Tymor newydd yr Adran Premier - pwy all stopio Wrecsam?

Mae tymor newydd yr Adran Premier yn cychwyn ddydd Sul gyda Wrecsam yn gobeithio cael eu coroni'n bencampwyr am yr eildro yn olynol.

Mi oedd tymor 2025-26 yn un bythgofiadwy i'r Dreigiau, wnaeth ennill y gynghrair am y tro cyntaf yn eu hanes ac ennill Tlws Adran ar ôl curo Caerdydd ar giciau o'r smotyn yn y ffeinal.

Aethon nhw yn eu blaenau i chwarae yn rowndiau rhagbrofol Cynghrair y Pencampwyr gan ennill o 4-2 yn erbyn FC Pyunik o Armenia. Dyna'r tro cyntaf mewn saith tymor i glwb o Gymru ennill gêm Ewropeaidd.

Er y siom o orffen yn ail yn y gynghrair fe lwyddodd Caerdydd i ennill Cwpan Cymru, gan drechu eu gelynion pennaf Abertawe yn y ffeinal ar giciau o'r smotyn.

Mi gafodd yr Adran Premier - sef prif gynghrair merched Cymru - ei sefydlu yn 2009. Uwch Gynghrair Merched Cymru oedd yr enw gwreiddiol.

Abertawe oedd y pencampwyr cyntaf 'nôl yn nhymor 2009-10. Mae'r Elyrch wedi cael eu coroni'n bencampwyr ar chwe achlysur, ond dydyn nhw heb ennill y gynghrair bellach ers 2022.

Fe gafodd y gynghrair ei hail-lansio yn 2021, gan gyflwyno'r enw Adran Premier.

Ar y pryd, hon oedd y drydedd gynghrair yn Ewrop i gael gwared ar y gair 'merched' o'r teitl er mwyn normaleiddio a rhoi statws i bêl-droed merched.

"Tydi'r gair 'dynion' ddim yn nheitl y Cymru Premier, felly does dim angen y gair 'merched' yn yr Adran Premier", meddai Pennaeth Pêl-droed Merched Cymdeithas Bêl-droed Cymru, Lowri Roberts yn 2021.

Mae 'na wyth clwb yn cystadlu yn y gynghrair, gydag un tîm yn syrthio allan ohoni ar ddiwedd y tymor.

Caerdydd ydi'r tîm mwyaf llwyddiannus yn hanes diweddar y gynghrair, ond gyda chymorth Ryan Reynolds a Rob Mac fe lwyddodd Wrecsam i orffen uwch eu pennau yn y tabl y tymor diwethaf.

Mae'r diddordeb mae perchnogion Wrecsam wedi ei ddangos yn nhîm y merched yn sicr wedi codi proffil y gynghrair, gan eu bod yn aml yn rhoi canlyniadau'r tîm ar eu cyfrifon cyfryngau cymdeithasol.

Ers ennill dyrchafiad i'r Adran Premier yn 2023 maen nhw wedi mynd o nerth i nerth.

Wrecsam oedd y clwb cyntaf yn y gynghrair i roi cytundebau lled-broffesiynol i'w chwaraewyr, a mi gafodd yr uchelgais yna ei wobrwyo wrth ennill y bencampwriaeth y tymor diwethaf.

Mae gan Wrecsam reolwr hynod o brofiadol wrth y llyw yn Jenny Sugarman, ac mae'n ymddangos eu bod nhw wedi cryfhau'r garfan yn effeithiol dros yr haf.

Ymysg y chwaraewr sydd wedi ymuno â'r Dreigiau mae Natasha Thomas, ymosodwr rhyngwladol Jamaica a phrif sgoriwr yn hanes tîm merched Ipswich Town.

Mae hi'n gwbl amlwg eu bod nhw'n benderfynol iawn o ddal eu gafael ar dlws yr Adran Premier.

Ar ôl y siom o orffen yn ail y tymor diwethaf mae Iain Darbyshire wedi gadael ei swydd fel rheolwr Caerdydd, gyda'r is-reolwr Noah Bushby yn camu i fyny i gymryd yr awenau.

Fel Wrecsam, mae'r Adar Gleision hefyd wedi cryfhau eu carfan. Yr ymosodwr Haile Richards ydi, o bosib, y chwaraewr mwyaf cyffrous maen nhw wedi arwyddo yn dilyn cyfnodau yn chwarae'n Sbaen a Phortiwgal.

Ar ôl pedwar tymor heb ennill tlws mi fydd Abertawe yn gobeithio am well y tymor yma, tra bod Y Seintiau Newydd wedi arwyddo Abbie Iddenden and Hannah Snape o Wrecsam.

Mae MET Caerdydd yn ôl yn y brif haen ar ôl ennill dyrchafiad, tra bod Llansawel wedi penodi Mark Murison yn rheolwr newydd ar ôl gorffen yn bumed y tymor diwethaf.

James Fishlock fydd yng ngofal Y Barri unwaith eto, tra y bydd Aberystwyth yn anelu i orffen yn uwch ar ôl gorffen yn seithfed y ddau dymor diwethaf.

Dydd Sul, 6 Medi

Y Barri v Llansawel (14:00)

MET Caerdydd v Y Seintiau Newydd (14:00)

Wrecsam v Aberystwyth (14:00)

Abertawe v Caerdydd (17:15)