Cymuned yn cynnal taith goffa i ddyn 18 oed fu farw yng Ngorseinon

Daeth dwsinau o bobl ar feiciau modur, ceir a beiciau at ei gilydd yng Ngorseinon ddydd Sul i gofio Ceiran Evans, dyn 18 oed fu farw mewn gwrthdrawiad yn gynharach y mis hwn.

Mae dyn 18 oed wedi'i gyhuddo o'i lofruddio yn dilyn gwrthdrawiad rhwng car a beic ar Ffordd Pen Cae Crwn ar 9 Gorffennaf.

Dywedodd teulu Ceiran eu bod wedi trefnu'r daith er mwyn "cofio ei fywyd" a dathlu "ei gariad at feiciau a cherbydau".

Ychwanegodd ei fodryb eu bod wedi'u "syfrdanu" gan y gefnogaeth, a'r nifer a ddaeth i'r digwyddiad.

Roedd tua 100 o gerbydau yn rhan o'r daith o amgylch Gorseinon, a aeth heibio cartref Ceiran a safle'r gwrthdrawiad.

Cafodd balwnau, baneri a lluniau o Ceiran eu gosod y tu allan i'w gartref, gan gynnwys teyrngedau i'w lysenw o'i blentyndod y mae llawer o'i ffrindiau'n eu defnyddio, Fatboy.

Mae blodau, balwnau a negeseuon fel "Forever 18" a "Fly High" hefyd wedi'u gadael ger safle'r gwrthdrawiad.

Dywedodd Becky Arnold-Jones, modryb Ceiran, fod y teulu am roi cyfle i'r gymuned ddod at ei gilydd gan fod y digwyddiad wedi "effeithio ar bobl ledled Gorseinon".

"Rydyn ni wedi syfrdanu gan bawb sydd wedi gwneud yr ymdrech i ddod," meddai.

Ychwanegodd ei bod hi am i bobl gofio Ceiran fel rhywun oedd yn caru bywyd ac yn "caru beiciau ers pan oedd yn blentyn bach".

"Roedd yn caru bywyd ac roedd e'n fachgen da a dw i eisiau i bawb ei gofio am hynny a dim byd arall, oherwydd dyna mae e'n ei haeddu," ychwanegodd.

Mae dyn 19 oed yn parhau mewn cyflwr difrifol yn yr ysbyty yn dilyn y gwrthdrawiad.

Mae Tyler Ford, 18, wedi'i gyhuddo o lofruddio a cheisio llofruddio, ac mae disgwyl iddo sefyll ei brawf ym mis Ionawr.

Mae pedwar dyn arall a gafodd eu harestio fel rhan o'r ymchwiliad wedi'u rhyddhau ar fechnïaeth yr heddlu.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.