Bliadhna nan ÒranYear of Song

Niall Dòmhnallach (Niall a' Ghobha)

'S ann an Grèinetobht, ann a' Solas, Uibhist a Tuath, a rugadh Niall Dòmhnallach, Niall a' Ghobha (1882-1964) agus chun an latha an-diugh canar Taigh a' Ghobha ris an dachaigh far an robh a' cheàrdach aig athair. Bhuineadh cuideachd athair, Aonghas, do Phaibil agus cuideachd a mhàthar, Màiri Aonghais Chaluim, do Hòrasaraidh. Bha seachdnar ghillean agus aon nighean anns an teaghlach.

Dh'ionnsaich Niall ceàird na tàillearachd bho Aonghas Tàillear Dòmhnallach, a bha càirdeach dhan teaghlach, ann a' Loch Euphort.

An dèidh sin bha e ag obair ann an Inbhir Nis agus an Glaschu.

Chaidh Niall a leòn air an Somme aig àm a' Chogaidh Mhòir agus chaill e trì òrdagan. Cha b' urrainn dhà a cheàird a leantainn às dèidh sin agus thill e dhachaigh a dh'Uibhist còmhla ri athair agus ri mhàthar.

Bha e ri croitearachd an uair sin, a' cumail beagan chruidh is chaorach. Sgrìobh e an t-òran 'Blàr Arras' mu dheidhinn na dh'fhuiling daoine aig àm a' Chogaidh Mhòir.

Sgrìobh e òran eile mun chogadh ach feumaidh gun robh e a' toirt gu chuimhne gnothaichean a bha cho uamhasach oillteil 's nach gabhadh e an t-òran idir. Cho math ri bhith a' seinn òrain aig bainnsean is cuirmean bhiodh Niall a' cur a-mach na loidhne ann an Eaglais na h-Alba ann a' Solas.