Bliadhna nan ÒranYear of Song

Sèist / Chorus

Fhearaibh! Chan e breugan
A th' ann mu each Nèill Iagain,
Chunna mise bhiastag a' dannsa.
Thàinig e don phorch,
Agus mise gabhail port ann
Is thòisich e air nodadh le cheann rium.

Nuair a thug mi sùil
Gun robh poit anns an robh bùla
Crochte ris a' bhrùid a bha sanntach,
Cha b' e bean no pàiste
A bheireadh air an àigeach
Is barailte buntàt' fo chommanda.

'S ann thòisich e air tionndadh
A dheireadh 's e cho diombach,
Thuirt Ailean Ailig riumsa "Bheil ceann air?"
Chan aithneadh duine choltas
Fhad 's a mhair am poca
Thug mise leam an fhorc ga cur annsan.

Nuair a chaidh mi sìos
Gun robh preasa san robh iarainn
Coireachan is miasan is lanntair
Aige-san nam pìosan –
Crannachan gun sgeul air
Is loinneid 's i na bheul aig an t-srainnseir.

'S ann a ghabh am fuathas
Roimhe Peigeag Ruairi
Nuair chunnaic i e gluasad a' frying-pan
Uighean agus ìm aice
Dheasaich i gu dìnnear
Dh'ith e h-uile bìdeag gun taing dhith.

Nam bithinn-sa nan àite
Reicinn ris na ceàird e,
Bhiodh e math gu tràladh na van dhaibh.
Ged leigeadh iad mu rèir e,
Bheireadh e e-fhèin às
Ged tha e gun Bheurla, gun Fhrangais.