ቀጥታ, ኢራን የሆርሙዝ ወሽመጥ ለቀሪዎቹ የተኩስ አቁሙ ቀናት መከፈቱን አስታወቀች

የሆርሙዝ ወሽመጥ “ለቀረው የተኩስ አቁም ጊዜ ሙሉ ለሙሉ ክፍት እንዲሆን መታወጁን” ኢራን የውጭ ጉዳይ ሚኒስትር አባስ አራግቺ አስታወቁ። ለኢራን ውሳኔ ምላሽ የሰጡት አሜሪካ ፕሬዝዳንት ዶናልድ ትራምፕ “አመሰግናለሁ” ሲሉ በትሩዝ ሶሻል የማኅበራዊ ሚዲያ ገጻቸው ጽፈዋል።

ጭምቅ ሃሳብ

ኢራን የሆርሙዝ ወሽመጥ ለቀሪዎቹ የተኩስ አቁሙ ቀናት መከፈቱን አስታወቀች
የእስራኤል መከላከያ ሚኒስትር ሄዝቦላህ ላይ የተከፈተው ዘመቻ "አሁንም አልተጠናቀቀም" አሉ
የሄዝቦላህ አመራር ቡድኑ "መቼም ትጥቅ እንደማይፈታ" ለቢቢሲ ተናገሩ
ኢራን የሊባኖስ ተኩስ አቁምን በበጎ እንደምትቀበለው ገልጻ ሄዝቦላህ ያደረገውን "ተጋድሎ" አወደሰች
ሄዝቦላህ የተኩስ አቁም ጥሰቶች ከተፈጸሙ 'ጣቴ ቃታ ላይ ነው' አለ
ፓኪስታን በሊባኖስ የተደረሰውን የተኩስ አቁም አወድሳ የትራምፕን "ብልሃት" የተሞላበት ዲፕሎማሲ አደነቀች
ትራምፕ ኢራን ያበለጸገችውን ዩራኒየም ለማስረከብ ተስማምታለች አሉ
የተባበሩት መንግሥታት ዋና ፀሐፊ የእስራኤልን እና ሊባኖስን የተኩስ አቁም ስምምነት አወደሱ
ትራምፕ የኢራን ጦርነት "በጣም በቅርቡ ማብቃት አለበት" አሉ
በእስራኤል እና ሊባኖስ መካከል የተደረሰው የአስር ቀን የተኩስ አቁም ስምምነት ተግባራዊ መሆን ጀመረ

የቀጥታ ሽፋን

17 ሚያዚያ 2026በሆርሙዝ ወሽመጥ የሚደረግ ጉዞ የኢራን አብዮታዊ ዘብ ፈቃድ እንደሚያስፈልገው ተዘገበ
የፎቶው ባለመብት, Reuters
የኢራን የውጭ ጉዳይ ሚኒስትር አባስ አራግቺ በሆርሙዝ በኩል የሚያልፉ “ሁሉም የንግድ መርከቦች ሚያደርጉት ጉዞ ለቀሪው የተኩስ አቁሙ ጊዜ ሙሉ በሙሉ ክፍት እንዲሆን መታወጁን” በኤክስ ገጻቸው አስታውቀው ነበር።
የኢራን መንግሥት የቴሌቪዥን ጣቢያ አንድ “ከፍተኛ ወታደራዊ ባለሥልጣንን” ጠቅሶ ባስተላለፈው ዘገባ፤ የመርከቦቹ ጉዞ የሚከናወነው “በተለየ መስመር” እንደሆነ ገልጿል። መርከቦቹ ለማለፍ የኢራን እስላማዊ አብዮታዊ ዘብ ባሕር ኃይል ፈቃድ እንደሚያስፈልጋቸውም ጠቅሷል።
ባለሥልጣኑ ለቴሌቪዥን ጣቢያው እንደተናገሩት፤ ይህ የተለየ የጉዞ መስመር የተወሰነው በኢራን የወደቦች እና ማሪታይም ድርጅት ነው።
ጣቢያው ከፍተኛ ወታደራዊ ባለስልጣኑን ጠቅሶ እንደዘገበው፤ በሆርሙዝ ወሽመጥ በኩል የሚደረግ የወታደራዊ መርከቦች ጉዞ አሁንም ቢሆን "የተከለከለ" ነው።
በሌላ በኩል የመርከብ ጉዞ ኩባንያዎች የሆርሙዝ ደኅንነት እስከሚረጋገጥ ድረስ ወሽመጡን እንደማይጠቀሙ ተናግረዋል። ቢቢሲ ያነጋገረው አንድ የነዳጅ እና የጋዝ ጫኝ መርከቦች ኦፕሬተር፤ ለጊዜው የኢራን መግለጫ “ምንም የሚቀይረው ነገር የለም” ብሏል።
“አላስፈላጊ አደጋ ውስጥ መግባት አለብን ብለን አናስብም፤ የኩባንያችን በወሽመጡ በኩል ቀድሞ የሚያልፍ ተቋም እንሆናለን የሚል አቋም የለውም” ሲል ገልጿል።
በቀጣናው የሚገኙ ነዳጅ ጫኝ መርከቦች ኦፕሬተር የሆነው ‘ስቴና በልክ’ የተሰኘው ኩባንያ በበኩሉ “ሁኔታውን በቅርበት እየተከታተለ” መሆኑን አስታውቋል።
“የእያንዳንዱ ጉዟችን ውሳኔ የሚመሠረተው የሠራተኞቻችን እና የመርከቦቻችን ደኅንነት ላይ ነው፤ ደኅንነቱ የተጠበቀ መሆኑን እስካላረካን ድረስ ጉዞ አንጀምርም” ብሏል።
17 ሚያዚያ 2026ፕሬዝዳንት ትራምፕ ወደ ኢራን ወደቦች የሚደረግ ጉዞ ላይ የተጣለው እገዳ እንደሚቀጥል አስታወቁ
የፎቶው ባለመብት, AFP via Getty Images
ፕሬዝዳንት ዶናልድ ትራምፕ አሜሪካ ከዚህ ሳምንት መጀመሪያ አንስቶ የወሰደችው ወደ ኢራን ወደቦች የሚደረግ ጉዞን የማገድ እርምጃ ቴህራን ስምምነት ላይ እስከምትደርስ ድረስ “በሙሉ ኃይል እና ተፈጻሚነት” እንደሚቀጥል ተናገሩ።
ኢራን ዘግታ የቆየችውን የሆርሙዝ ወሽመጥ ለቀሪዎቹ የተኩስ አቁም ቀናት እንደምትከፍት አስታውቃለች።
ፕሬዝዳንት ትራምፕ ለዚህ እርምጃ ምስጋና የሰጡበትን የትሩዝ ሶሻል ማኅበራዊ ሚዲያ ገጽ ጽሁፍ ከለጠፉ በኋላ ሌላ መልዕክት አጋርተዋል።
ሆርሙዝ ቢከፈትም፤ “ከኢራን ጋር ያለን ጉዳይ 100% እስኪጠናቀቅ ድረስ በኢራን ላይ የተደረገው የባህር ኃይል እገዳ በሙሉ ኃይል እና ተፈፃሚነት ይቀጥላል" ብለዋል።
"አብዛኛዎቹ ነጥቦች ድርድር የተደረገባቸው በመሆኑ ይህ ሂደት በጣም ፈጣን መሆን አለበት። ለዚህ ጉዳይ ለሰጣችሁት ትኩረት አመሰግናለሁ! ፕሬዝዳንት ዶናልድ ጄ. ትራምፕ" ሲሉ ውሳኔያቸውን አስታውቀዋል።
አሜሪካ ወደ ኢራን ወደቦች የሚጓዙ ወይም ከዚያ የሚመጡ መርከች ላይ እገዳ የጣለቸው ሰኞ ዕለት ነበር።
የፕሬዝዳንት ትራምፕ አስተዳደር በዚህ እርምጃ አማካኝነት ኢራን ከፔትሮኬሚካል ሽያጭ የምታገኘው በቢሊዮኖች የሚቆጠር ዶላር እንዲቋረጥ የማድረግ ዓላማ አለው።
17 ሚያዚያ 2026ኢራን የሆርሙዝ ወሽመጥ ለቀሪዎቹ የተኩስ አቁሙ ቀናት መከፈቱን አስታወቀች
የፎቶው ባለመብት, AFP via Getty Images
የሆርሙዝ ወሽመጥ “ለቀረው የተኩስ አቁም ጊዜ ሙሉ ለሙሉ ክፍት” እንደሚሆን የኢራን የውጭ ጉዳይ ሚኒስትር አባስ አራግቺ አስታወቁ።
አራግቺ በኤክስ ገጻቸው ባሰፈሩት ጽሑፍ፤ “ሊባኖስ ውስጥ በተደረሰው ተኩስ አቁም መሰረት በሆርሙዝ ወሽመጥ በኩል የሚደረግ የሁሉም የንግድ መርከቦች ጉዞ ለቀሪው የተኩስ አቁሙ ጊዜ ሙሉ በሙሉ ክፍት እንዲሆን ታውጇል” ብለዋል።
ለ40 ቀናት የተዋጉት አሜሪካ እና ኢራን በፓኪስታን አሸማጋይነት የሁለት ሳምንት ተኩስ አቁም መፈጸማቸው ይታወሳል። ይህ ተኩስ አቁም በሚቀጥለው ሳምንት ረቡዕ ይጠናቀቃል።
የውጭ ጉዳይ ሚኒስትሩ፤ የመርከቦቹ ጉዞ የሚካሄደው “የኢራን እስላማዊ ሪፐብሊክ የወደብ እና ማሪታይም ድርጅት አስቀድሞ ባሳወቀው የተቀናጀ መስመር” በኩል እንደሆነም ገልጸዋል።
ለኢራን ውሳኔ ምላሽ የሰጡት አሜሪካ ፕሬዝዳንት ዶናልድ ትራምፕ “አመሰግናለሁ” ሲሉ ትሩዝ ሶሻል በተባለው የማኅበራዊ ሚዲያ ገጻቸው ጽፈዋል።
ትራምፕ፤ “ኢራን የሆርሙዝ ወሽመጥ ሙሉ በሙሉ ክፍት መሆኑን እና ለሙሉ ጉዞ ዝግጁ መሆኑን አሁን አስታውቃለች። አመሰግናለሁ!" ብለዋል።
የካቲት ላይ በአሜሪካ እና እስራኤል ጥቃት የተከፈተባት ኢራን ብዙ ከዓለም ነዳጅ ማጓጓዣ መስመሮች መካከል በርካታ መርከቦችን በማስተናገድ ቀዳሚ የሆነውን የሆርሙዝ ወሽመጥ ዘግታ ቆይታለች።
ለዚህ እገዳ ምላሽ የሰጠችው አሜሪካ ደግሞ በዚህ ሳምንት መጀመሪያ በወሽመጡ በኩል ወደ ኢራን ወደቦች ጉዞ እንዳይደረግ ከልክላለች።
17 ሚያዚያ 2026የእስራኤል መከላከያ ሚኒስትር ሄዝቦላህ ላይ የተከፈተው ዘመቻ “አሁንም አልተጠናቀቀም” አሉ
የፎቶው ባለመብት, EPA
እስራኤል፤ ዳግም ውጊያ የሚጀመር ከሆነ ወደ መኖሪያቸው በመመለስ ላይ ያሉ በሺህዎች የሚቆጠሩ ንጹኃን ሊባኖሳውያን በድጋሚ ከደቡብ ሊባኖስ ሊፈናቀሉ እንደሚችሉ ማስጠንቀቋን አጃንስ ፍራንስ ፕሬስ (ኤኤፍፒ) ዘገበ።
የእስራኤል መከላከያ ሚኒስትር ኢዝራኤል ካትዝ በቴሌቪዥን በተላለፈ መግለጫቸው፤ ሊባኖስ ውስጥ የተፈጸሙ ጥቃቶች “በርካታ ግቦችን ማሳካታቸውን” ተናግረዋል። ቢሆንም ግን ሄዝቦላህ ላይ የተከፈተው ዘመቻ “አሁንም እንዳልተጠናቀቀ” ገልጸዋል።
“ዳግም ውጊያ ከተጀመረ ተልዕኮውን ለማጠናቀቅ እንዲቻል ወደ ደኅንነት ዞኑ የተመለሱት እነዛ ነዋሪዎች ለቅቀው መውጣት ይኖርባቸዋል” ብለዋል።
የእስራኤል ጦር "አፅድቶ የተቆጣጠራቸውን" ቦታዎች በሙሉ ይዞ እንደሚቀጥል መናገራቸውን ሮይተርስ ዘግቧል።
ሄዝቦላህ የተኩስ አቁም ስምምነቱ ከተደረሰ በኋላ በሰጠው አስተያየት “"ማንኛውም የተኩስ አቁም በመላው የሊባኖስ ግዛት ሁሉን አቀፍ መሆን አለበት፤ ለጠላት እስራኤል ምንም ዓይነት የእንቅስቃሴ ነፃነት ሊፈቅድ አይገባም" ብሏል።
17 ሚያዚያ 2026የሄዝቦላህ አመራር ቡድኑ “መቼም ትጥቅ እንደማይፈታ” ለቢቢሲ ተናገሩ
ሊባኖስ እና እስራኤል የደረሱት የ10 ቀን የተኩስ አቁም ስምምነት ከመጀመሩ አስቀድሞ ከቢቢሲ ጋር ቃለ መጠይቅ ያደረጉት የሄዝቦላህ ከፍተኛ አመራር ዋፊቅ ሳፋ ቡድን “መቼም፣ ጭራሽ” ትጥቅ እንደማይፈታ ገለጹ።
የእስራኤል ጠቅላይ ሚኒስትር ቤንጃሚን ኔታንያሁ ሄዝቦላህን ትጥቅ ማስፈታት በቀጣይ ከሊባኖስ መንግሥት ጋር ለሚደረግ ድርድር የተቀመጠ መሠረታዊ ጥያቄ መሆኑን ተናግረዋል።
ስለ ትጥቅ መፍታት የተጠየቁት ሳፋ ግን “ተገቢ ተኩስ አቁም፣ ትክክለኛ የሆነ እስከሚደረስ አይደረግም" ብለዋል።
"እስራኤል ለቅቃ እስካልወጣች ድረስ አይሆንም። እስረኞች ከመመለሳቸው፣ የተፈናቀሉ ሰዎች ወደ ቀያቸው ከመመለሳቸው እና መልሶ ግንባታ ከመጀመሩ በፊት ትጥቅ መፍታት አይኖርም። እስከዚያው ድረስ ስለ ሄዝቦላህ የጦር መሳሪያ ማውራት አይቻልም” ሲሉ ቅድመ ሁኔታዎቻቸውን ዘርዝረዋል።
ቤይሩት ውስጥ በሚገኝ የመኖሪያ ሕንጻ ላይ የተደረገው ይህ ቃለ መጠይቅ በሄዝቦላህ እና በቀጣናዊ አጋሩ ኢራን መካከል ያለውን ቅንጅት ያሳያል። “ሄዝቦላህ እና ኢራን በአንድ ሰውነት ውስጥ ያሉ ሁለት ነፍሶች ናቸው” ብለዋል።
“ያለ ኢራን ሄዝቦላህ ሊኖር አይችልም። ያለ ሄዝቦላህም አራን አትኖርም” ሲሉ በሁለቱ አካላት መካከል ስላለው “ሃይማኖታዊ፣ ሕጋዊ እና ርዕዮተ ዓለማዊ” ግንኙነት ገልጸዋል።
የሺዓ እስልምና ፖለቲካዊ እና ወታደራዊ ቡድን የሆነው ሄዝቦላህ እንደ አሜሪካ፣ ዩናይትድ ኪንግደም፣ እስራኤል እና በርካታ የዓለም አገራት በሽብርተኛ ድርጅትነት ተፈርጇል።
ቡድኑ የአሁኑን የመካከለኛው ምሥራቅ ጦርነት የተቀላቀለው የካቲት ላይ ወደ እስራኤል ሮኬቶችን ከተኮሰ በኋላ ነበር።
ሄዝቦላህ ይህንን ጥቃት የፈጸመው በኢራን ጠቅላይ መሪ ላይ ለተፈጸመው ግድያ እንዲሁም ከህዳር 2016 ዓ.ም. አንስቶ እስራኤል በየቀኑ በሚባል ደረጃ ሊባኖስ ላይ ስትፈጽም ለነበረው ጥቃት በአጸፋ ምላሽነት መሆኑን ገልጿል።
እስራኤልም ከፍተኛ የአየር ጥቃቶችን በመፈጸም እና ደቡባዊ ሊባኖስን በእግረኛ ወታደሮች በመውረር ምላሽ ሰጥታለች። ሄዝቦላህ ትጥቅ እስከሚፈታ ድረስም ይህንን ዘመቻ እንደምትቀጥል ተናግራለች።
ሄዝቦላህ ቅድሚያ የሚሰጠው ለሊባኖስ ጥቅም ወይስ ለኢራን የሚል ጥያቄ የቀረበላቸው ሳፋ፤ “ያለ ምንም ጥርጥር ሄዝቦላህ የሚመለከተው የሊባኖስን ጥቅም ነው” ብለዋል።
ኢራን ተኩስ አቁም ላይ እንዲደረስ ያሳደረችውን ግፊት ጨምሮ የምታደርጋቸው ድጋፎች ሊባኖስን ማገዛቸውን ጠቅሰዋል። ቢቢሲ ያነጋገራቸውን ጨምሮ በርካታ ሊባኖሳውያን ግን ቡድኑ ትጥቅ እንዲፈታ ይፈልጋሉ። አገሪቱን ግጭት ውስጥ ከትቷል ሲሉም ይወቅሳሉ።
ሄዝቦላህ ትጥቅ ለመፍታት ፈቃደኛ ባለመሆኑ እና ሰፋ ያሉ ቅድመ ሁኔታዎችን በማስቀመጡ እንዲሁም እስራኤል የደኅንነት ጥያቄዎቿን አጥብቃ በመያዟ የተነሳ በሊባኖስ ተግባራዊ የሚሆን ማንኛውም ተኩስ አቁም ለረጅም ጊዜ የሚቆየውን ግጭት ለጊዜው ከመግታት ያለፈ ጥቅም ላይኖረው ይችላል።
17 ሚያዚያ 2026ኢራን የሊባኖስ ተኩስ አቁምን በበጎ እንደምትቀበለው ገልጻ ሄዝቦላህ ያደረገውን “ተጋድሎ” አወደሰች
የፎቶው ባለመብት, Adnan Abidi / Reuters
ኢራን በሊባኖስ የተደረሰውን የተኩስ አቁም ስምምነት ዲፕሎማሲያዊ ስኬት እና የሄዝቦላህ “ተጋድሎ” ውጤት እንደሆነ ገለጸች።
ቴህራን የተኩስ አቁሙን የምትመለከተው በፓኪስታን አሸማጋይነት ከአሜሪካ ጋር የተደረሰው ሠፊ መግባባት አካል አድርጋ እንደሆነ የኢራን የውጭ ጉዳይ ሚኒስቴር ቃል አቀባይ ኢስማኢል ባቃኢ ተናግረዋል።
ኢራን ሰፊ ቀጣናዊ የተኩስ አቁም እንዲደረስ ያለ ማቋረጥ ግፊት ስታደርግ መቆየቷንም በአጽንኦት አንስተዋል።
የኢራን ከፍተኛ ባለሥልጣናት ተኩስ አቁም ላይ ለመደረሱ ለሄዝቦላህ እውቅና ሰጥተዋል። የፓርላማ አፈ ጉባኤው ሞሐማድ ባገር ጋሊባፍ ኤክስ ገጻቸው ላይ በአረብኛ ባሰፈሩት ጽሑፍ፤ ስምምነቱ “የሄዝቦላህ የጽናት እና የአክሲስ ኦፍ ሬዚስታንስ የአንድነት ውጤት እንጂ ሌላ አይደለም” ብለዋል።
አፈ ጉባኤው የጠቀሱት ‘አክሲስ ኦፍ ሬዚስታንስ’ ኢራን በቀጣናው ከሚገኙ አጋር ታጣቂ ቡድኖች ጋር የፈጠረችውን መረብ ለመግለጽ የምትጠቀምበት ስያሜ ነው።
የኢራን አብዮታዊ ዘብ የኩስድ ኃይሎች አዛዥ የሆኑት ኢስማኢል ቃኒ በበኩላቸው ሄዝቦላህን “ባለ ድል” ሲሉ ጠርተዋል። ስምምነቱ የሊባኖስ የትግል ኃይሎች የጽናት እና የኢራን እስላማዊ ሪፐብሊክ ድጋፍ ውጤት መሆኑን ገልጸዋል።
የኢራን መገናኛ ብዙኃንም የሊባኖስ ተኩስ አቁምን በተመለከቱ ዘገባዎቻቸው ያስተጋቡት የሄዝቦላህ “ተጋድሎ” እና የቴህራን ዲፕሎማሲያዊ ጫና ውጤት ነው የሚለውን የከፍተኛ ባለሥልጣናቱን አገላለጽ ነው።
17 ሚያዚያ 2026ሄዝቦላህ የተኩስ አቁም ጥሰቶች ከተፈጸሙ ‘ጣቴ ቃታ ላይ ነው’ አለ
የምስሉ መግለጫ, እስራኤል በደቡባዊ ሊባኖስ ለስድስት ሳምንታት ባካሄደችው የኤር ድብደባ የተፈናቀሉ ነዋሪዎች ወደ መኖሪያ አካባቢያቸው እየተመለሱ ነው
ሄዝቦላህ በሊባኖስ እየተካሄደ ባለው የተኩስ አቁም ስምምነት ወቅት እስራኤል "ክህደት" ከፈጸመች "ጣቴ ቃታ ላይ ነው" ሲሉ አስታወቀ።
በኢራን የሚደገፈው ቡድን በቴሌግራም ላይ ባወጣው መግለጫ እስካሁን ድረስ በግጭቱ ወቅት ያከናወናቸውን ተግባራት ሲገልጽ እአአ ከመጋቢት 2 እስከ ሚያዝያ 16 ባለው ጊዜ ውስጥ በእስራኤል ላይ 2 ሺህ 184 ዘመቻዎችን እንደፈጸመ ተናግሯል።
እንግሊዝ እና አሜሪካን ጨምሮ በበርካታ አገሮች በሽብርተኛ ድርጅትነት የፈረጁት ሄዝቦላህ በተኩስ አቁም ድርድሩ ውስጥ አልተሳተፉም። ድርድሩ በእስራኤል እና በሊባኖስ መንግሥታት መካከል የተከናወነ ነው።
ሐሙስ ዕለት ስለተገለጸው የተኩስ አቁም ስምምነት ምላሹን የሰጠው ሄዝቦላህ፤ "ማንኛውም የተኩስ አቁም ስምምነት በመላው የሊባኖስ ግዛት ውስጥ ተፈጻሚ መሆን አለበት። ጠላት የሆነችው እስራኤል የመንቀሳቀስ ነፃነት ሊፈቀድላት አይገባም” ብሏል።
እስራኤል ለ10 ቀናት የሚቆይ ጊዜያዊ የተኩስ አቁም ስምምነት ለማድረግ ብትስማም ግን ጠቅላይ ሚኒስትር ቤንያሚን ኔታንያሁ የእስራኤል ወታደሮች እስከ የተኩስ አቁም መጨረሻ ድረስ በሊባኖስ ግዛት "የደህንነት ቀጠና" ውስጥ እንደሚቆዩ ተናግረዋል።
17 ሚያዚያ 2026ፓኪስታን በሊባኖስ የተደረሰውን የተኩስ አቁም አወድሳ የትራምፕን “ብልሃት” የተሞላበት ዲፕሎማሲ አደነቀች
የፎቶው ባለመብት, Getty Images
የፓኪስታን ጠቅላይ ሚኒስትር ሼህባዝ ሻሪፍ በእስራኤል እና በሊባኖስ መካከል ለአስር ቀናት የሚቆይ የተኩስ አቁም ስምምነት በመደረጉ መደሰታቸውን ገልጸው፣ የፕሬዚዳንት ዶናልድ ትራምፕን "ደፋር እና ብልህ የዲፕሎማሲ ጥረቶች" አወድሰዋል።
ሸሪፍ አገራቸው "ለሊባኖስ ሉዓላዊነት እና ለግዛት አንድነት ያላትን የማይናወጥ ድጋፍ" አጽንኦት ሰጥተዋል።
በዚህ ሳምንት በእስራኤል እና በሊባኖስ መካከል በዋሺንግተን ውይይት የተደረገ ሲሆን ይህም በጎረቤት አገራቱ መካከል ዲፕሎማሲያዊ ግንኙነት ለመጀመር ታሪካዊ እርምጃ መሆኑ ተገልጿል።
ይህ የሆነው ባለፈው ሳምነት መጨረሻ በፓኪስታን አስተናጋጅነት በኢራን እና በአሜሪካ መካከል የተደረገው ድርድር ሳይሳካ ከቀረ በኋላ ነው።
ኢዝላማባድ በኢራን እና በአሜሪካ መካከል ተግባራዊ የሆነውን የሁለት ሳምንት የተኩስ አቁም ስምምነት በማደራደር ረገድ ቁልፍ ሚና ተጫውታለች።
የፓኪስታን ጦር አዛዥ ሐሙስ ዕለት የተኩስ አቁሙን ለማራዘም በሚደረገው ጥረት ዙሪያ ለመነጋገር በቴህራን ከኢራን ባለሥልጣናት ጋር እንደተገናኙ የሚገልጹ ዘገባዎች ወጥተዋል።
17 ሚያዚያ 2026ዩኬ እና ፈረንሳይ 40 አገራት የሚሳተፉበት በሆርሙዝ ወሽመጥ ዙሪያ የሚመክር ጉባዔ ዛሬ ያካሄዳሉ
የፎቶው ባለመብት, Getty Images
ዩኬ እና ፈረንሳይ ዛሬ ከሰዓት በኋላ በሆርሙዝ ወሽመጥ የመርከቦችን እንቅስቃሴ ወደነበረበት ለመመለስ ስለሚኖረው የጋራ ጥረት ለመወያየት ከአጋሮቻቸው ጋር ስብሰባ ሊያደርጉ ነው።
ቴህራን ለአሜሪካ እና ለእስራኤል ጥቃቶች ምላሽ በመስጠት የኢራን ወሳኝ የሆነውን የውሃ መስመር ዘግታለች።
አሜሪካ በበኩሏ የኢራን ወደቦችን በመዝጋቷ ምክንያት ለዓለም አቀፍ የኃይል ዋጋ መጨመር ምክንያት ሆኗል።
ወደ 40 የሚጠጉ አገሮች ዛሬ ከሰዓት በኋላ በሚደረገው ስብሰባ ላይ እንደሚሳተፉ ይጠበቃል ሲል የኪር ስታርመር ጽህፈት ቤት አስታውቋል።
መሪዎቹ "በቀጣናው ውስጥ ያለውን የተኩስ አቁም ስምምነት በመደገፍ እና የመርከብ መንገዶች ለረዥም ጊዜ በኩል በድጋሚ እንዲከፈቱ እና እንዲጠበቁ በማድረግ ላይ ያተኩራሉ" ሲል አክሏል።
ስታርመር ወሽመጡ “ያለ ቅድመ ሁኔታ እና በፍጥነት እንደገና መከፈቱ ዓለም አቀፍ ኃላፊነት ነው" በማለት ለተሰብሳቢዎቹ እንደሚገልጹ ዳውኒንግ ስትሪት አስታውቋል።
በተጨማሪም "የመርከብ ነፃነትን ለማረጋገጥ ዓለም አቀፍ ወታደራዊ ተልዕኮ" ሊሰማራ እንደሚችል ኤኤፍፒ ዘግቧል።
17 ሚያዚያ 2026ትራምፕ ኢራን ያበለጸገችውን ዩራኒየም ለማስረከብ ተስማምታለች አሉ
የፎቶው ባለመብት, Reuters
ፕሬዚዳንት ዶናልድ ትራምፕ ኢራን ያበለጸገችውን ዩራኒየም ለማስረከብ መስማማቷን ተናገሩ።
በአሜሪካ እና በኢራን መካከል እየተካሄደ በነበረው የሰላም ድርድር ላይ ካላግባቡ ነጥቦች መካከል ቴህራን ያበለጸገችው ዩራኒየም አንዱ ነበር።
ፕሬዚዳንቱ በሳምንቱ መጨረሻ በዋሺንግተን እና በቴህራን መካከል ንግግር ሊቀጥል እንደሚችል ተናግረው፤ ከስምምነት ልንደርስ “በጣም ተቃርበናል” ብለዋል።
ትራምፕ በላስቬጋስ በአሜሪካ ምጣኔ ኃብት ላይ ባተኮረ ጉባዔ ላይ ተገኝተው ባደረጉት ንግግር ጦርነቱ “ያለምንም እንከን” እየሄደ እንደሆነ ተናግረው በቅርቡ ማብቃት አለበት ብለዋል።
ቀደም ሲል ዋይት ሐውስ ኢራን የኒውክሌር ጦር መሣሪያ እንደማይኖራት መስማማቷን ገልጾ ነበር።
አክሎም ባለፈው ዓመት እስራኤል እና አሜሪካ የፈጸሙትን ድብደባ ተከትሎ ከመሬት በታች እንደተቀበረ የሚታመነውን የበለጸገ ዩራኒየም “የኒውክሌር አቧራ” አራግፈው ቆፍረው እንደሚያወጡ ተናግረው ነበር።
ትራምፕ በቀጣይ ዙር በሚደረገው የሁለቱ አገራት ድርድር እርግጠኛ ሆነው ታይተዋል።
ነገር ግን ከአምስት ቀናት በኋላ የሚያበቃው የተኩስ አቁም ስምምነቱ ስለመራዘሙ እርግጠኛ አለመሆናቸውን ጨምረው ተናግረዋል።
17 ሚያዚያ 2026በእስራኤል እና በሊባኖስ መካከል የተደረሰው የሰላም ስምምነት ምን ምን ነጥቦችን ይዟል?
የፎቶው ባለመብት, EPA
የእስራኤልና የሊባኖስ መሪዎች በመካከላቸው የተደረሰውን የተኩስ አቁም ስምምነት በደስታ ተቀብለውታል።
ኔታንያሁም “ታሪካዊ የሰላም ስምምነት ለማድረግ እድል” እንደሚፈጥር ተናግረዋል።
የተኩስ አቁም ስምምነቱ ለአስር ቀናት የሚቆይ ሲሆን የሚደረጉ ድርድሮች የለውጥ ምልክቶችን ካሳዩ "በጋራ ስምምነት" ሊራዘም ይችላል።
የአሜሪካ የውጭ ጉዳይ ሚኒስቴር ይፋ ባደረገው ዝርዝር መረጃ መሰረት ስምምነቱ የሚከተሉትን ነጥቦች ይዟል።
- እስራኤል "በማንኛውም ጊዜ፣ በታቀዱ፣ በተጨባጭ ወይም በቀጣይ ከሚፈጸሙ ጥቃቶች ራሷን ለመከላከል አስፈላጊውን እርምጃ ሁሉ የመውሰድ” መብት ይኖራታል።
- ሊባኖስ፣ ሄዝቦላህ እና ሌሎች "ከመንግሥት ውጭ የሆኑ የታጠቁ ቡድኖች" በእስራኤል ዒላማዎች ላይ ጥቃት እንዳይሰነዝሩ ለመከላከል "ትርጉም ያላቸውን እርምጃዎች" መውሰድ አለባት።
- በስምምነቱ ውስጥ ተሳታፊ የሆኑ አካላት የሊባኖስ የጸጥታ ኃይሎች ለሊባኖስ ደህንነት ብቸኛ ኃላፊነት እንዳለባቸው ይገነዘባሉ።
- እስራኤል እና ሊባኖስ "ቀሪ ጉዳዮችን ሁሉ ለመፍታት" አሜሪካ ተጨማሪ ቀጥተኛ ውይይቶችን እንድታመቻች ጠይቀዋል።
መግለጫው አክሎም የተኩስ አቁም ስምምነቱ እስራኤል በሁለቱ ወገኖች መካከል "በቀና ልቦና ዘላቂ የጸጥታ እና የሰላም ስምምነት ለመድረስ የሚደረግ ድርድር" ለማስቻል “መልካም ፈቃደኝነቷን” ያሳየችበት እንደሆነ ገልጿል።
ሄዝቦላህ በተኩስ አቁም ስምምነቱ ለመሳተፍ ፈቃደኛ መሆኑን ያሳየ ቢሆንም፣ በሊባኖስ ውስጥ የሚፈጸሙ ጥቃቶችን “ሙሉ በሙሉ እንዲቆሙ” እና "የእስራኤል ኃይሎች የመንቀሳቀስ ነፃነት እንደሌላቸው" የሚሉ ሃሳቦች መካተት እንዳለበት ተናግሯል።
17 ሚያዚያ 2026በእስራኤል አየር ድብደባ ተፈናቅለው የነበሩ ሊባኖሳውያን ወደ ቤታቸው መመለስ ጀመሩ
የፎቶው ባለመብት, Reuters
የምስሉ መግለጫ, ወደ ቤታቸው ለመመለስ እየተሰናዱ ያሉ ሊባኖሳውያን እቃቸውን በመኪና ላይ ሲጭኑ ታይተዋል
በሊባኖስ ላለፉት ስድስት ሳምንታት እስራኤል ስታካሄድ የነበረው የአየር ድብደባ በተኩስ አቁም እንዲቆም ከተደረገ በኋላ ቀያቸውን ጥለው የተፈናቀሉ ሊባኖሳውያን መመለስ ጀመረዋል።
አንዳንድ ነዋሪዎች እቃቸውን በመኪና ጭነው ወደ ደቡባዊ ሊባኖስ ሲያመሩ ታይተዋል።
የእስራኤል እና የሊባኖስ መሪዎች የተኩስ አቁም ላይ መድረሳቸውን አወድሰውዋል።
ኔታንያሁ “የሰላም ስምምነት ላይ ለመድረስ ታሪካዊ ዕድል” መኖሩን ተናግረዋል።
የተኩስ አቁሙ ለአስር ቀን የሚቆይ ሲሆን የሚደረጉ ድርድሮች ለውጥ ካሳዩ “በጋራ ስምምነት ሊራዘም እንደሚችል” ተገልጿል።
የፎቶው ባለመብት, Reuters
የፎቶው ባለመብት, Reuters
የምስሉ መግለጫ, አምስት ሰዎች በአንዲት አነስተኛ ሞተር ላይ ተጭነው ወደ ሲዶን በሚወስደው ዋና መንገድ ላይ ሲጓዙ ይታያሉ
17 ሚያዚያ 2026የተባበሩት መንግሥታት ዋና ፀሐፊ የእስራኤልን እና ሊባኖስን የተኩስ አቁም ስምምነት አወደሱ
የፎቶው ባለመብት, EPA
የተባበሩት መንግሥታት ዋና ፀሐፊ አንቶኒዮ ጉቴሬዝ በእስራኤል እና በሊባኖስ መካከል የተደረሰውን የተኩስ አቁም ስምምነትን በደስታ እንደሚቀበሉ እና አሜሪካን ስላደረገችው አስተዋጽኦ አመስግነዋል።
"ይህ ለግጭቱ የረዥም ጊዜ መፍትሄ ለማግኘት ለሚደረገው ድርድር መንገድ እንደሚጠርግ እና በቀጣናው ዘላቂ እና ሁሉን አቀፍ ሰላም ለማምጣት ለሚደረጉ ቀጣይ ጥረቶች አስተዋጽኦ እንደሚያደርግ ተስፋ አደርጋለሁ" ሲሉ ጉቴሬዝ በሰጡት መግለጫ ተናግረዋል።
ሁሉም ወገኖች የተኩስ አቁም ስምምነቱን እና "ሁልጊዜም ዓለም አቀፍ ሕግን እንዲያከብሩ" አሳስበዋል።
17 ሚያዚያ 2026ትራምፕ የኢራን ጦርነት “በጣም በቅርቡ ማብቃት አለበት” አሉ
የፎቶው ባለመብት, Reuters
የአሜሪካው ፕሬዚዳንት ዶናልድ ትራምፕ በኔቫዳ ለተሰበሰቡ ሰዎች የኢራን ጦርነት “በቅርቡ ማብቃት አለበት” ሲሉ ተናገሩ።
ትራምፕ “በኢራን የሚካሄደው ጦርነት ያለምንም እንከን እየተካሄደ ነው” ካሉ በኋላ “በቅርቡ መጠናቀቅ አለበት” ብለዋል።
ፕሬዚዳንቱ ይህንን ሲሉ ምን ማለታቸው እንደሆነ ባያብራሩም የአሜሪካ ጦር ሮኬቶችን መትቶ ሲጥል ግን ብቃት እንዳለው ተናግረዋል።
ባለፈው ሳምነት መጨረሻ ላይ በፓኪስታን ኢዝላማባድ የተካሄደው የሰላም ድርድር ያለምንም ውጤት ተበትኗል።
ዋሺንግተን በሁለቱ አገራት መካከል ቀጣይ ድርድር ለማድረግ ንግግሮች መኖራቸውን ቢገልጽም መቼ እና የት ይካሄዳል የሚለውን ግን ይፋ ማድረግ አልፈለገም።
17 ሚያዚያ 2026በእስራኤል እና ሊባኖስ መካከል የተደረሰው የአስር ቀን የተኩስ አቁም ስምምነት ተግባራዊ መሆን ጀመረ
የፎቶው ባለመብት, Reuters
በእስራኤል እና ሊባኖስ መካከል የተደረሰው የአስር ቀን የተኩስ አቁም ከእኩለ ለሊ ት ጀምሮ ተግባራዊ መሆን ጀምሯል።
የአሜሪካው ፕሬዚዳንት የተኩስ አቁም ስምምነቱ ለአስር ቀን ብቻ የተደረሰ ቢሆንም ሊራዘም እንደሚችል ጠቁመዋል።
የእስራኤል ጠቅላይ ሚኒስትር ቤንያሚን ኔታንያሁ ከሊባኖስ ጋር “ታሪካዊ የሰላም ስምምነት” ዕድልን ይፈጥራል ብለዋል።
በኢራን የሚደገፈው ሄዝቦላህ የተኩስ አቁሙን እንደሚያከብር ጠቅሶ በኋላ ላይ “በሁሉም የሊባኖስ ግዛቶች የተሟላ ጥቃቶችን ማቆም” እንዲያካትት እና “የእስራኤል ጦር በነጻነት እንዳይንቀሳቀስ” ጠይቋል።
ኔታንያሁ ጦራቸው በደቡባዊ ሊባኖስ ውስጥ 10 ኪሜ ያሀል ዘልቆ በመግባት “የደህንነት ቀጣና” ውስጥ እንደሚቆዩ የተናገሩ ሲሆን ይህ ግን ከሄዝቦላህ ፍላጎት ውጭ ነው።
የአሜሪካ ውጭ ጉዳይ ሚኒስቴር በስምምነቱ መሠረት የሊባኖስ መንግሥት ሄዝቦላህ እስራኤል ላይ ጥቃት እንዳይፈጽም ለማድረግ “ተጨባጭ እርምጃዎችን መውሰድ” ይኖርበታል ብሏል።
አክሎም የሊባኖስ የጸጥታ ኃይል ለሊባኖስ ሉዓላዊነት እና ብሔራዊ መከላከያ “ሙሉ ኃላፊነት” እንዳለበት አስታውቋል።
የተኩስ አቁሙ ተግባራዊ መሆን እንደጀመረ የእስራኤል መከላከያ ባለፉት 24 ሰዓታት ውስጥ በደቡባዊ ሊባኖስ የሚገኙ ከ380 በላይ የሄዝቦላህ ዒላማዎችን መደብደቡን ገልጿል።
ዒላማ ከሆኑት መካከል የሮኬት ማስወንጨፊያዎች፣ ዋና መስሪያ ቤቱን እና የሄዝቦላህ አባላት ይገኙበታል።
ትራምፕ የሊባኖስ እና የእስራኤል መሪዎች በዋሺንግተን ተገናኝተው በቀጣይ ጉዳዮች ላይ እንዲወያዩ መጋበዛቸውን ተናግረዋል። እስካሁን ግን ከየትኛውም ወገን ስለግብዣው ማረጋገጫ አልተገኘም።
ዶናልድ ትራምፕ በትሩዝ ሶሻል የማኅበራዊ ድረ ገጻቸው ላይ ዛሬ ለሊባኖስ “ታሪካዊ” ቀን ነው ሲሉ ጽፈዋል።
“መልካም ነገሮች እየሆኑ ነው” ያሉት ትራምፕ በሌላ የማኅበራዊ ሚዲያ ልጥፋቸው “ሄዝቦላህ በዚህ ወሳኝ ጊዜ ተገቢውን እና የተረጋጋ ባህሪውን እንደሚያሳይ ተስፋ አደርጋለሁ” ብለዋል።
የፎቶው ባለመብት, Reuters
የምስሉ መግለጫ, የተኩስ አቁም ስምምነት መደረሱን ተከትሎ ደስታቸውን ለመግለጽ አደባባይ የወጡ ለቤይሩት ነዋሪዎች ርችት ተኩሰዋል
16 ሚያዚያ 2026ትራምፕ በሰዓታት ውስጥ እስራኤል እና ሊባኖስ የ10 ቀን የተኩስ አቁም እንደሚጀምሩ ተናገሩ
የፎቶው ባለመብት, EPA
ዶናልድ ትራምፕ የሊባኖሱን ፕሬዚዳንት እና የእስራኤሉን ጠቅላይ ሚኒስትር ማነጋገራቸውን እና የተኩስ አቁም በጥቂት ሰዓት ውስጥ እንደሚጀመር ተናገሩ።
ትራምፕ በመግለጫቸው ላይ በኢራን የሚደገፈውን እና ከእስራኤል ጋር ውጊያ እያካሄደ ያለውን ሄዝቦላህን አልጠቀሱም።
“ከሊባኖሱ ፕሬዝዳንት ጆሴፍ አውን እና ከእስራኤል ጠቅላይ ሚኒስትር ቢቢ ኔታንያሁ ጋር ጥሩ ውይይት አድርጌያለሁ” ሲሉ በማኅበራዊ ሚዲያ ገጻቸው ላይ ጽፈዋል።
“እነዚህ ሁለቱ መሪዎች በአገራቸው መካከል ሰላም ማስፈን እንዲቻል የ10 ቀን የተኩስ አቁም ስምምነት ከ7:00 (ሌሊት) ጀምሮ ይጀምራሉ።”
የሊባኖስ ጠቅላይ ሚኒስትር ናዋፍ ሳላም ከእስራኤል ጋር የተደረሰውን ጊዜያዊ የተኩስ አቁም መቀበላቸውን አስታውቀዋል።
ማክሰኞ ዕለት ከ34 ዓመታት በኋላ ለመጀመርያ ጊዜ የሁለቱ አገራት ልዑካን በዋሺንግተን መገናኘታቸውን ያስታወሱት ትራምፕ ኃላፊዎቻቸውን “ዘላቂ ሰላም” ማምጣት እንዲቻል ከእስራኤል እና ሊባኖስ ጋር እንዲሰሩ ማዘዛቸውን ተናግረዋል።
"ምክትል ፕሬዝዳንት ጄዲ ቫንስ እና የውጭ ጉዳይ ሚኒስትር ሩቢዮ፣ የፔንታጎን የጋራ ወታደራዊ አዛዦች ሊቀ መንበር የሆኑት ጄነራል ዳን ራዚን ኬን፣ ከእስራኤል እና ሊባኖስ ጋር ዘላቂ ሰላም ለማምጣት እንዲሰሩ መመሪያ ሰጥቻለሁ።”
“በመላው ዓለም ዘጠኝ ጦርነቶችን መፍታት በመቻሌ ክብር ይሰማኛል እና ይህ ደግሞ 10ኛው ይሆናል” ሲሉ በመልዕክታቸው ላይ አስፍረዋል።
የአሜሪካ ፕሬዚዳንት የእስራኤሉ ጠቅላይ ሚኒስትር ቤንያሚን ኔታንያሁን እና የሊባኖስን ፕሬዚዳንት ጆሴፍ አውን በዋይት ሐውስ ለተጨማሪ ንግግር መጋበዛቸውን አስታውቀዋል።
“ሁለቱም ወገኖች ሰላም ይፈልጋሉ እና በፍጥነት ይሆናል" ሲሉ በትሩዝ ሶሻል ገጻቸው ላይ ለጥፈዋል።
የሁለቱ አገራት መሪዎች ግብዣውን ስለመቀበላቸው የታወቀ ነገር የለም።
16 ሚያዚያ 2026የአሜሪካ እና የሊባኖስ ፕሬዚዳንቶች በስልክ ተወያዩ -ቤይሩት
የፎቶው ባለመብት, Getty Images
የሊባኖስ ፕሬዚዳንት ጆሴፍ አውን ዛሬ ከአሜሪካው ፕሬዚዳንት ዶናልድ ትራምፕ ጋር በስልክ መወያየታቸውን ጽህፈት ቤታቸው ገለጸ።
ጽህፈት ቤቱ በኤክስ ገጹ ላይ ኦውን ፕሬዚዳንት ትራምፕ በሊባኖስ የተኩስ አቁም ስምምነት እንዲደረስ እንዲሁም “ዘላቂ ሰላም እና መረጋጋትን ለማረጋገጥ” ስለሚያደርጉት ጥረት አመስግነዋል ብሏል።
አውን በእስራኤል እና ሄዝቦላህ መካከል “በተቻለ ፍጥነት በቀረበ ጊዜ” የተኩስ አቁም ስምምነት ላይ እንዲደረስ በድጋሚ ጠይቀዋል።
ትራምፕ ለፕሬዚዳንት ኦውን እና ሊባኖስ ያላቸውን ድጋፍ መግለጻቸውን ጽህፈት ቤቱ አክሎ ገልጿል።
ዛሬ የሊባኖሱ ፕሬዚዳንት እና የእስራኤሉ ጠቅላይ ሚኒስትር ይወያያሉ ተብሎ ተጠብቆ የነበረ ቢሆንም ይህ ግን መሰረዙን ቢቢሲ ከሊባኖስ ባለሥልጣናት ምንጮቹ አረጋግጧል።
እስራኤል በደቡባዊ ሊባኖስ የምትፈጽመውን የአየር ድብደባ ቀጥላለች።
አንድ ከፍተኛ የሊባኖስ ባለሥልጣን የእስራኤል የአየር ድብደባ ደቡባዊ ሊባኖስን ከቀሪው የአገሪቱ ክፍል የሚያገናኝ ቁልፍ ድልድይን ማውደሙን ለሮይተርስ የዜና ወኪል ተናግረዋል።
16 ሚያዚያ 2026የእስራኤል መከላከያ ሚንስትር ኢራን ላይ 'ከዚህም በላይ የከፉ' ጥቃቶች እንደሚፈጸም ዛቱ
የፎቶው ባለመብት, Reuters
የእስራኤል መከላከያ ሚኒስትር እዝራኤል ካትዝ ኢራን ከአሜሪካ ጋር የጀመረችው ድርድር ላይ ከስምምነት የማትደርስ ከሆነ ‘ከዚህም በላይ የከፋ’ ጥቃት ሊሰነዝሩ እንደሚችሉ አስጠነቀቁ።
“ኢራን ታሪካዊ መስቀለኛ መንገድ ላይ ትገኛለች። ይህ ወደ ወደፊቱ ድልድይ እና ወደ መገለል እና ውድመት ምርጫ የሚያደርጉበት ቅጽበት ነው።”
ኢራን መነጠል እና ውድመትን የምትመርጥ ከሆነ እስራኤል እስካሁን ያልደበደበቻቸውን ዒላማዎች “በጣም በፍጥነት በመለየት” “እስካሁን ከተፈጸሙት የከፋ” ጥቃት እንደሚፈጽሙ ዝተዋል።
“ምርጫው በእጃቸው ነው እና ውጤቱም የራሳቸው ነው” ሲሉ አስተያያታቸውን አጠናቅቀዋል።
ቀደም ሲል የአሜሪካው መከላከያ ሚኒስትር ፒት ሄግሴት ኢራን ከስምምነት ላይ የማትደርስ ከሆነ ጦራቸው ጥቃቱን ዳግም ለመጀመር ዝግጁ መሆኑን በመናገር “በብልሃት እንድትመርጥ” አስጠንቅቀው ነበር።
16 ሚያዚያ 2026የሊባኖሱ ፕሬዚዳንት ከእስራኤሉ ጠቅላይ ሚኒስትር ጋር እንደማይነጋገሩ ምንጮች ለቢቢሲ ገለጹ
የፎቶው ባለመብት, Getty Images
የእስራኤሉ ጠቅላይ ሚኒስተር እና የሊባኖሱ ፕሬዚዳንት መካከል ዛሬ ምንም ዓይነት ንግግር እንደማይኖር የሊባኖስ ባለሥልጣናት ምንጮች ለቢቢሲ ገለፁ።
የሊባኖስ ፕሬዚዳንት ጆሴፍ አውን ለአሜሪካ ውጭ ጉዳይ ሚኒስትር ማርኮ ሩቢዩ ዛሬ መነጋገር እንደማይችሉ ማሳወቃቸውን ተናግረዋል።
የፕሬዚዳንቱ ጽህፈት ቤት ከእስራኤል ጠቅላይ ሚኒስትር ጋር ሊደረግ የነበረው ንግግር መሰረዙን የሚገልጽ መግለጫ ማውጣት አለመፈለጉን ቢቢሲ ከምንጮቸ ሰምቷል።
ፕሬዚዳንት አውን ከሄዝቦላህ እና ከአብዛኛው የሊባኖስ ሕዝብ ጋር ያላቸው ግንኙነት እስራኤል ጥቃት መቀጠሉን ተከትሎ ደፍርሷል።
የሊባኖስ ፕሬዚዳንት ከእስራኤሉ ጠቅላይ ሚኒስትር ጋር ንግግር እንዲደረግ የሚፈልጉ ሲሆን የተኩስ አቁም ግን ቁልፍ መሆኑን ተናግረዋል።
እስራኤል በበኩሏ የወታደራዊ ዘመቻዋን ለማቋረጥ ፈቃደኛ ሳትሆን ቀርታለች።
ዶናልድ ትራምፕ የሊባኖሱ ፕሬዚዳነት ጆሴፍ ኦውን እና የእስራኤሉ ጠቅላይ ሚኒስትር ቤንያሚን ኔታንያሁ ዛሬ እንደሚነጋገሩ ገልጸው ነበር’
ይህንን የትራምፕ ሃሳብ የእስራል ሚኒስትርም አረጋግጠውት ነበር።
16 ሚያዚያ 2026ርዕሰ ሊቃነ ጳጳሳት ሊዮ በቢሊዮን የሚቆጠር ገንዘብ ለጦርነት የሚያወጡ 'አምባገነኖች'ን ተቹ
የፎቶው ባለመብት, Reuters
ርዕሰ ሊቃነ ጳጳሳት ሊዮ ዛሬ በካሜሩን ባደረጉት ንግግር በቢሊዮን የሚቆጠር ገንዘብ ለጦርነት የሚያወጡ መሪዎችን ባልተለመደ ሁኔታ በግልጽ ተችተዋል።
ይህ የሆነው የአሜሪካው ፕሬዝዳንት ዶናልድ ትራምፕ በማኅበራዊ ሚዲያላይ እንደገና ከተቿቸው በኋላ ነው።
ርዕሰ ሊቃነ ጳጳሳት ሊዮ በካሜሮን ባሜንዳ ባደረጉት ንግግር፣ “ለራሳቸው ወታደራዊ፣ ኢኮኖሚያዊ እና ፖለቲካዊ ጥቅም ሲሉ ሃይማኖትንና የእግዚአብሔርን ስም የሚጠቀሙ” ሰዎችን አውግዘዋል።
ጳጳሱ ይህ ዓመፅን ለማጽደቅ እምነትን መጠቀም መሆኑን በመጥቀስ አስጠንቅቀዋል።
ለአስር ዓመታት ያህል በዘለቀው ግጭት ለተጎዳው የአካበቢው ማኅበረሰብ ባደረጉት ንግግር “ሰላምን ለማወጅ” ብመጣም ነገር ግን የአካባቢው ነዋሪዎች “ለእኔም ሆነ ለመላው ዓለም ሰላምን እያወጁ” እንደሆነ ተረድቻለሁ ብለዋል።
ሊዮ ጦርነት የሰው ልጅ እንደሚቀጥፍ ሲያስረዱ ቅድሚያ በሚሰጣቸው ጉዳዮች ላይ ዓለም አቀፍ አለመመጣጠን መኖሩን በመግለጽ ተችተዋል።
“የጦርነት ጌቶች ለማውደም የሚፈጀው ቅጽበት እንደሆነ የማያውቁ ለመምሰል ይሞክራሉ፤ ነገር ግን መልሶ ለመገንባት የሕይወት ዘመን በቂ አይደለም” ብለዋል።
አክለውም “በቢሊዮን የሚቆጠር ዶላር ለግድያና ለውድመት ይውላል፤ ነገር ግን ለፈውስ፣ ለትምህርትና ለማደስ የሚያስፈልጉ ሀብቶች የትም አይገኙም” ብለዋል።
ሊቀ ጳጳሱ የጦርነት ጌቶች ሲሉ የጠሯቸውን “ወሳኝ የሆነ የተግባር ለውጥ” እንዲያደርጉ ጥሪ አቅርበው ወደ “ሰብአዊ ወንድማማችነት የበለፀገ እና ዘላቂ መንገድ” እንዲሸጋገሩ አሳስበዋል።
“ዓለም በጥቂት አምባገነኖች እየተናጠች” እያለ “በብዙ አቃፊ እና ደጋፊ ወንድሞችና እህቶች ተይዛ ትገኛለች” በማለት ተስፋን ፈንጥቀዋል።