victor Munoz (Osasuna), Mikel Oyarzabal (Real Sociedad), Ferran Torres (Barcelona), Lamine Yamal (Barcelona), Dani Olmo (Barcelona), Nico Williams (Athletic Bilbao), Borja Iglesias (Celta Vigo).

12. 25 Mayu 2026Iraola ya yi ban kwana da Bournemouth duk da samun tikitin zakarun Turai, Premier League

    Magoya bayan Bournemouth sun rera waka suna cewa: “We’re all going on a European tour” yayin da suka yi murnar ganin ƙungiyar ta samu tikitin shiga gasar Turai ta baɗi a ranar Lahadi.

    Duk da cewa burinsu na kaiwa Champions League bai cika ba, ƙungiyar ta Andoni Iraola ta tabbatar da samun matakin shiga Europa League a karshen kakar Premier League.

    A wasan karshe da suka tashi 1-1 da Nottingham Forest a ranar Lahadi, Bournemouth ta tabbatar da matsayinta na shida a teburi, wanda ya isa ya ba su tikitin shiga gasar Turai. Wannan nasara ta zo ne bayan sauyi mai ban mamaki da Iraola ya kawo a cikin shekara uku da ya yi a ƙungiyar

    Iraola ya karɓi aikin horar da Bournemouth a lokacin da suka kare a matsayi na 15 a kakar 2022-23, wanda aka ɗauka a matsayin cigaba, bayan rikicin da ya biyo bayan doke su 9-0 da Liverpool ta yi musu da kuma sauya Scott Parker da Gary O’Neil.

    Yanzu kuwa, sun kammala kakar a matsayi na shida a Premier League, abin da ya ba su damar buga Europa League a kakar wasa mai zuwa.

    Tsohon kocin RB, Leipzig, Marco Rose, shi ne zai gaji Iraola, kuma shi ne zai ɗauki nauyin ci gaba da gina nasarorin da aka samu a Bournemouth.

    Bayan tabbatar da tikitin Europa League, Iraola ya samu tafi daga magoya bayan Nottingham Forest, abin dmagoya baya sun yi tafa masa da nuna irin girmamawar da suka yi masa a gasar.

13. 25 Mayu 2026, Daga Jaridu

    Manchester United ta tuntubi West Ham a kan dan wasanta na tsakiya Mateus Fernandes, ko za a sayar mata da matashin mai shekara 21 da ke taka wa tawagar Portugal leda, wanda kuma Arsenal da Paris St-Germain su ma suke sa ido a kan shi, inda aka yi masa farashin fam miliyan 80. (Mail)

    Haka kuma Manchester United ta yi nisa a tattaunawa da Atalanta a kan cinikin dan wasan tsakiya Ederson, dan Brazil mai shekara 26, sai dai har yanzu akwai rashin cimma matsaya tsakanin kungiyoyin biyu kan farashin dan wasan. (Sky Sports)

    Tottenham ta dauke hankalinta daga dan wasan Roma mai kai hari Paulo Dybala mai shekara 32, wanda ya ci Kofin Duniya da Argentina a 2022. (Football Insider)

    Nottingham Forest na shirin cinikin dan wasan tsakiya na Middlesbrough, Hayden Hackney, dan Ingila mai shekara 23. (Teamtalk)

    Fenerbahce na sa ido a kan dan wasan Faransa, Randal Kolo Muani, mai shekara 27, wanda ya yi wannan kakar a Tottenham a matsayin aro daga Paris St-Germain. (Fanatik)

14. 25 Mayu 2026An sa hoton ƙwallon da McTominay ya ci Denmark a takardar kuɗin Scotland, Scotland

    Bankin Scotland ya ƙaddamar da takardar kuɗi ta musamman mai darajar £20, wacce ke ɗauke da hoton shahararriyar ƙwallon da Scott McTominay ya ci wa Scotland man ban sha'awa.

    An kirkiro wannan takarda ne domin murnar komawar Scotland zuwa gasar FIFA World Cup bayan samu tikitin shiga gasar a karon farko tun bayan shekarar 1998.

    Tsarin takardar ya haɗa abubuwan gargajiya na takardun kuɗi tare da hoton kwallon da Scott McTominay ya ci Denmark a wasan neman gurbin shiga gasar.

    Takardu 100 kacal aka buga daga wannan nau’i na musamman, inda guda 50 za su kasance ta hanyar gwanjon masu tara kayayyaki, ƙyautar caca, da kuma wasu wuraren nune-nune a Edinburgh da Glasgow.

    Tawagar Scotland ta samu gurbin shiga gasar Kofin Duniya bayan da ta doke Denmark da ci 4-2 a filin Hampden Park a watan Nuwamba.

    McTominay ne ya fara cin ƙwallon mai ban mamaki, wacce ta zama daya daga cikin manyan lokutan da suka taimaka wa Scotland komawa babban matakin ƙwallon kafar duniya.

15. 25 Mayu 2026Tarihin da Guardiola ya kafa a Manchester City, Manchester City

    Ga jerin wasu nasarorin da Guardiola ya samu a Premier League tare da Manchester City da ya horar.

    • Ƙungiyar Premier League da ta lashe Premier League huɗu a jere
    • Wadda ta haɗa maki ɗari a kaka ɗaya a Premier League (100 - 2017/18)
    • Ta farko a Premier League da ta samu maki 90 ko fiye da haka
    • Kocin da ya ci na 100 da 150 da 200 da kuma 250 a Premier League a karancin wasanni.
    • Kociyan da ya haɗa maki 500 da 600 da 700 da kuma 800 a Premier League.
    • Cin wasa da yawa a cikin shekara ɗaya (36 - 2021)
    • Kakar da ci wasanni da yawa a Premier League (32 - 2017/18 da kuma a 2018/19)
    • Cin ƙwallaye da yawa a kakar Premier League (106 - 2017/18)

16. 25 Mayu 2026Messi ya tsorata da raunin da ya ji daf a fara gasar Kofin Duniya, Argentina

    Ƙyaftin ɗin, Argentina, Lionel Messi, ya ji tsoro da rauni da ya ji daf a fara gasar Kofin Duniya, bayan ya nemi a sauya shi yayin wasan Inter Miami a gasar Major League Soccer a ranar Lahadi.

    Kocin Inter Miami, Guillermo Hoyos, daga baya ya bayyana cewa maye gurbin ɗan wasan mai shekara 38 a karawar da suka buga da Philadelphia Union ya kasance domin kariya, sakamakon yanayin fili da ya yi nauyi saboda ruwan sama a Miami.

    Messi, wanda ya lashe Kofin Duniya na 2022, ya bar filin a minti na 73 bayan da ya kama bayan cinyarsa ta hagu, sai dai an gan shi yana tafiya cikin kwanciyar hankali yayin da ya nufi ɗakin canza kaya.

    Messi bai tabbatar da cewa zai buga wa Argentina gasar Kofin Duniya mai zuwa ba, amma ana sa ran zai kasance cikin tawagar da za ta kare kambunta a gasar da za a fara a ranar 11 ga watan Yuni, wadda Amurka, Kanada da Mexico za su karbi bakunci.

    Argentina za ta fitar da jerin ƴan wasanta a mako mai zuwa, kuma za ta fara wasa da Algeria a ranar 16 ga Yuni.

    Tun lokacin da ya koma Inter Miami a 2023, Messi ya rika rage yawan wasanninsa saboda kula da lafiyarsa, duk da cewa ya sha fama da matsalar raunin cinyarsa a wasu lokuta.

17. 25 Mayu 2026Rangers ta amince da ɗaukar Lawrence Shankland, Rangers

    Ƙungiyar Rangers ta cimma yarjejeniya da Heart of Midlothian kan ɗaukar ƙyaftin ɗinsu, Lawrence Shankland da zarar an kammala yi masa gwajin koshin lafiya da za a yi masa a kwanaki masu zuwa.

    Ɗan wasan na tawagar Scotland, wanda aka dade ana danganta shi da komawa Ibrox, ana sa ran zai zama cefanen farko na sabon koci, Danny Rohl a wannan bazarar.

    Shankland mai shekaru 30 ya taka muhimmiyar rawa wajen jagorantar Hearts zuwa matsayi na biyu a wannan kakar.

    Tun zuwansa Hearts a 2022, ya zura ƙwallaye 88 a wasa 171 da ya buga wa ƙungiyar. Haka kuma, yana cikin ƴan wasa mafi zura kwallaye a Scottish Premiership tun bayan fara gasar a 2013.

    A jimlace kuma, Shankland ya zura kwallaye 236 a wasanni 494 da ya buga a matakin ƙungiya, sannan ya zura kwallaye huɗu a wasa 18 da ya buga wa tawagar Scotland.

18. 25 Mayu 2026, Daga Jaridu

    Kyaftin din Tottenham Cristian Romero, mai shekara 28, zai so hadewa da dan kasarsa Argentina, Diego Simeone a Atletico Madrid. (Teamtalk)

    Ana sa ran dan bayan Crystal Palace Maxence Lacroix, mai shekara 26, zai bar kungiyar a bazara, inda kungiyoyin Firimiya da yawa ke son dan wasan na Faransa.(RMC Sport)

    Tottenham na duba yuwuwar neman mai tsaron ragar Benfica Anatoliy Trubin, dan Ukraine mai shekara 24, a bazara. (A Bola)

    Darektan wasanni na AC Milan Igli Tare na da kwarin gwiwa cewa tsohon dan wasan tsakiya na Croatia Luka Modric, mai shekara 40, zai sake kulla yarjejeniyar zama a kungiyar tsawon karin shekara daya. (DAZN via Football Italia)

19. 25 Mayu 2026Fabregas ya kai Como zuwa Champions League a tarihi, Champions League

    Kungiyar Como ta Cesc Fabregas ta samu tikitin shiga gasar Champions League a karon farko a tarihinta, bayan da ta doke Cremonese da ci 4-1 a ranar karshe ta kakar Serie A.

    Wannan nasara ta Como, tare da doke AC Milan 2-1 a hannun Cagliari, ya tabbatar da cewa Como ta kare a matsayi na huɗun teburi, wanda ya ba su tikitin zuwa gasar zakarun Turai. A daya bangaren kuma, wannan sakamako ya tabbatar da faduwar Cremonese zuwa Serie B.

    Tsohon ɗan wasan Arsenal da Chelsea da Barcelona, Fabregas mai shekara 39, ya bayyana cewa wannan nasara tana daga cikin manyan nasarorin rayuwarsa.

    Kafin wasan, Como na bukatar nasara tare da fatan ko AC Milan ko Roma za su rasa maki, domin ta samu tikitin Champions League.

    Roma ta doke Hellas Verona, wadda ta kare a matsayi ta uku, amma rashin nasarar Milan da Cagliari ya bai wa Como damar tsallaka Milan zuwa huɗu na farko.

    Wannan kuma ya janyo Juventus ta rasa tikitin Champions League. Juventus ta fara wasa ranar Lahadi a matsayi na shida kuma tana bukatar nasara tare da fatan wasu ƙungiyoyi su yi kuskure.

    A wasan hamayya da Torino, wanda aka jinkirta na awa ɗaya saboda dalilan tsaro bayan rikici tsakanin magoya baya, Juventus ta tashi 2-2.

    A karshe, sakamakon Roma da Como ya tabbatar da cewa Juventus za ta buga gasar Europa League a kakar wasa mai zuwa.

20. 25 Mayu 2026Conte ya bar Napoli kaka ɗaya da lashe Serie A, Napoli

    Kocin Napoli, Antonio Conte, ya sanar cewa zai bar ƙungiyar a karshen wannan kakar, watanni 12 kacal bayan da ya jagorance su zuwa lashe kofin Serie A.

    Tsohon kocin Chelsea da Tottenham ya karɓi ragamar Napoli a shekarar 2024, kuma a kakarsa ta farko ya jagoranceta zuwa lashe kofin gasar Serie A, wanda shi ne na huɗu a tarihin ƙungiyar ɗin.

    Sai dai a wannan kakar, Napoli ta kare a matsayi na biyu da maki 11 tsakani da Inter Milan, wadda ta lashe kofin bana.

    A gasar Champions League – wacce Conte ya sha wahala wajen samun nasara a cikinta – Napoli ta kasa kaiwa matakin zagaye na biyu.

    Bayan da Napoli ta doke Udinese da ci 1-0 a wasan su na karshe a kakar a ranar Lahadi, Conte ya sanar da ficewarsa a wani taron manema labarai tare da shugaba, Aurelio De Laurentiis.

    Lokacin da aka tambaye shi ko zai iya zama sabon kocin tawagar ƙasar Italiya, Conte ya ce: “Shawarata ita ce a ɗauki Pep Guardiola.”

    Conte ya kusan barin Napoli a bazarar da ta gabata, amma aka shawo kansa ya ci gaba bayan tattaunawa da De Laurentiis.

    Napoli ta ƙara ɗaukar sabbin ƴan wasa kamar Kevin De Bruyne da Rasmus Højlund, amma raunin da wasu daga fitattun ƴan wasa, ya sa Conte ya kasa kare kofin da ya ɗauka.