Indonesia: Iruka ry'ikirunga ryatumye abagenzi 150,000 b'indege basigara mu gihirahiro

Inyandiko gusa
Insiguro ya video, Reba: Isoko y'amazuku (lava) hamwe n'igicu cy'ivu ubwo ikirunga cyarukaga muri Indonesia
    • Umwanditsi, Toby Mann
  • Yatangajwe
  • Igihe co gusoma: iminota 3

Abagenzi barenga 150,000 basigaye mu gihirahiro nyuma yuko iruka ry'ikirunga ritumye abategetsi bo muri Indonesia (Indonésie) baba bahagaritse ibikorwa byo ku bibuga by'indege bitandatu.

Ikibuga mpuzamahanga cy'indege cya Soekarno-Hatta ni cyo cya mbere cyafunzwe mu gitondo cyo ku cyumweru, nyuma yuko ivu ryavaga ku kirunga cya Anak Krakatau rigaragaye mu kirere kiri hafi y'icyo kibuga cy'indege.

Minisitiri wo gutwara abantu n'ibintu wa Indonesia, Dudy Purwagandhi, yavuze ko kugeza ubu ingendo 467 z'indege ari zo zagizweho ingaruka, ndetse yasabye kompanyi zo gutwara abagenzi mu ndege gutekereza ku guhindurira inzira zimwe mu ngendo z'indege zikajya ku bindi bibuga.

Icyo kirunga cyari cyatangiye kuruka mu ijoro ryo ku wa gatanu, gikomeza guteza umutingito w'isi, amazuku (laves) hamwe n'urusaku rwomongana mu turere dukikije aho hantu. Abategetsi bavuze ko mu gitondo cyo ku cyumweru icyo kirunga cyarutse izindi nshuro ebyiri.

Ikirunga cya Anak Krakatau kirimo kuruka ibintu kibyohereza mu kirere, nyuma y'iruka ryabereye mu bunigo bwa Sunda, muri Indonesia.

Ahavuye isanamu, EPA

Insiguro y'isanamu, Iruka rishya ry'ikirunga cya Anak Krakatau ryatumye ingendo z'indege ziburizwamo ndetse biba ngombwa ko amashuri amwe na yo ahagarika ibikorwa

Minisiteri yo gutwara abantu n'ibintu yavuze ko iryo hagarikwa ry'ibikorwa ahanini ryagize ingaruka ku ngendo zijya n'iziva muri Singapour, ndetse n'izindi nzira mpuzamahanga nka Doha muri Qatar, Sydney muri Australia na Kuala Lumpur muri Malaysia.

Minisitiri Purwagandhi yavuze ko icyemezo cyo kuba n'ibindi bibuga by'indege bifunzwe cyafashwe nyuma yuko ibipimo bigaragaje ko ivu ry'ikirunga ryakwirakwiriye ryerekeza mu ntara ya West Java.

Yashishikarije kompanyi z'indege kwihutisha ibikorwa byo gusubiza amafaranga abagenzi bari baguze amatike y'indege bagizweho ingaruka n'iburizwamo ry'ingendo, ndetse kompanyi z'indege zigatanga amakuru ku gihe ku bafite gahunda z'ingendo mu gihe kiri imbere, kugira ngo hirindwe ubucucike ku bibuga by'indege.

Abagenzi baheze mu gihirahiro bicaye ku ntebe ndende yo ku kibuga mpuzamahanga cy'indege cya Soekarno-Hatta, i Tangerang, muri Indonesia, ku itariki ya 6 Nzeri (9) mu mwaka wa 2026.

Ahavuye isanamu, Getty Images

Insiguro y'isanamu, Ingendo ziva n'izijya muri Singapour – hamwe na Doha, Sydney, na Kuala Lumpur – zahungabanye