Bachgen 'bregus' wedi boddi ar ôl mynd ar goll ar wyliau - cwest

Fe wnaeth bachgen 16 oed a aeth ar goll ar wyliau yng ngogledd Cymru foddi ar ôl mynd i'r môr yn Llandudno, mae cwest wedi clywed.

Diflannodd Athrun Lombardo o draeth Pen Morfa ym mis Mai 2025 tra ar wyliau gyda'i deulu.

Cafodd ei gorff ei ganfod yn y môr bedwar diwrnod yn ddiweddarach.

Daeth y crwner i'r casgliad mai anffawd oedd ei farwolaeth, ac nad oedd bwriad ganddo i niweidio ei hun.

Roedd gan Athrun, a oedd yn dod o Emersons Green ym Mryste, awtistiaeth a chyflyrau cymhleth gan gynnwys dyspracsia, ac fe gafodd ei ddisgrifio fel "unigolyn bregus".

Fe wnaeth yr heddlu, y gwasanaeth bad achub, Gwylwyr y Glannau a chŵn chwilio ac achub gynnal ymgyrch fawr i chwilio amdano ar ôl iddo fynd ar goll.

Cafodd ei weld ddiwethaf yn gwisgo siorts nofio yn unig.

Cafwyd hyd i'w gorff bedwar diwrnod yn ddiweddarach yn y môr gan griw bad achub Conwy.

Roedd ar wyliau gyda'i rieni a'i frawd yn ymweld ag aelodau eraill o'i deulu.

Clywodd y cwest yn llys y crwner Sir Ddinbych, Rhuthun gan ei fam, Catherine Lombardo, "nad oedd unrhyw arwydd" y byddai'n ei weld am y tro olaf y diwrnod hwnnw.

Dywedodd ei dad mewn datganiad ei fod wedi dweud wrth ei fab i gerdded tuag at y môr tra'r oedd yn rhoi eli haul ar ei fab iau, gan "nad oedd ganddo reswm i boeni".

Dywedodd hefyd ei fod yn caniatáu iddo grwydro o gwmpas "i hybu ei annibyniaeth".

Mewn datganiad, dywedodd Catherine Lombardo iddi gyrraedd y traeth tua dwy awr ar ôl i'w mab gael ei weld ddiwethaf, a bod ei phlentyn iau wedi dweud ei fod wedi gweld Athrun yn "rhedeg tuag at y môr", a oedd yn anarferol oherwydd nad oedd fel arfer yn rhedeg i unman.

Er iddo gael triniaeth am iselder yn y gorffennol, dywedodd ei fam fod ei hwyliau wedi gwella yn ystod y gwyliau.

Dywedodd y crwner John Gittins nad oedd tystiolaeth i awgrymu mai gweithred fwriadol oedd y digwyddiad, gan gofnodi marwolaeth trwy anffawd.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.