တိုက်ရိုက်ထုတ်လွှင့်မှု, ရွှေလီတစ်ဖက်ခြမ်း နမ့်ခမ်းမြို့က ပေါက်ကွဲမှုအလွန် လိုအပ်တာကူညီမယ်လို့ တရုတ်ပြော

တိုက်ရိုက် ထုတ်လွှင့်ချက်

1. လွန်ခဲ့သော ၂၂ မိနစ် ကမြန်မာ - ရုရှား သတင်းအချက်အလက်လုံခြုံရေးစင်တာ ထူထောင်ဖို့ ခြေလှမ်း

   

   ဓာတ်ပုံ ရင်းမြစ်, GLMN

   စစ်ဘက်ဆိုင်ရာ ပူးပေါင်းဆောင်ရွက်တာတွေလုပ်နေတဲ့ မြန်မာနဲ့ ရုရှားကြား သတင်းအချက်အလက် လုံခြုံရေး စင်တာ ပူးတွဲထည်ထောင်ဖို့ နားလည်မှုစာချွန်လွှာကို လက်မှတ်ရေးထိုးလိုက်တယ်လို့ နေပြည်တော်က သတင်းထုတ်ပါတယ်။

   နေပြည်တော်မှာ ဦးမင်းအောင်လှိုင်က သမ္မတအဖြစ်ဦးဆောင်တဲ့အစိုးရအတွက် အမျိုးသားလုံခြုံရေးအကြံပေး တာဝန်ယူထားတဲ့ စစ်ဗိုလ်ချုပ်ကြီးဟောင်း ဦးတင်အောင်စန်းရဲ့ မော်စကိုမြို့ ခရီးစဉ်အတွင်းမှာ အခု နားလည်မှုစာချွန်လွှာကို လက်မှတ်ရေးထိုးခဲ့တာလို့ ဆိုပါတယ်။

   ဦးတင်အောင်စန်းဟာ ရုရှားအမျိုးသားလုံခြုံရေးကောင်စီက ဦးဆောင်လုပ်တဲ့ နိုင်ငံတကာ လုံခြုံရေးညီလာခံကို တက်ရောက်ဖို့ ပြီးခဲ့တဲ့တစ်ပတ်အတွင်း မော်စကိုမြို့ကို သွားခဲ့တာဖြစ်ပါတယ်။

   မေလ ၂၅ ရက်နေ ၃၁ ရက်အထိကြာတဲ့ မော်စကို ခရီးစဉ်အတွင်း မြန်မာနဲ့ ရုရှားကြား နိုင်ငံတကာအဆင့် သတင်းအချက်အလက် လုံခြုံရေးနယ်ပယ်မှာ ၃ နှစ်ကြာ ပူးပေါင်းရေးအစီအစဉ်ကိုလည်း လက်မှတ်ထိုးခဲ့တယ်လို့ နေပြည်တော်က ဇွန်လ ၁ ရက်မှာ သတင်းထုတ်ပါတယ်။

   ဦးတင်အောင်စန်းရဲ့ မော်စကိုခရီးစဉ်ဟာ ရုရှားကာကွယ်ရေးဝန်ကြီးဟောင်းလည်းဖြစ်၊ လက်ရှိမှာ ရုရှားအမျိုးသားလုံခြုံရေးကောင်စီ အတွင်းရေးမှူးလည်းဖြစ်တဲ့ မစ္စတာ ဆာဂေး ရှိုဂူရဲ့ ပြီးခဲ့တဲ့ဖေဖော်ဝါရီလဆန်းနေပြည်တော်ခရီးအပြီးမှာ ပေါ်ပေါက်တာဖြစ်ပါတယ်။

   ရုရှားအမျိုးသားလုံခြုံရေးကောင်စီ အတွင်းရေးမှူးကတော့ မြန်မာဟာ လုံခြုံရေးအတွက် မော်စကို အားကိုးနိုင်တယ်လို့ဆိုပြီး မြန်မာနဲ့ ရုရှားဟာ အနောက်ရဲ့ဖိအားကို ကြုံနေရဆဲလို့ ပြောခဲ့ပါတယ်။

   တဖက်မှာလည်း မြန်မာမှာ ၂၀၂၁ စစ်အာဏာသိမ်းမှုဖြစ်အပြီးကတည်းကဆိုရင် အနောက်ပိတ်ဆို့ခံ မြန်မာနဲ့ ရုရှားကြား နီးကပ်တဲ့ဆက်ဆံရေးရှိထားပါတယ်။

   ရုရှားနဲ့ မြန်မာကြား စစ်ဘက်ဆိုင်ရာနည်းပညာပူးပေါင်းဆောင်ရွက်ရေး တိုးလာဖို့ မျှော်လင့်တဲ့အကြောင်းကိုလည်း ရန်ကုန်မှာရှိတဲ့ ရုရှားသံအမတ်က ရုရှားတပ်သတင်းစာ ခရာစနီးယား ဗီယက်ဇဒါးကို မေလတုန်းက ပြောထားပါတယ်။

   မြန်မာကို ရုရှားက လေကြောင်းကာကွယ်ရေး စနစ်နဲ့ လေယာဉ်တွေ ရောင်းချထားတာ၊ နောက် မြန်မာစစ်တပ်သားတွေ ရုရှားရဲ့စစ်ဘက်နဲ့ သိပ္ပံနည်းပညာကဏ္ဍမှာ ပမာဏတစ်ခုအထိ လာရောက်ပညာသင်နေတာတွေကို ထောက်ပြပြီး သူက အခုလိုပြောသွားတာဖြစ်ပါတယ်။

2. လွန်ခဲ့သော တစ်နာရီ ကတရုတ်-မြန်မာနယ်စပ် နမ့်ခမ်းက ယမ်းရုံပေါက်ကွဲမှုနဲ့ သေဆုံးမှုများနောက်ကွယ်

   

   ဓာတ်ပုံ ရင်းမြစ်, Mai Kaung Saing

   ကောင်းတပ်ရွာဟာ အိမ်ခြေ ၃၀၀ နီးပါးလောက်ရှိတဲ့ လူနေထူထပ်တဲ့ရပ်ကွက်တစ်ခုဖြစ်ပြီး TNLA ရဲ့ တပ်ပိုင်းနဲ့ အရပ်ဘက်ဝန်ထမ်း တချို့လည်း နေထိုင်ကြတယ်လို့ ဒေသခံတွေက ပြောပါတယ်။ အဲဒီယမ်းရုံက ကောင်းတပ်ရွာနဲ့ တဆက်တည်းဖြစ်နေပြီး နမ့်ခမ်းဆေးရုံနဲ့လည်း တစ်မိုင်လောက်ပဲ ဝေးတယ်လို့ ဆိုပါတယ်။

   တစ်တော့(TikTok)နဲ့ ဝီချက်(WeChat)စတဲ့ တရုတ်လူမှုကွန်ရက်ပေါ်မှာလည်း ယမ်းချက်ရုံကနေ ပေါက်ကွဲမှုဖြစ်ခဲ့တာလို့ နမ့်ခမ်းဒေသခံတချို့က ရေးသားနေကြပါတယ်။

   စက်ရုံဝန်ထမ်းတချို့ ပေါက်ကွဲမှုအတွင်း သေဆုံးသွားခဲ့တာကြောင့် သူတို့နဲ့ရင်းနှီးသူတွေက ဝမ်းနည်းကြေကွဲကြောင်း ပြောဆိုထားကြတဲ့မှတ်တမ်းတွေကိုလည်း တွေ့ရပါတယ်။ ကောင်းတပ်ရွာအနီးက ယမ်းရုံကို TNLA နဲ့ တရုတ်နိုင်ငံသား လုပ်ငန်းရှင်တချို့ ပူးပေါင်းလုပ်ကိုင်နေတယ်လို့ ကောင်းတပ်ရွာဒေသခံ ၃ ဦးထက်မနည်းက ပြောပါတယ်။

   တရုတ်-မြန်မာ နယ်စပ်က ပေါက်ကွဲမှုတွေအကြောင်း ဒီလင့်ခ်ကိုနှိပ်ပြီး ဆက်လက်ဖတ်ရှုနိုင်ပါတယ်။

3. လွန်ခဲ့သော တစ်နာရီ ကနမ့်ခမ်းပေါက်ကွဲမှုအတွက် လိုအပ်တဲ့အကူအညီတွေ ပေးမယ်လို့ တရုတ်ပြော

   

   ဓာတ်ပုံ ရင်းမြစ်, MOFA/ China

   တရုတ်နိုင်ငံ၊ ရွှေလီမြို့တစ်ဖက်ခြမ်းမှာရှိတဲ့ ရှမ်းမြောက်၊ နမ့်ခမ်းမြို့နယ်ထဲက ပြင်းအားမြင့်ပေါက်ကွဲမှုအလွန် နောက်ဆက်တွဲကိစ္စရပ်တွေကို ကိုင်တွယ်နိုင်ဖို့ လိုအပ်တဲ့အကူအညီတွေ ပံ့ပိုးပေးသွားမယ်လို့ တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မစ္စတာ လင်ကျန်းက ပြောပါတယ်။

   တအာင်းတပ် (TNLA) ထိန်းချုပ်ထားတဲ့ နမ့်ခမ်းမြို့နယ်ထဲက ကောင်းတပ်ရွာ ပေါက်ကွဲမှု ဖြစ်စဉ်နဲ့ပတ်သက်လို့ စုံစမ်းမှုတွေကိုလည်း အနီးကပ်စောင့်ကြည့်သွားမယ်လို့ မနေ့က လုပ်တဲ့သတင်းစာရှင်းလင်းပွဲမှာ မစ္စတာ လင်ကျန်းက ပြောပါတယ်။ ပေါက်ကွဲမှုအလွန် ဘယ်လိုအကူအညီတွေပေးမှာလဲဆိုတာကိုတော့ သူက အသေးစိတ်ထည့်ပြောသွားတာ မရှိပါဘူး။

   နမ့်ခမ်းဖြစ်စဉ်မှာ တရုတ်နိုင်ငံသား တစ်ဦး ထိခိုက်ဒဏ်ရာရတယ်လို့ သိရပြီး ဖြစ်စဉ်ဖြစ်ပြီးပြီးချင်းမှာပဲ မြန်မာဘက်က သက်ဆိုင်ရာတာဝန်ရှိသူတွေနဲ့အခြေအနေကို အတည်ပြုစစ်ဆေးခဲ့တယ်လို့လည်း တရုတ်နိုင်ငံခြားရေးဝန်ကြီးဌာနဘက်က ပြောပါတယ်။ ဒဏ်ရာရတရုတ်နိုင်ငံသားကို အကောင်းဆုံးကုသမှုပေးဖို့ မေတ္တာရပ်ခံထားတယ်လို့လည်း မနေ့က သတင်းစာရှင်းလင်းပွဲမှာ မစ္စတာ လင်ကျန်းက ပြောခဲ့ပါတယ်။

   နမ့်ခမ်းပေါက်ကွဲမှုဖြစ်စဉ်ကြောင့် သေဆုံးသူ ၄၃ ဦး အထိရှိပြီး အဲဒီထဲ အသက်မပြည့်သေးတဲ့ ကလေးငယ် ၇ ဦးပါဝင်ကြောင်း TNLA က မနေ့ ည ၈ နာရီမှာ ထုတ်ပြန်တဲ့စာရင်းအရ သိရပါတယ်။ စာရင်းအရ ပြင်းထန်ဒဏ်ရာရရှိသူ ၃၇ ဦးထဲမှာလည်း ကလေးငယ် ၉ ဦး အထိ ပါဝင်နေပါတယ်။

   ဒါအပြင် ဒဏ်ရာအနည်းငယ်ရရှိသူ ၇၅ ဦးရှိပြီး ကလေးငယ် ၁၆ ဦး ပါဝင်နေပါတယ်။

   TNLA ရဲ့ မနေ့ညပိုင်း သတင်းထုတ်ပြန်ချက်မှာတော့ ပေါက်ကွဲမှုအလွန် ကူညီကယ်ဆယ်ရေး၊ ကျန်းမာရေးစောင့်ရှောက်မှုတွေကို တိုးလုပ်ပေးနေပြီး လိုအပ်တဲ့အကူအညီတွေလည်း ရအောင်လုပ်ဆောင်မယ်လို့ ဆိုပါတယ်။ အပျက်အစီးတွေကြားထဲမှာ ရှာဖွေကယ်ဆယ်ရေးတွေ ဆက်လုပ်နေရဆဲလို့လည်း ထုတ်ပြန်ချက်ထဲ ပါရှိပါတယ်။

   နမ့်ခမ်းမြို့နယ်က ကောင်းတပ်ရွာမှာ မေ ၃၁ ရက်က ပေါက်ကွဲမှုဖြစ်ခဲ့တာဖြစ်ပြီး မိုင်းတွင်းကျောက်ထုတ်လုပ်ဖို့ သိုလှောင်ထားတဲ့ ယမ်းပျော့တွေ ပေါက်ကွဲတာလို့ TNLA ဘက်က ပြောထားပါတယ်။

   ဒီပေါက်ကွဲမှုဟာ တရုတ်နိုင်ငံသားတွေရဲ့ယမ်းချက်စက်ရုံနဲ့ ဆက်စပ်နေတယ်လို့ သတင်းတွေ ထွက်ပေါ်နေပြီး နောက်ဆုံးရစုံစမ်းစစ်ဆေးမှုနဲ့ပတ်သက်လို့ TNLA ပြောရေးဆိုခွင့်ရှိသူ လွေးယေဦးကို ဘီဘီစီက မေးမြန်းထားပေမဲ့ ဇွန်လ ၂ ရက်၊ မနက် ၉ နာရီခွဲအချိန်အထိ တစုံတရာ ပြန်လည် ဖြေကြားတာမရှိ‌သေးပါဘူး။

4. လွန်ခဲ့သော တစ်နာရီ က

   မင်္ဂလာပါ။ ဇွန်လ ၂ ရက် ဘီဘီစီသတင်းများ တိုက်ရိုက်တင်ဆက်မှု စတင်ပြီဖြစ်ပါတယ်။ နိုင်ငံတဝန်းနောက်ဆုံးရ သတင်းများကို တိုက်ရိုက်ထုတ်လွှင့်ချက်မှာ အချိန်နဲ့ တပြေးညီ ဖတ်ရှုနိုင်ပါတယ်။