Dyn fu farw mewn gwrthdrawiad ym Môn wedi'i enwi'n lleol

Mae dyn fu farw mewn gwrthdrawiad ar Ynys Môn wedi'i enwi yn lleol fel Sean Chamberlain.

Mae'r BBC ar ddeall fod Mr Chamberlain, 60, yn rheolwr ar fwyty a garej ceir yng Nghemaes.

Dywedodd Heddlu'r Gogledd fod dyn wedi cael arestio ar ôl i feiciwr modur farw mewn gwrthdrawiad gyda char.

Mewn neges ar gyfrif cyfryngau cymdeithasol y bwyty, dywedodd tad Mr Chamberlain: "Gyda thristwch mawr rwy'n cadarnhau colled drasig fy mab Sean, gŵr annwyl Debbie a thad ymroddedig Katy, Emma, ​​Jack a Ceri."

Digwyddodd y gwrthdrawiad ar yr A5025 yn Llanfachraeth am 18:57 nos Fawrth.

Roedd y gwrthdrawiad rhwng car Jaguar I-Pace llwyd a beic modur Triumph gwyn.

Bu farw'r dyn oedd yn gyrru'r beic modur yn y fan a'r lle, er gwaethaf ymdrechion y gwasanaethau brys.

Cafodd dyn ei arestio yn y fan a'r lle ac mae'n parhau yn y ddalfa.

Wrth roi teyrnged iddo, dywedodd y cynghorydd Aled Morris Jones sy'n cynrychioli ward Twrcelyn fod y newyddion yn "drist a thrychinebus" a'i fod yn "meddwl am y teulu yn eu galar".

Ychwanegodd fod Mr Chamberlain "yn uchel iawn ei barch yn ardal Cemaes ac ardal Twrcelyn" a bod y gymuned yn meddwl am y teulu oll ar yr "adeg trist yma".

Dywedodd y Sarjant Alun Jones o'r Uned Plismona'r Ffyrdd fod ymchwiliad yn cael ei gynnal i amgylchiadau'r gwrthdrawiad.

Mae'r heddlu'n apelio ar unrhyw un a welodd y digwyddiad, neu sydd â lluniau teledu cylch cyfyng, dashcam neu o gamera cloch drws, i gysylltu â nhw.