12 awr o 'waith tîm, sgil a gwytnwch' i glirio 'afon o sbwriel' o fynydd

Mae gwirfoddolwyr wedi glanhau yr hyn a gafodd ei ddisgrifio fel "afon o sbwriel" yn llifo oddi ar fynydd yn Rhondda Cynon Taf.

Fe ddywedodd Tîm Achub Mynydd Canol y Bannau eu bod nhw wedi cael gwared ar dros dunnell o wastraff o Fynydd Bwlch dros y penwythnos.

Oherwydd y tirwedd "heriol", roedd yn rhaid i'r timau ollwng eu hunain i lawr gyda rhaffau, gan gymryd 12 awr i glirio sbwriel oedd wedi pentyrru ar y safle.

Cafodd eu hymdrechion eu canmol gan Gyngor Sir Rhondda Cynon Taf, a ddywedodd ei bod hi'n "hollol annerbyniol" fod pobl wedi trin y lle fel "man personol i waredu sbwriel".

Ym mis Ionawr fe wnaeth blogiwr teithio, Nathan Dixon, dynnu sylw at y gwastraff ar hyd ochr Mynydd Bwlch gyda lluniau drôn yn dangos maint y broblem.

Ar y pryd roedd modd gweld y llanast o hyd at "bum milltir i ffwrdd", meddai, tra bod perchennog y tir Katie Davies yn dweud fod y golygfeydd "afiach" yn dorcalonnus.

Roedd sbwriel i'w weld wedi ymgasglu dros gyfnod o amser ar ôl cael ei daflu o le parcio ar frig Mynydd Bwlch, gan ddisgyn ar dir serth oedd yn anodd ei gyrraedd.

Dywedodd Cyngor Rhondda Cynon Taf fod y gwastraff oedd wedi ei dipio'n anghyfreithlon yn cynnwys sbwriel masnachol a chartref, megis "teiars, byrddau plaster, bagiau sment, nwyddau gwyn, a thunelli o sbwriel rhydd".

Ychwanegodd y cyngor fod tystiolaeth o bobl yn dringo lawr i losgi'r sbwriel er mwyn cael gwared ar y dystiolaeth, a bod hynny wedi creu perygl i fywyd gwyllt a'r amgylchedd.

Ond gydag amodau tywydd ffafriol dros y penwythnos, roedd modd i'r cyngor gydweithio gyda'r tîm achub mynydd i waredu'r sbwriel.

"Roedd hyn yn lot mwy na chasgliad sbwriel," meddai Carys Rees o Dîm Achub Mynydd Canol y Bannau.

"Dros 12 awr, fe wnaeth y tîm ddefnyddio cilomedr o raff a thynnu ymhell dros dunnell o sbwriel yn ôl i'r brif ffordd gan ddefnyddio systemau achub rhaffau arbenigol.

"Roedd y tirwedd yn heriol, yr amodau yn gofyn tipyn, ac roedd angen lot fawr o waith tîm, sgil a gwytnwch gan bawb."

Ychwanegodd Ms Rees na allai fod "yn fwy balch o'r tîm".

"Nid yn unig wnaeth ein gwirfoddolwyr roi eu hamser i gymryd rhan yn yr her yma a gweithio'n ddiogel ar dirwedd mor anodd, ond drwy gydol y dydd fe wnaethon ni hefyd ymateb i bedwar galwad achub mynydd.

"Mae'r ymroddiad yna'n dweud popeth am broffesiynoldeb ac ymroddiad ein gwirfoddolwyr."

Er mai tirfeddianwyr sy'n gyfrifol am glirio gwastraff sydd wedi ei dipio ar dir preifat yn ôl y gyfraith, dywedodd y cyngor eu bod wedi camu i'r adwy y tro yma oherwydd "perygl sylweddol a maint y safle".

"Mae Mynydd Bwlch yn cynnwys rhai o'n golygfeydd cefn gwlad mwyaf godidog ni, ac mae'n hollol annerbyniol fod lleiafrif yn ei drin fel man personol i waredu sbwriel," meddai arweinydd y cyngor, Ann Crimmings.

Ychwanegodd na fydden nhw'n goddef sbwriel yn cael ei daflu mewn modd tebyg yn y dyfodol.

"Dyna pam y byddwn ni'n parhau i ddefnyddio'r holl bwerau sydd gennym i ddwyn y rheiny i gyfrif am eu gweithredoedd," meddai.

"Gallai llawer o'r eitemau gafodd eu casglu fod wedi cael eu cludo i ganolfan ailgylchu gymunedol neu ei gasglu ar ochr y stryd am ddim."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.